4月23日（陰）

參加完週六晚表弟嘅婚宴，香港代表嘅親友大多都揀週日離台，肥肥家族亦不例外，因週一可照常返工。為咗唔好要父母太趕，當日就特選國泰航空下午航班回港。中午辦理好退房手續後，一行八人先喺「邊田庄」享用過花藝午餐，方才慢慢前往桃園機場。

好彩每次同父母旅遊都會選搭商務位，候機時可於貴賓室邊飲邊食邊等，不過就真係估唔到當日CX409班機一再延誤，原本八點機抵港居然要等到半夜點幾先返到屋企。。。

4月22日（陰）

旅程到咗婚宴嗰日，家人朝早食完個酒店早餐就慢慢行去「這一鍋皇室秘藏鍋物」食晏。路程大約二十分鐘左右，由於預鬆咗時間，大家就好佗佻地邊行邊購物。見識過人氣火鍋後，長輩們就趕返酒店參加斟茶儀式，小肥就孖哥哥同表妹去咗「STAYREAL」血拼一番。滿載而歸後即返回「台北國賓大飯店」，裝好身就上去「樓外樓」參加小表弟迎娶嬌妻之晚宴。

4月21日（陰）

肥叔叔早年遷往台北工作，愛飲好食嘅佢每次返港聚餐時都定必會大談食經。得知肥肥家族將飛往台北參加婚宴，佢就提議四口子由台北坐高鐵去一轉台中，一訪由美女廚神開辦嘅法國餐廳「樂沐法式餐廳」，細嚐佳餚已值會票價咁話；講到咁犀利，我地當然係要去見識吓啦！

因深知大肥爸爸最怕行路同等車，哥哥早於出發前已訂好高鐵車票，仲訂埋旅遊的士接送四人來往台中車站及餐廳。有哥哥喺身邊，大家真係乜都唔洗擔心，週五朝早喺「台北國賓大飯店」食完自助早餐後就搭的士去台北車站，等佢喺櫃檯攞好飛後就好順暢地排隊上列車，四十五分鐘就到台中車站，簡易快捷。

喺「樂沐法式餐廳」享受完一頓難忘嘅感官旅程後，導遊先生就車咗我地去「如邑堂太陽餅」度買太陽餅做手信。由台中返回台北後已過黃昏，由於落著傾盆大雨，週五交通又特別擠塞，結果等咗成個鐘頭先搭到的士返酒店。晚餐就由舅父仔帶路去咗「嘟柏林鐵板燒」食潮派海陸鐵板燒。

一人的自由