選乘大韓航空購下商務票，旅客可於「天合聯盟香港貴賓室」候機，不過室內並無廣播服務，大家要自己留意登機時間。

長形嘅貴賓室面積寬廣，最入嘅偏廳有多張獨立梳化櫈，大部份嘅白色枱仔都有插蘇位，方便旅客可邊等邊叉電。除咗個較輕鬆舒適嘅偏廳之外，中央有個大型少少嘅用餐大堂，散座嘅餐桌大啲又高啲，只係枱面唔係太乾淨。

尾段拍牆為自助飲品區，有咖啡機、啤酒雪櫃、汽水、蒸餾水等等。XO仔就當然係選擇飲酒啦！自選食物中有西式嘅麵包、三文治、沙律、甜品等。最有型都要數部班戟機，少入廚嘅小肥都係第一次見。亞洲菜中都有不少熱食及炸物。唯一要排隊嘅就係個麵檔，由專人即點即煮四款麵品。由於出門口前已經喺屋企食咗晚飯，細佬就簡單啲試咗碗台灣牛肉麵。牛肉麵只屬微暖，湯底稀而味淡，麵條同牛展塊一樣偏硬，個人覺得唔係好掂。

香港機場內有不少貴賓室，論環境、設施及餐飲質素，「天合聯盟香港貴賓室」當真不及本港主場嘅兩間航空公司。

大韓航空於韓國仁川國際機場嘅商務貴賓室「KAL Lounge – Prestige Class」環境開揚寬廣，有獨立方形廂座、二人單邊圓枱仔散座、梳化式客廳位、餐飲部合拼式長枱及圍繞嘅酒吧嘅卡位。同香港個「天合聯盟香港貴賓室」一樣，室內最不缺乏就係叉電插蘇同埋會添嘅紅酒、白酒、烈酒（對唔住，當日啤酒機壞哂。。。）。

由於航機抵達韓國時實在太早，貴賓室內只有飲料及零星嘅香蕉、乳酪、鬆餅食，唔怪得知個個都選食韓式杯麵啦！約六點半左右終於有早餐熱食出爐，無奈水準唔係咁高，小肥只好主攻咖啡同乳酪。

大韓航空長途機KE 73選用B787-9型號班機，商務艙之獨立座位同頭程一樣咁好坐，且空間感足，音響隔音系統出色，細佬啲戲接住黎睇，成功追咗幾套新片，正呀！遺憾在於空中服務員笑容欠奉，而且只會按本子辦事，毫不體貼，亦不細心。

膳食方面，小食明顯比正餐美味。早機提供嘅正餐為午餐，前菜「烤雞沙律」又嚡又乾，「韓式牛肉蓋飯」味道雖然唔錯，但牛肉又老又硬，就連甜品「莫卡蛋糕」都唔得鬆潤，個餐其實可以用一個「乾」字黎形容！航班嘅小食中，細佬只係試咗兩款；新鮮煮出嘅「泡菜拉麵」湯底熱辣惹味，麵條煙韌彈牙，而「朱古力曲奇」則香脆甜美，邊食邊嘆埋杯香檳確真享受。臨落機前有份「簡單的用餐」，主菜「中式海鮮豆腐」還過得去，不過個蒜蓉包就硬到咬唔到，XO仔唔想咁後生就做蹦牙仔囉！

機場酒店「Sheraton Gateway Hotel in Toronto International Airport」連接著多倫多皮爾遜國際機場，入面間西餐廳「Sheraton Mahogany Grill」最方便啲早機及轉機嘅旅客休閒地享用早、午、晚餐。店子樓底唔高，不過舖有地毯，所以人多都唔覺嘈吵，無奈中午時份樓面只有兩位服務生，雖則其態度唔係惡劣，但明顯各佔不同地盤，落單、斟水都要等同一個人得閒先做，效率就唔係特別高。

最好彩就係啱啱坐完長途機攰多過餓，因餐店嘅午餐份量雖多，但水準一般過一般：

1)      Soup of the day（CAD 10）：是日例湯之芝士西蘭花忌廉湯一啲都唔算杰，但味道實在過咸，真係食唔過！

2)      Mahogany Caesar （CAD 17）：大大碟凱撒沙律爽脆鮮濃，係成餐飯最好食嘅一味。

3)      35 Day Aged 8oz AAA Striploin (CAD 37)：原本點咗要「medium rare」嘅牛扒一刀切落去一啲粉紅都唔見，過熟程度似係「medium well」多啲囉，肉質偏韌同硬，即使夠薄都有啲難咬，當真不吃也吧！

經常外遊嘅哥哥早已成為「希爾頓榮譽客會」，今次去加拿大探親，見集團企下嘅「Hilton Toronto/Markham Suites Conference Centre & Spa」就喺契婆家附近，離主要嘅高速公路又近，位置極之方便，所以唔洗多諗就決定一試。

酒店限定下午三時才可辦理入住手續，退房則定為早上十一點。住客可以優惠價十蚊加幣於停車場內泊一日車，車位全部可用頭入，非常易泊。一家四口入住之豪華套房共有兩間雙人房、兩個洗手間及一個大客廳，面積寬廣，且極為舒適。客廳內除咗有梳化同大電視之外，仲有張大大嘅玻璃飯枱。雙人房空間足，單人及雙人床都好大好彈。套房唯一最大嘅問題就係兩個洗手間入面只有一間有得沖涼，當真奇怪得很！

由於事隔太耐，XO仔當時又忘記咗留起張單，房費幾多真係唔記得，還請讀者們見諒！細佬只係記得包咗免費上網服務，及可享用「Hhonors Executive Lounge」之餐飲設備。

「漁膳房」為多倫多Richmond Hill嘅一家中菜廳，門外有多個車位供食客免費泊車。除咗門面極有氣派之外，接待大堂亦可見魚缸內多隻生猛嘅海鮮游黎游去。用餐大堂樓底高高，光線充裕，環境十分時尚雅致。

契婆特別點咗個「六人溫蟹龍蝦套餐」（CAD 468）為肥肥家族洗塵：

1)      刺身拼盤：刺身拼盤嘅冰陣效果十分吸睛，七款魚生均鮮香潤甜，極之美味。

2)      燉湯：大大盅圓肉燉雞湯每人可分成兩碗，不過湯品淡而無味，請恕細佬直言，真係情願飲一碗濃味啲嘅燉湯，都好過飲兩碗稀稀嘅。

3)      十磅避風塘龍蝦：金黃橙美嘅龍蝦山可以話係全餐最震撼嘅一道！龍蝦爽厚彈牙，香辣惹味，正爆！

4)      油爆鱔球（中）：鱔球又腥又多骨，食唔過。

5)      磅半蒸青斑：XO仔都係第一次見到中式蒸魚會豉油另上，食落的確係冇咁油同健康啲，但係魚肉就偏嚡同老，唔得嫩滑，感覺好似欠缺火喉咁。

6)      五磅蒜蓉蒸溫蟹：蒜蓉蒸溫蟹一上枱時即食的話確真鮮甜香濃，無奈餐店上餸速度太快，要食完避風塘龍蝦先轉食「溫」（暖嘅）蟹就流失咗啲鮮味。

7)      上湯豆苗（中）：豆苗色澤鮮綠，調味都好清。

8)      龍蝦膏炒飯：同龍蝦一樣成座小山丘嘅龍蝦膏炒飯好夠乾身，而且好足料，香口爽脆，惹味非常！

格調高雅嘅「漁膳房」海鮮套餐菜式量足且大多新鮮，可惜食物一窩蜂上，食客根本冇可能襯熱續款去細嚐，個人覺得有啲嘥料！最奇怪就係餐廳居然唔接受信用卡付款，加上服務生態度不甚友善，加茶、換碟等基本功夫要問先會做，似乎有點唔係好合理囉！

因為航班原因，check out飯店後，還有數多小時才上機，所以便到台北車站地下街逛逛打發時間吧，由捷運站行去地下街尾就有好多不同的餐廳，由於未食午飯，見到豪品的價錢不太貴，而且老闆娘熱情的招徠，所以就揀左豪品來食。

佢平均每款食物大約是NT100-150左右，但都有一些NT60左右的担担麵，而且店內有免費飲品和湯水提供任飲。我們最後揀左一個紅燒牛肉麵和一個台南担仔麵，我覺得紅燒牛肉麵就比較一般，無預期咁好食，湯底不算太濃味，但牛肉都入味的。 而台南担仔麵比較似一碗牛丸麵，不過材料都比較少，始終可能只係NT59，不可能要求太多，加上台北地下街都可以話係熱門的旅遊點，所以食物相對一定無其他地方咁抵食。

前排去台北旅行，行過見到呢間吳師父大餅，啲食物都幾大舊，而且個價錢好街坊價，台灣人好似好慶叫銅板美食，因為一個只係NT30，我就買左兩個春卷餅，一個韮菜味，一個係鮮肉口味。先講下韮菜味先，我好鍾意呢一個口味，一來我不喜歡太多肉，二來我好鍾意食韮菜，我以為佢入面全部都係韮菜，但原來唔係，佢都有少少肉碎係入面(話就話少少，其實都幾多)，最正係因為入面仲有粉絲，所以真係超級飽肚，無諗過NT30可以有咁正。鮮肉方面不是不好吃，只係在於我的口味，我覺得比韮菜遜色一點，但NT30來說，你簡直覺得到底肉係咪唔駛錢，因為真係超多肉，鮮肉的餡料主要是肉和白菜，一樣可以吃飽飽。

前見到笑波子係北海道小樽食左一個超高大的多層口味軟雪糕，令到我都好想食，但係未食到前就係今次的台灣之旅有機會食到了。因為天氣都比較熱，去淡水行街雖然有足夠的水，但係見到個個都買雪糕食，的確令人都好想食來消暑的，行過見到這一間巨無霸雪糕好多人排隊買，相信應該好多人都係這個心態吧。
排隊的人主要買雲哩嗱加朱古力味，但我比較鍾意食綠茶味，始終令我想食大大杯超就雪糕的係笑波子嘛，綠茶比較似日本，同埋我都鍾意食綠茶，所以我就揀左綠茶配香芋口味，雪糕店有大和細兩款選擇，大的size保守估計約有15圈大右，而小的就大約7-8圈，兩者相差NT10，食什麼size可自由選擇，我亦都只是揀了細size。
先講講綠茶味，綠茶味都非常濃郁，有香芋味都重芋頭味，而且不會超甜，雪糕的質感係比較像奶冰的，都ok好味，但價得一提，雪糕在炎夏比較易溶，打卡拍照後已經有少少溶化了，要注意食的時機和自備紙巾。

總括而言，我覺得雪糕味道不錯，不算過甜，而且亦都非常適合打卡用。

每次去完五分埔，都一定會去行饒河街夜市的，除左會食不同的美食外，當然係炎熱天氣行夜市，食冰一定係一個唔錯的選擇，行行下，見到有一間冰店門口有好多芒果好吸引，所以就揀左呢間小華冰果室了。

冰室有好多不同款的冰，有刨冰和綿綿冰，不過綿綿冰以水果為主，而我最鍾意食的芋圓就配刨冰，所以就揀左呢款冰冰了，餡料有芋圓、番薯圓、紅豆、珍珠等，價錢並不貴，只售NT60，但是一碗冰冰的份量都很大份，足夠兩人食用，夏日炎炎行夜市，找一個舒服的地方，又食一些透心涼的食物，令人身心都覺得好滿足。

因為下塌的地方是三重，所以有到三和夜市找美食，由巷頭行到巷尾，見到巷尾有一檔買可麗餅的攤檔，見價錢也不貴，便想叫一份來吃。
餐牌上有好多選擇，我也很難下決定，但就見多數的客人會點芝士粟米蝦可麗餅，所以我便點試一個了。攤檔的可麗餅全部都是即點即造，所以需要稍等片刻，見店主可以一日同時兼顧幾份真的很利害，而且唔會亂。
等了大約數分鐘，便有可麗餅了，先說說味道，可麗餅的外皮很脆卜卜，好正，而且入面的餡料望起來不算很多，但食起上來就比預期多了，同埋沙津醬很夠，配搭芝士很配合，可麗餅料多又不會吃太飽，可留空間繼續掃小食。

平時去台北，都會去五分埔行，所以有時都會去松山車站，今次揀左去松山車站的花月嵐食飯，叫了一個人氣大蒜拳骨垃麵和一個鐵板炒飯配蒜蓉汁。

拉麵的蒜味很濃，鍾意蒜頭的人士必定喜歡，加上不會覺得味精味濃，我反而十分喜歡啖啖拉麵也有蒜香，是個不錯的選擇。

另外，鐵板妙飯也出乎意料地好味，不過注意汁不要落太多，要跟個人口味而調教，如果一次過落掉，會覺得太鹹，而且炒飯的味道又同某知名鐵板炒飯不同，實在令人驚喜。

去左台灣旅行，第一日去行廣州街夜市，見到係廣州街附近有一間叫四方阿九魯肉飯的餐店，入面好多當地人幫襯，所以就決定食呢間店舖。

三重區的燒肉眾位置不算太好找，但卻可說是隱世名店，平日店內不算太多人，因此上菜時間也很快，店員亦會詢問是否已上齊，值得一讚。店內的日式燒肉是採用炭火爐盆的，價錢分499、599、699、899，499主要是沒有牛和蝦，不過對不吃牛的人士來說，都是一個選擇。
而我就揀左599吃到飽的套餐。店內飲品任飲，上下層也有飲品，不過選擇比較少，沒有無糖飲料，是到尾段才有一壺冷泡茶。

第一輪，我點了一些豬、雞、安格斯牛和奶油雪花牛，還有一些蔬菜、扇貝、蝦和魷魚串，大致上所有嘢都好好食，只係雞軟骨同我相象中不同，而相對比較比較硬，我不會再點，但其他我覺得比較好的有香菇、粟米和魷魚串，蝦都好入味，可以燒完就咁食。 第二輪，我就點了上輪沒有order的牛、還有其他的蔬菜，試多點不同的食物，我覺得燒肉眾的牛質素也不錯，大家也可會款叫點，選擇自己喜愛的食物。
之後大約一小時到便提醒你時間快到，差不多last order，所以便點了一些甜點來燒，點了綿花糖和香蕉，不過到我地結帳時才知道，原來下層有雪糕食，因為不知道，所以無食，大家到時記得一試。