去旅行，除地鐵，火車亦都喺另一種重要交通工具。晌釜山有好多火車站，都有晒地鐵接駁，不過如果要搭韓國高鐵KTX，就要去「釜山火車站」，跟地鐵1號線釜山站（#113）相連，個火車站都幾大，一出地面就見。

想由釜山出發往慶洲，交通方面有三個選擇：
- 搭乘釜山地鐵1號線至『釜田站』步行至『釜田火車站』→搭乘火車至『慶州火車站』，車程約1.5 - 2小時，KRW6,800。（分「新村號」特快車、「無窮花號」快車）　
- 搭乘釜山地鐵1號線至『老浦洞站』步行至『釜山綜合巴士客運站』→搭乘巴士至『慶州市高速巴士站』，車程約1小時，約KRW5,000。
- 搭乘釜山地鐵1號線至『釜山站』步行至『釜山KTX站』→搭乘韓國高鐵至『新慶州KTX站』，車程約半小時，KRW10,700。

其實各有長短，舊式火車站站停、慢慢行，天氣好可以睇吓風景，而慶州火車站就在慶州市內，就算晌釜山嘅釜田站都屬市內區域，但班次疏落兼車程太長；而高鐵KTX夠晒快，無乜停站，行車穩定，全程晌山中隧道居多，但零景觀，車費較高，仲有新慶州站設於市外，接駁巴士唔密，又唔喺度度地方都到，我哋打的入市區都要成KRW18,000一程；而高速巴士就介乎兩者之間，不過如遇天雨可免則免，仲有就喺晌釜山嘅接駁點「釜山綜合巴士客運站」（老浦洞站）算喺市郊，都幾遠，所以揀咩車都要視乎時間、車費、方便度……等等。

雖然話KTX貴，不過都唔知因乜，我哋由釜山出發往慶洲，原價KRW10,700一位，每位另減KRW4,000，折後價即喺KRW6,700，仲平過搭舊式火車添。不過，唔知喺咪啲人嫌新慶洲唔方便，到站只有我哋4個人落車，下面大堂又喺空無一人，靜得緊要！

有90年歷史嘅國立慶州博物館，主要展示B.C.57 – A.D.935近千年新羅時期首都慶州地區嘅文化遺産，館內收藏咗10萬餘件物品，而展出嘅都有成3千多件。整個博物館分4部份：本館（考古館）、美術館、月池館及戶外展廳。另外晌本館側仲有個特別展館，不過依期無嘢展，又休館。

1. 考古館 - 到訪當日因耐震建設工程休館，休館期仲要由04-12-2012 ~ 05-08-2013。所以未能欣賞代表性嘅展品「新羅金冠」。
2. 美術館 – 樓高兩層，除好多出土美術工藝品文物，仲有個新羅王城復原模型歷史資料室。
3. 月池館 - 錯過了，其實值得入內一看，因為之後所參觀嘅雁鴨池，基本上空無一物喇，從雁鴨池水塘和周邊嘅建築物遺址中出土咗三萬多件遺物，部份700多件擺咗晌度展出，可以一窺新羅王室同貴族華麗生活嘅生活面貌。
4. 戶外展廳 - 因天雨不停，無乜心機多睇，有啲梵鐘（聖德大王神鐘）、古善寺址三層石塔、慶州地區嘅寺廟及宮殿遺址等搬嚟嘅石雕遺物。

如果對佛教或華麗嘅宮殿文化有興趣者，嚟參觀國立慶州博物館就啱啲。

雁鴨池原喺月城東北部東宮內嘅人造水塘，當時被稱為「月池」，但晌朝鮮時代先被改叫做「雁鴨池」。

據史書記載，新羅嘅文武王在位第14年（A.D.674）命令晌宮城裏挖一個蓮花池，做一座小山，種上花花草草，餵養珍奇動物，為紀念三國統一而下令修建嘅，名為「臨海殿」嘅行宮。不過，後被外族侵略而燒毀。雁鴨池就喺當時所挖出嘅蓮花池，位處月城外側東北部，據1974年挖掘時嘅調查結果，雁鴨池呈球形，東西200M，南北180M，有大小不等嘅3個小島。目前嘅雁鴨池接近圓形，喺沿護岸石重新修建而成。

當中好多殿址都無晒，只喺修復咗幾個，內裡有啲模型及文物簡介（韓英中日文），入到去真喺唔太多嘢睇，幸好大量文物，都被埋晌當年國王飼養寵物嘅池內，免遭洗難，要睇出土文物就要晌國立慶州博物館嘅月池館喇！

半月城，就晌雁鴨池對面，喺新羅時期具有代表性嘅宮殿基地。因為呈半月形，所以被稱為新月城或半月城，亦喺新羅王居住過嘅地方。據書講，以前依度有南門、正門、北門、玄德門、武平門等城門，又有月上樓、忘恩樓、鼓樓等樓閣，仲有談論國家大事嘅朝元殿，以及很更多建築物。不過，現況喺冬天顯得一片荒涼，剩低就得啲基石、石碑。

半月城裡面有個石冰庫，顧名思義就喺石做嘅冰庫，即喺古代冰箱。如果唔講，點都唔信眼前依個咁簡陋成個墓塚就喺個可以存冰嘅地方，望入去完全無乜特別，空空洞洞咁。不過，走近入口附近，陣陣陰風冷氣。又喺據講，石冰庫建晌地氣寒冷嘅地方，一半晌地上，一半晌地下，地面同牆壁喺花崗岩，拱形頂部，設有通風口，又用上很多很多石灰，喺有防止外部嘅濕氣同雨水進入嘅作用，再者，存冰時用咗稻草嚟隔熱，科學家做過試驗證明稻草隔熱存冰喺幾有效，真喺唔到你唔服古人智慧，咁神奇嘅結構就可以存放冰塊。

瞻星臺亦喺象徵慶州嘅代表遺跡之一，建於新羅時期第27代王善德女王（A.D.632~647），至今已有1,400多年歷史，但仲喺完整咁保持原貌。

佢喺東方現存最古老嘅天文臺，主要用於觀測天空中嘅雲氣及星座。石結構建築，呈圓筒井形，但直線同曲線嘅搭配十分和諧，臺高9.4M，底座直徑5.35M，由365塊30cm大小嘅花崗岩石塊分27層堆疊而成。正南側嘅第13至第15層之間有四方形出入口，可以進入內部，出入口下邊兩側配備長梯供人登上瞻星臺，當然依家你就唔會見到有條梯啦。

慶州有咩出名嘅食物？就喺菜包飯（쌈밥, Ssambap）同皇南餠（황남빵, Hwangnam-ppang），晌大陵苑周邊就有好幾間專做菜包飯嘅韓餐館，時值正下大雨，又已經差唔多近1:00pm，所以就搵一間似模似樣嘅店鋪試吓菜包飯，咁啱見其中一間有旅行團幫襯，應該都穩陣啩。

入到去，一貫韓式菜館格局，唔知點解，又被安排坐晌韓式矮枱嗰邊啲位。翻開個餐牌，得一版紙，勁簡單，正當我哋唔知點叫嘢好，隔離團個導遊喺帶台灣團，識講國語，充當我哋嘅臨時翻譯，佢話我哋4個人叫兩份菜包飯（KRW10,000 / 份），加個豆腐鍋（KRW8,000）就夠晒，好彩有佢，唔喺今餐實撐爆肚啦。

之前講過我哋懷疑就喺食咗依餐而又痾又嘔（因為之後除咗試過啲皇南餠，晚餐亦唔喺一齊食，此外就無再食過其他嘢，後來睇醫生亦證實輕度食物中毒），拋開依個事件，其實佢啲食物都幾好食，兩份菜包飯已經包咗好多嘢，兩碗白飯，十多款前菜，又有煎魚、煎蔥餅、醬炆肉，最正有鍋熱辣、清甜嘅牛骨湯，又香又好飲。菜包飯其實喺用菜（如白菜、生菜……）包住米飯同熟肉嚟食，鍾意又可以夾啲泡菜、醃菜，下點甜辣醬，味道變化多，富層次。而豆腐鍋要個走辣版，因為可以揀辣或唔辣都得。雖然未能百分百確實，我哋事後覺得最可疑出事喺啲「生」菜，好彩，都算喺不幸中之大幸，食啲葯都頂得住！

大陵苑喺新羅時代王陵及古墳嘅所在地，大大細細猶如小山丘嘅王陵古墳處處皆是，而周圍環境寧靜盎然，加上今日晏晝煙雨濛濛，感覺更顯淒美！

古墳內嘅壁畫蘊含數千年珍貴嘅歷史資料，晌1973年被發掘嘅古墳天馬塚，喺新羅時期典型嘅積石木棺墳，高12.7M，直徑成50M，周長157M，在封土內部有以石頭堆積成嘅積石層；積石層裡有個長6.5M，寬度4.2M，高度2.1M嘅木房，中央放著木棺同屍體，出土遺物多達11,500多件。天馬塚可以入去參觀，但就唔俾影相，裡面放有主要出土遺物嘅複製品

搭完火車晌釜田站轉地鐵，因為姨仔另有「代友入貨」任務，於是分道揚鑣，我哋3個人就索性返番酒店附近食，因為之前逛過中央洞都有幾多食肆。

兜咗個圈，有幾間心水，其實小弟心儀其中一間夠人氣嘅食店，不過望落非常地道，專做街坊生意，生怕溝通唔掂，結果就搵咗DoMoYa依間日式餐廳。一來單睇門面幾光鮮，二來門口棟咗個餐牌，可以睇啱晒先入去，三來就喺價位平宜，再者我哋又唔喺太想食韓國嘢。

入到去頓時感覺溫暖，因為近門口位就放咗部暖爐，我哋成日飽受風雨煎熬，依部暖爐真喺令人窩心。餐牌雖然全韓文，但靠睇圖都略知一二，食物主要分4類：吉列定食、米飯或便當、烏冬、蕎麥麵。跟個侍應落單，喺雙語廣播，佢講韓文，我講英文，加埋手指指，都OK啦，然後佢放低樽水，我哋就自斟自飲。早前都講過，依個喺韓式餐廳特色，無熱茶，一貫白開水，成樽放低，隔客自便！

김치냄비우동泡菜烏冬鍋 KRW5,000
有時啲圖片都唔太可靠，舅仔以為喺清湯烏冬，原來喺泡菜烏冬鍋，食就幾好食，滾熱燙，辛辣惹味，只喺舅仔都唔喺嗜辣嘅人，食起上嚟當然有點點吃力。依個時候，咪就喺發揮群眾力量囉，大家一人分享啲，唔使一個人獨撐！

해물냄비우동海鮮烏冬鍋 KRW5,000
依個跟圖又喺有啲分別，海鮮配料無圖咁多，但味道唔錯，湯頭幾鮮甜，啲烏冬好滑溜，海鮮有啲蟹柳、魷魚、蝦，以及雞蛋。烏冬鍋均會有醃蘿蔔同泡菜作為伴鍋前菜，兼且烏冬份量十足。

로스까스吉列豬扒定食 KRW6,000
依個吉列定食小弟覺得超值，晌香港點一客有啲質素嘅吉列豬扒定食，閒閒哋都要過百大洋，依家只喺KRW6,000，折番HKD45都未使。一客有齊兩大件吉列豬扒、滿滿嘅沙律汁椰菜絲、麵豉湯、大大碗白飯。吉列豬扒炸得非常脆，又唔油，蘸芝麻醬好正，椰菜絲幼細爽口，飯粒又軟熟綿綿，只欠一客牛乳布甸咋，哈哈！抱歉，店家唔賣甜品。

小店地方闊落，招呼又唔錯，人唔太多食得輕鬆自在，仲唔收加一，食3樣嘢夾埋都喺KRW16,000，即喺百二蚊左右，抵食！唯一唔抵咪就喺第二朝嘔番晒囉！

來了徐州2天，今日是星期一，爸爸要上班了，我同媽咪好多地方都唔熟，只係係屋企附近周圍逛下，發現了這間pizza店，見佢雖然店子細細，但門面光鮮，就入去幫襯吓。

當時是下午1時多，店內一枱客也沒有，我們就是唯一的客人lor! 店子只有少量款式的食物供應，我和媽叫了1.全蝦堡(13元) 2. 夏威夷海鮮pizza 9吋 (36元)

原來食物是即係製的，我哋等候期間，聽到廚房傳來切菜的聲音，應該係切生菜呀!

等了差不多15mins，送來了炸蝦堡，連包也烘熱過，內裡的蝦餅仲有2塊，而且剛剛炸起，非常熱辣，超美味!

至於夏威夷海鮮pizza，呢個就真係差喇，唔係我哋食開既pizza來的，係好似一塊乾硬左既曲奇餅底，應該係店方唔識整pizza 底，是但整個底再放料就當係pizza，而且海鮮餡料只有一d硬到死既蝦，呢度既pizza唔食絕對無損失。 但呢間店既漢堡不容忽視!

係等食物期間，聽到店主跟住唱片唱beyond既海濶天空、光輝歲月，覺得好親切，雖然不在香港，但聽到廣東歌都好開心，我用我d好水既煲冬瓜同老闆吹水，佢話好鐘意beyond呀! 又問我哋覺得d食物點，我照直講話個burger很好，不過pizza味道有d怪，海鮮批偏辣，而且餅底太硬，我就係次次都有嗰句講嗰句，希望無得罪人la~ haha~

今日天氣晴，又係時候周圍走走LA~ 今天目的地係市中心的戲馬台及戶步山步行街~

戲馬台是徐州現存最早的古蹟。公元前206年，項羽自立為西楚霸王，定都彭城後，在城南的南山上營築了一高台，用以觀看士卒戲馬取樂，故名戲馬台。

我哋坐32號公車到中國人壽北站下車，對面已經是戶步山步行街，再踏上石橋往山上走，大約15mins便到戶步山古建築群，那裡由很多石屋等組成，再由小斜路走，就見到宏偉的戲馬台了，入場費為￥20。

內裡有一座項羽的石像，以及台頭寺、三義廟、名宦祠、聚奎山房、碑亭等，可見古時的建築技藝相當出色，愛看古建築的你不容錯過呀!

戶步山步街街的石橋上擺放了各式各樣的古玩，就像香港的嚒囉街，如果鐘意買懷舊玩意的人應該會樂而忘返。

至於行到攰攰地，又係時候要醫肚，今次爸爸帶了我地去彭城一號既龍記茶餐廳，雖然係茶記，但內裡裝修一d都唔似港式茶記，係好西化既裝修，當時臨近聖誕，仲有d聖誕佈置添~

食物方面，除了茶餐廳應有的炒粉麵飯等，仲有點心供應，我哋叫了春卷、叉燒腸粉、牛肉、干炒牛河等，味道都好似香港茶餐廳既味道，聽閒店主為廣東人，廚師也從深圳到徐州工作，怪不得知味道如此正宗。另外，亦叫了一道招牌菜，鹹蛋黃茶樹菇，就似我哋食開既黃金蝦，不過變成茶樹菇，雖然明知用鹹蛋黃煮的餸超唔健康，但都不停咁食，食到有d濟添，哈哈!

其實係徐州好難食到近似香港口味的食物，所以呢間店子成為我父親假日的飯堂囉!

彭城一號有間泡芙工房，係來自日本的，香港也有這間店，徐州價錢比香港平些少la，大約七折到，不過在當地叫做好貴的了，當地人的收入水平同香港差得遠，做一個時裝店的sales人工約￥800-￥1000，做文職的若有￥3000人工已叫非常之好了。為食的我買了半打回家作甜品，最美味的為香草黑曲奇，類似菠蘿包的皮面，雪凍了仍然很脆，加上非常香滑的忌廉夾心，很美味!

話咁快我地又去到下一個景點 -- 變身塔 (Pre Rup)。變身塔(Pre Rup)這名稱的來源，是由於廟內設有火化和清洗遺體的設施，而‘變身’也就是‘轉換身體’的意思。

變身塔遠望近望都相當宏偉，建築模式又是我們最懼怕的‘寺廟山’類，前後左右每個角落，都建有不同大小高度的尖塔樓；聽導遊說，那便是火化屍體，又或是審判犯人的地方。

變身塔屬於較早期的吳哥寺廟，故內裡的裝飾雕塑不算太多，整體建築材料雖以紅磚為主，但雕飾則是於紅磚外塗灰泥再雕刻，因此即使經歷長年的風化，仍維持不錯極細緻的狀態。

我們由東面的入口進入，去到第一層的內圍，便見到正中央長方形的石池，相傳這就是火化遺體所在，之後骨灰便會移到東北角的清洗池，再以椰子水清洗；幸好我們是在光天白日，四周都滿是遊人的情況下參觀，否則聽完這些可怕的傳說，感覺都會頗為陰森恐怖。

不過之後我們卻見到更恐怖的建築物 -- 就是一望無際又高聳入雲的樓梯啦！！！仲要無扶手，而且中途並沒有任何可以停留稍作休息的地方；幸好我早上食了一大份高熱量的早餐，暫時尚有氣有力去征服這條長長的樓梯級。

我苦瓜乾著臉一口氣爬到最頂層，最興奮便是轉身眺望四周風景那一刻，確實是漂亮壯觀得，令人感覺不枉此行。

階梯兩旁各有一隻守護石獅子，今次這對石獅子是有尾巴的，長長的緊貼著身體一直伸延至頭部，十分特別。

再細心觀望變身塔的設計模式，最令人印象深刻當然是N咁多個的塔樓，由底到頂全都是以一塊塊的小紅磚砌成，而且歷經多年的風吹雨打仍屹立不倒，實在很佩服當年建造者的心思和毅力。不過塔樓的擺放位置感覺上有點混亂，東一堆西一堆的擠在一起，和後期的吳哥寺廟所強調的對稱美感大有不同。

第三天行程就這樣完了!

40階梯文化觀光主題街喺展示充滿韓國戰爭苦難時代嘅哀怨同鄉愁嘅一條主題街道，由國民銀行中央洞分行，經過40階梯，一直走到40階梯文化館，全長都只不過約450M左右，當中豎立咗好幾個當時難民區生活場景嘅雕塑，如「媽媽的心」、「爆米花的人」、「拉手風琴的人」……等等，順路嘅話不妨走走看看。

40階梯文於2004年6月被選定為釜山市綜合評價最優秀嘅街道，60多年前，40階梯於1950年6·25戰爭時位處喺交通行政中心「釜山中區」，當時有好多因躲避戰爭嘅難民逃難至此，晌附近搭咗好多簡陋棚屋聚居，從前方碼頭運嚟嘅貨物及救援物資亦晌度販賣及發放，因此形成咗一個市場。亦由於好多人都逃難於此，許多因逃難分散嘅家庭卻能夠在此重逢。故此，40階梯附近仍有著戰爭時逃難所遺留嘅50~60年代建築，可會勾起老一輩人嘅回憶。

龍頭山公園屬市內地標之一，尤其公園內嘅釜山塔，高度120M，晌上面嘅展望臺可360∘睇晒釜山全景及釜山港口，廣闊開揚，一覽無遺，夜景更喺迷住唔少遊客。夜間，藍色照明燈打晌塔身色彩迷幻，令釜山塔更加迷人。

由於公園形狀有啲似一條從海遊上陸地龍嘅頭部，因而得名，就算唔睇夜景，晌天朗氣清嘅日子，上到嚟公園感覺都好舒服。因為園內約有700多種生長繁茂嘅植物，園藝幾有佈局，深受釜山市民喜愛嘅休憩場所，當日所見都有幾多市民在此休閒、曬太陽、做吓器械運動、捉吓棋、放紙鳶。

除釜山塔，其他設施仲有天空咖啡館、世界文化遺產展示館、世界民俗樂器博物館、世界風俗文物紀行、紀念品館、鼓咖啡店、特別展示館……等等，喺公園晌2007年10月重新組建成嘅「世界文化體驗中心」設施。此外公園內仲豎立著朝鮮時代名將李舜臣將軍嘅銅像（高度12M），以及青銅龍塔、鐘閤（釜山市民的鐘）、花鐘（直徑5M）、文學碑等等。

補充資料：
龍頭山公園（免費參觀）
釜山塔（入場費KRW4,000）
世界民俗樂器博物館（入場費KRW2,500）
世界模型船展示館（入場費KRW1,000）

去完龍頭山公園，從另一邊出口落番去中央洞，附近幾條街都有好多食店，兜咗一個圈，睇見依間門口好似麻雀館，實質喺街坊食堂嘅「中央蕎麥」（註：佢無中文名，店內店外全韓文，極地道，真正街坊鋪，個中文名都喺小弟返嚟再幫佢譯番，再者小弟完全唔識韓文，都喺靠啲網上翻譯系統，下文啲菜式名字亦如是，如有錯誤請更正，多多指教）。食完走出嚟個阿叔一睇就知我哋喺遊客，即刻豎起手指公讚依度喺好嘢，從門縫望入去，真喺好旺、超人氣，膽粗粗走入去試試。

原來依間嘢喺賣烏冬同蕎麥麵，啱晒啦，第一日食咗兩餐韓國菜，辣得要命，今餐食餐日本嘢，可以好好緩和一吓。由於牆上嘅菜牌全韓文，只有日文翻譯，一粒字都唔識，完全睇唔掂，姨仔學緊韓文，都識少少，不過小弟都喺手指指就算，睇睇隔離枱有啲咩，篤篤手指搞掂。

場內有一般枱椅，亦有傳統韓式矮枱，第一次坐，感受吓韓式氣氛，不過真喺好唔慣，搞到小弟成日郁嚟郁去！另外，因為喺食日本嘢，無晒大堆頭嘅韓式前菜，只有啲漬蘿蔔同泡菜蘿蔔，我同舅仔食蕎麥麵，兩位女士就要湯烏冬，最難得喺有熱茶奉客，仲要喺玄米茶，香呀。

냄비우동湯烏冬KRW4,500
唔好睇佢細細份，都有幾多烏冬晌裡面，配料有鳴門卷、油豆腐，湯底清甜，晌寒冷嘅冬天，一鍋熱騰騰嘅烏冬食得令人窩心。

특오뎅우동特級烏冬鍋KRW5,000
比起上面個湯烏冬，依個烏冬鍋就抵食好多，只喺多KRW500，烏冬份量及餸料都多啲。

모밀국수蕎麥麵（兩份）KRW6,000
以每兩盆計，伴有醬油，口感超正，因為麥白質感整之滑溜！真喺好快一盆就放晒入口。

김초밤紫菜壽司卷KRW3,000
유부초밤炸豆腐壽司KRW3,000
因為單食蕎麥麵驚唔夠，所以點多兩客壽司。紫菜壽司卷一客有5件，而炸豆腐壽司則一客4件，兩者味道唔錯，飯料鬆軟。

其他仲有蝦天婦羅烏冬（새우튀김우동KRW5,000）、天婦羅烏冬面（튀김우동KRW4,000）、蕎麥鍋（모밀냄비KRW6,500）……等等。價錢實惠又無加一，抵食！

位處影島區嘅南端最終處，又喺另一景點名勝「太宗臺」，被稱為睇「絕景最美日落」嘅理想地點。由於昨日晌冬柏島睇日落嘅經驗，釜山日落都幾早，所以我哋預早少少出發。除日落，沿入去觀景台路途中亦見到有啲懸崖峭壁和奇岩怪石，都有一定可觀性。

影島喺由絕影島縮減而嚟嘅名稱，從前依度就以牧馬場聞名，生產跑速極快連影子都睇不到嘅名馬，故被冠為絕影島。而太宗臺喺新羅時期第29代太宗武烈王晌完成統一三國嘅偉業後，巡視全國時沉醉此處嘅美景中，並晌依度射箭遊玩，因而得名。太宗臺與五六島都喺釜山代表性嘅岩岸，都因波浪侵蝕海岸所形成，太宗臺海拔250M高，內有茂密嘅海松、熱帶性闊葉樹日本桂、楠木、冬柏樹、柃木等200多種樹木。

遊客主要會去太宗臺嘅觀景台，以及再往前沿燈塔木造步道樓梯落至底嘅神仙岩 (신선바위)。而太宗臺以外，影島區仲有2012年7月新開嘅國立海洋博物館（국립해양박물관, http://www.nmm.go.kr/china/）及東山洞貝塚等景點。

不過今次又預得時間多得滯，晌中央洞坐巴士入去太宗臺都喺半小時多啲，車程頗順。個人建議，去太宗臺觀光可以當行山咁嚟玩，條路唔難行，少少斜，但唔會大上大落，而且環境真喺好舒服，期間又設有一啲觀景台，望望壯闊海洋。由太宗臺入口行去最南端主觀景台，大概1個多小時，而由主觀景台順方向晌另一邊返回入口處都喺45分鐘。當然，有小朋友或行路不太方便者，就最好坐太宗臺小火車啦，來回計成人KRW1,500，青少年KRW1,000，兒童KRW600。

今日有啲可惜，天晴但多雲，又厚，等咗咁耐，太陽伯伯都落晒，但就瞇埋咗晌啲厚雲後面。據講，如果夠晒天氣晴朗時，仲可以清楚望到對面遙遠嘅日本對馬島添。

札嘎其市場喺韓國最有代表性嘅水產市場，充滿活力，她自19世紀末至今，韓國嘅海產、海鮮、乾魚貨等約有30~50%皆經由此地流通全韓國，可見其舉足輕重嘅地位。釜山港前嘅南海與附近沿海所捕獲嘅漁貨，一年四季都有著各種海鮮，貨源應有盡有。每年10月左右，更舉辦「札嘎其慶典」，除能盡情享受各種豐富嘅新鮮海產外，仲有許多精彩活動。

近南浦洞地鐵嗰邊有個乾漁貨市場，如果鍾意漁產乾貨，大可走過去睇睇，買啲當手信都好。不過我哋無去，主要都喺嚟搵食，所以一出地鐵都喺直踩去札嘎其市場。札嘎其市場樓高7層，地下喺經營海鮮水產嘅商店，2樓就喺魚生餐廳，亦即喺我哋嘅目標，而5、6樓仲有OASE自助餐廳，美食多到不得了，都喺折港紙三百幾，勁抵。不過，既然想地道啲，又有啲當地氣氛，去2樓搵食就啱心意啲。

札嘎其市場周邊仲有唔少魚類街頭小食，尤其炭火燒烤，最吸引到啲遊客。所以，食唔食海鮮，都值得一嚟！

期待已久嘅札嘎其市場海鮮大餐即將登場，不過未講食，先講環境。上到二樓，感覺就有啲似我哋康民署啲熟食市場咁，不過氣氛真喺一流，靠海一邊窗全部都喺客枱，不過要將就吓，全部都喺韓式矮枱，唔慣都要坐成晚。坐滿客人，好熱鬧，但其實當你一入內，各個檔位已不斷跟實你，游說你幫襯，因為一枱人隨時都食幾十萬韓圜，好似我哋一共6個人都食咗成KRW255,000，但其實好抵喎，因為折返港紙其實每人都喺三百鬆啲，全部都喺海產嘢，更要飽住走添。

先說明少少嘢，雖然拎咗佢卡片，都喺得韓日文，餐廳名字就無錯架喇，叫「거제키다리힛집」，不過「巨濟島刺身室」就我幫佢譯，上到二樓真喺有好多海鮮食店，每個檔口唔算劃分得好清晰，但上面都總有個鋪頭名！

檔口前有好多水缸，以新鮮海產「晒冷」自然少不了。另外餐牌亦分門別類，韓日英中文，雖然啲中文譯名跟我哋所認識略有不同，但大致睇得明，點菜難度唔大！而廚房就晌隔離，即點即煮，做好即上。

前菜
食韓國菜前菜多喺人都知，不過，今餐嘅前菜陣容之鼎盛，有啲無法想像。由於陸續咁嚟，我哋又不斷咁食，所以難有一張前菜「合照」，但前前後後，加埋都成10多樣，包括烚南瓜、灼蝦、天婦羅、豆腐、泡菜、椰菜絲、醃蘿蔔……等等，有啲就唔喺好知咩名，但竟然螄蚶同生蠔都喺前菜嚟，生蠔仲一人一隻，唔使爭，基本上前菜喺唔收錢嘅。好多款前菜都好食，不過烚南瓜同個豆腐最得我心，因為原味突出，南瓜清甜香軟，豆腐味濃質滑，正。

什錦海鮮KRW100,000（大）
分特大、大、中、細（KRW150,000 / KRW100,000 / KRW80,000 / KRW 50,000）
6個人，老闆娘就建議要份大嘅，每份什錦海鮮都包4樣海產，有鮑魚（每人一隻）、海鞘、法螺、八爪魚。新鮮鮑魚刺身都喺第一次食，鮑魚已鎅開一件件，口感爽，但有啲韌；海鞘唔多好食，好似食柴皮咁，又無乜味；法螺OK，點啲醬油食落幾鮮；八爪魚真喺可以用「鮮活」形容，篤一篤佢會仲郁，放入口亦會啜住啜住，挺有趣。

黃魚烤KRW50,000（大）
分大、中、細（KRW50,000 / KRW40,000 / KRW30,000）
黃魚烤都喺要份大，真喺頗大條，單睇賣相，燒得好香甘，肉嫩油香，又喺值得一讚嘅菜式。

盲長魚（盲鰻）KRW60,000（大）
分大、中、細（KRW60,000 / KRW50,000 / KRW40,000）
睇書介紹，已一心想試，所以喺是晚嘅指定菜式。不過，唔習慣嘅話有啲人會覺得好核突，因為啲盲鰻喺活劏，再由老闆娘粉墨登場晌你面前即煮，啲盲鰻邊煮邊郁，海國人可能嚇鬼暈。煮盲鰻其實都好簡單，配菜只有洋蔥同青椒，，撒啲胡椒粉，兜兜炒炒煮熟就喺，味道方面，盲鰻都幾鮮味，啖啖肉，帶點辣（辟腥）。

海味蔥餅KRW30,000（中）
分大、中、細（KRW40,000 / KRW30,000 / KRW20,000）
以鮮蝦為主，蛋餅加入大量香蔥，煎得非常脆香。不過賣到成KRW30,000一客，感覺有啲貴。

生魚片拌飯KRW15,000（中）
分中、細（KRW15,000 / KRW10,000）
反而個魚生飯就抵食喎，因為一客有好多魚生。老闆娘仲教咗個食法，將碗飯倒入魚生內，唧啲韓國甜辣醬，撈勻嚟食，滋味到極。

收費方面，所以前菜送嘅，你晌餐牌點咗幾多嘢，就按價照加，有單有據（不過完全喺韓文，俾番張單我都睇唔明），無加一，無小費，認真實際同實惠！認住「巨濟島」（거제）個名，或認住老闆娘個樣，就算唔喺搵依間「巨濟島」，都絕對要嚟札嘎其市場食番次海鮮大餐！