契公契婆專程請我地去左間高級中餐廳為我地餞行，重預訂左席「滋補鮑魚宴」，真係太客氣啦！

一入門口就見倒好歐陸式既裝修，感覺好貴族，同餐廳個名好襯。聽契公契婆同姐姐仔們既對答，佢地應該係常客，所以服務都唔同Ｄ。攞BB高櫈，掛衫，沖茶，分餸，換碟，清枱，全部都係自動波，非常細心體貼，無可挑剔。

大紅乳豬件海蜇：乳豬皮脆，肉質又夠軟，最重要係唔肥，所以我地唔需要費神去切開任何肥膏。

柚子明蝦球：蝦球爽口，甜甜酸酸既柚子味唔會太過濃，好開胃；拌碟既西蘭花都好爽脆。

菘茸菇蜜豆炒帶子：蜜糖豆同帶子都好鮮甜爽口。

雲腿四寶燉翅群：個湯煲得好夠火候，好足料，所以味道濃郁，非常美味。

腿汁原隻中東鮑魚：依味個腿汁就比較咸，不過鮑魚都做得唔錯，夠腍。

金牌手淋脆皮雞：隻雞唔肥，黑肉好嫩，皮都好脆，不過胸肉就有少少乾，味道亦可以調咸少少。

蔥油蒸魚中皇：魚肉鮮甜嫩滑，蒸得又冇話過火，個豉油甜咸適中，送飯一流！

極品頭柚焗雙龍蝦：食到依味個肚已經個脹，所以BB女喺我肚腩上訓得好舒服，我都成機休息一下，食慢Ｄ。香口既龍蝦一Ｄ都唔嚡，好新鮮，海鮮皇哥哥重食到停唔倒手添。

櫻花蝦炒飯：炒飯好夠乾身，大大粒既櫻花蝦並非急涷，超級新鮮爽甜，讚！

鮑汁炆伊麵：真係開始食唔落啦，不過同媽咪都分左碗。唔會太油膩，味道帶甜，伊麵夠腍，都好ok。

滋潤甜品 - 紅豆沙：小弟唔係一個紅豆沙fans，不過見倒個碗內有大大粒既紅豆，就覺得廚房唔係開粉溝出黎既，所以都食左半碗。味道唔係太甜，只係有少少槳住個口。

美點雙輝：芒果綠茶糕清而不甜。

加拿大既海鮮真係名不虛傳，每樣都係咁精彩，真係食到攬住個肚！
值此機會，想再一次多謝契公契婆咁多日黎既照顧！

為方便出入，今次喺出門前爸爸同哥哥已經打點好一切，喺網上租定架七人車，等我地一到步就可以有車用。攞車同還車既地方都係一樣，機場內既指示都好清晰，所以都好容易搵倒。

Budget租既車好新正，不過做野既人就比較慢，冇人排隊都要等佢做成半個鐘頭paperwork，所以還車時大家最好預多少少時間。找數既時候大家記住要check下單上列明既項目，因為佢所用既全部係簡寫。其實有好多費用都由得佢架啦，不過“電油”依項比較易睇，而且自己交車前專登入滿個油江，所以特別敏感；當發現要收我油錢時，小弟就盡量心平氣和地叫佢攞份驗車報告出黎對一對，而工作人員最終亦幫我地減返條數出黎。

因為第日搭早機，所以哥哥就特別安排我地早一晚入住機場酒店，等我地可以訓耐少少，真係夠細心。佢揀選Sheraton既主要原因係因為無論還車定係去機場，步行都唔會超過十分鐘，更加唔需要經過任何路面，認真方便到極！

我地大概晚上11點半到酒店，櫃面非常繁忙，所以都等左成廿分鐘先有得上房。幫我地攞行李既叔叔都好友善，除左冇好粗暴地亂咁擺放我地Ｄ重量喼之外，重問我地有冇其他需要，例如熱水，毛巾。整體冇乜野要投訴。

環境，衛生，服務：

皇后名粥位置非常顯眼，個招牌又夠大，好容易搵倒。門外全部都係免費車位，真係好方便。雖則係粥店，但地方一Ｄ都唔「up dup」；裝修簡單，唔老土，間隔闊落，樓面高，又夠光猛；坐卡位或者散枱都咁舒服。最特別係粥店入面設有個外賣部，重要好多人出出入入架：好多都係打定電話黎叫埋野食，其他就因為黎到冇位，又唔想等，所以索性買返去食。

星期五既午市，一間喺外國既粥舖都可以由十一點爆到下午茶時間，天氣咁涼條隊重要排到出門口，真係厲害！契公契婆訂定位我地都要等成十分鐘，真係唔敢想像冇訂枱要企喺到等幾耐。

所有乾淨既餐具都擺放喺個大膠盤入面，又唔洗用枱布，所以熟手既伙計們執枱都好快捷。負責我地張枱嗰位哥哥仔都算有耐性，幫我地開完茶又冇吹我地落單；我地諗緊既時候又肯解答我地Ｄ問題，重提點我地可以點叫餸，感激感激！

味道：

1)    油條（$1.60）：油條既色澤清而不濁，好似新鮮炸出黎咁，而且油應該唔係翻用既；咬落清脆唔油膩，雖然係食緊炸物，但感覺都好健康。

2)    牛脷酥（$1.60）：真係好巨型呀，好在佢同我地切埋。牛脷酥似乎重少油過油條，味道唔會過甜，非常香口，買黎做早餐一流，正！

3)    香茜牛肉炸兩（$3.99）：喺餐牌倒見倒咁特別既配搭，所以就叫左黎試下。炸兩就食得多，有餡既炸兩都係第一次食倒，可以一次過食兩款腸粉，認真有創意！炸兩夠脆，同香茜牛肉既味道好夾，連豉油都調教得好，簡直係冇得彈呀！

4)    雜菌竹笙六穀粥（$6.99）：據餐牌所寫，六穀為「短糙米、去穀大麥、法國赤米、莓子黑米、紫大麥、日本超短米」，「有助改善肌膚、美白、舒緩神經緊張、低膽固醇」，聽落咁健康，所以就叫左碗細既黎試下。味道比想像中好，起碼唔苦，又唔會淡而無味；只係六穀米好容易黐牙。

5)    燒味雙拼(燒鴨 + 燒腩仔)（$9.75）：燒腩仔皮脆肉嫩，肥瘦均勻，香口又夠肉汁，真係頂呱呱！燒鴨一Ｄ都唔肥，但係肉質都可以咁嫩，而且唔乾，真係非常難得，大家都好欣賞！

6)    皇后大粥（$9.95）：雖然餐牌上有「皇帝大粥」（材料包括蝦球、五丸、墨魚片、柏葉、肉片、雞蛋、牛肉片），不過黎得皇后名粥就更係要試左「皇后大粥」先啦！材料包括櫻花蚌、蝦球、帶子、三文魚、斑球、蟹柳。因為好足料，所以淨食粥都已經好鮮甜；粥料既質感一Ｄ都唔會過熟而老，掂呀！

7)    豉椒排骨河（$7.50）：熱辣辣好夠鑊氣，河粉唔會黐埋一舊舊或炒到一pat pat，河粉同排骨既比例又啱，味道好香，又一推介！

8)    星州炒蘿蔔糕（$5.50）：一款少辣既一味，當中更咸而帶甜，筆墨難以形容。師傅炒功了得，蘿蔔糕每一小件完整無缺，又夠乾身，非常精彩，簡直係一流既傑作呀！

9)    蒜茸白菜苗（$7.95）：蒜味唔會太濃，味道調教得好好，可惜雖然白菜苗夠嫩，整體煮得油膩左少少。

總括黎講，皇后名粥地點方便，環境舒適，服務優等，食物款式新穎，配搭新鮮，味道奇佳，旺得有理！

後記：

1)  光顧既客人乜野種族都有，真係好難得，簡直係中國人之光呀！

2)  「黑牛」（可樂 + 雪糕）真係飲得多，不過睇餐牌時先知道佢有個親戚叫「白雪公主」（雪碧 + 雪糕）。（請看相）

3)   其實當日如果唔係已經食得太飽，真係好想試埋佢兩個比較特別既甜品架：炸香蕉加雪糕、皇后秘制甜品。

4)　我地訪多倫多既第四日，當表姐由紐約黎會合我地既時候，我地再幫襯皇后名粥既第二間分店；表姐同表姐夫對個星州炒蘿蔔糕尤其讚賞。

CN Tower原名為“Canadian National Tower”，後因股權變動關係而改名為“Canada’s National Tower”，但加拿大人普遍都只用簡稱“CN Tower”。據小册子講：自1976年建成後，CN Tower就成為世界紀錄大全中全球最高既塔。不過，經求知慾極強既XO仔上網查證後，發覺有一點小册子係冇提及到既：就係依項世界紀錄已經喺2010年9月被中國有“「小蠻腰」之稱既廣州塔打破左啦！

唔知係咪驚有恐怖襲擊呢，一入門口就要排隊過一個好大風既檢測機，測試睇下我地身上會唔會有炸藥或武器既殘餘物。排隊時有位工作人員幫大家影合照既，遊客離開時可以憑票買相；諗深一層，就算遊客唔攞走幅相，佢地都可以攞黎做記錄bor！喺檢測機內過程長達分幾鐘，頭髮被吹散哂之餘，有耳鳴既媽咪比佢搞到又暈又耳痛，大叫辛苦。過完機，重有位手持電子棒既保安哥哥抽人掃身檢查！計下條數先發現入去CN Tower觀光總共要過三種保安系統，都幾誇張！

契公契婆當日喺CN Tower為我地訂左既午餐（48加幣）已經包埋上塔內既“Look Out” 同 “Glass Floor” 觀光層，不過條件係每人要叫一個主菜。請注意：如果唔食午餐，依兩層“淨睇”既入場費都要成22.99加幣，所以個人覺得食埋個lunch低好多囉!

顧名思義，“Glass Floor” 既賣點係佢用玻璃造成既「地窗」，比冇懼高既朋友們企喺342米高空上感受下。講真嗰句，小弟未行到埋去已經覺得搖搖欲墜，暈暈地；哥哥就犀利啦，企完喺「地窗」上，重可以出埋去露天處吹風添，當真佩服佩服。

至於“Look Out”層呢，雖然有收費望遠鏡，不過點都唔及旋轉餐廳內睇景咁舒適；唔洗同人爭位影相外，旋轉餐廳既景係360度既，而“Look Out”既景只係180度。
（以上既相片全部都係喺餐廳內拍攝既。）

好欣賞餐廳定名為360，簡單而又包含到旋轉餐廳既特點，好有深度！上得黎食野都係為左個靚景姐，所以室內裝修光猛得黎要保持得簡潔，先唔會喧賓奪主。樓面好夠高，無論係咪坐喺窗口旁，每位客人都可以透過大大塊既玻璃窗欣賞倒多倫多既景色。好感動佢連餐具都亮潔如新，唔講真係唔知個塔年紀重大過哥哥。

每份午餐定價為48加幣（未加稅同服務費），包左頭盤，主菜，同甜品；淨係睇相都知道份量大得驚人。

頭盤：

1)  湯：Warm Cauliflower Veloute with Blue Ermite Cheese：埋到個位先酙落個碗，夠哂熱辣辣，而且幾有睇頭；哥哥話味道比較濃郁。值得一讚既係餐廳非常落意地為媽咪同契婆攞起佢地唔係好食既Blue Cheese。

2)  沙律：360 Caesar Salad：Ｄ菜夠新鮮爽脆，不過Ｄ煙肉就比較硬同韌。

主菜：

1)    360 Seafood Salad with Shrimp, Scallops, Smoked Salmon, Crab and Mussels：哥哥話所有海鮮都好夠味，而且好新鮮，所以極力推薦依款唔肥膩既海鮮拼盤！

2)    Braised Rosemary Scented Lamb Shank：媽咪話好少香港人會選擇依個部位黎煮。喜歡食羊既爸爸話個羊膝好滑好腍，非常野味，又夠火候，煮得好有技巧，一Ｄ都唔肥膩，讚不絕口！

3)    Slow Roasted, Aged, Canadian AAA Prime Rib of Beef：每客成隻碟咁大，以我同媽咪既食量只可以分一份黎食，然後打包另外嗰份。烹調既時間掌握得好好，牛扒好夠味，非常之啱我依個食肉獸既口味。

甜品：

1)    Warm Apple and Almond Strudel：對媽咪黎講就甜左少少，不過哥哥話可以接受；暖食個味道好溫和地清香。

2)    Dark Chocolate Tower with Preserved Summer Fruits：味道比平時既Dark Chocolate甜，所以伴碟既生果係必需既，因為可以令到整個朱古力塔冇咁溜。

可以一邊食好野，一邊欣賞靚景，一次過可以滿足哂視覺同味蕾既享受，掂！

當日喺媽咪既生日，所以為免有任何閃失，爸爸喺香港未出發前已經做定功課，搵左間連佢喺加拿大既朋友們都大讚既西餐廳同媽咪食晚飯慶祝。由選擇，到訂位，確認，以至所有特別安排都係爸爸一手包辦，佢對媽咪既愛簡直係盡在不言中啦！

爸爸選擇既Epic係多倫多一間歷史悠久既殖民地式酒店內既法國餐廳；據佢形容，依間Fairmont Royal York酒店同香港既半島酒店有異曲同工之妙。酒店位於多倫多核心地段，而且好近我地朝早去過既CN Tower，所以都好容易搵；佢地亦有代客泊車服務，非常方便。

餐廳內暗淡既光線好有情調，氣氛都好羅曼蒂克。古式既傢俬襯托住開放式既廚房，令大家可以感受到室內設計師既心思：保留倒酒店既歷史味得黎又追得上潮流。不過似乎歷史悠久既唔止係間酒店囉，因為服務生都屬於叔叔伯伯級。

餐牌只有一頁，大家可以選擇Prix Fixe（45加幣/配埋酒就75加幣）或散叫。我地叫完哂食物同飲品，佢就攞出熱烘烘既雙色餐包出黎。嘩，個樣已經夠靚，食埋落口簡直係頂呱呱：新鮮熱辣既麵包好軟熟，又唔乾，加埋牛油既香味，真係超正！（大家黎幫襯就一定要試，唔係真係走寶！）

頭盤：

1)    （Prix Fixe湯）Truffle Mushroom Cappuccino：松露味唔重，蘑菇蓉唔杰，味道夠得黎又唔會溜，所有材料既份量都掌握得非常好，好精彩！

2)    Northern Woods Field and Forest Mushroom Chowder（14加幣）：味道好濃烈，但都可以做到唔溜。

3)    Seared Bigeye Tuna & Peekytoe Crab Cake（20加幣）：蟹餅皮脆餡嫩，蟹肉鮮甜，契公大讚且推介！

主菜：

1)    （Prix Fixe）Lobster Risotto：意外地，做得好細膩既一味，雖然談不上嫩滑，但係好難得龍蝦肉完全唔嚡，代表廚藝有返咁上下；味道可以做到濃而不咸亦要讚賞；飯既份量適中，所以飽肚得黎唔會滯，好啱feel既一味！

2)    British Columbia Black Cod（34加幣）：契公契婆都拍手叫絕，美味香口，魚肉夠嫩。

3)    ‘Spring Creek Ranch’ Beef Striploin Steak 10oz（43加幣）：哥哥話好有肉味，肉質正常，汁液既味道調教得唔錯。

甜品：

1)    （Prix Fixe）Vanilla Crème Brûlée：好睇得，只係甜左少少，生日蛋糕好食Ｄ。

2)    生日蛋糕：掛住唱歌，所以唔記得影相。蛋糕每人兩小片，一黑一白，份量安排得剛剛好，味道又唔會太甜，又一讚！

可以食倒依頓色香味俱全既大餐，全部都係爸爸既功勞，真係感激萬分！

因為爸爸太大隻，要坐15個鐘頭既經濟客位太辛苦，所以一家人遠行就益埋小肥既XO仔有得坐商務機艙。

座位用cubicle式隔開，打斜形設計，腳向住路口，好夠私人空間。張櫈更可以180度平訓，對腳可以伸展得非常舒服。不過請留意：體重二百磅（二百頭嗰隻wor），身高5尺10既爸爸有個大肚腩，佢都只係覺得個位既size啱啱好，所以唔知道如果再肥Ｄ坐唔坐得落架。

電視機喺座位既內側撳出黎，好容易操控。機上提供既影片，音樂，遊戲，夠新夠多選擇，訓唔着都大把野可以做。Headphone既隔音亦做得好好，成功地增加左喺飛機上睇戲同聽歌既享受，讚。

上機後，擺放好行李，扣好安全帶，空中小姐好快就比杯飲品我地（共有四種選擇：橙汁，蘋果汁，香檳，水）。起飛後冇耐佢就攞左個 "agnès b." 既 Amenity Kit同餐牌比我地睇。唔知印刷費係咪好貴呢，定係個餐牌有寶，揀完食乜做午餐，佢好快就收左個餐牌，搞到我要上網抄錄返食左Ｄ乜。

中午前空中小姐們就開始忙碌地派上我地揀左既午餐同餐飲：

1)     Duck Confit & Goose Liver Terrine：一款涷到我牙都震埋既頭盤，係人都有既；雖然味道唔錯，不過因為涷得滯所以硬左少少。

2)     Tomato Salad：都係涷，不過好在唔酸，所以都食哂。

3)     Steamed Chicken w/ Yunnan Ham & Bamboo Shoot：中式主菜；雞肉同飯都夠熱，不過Ｄ飯就硬左Ｄ，雞肉個汁就太過味精，搞到XO仔要食藥同飲可樂去解返。

4)     Fresh Seasonal Fruits：唔甜唔酸，不過就好涷好硬。

食飽後睇左陣電影，再午睡片刻，大概六點半又有得食啦，今次係晚餐：

1)        Garlic Bread：成程機最美味既一味；麵包熱辣辣軟腍腍，蒜味好香濃。

2)        Flat Egg Pasta w/ Pumpkin, Mushrooms & Cheese：西式主菜；味道淡，麵條偏硬，個汁又杰又槳住個口，非常之溜，食完重有少少胃痛添，失敗！

除左用餐時間，全程都好少見倒有空中小姐經過；只係關大燈後攞過樽水黎就失哂蹤。因為個晚餐唔係好得，大概深夜時個肚就喺到叫，諗起餐牌中提及過有燒鴨瀨粉同雲吞麵食，所以就撳左個制問空中小姐。唔知係咪嘈醒左佢呢，佢個樣好兇地話要睇下有冇wor。等左佢成十分鐘後先返黎話我知機上有燒鴨同雲吞，不過冇瀨粉，燒鴨只可以配雲吞麵。（唔怪得知要咁快收返個餐牌啦。）因為曾經喺機上食完雲吞眼都腫埋，所以今次就叫左碗燒鴨跟雲吞麵；意外地鴨肉好嫩，不過個湯同麵就太勁味精，食完喉嚨又乾又粉。

總結：對我個人黎講，座位舒適，娛樂豐富，不過膳食太過依賴味精，最差勁既就係空中小姐既服務態度，不單唔會睇下乘客有乜需要，有需要時重要黑面神上身，惡劣中之惡劣！

明明一碗魚蛋粉,點解可以賣到8.99呢。本來以為佢好鬼特別,點知魚蛋咪係普通貨,面係普通貨。味道OK,但份量少到你唔信。下次不如過對面街食碗日本拉面好過,平過你又好食D!

之前去間間SUSHI,拉面,中國菜,全部員工招呼我個時都笑容滿面,點知呢間店個阿姐笑都唔笑,愉快心情即刻無左一半。叫左個assorted sushi C。SUSHI係正宗手握SUSHI,魚生新鮮,三文魚都係( WILD SOCKEYE SALMON, 總括係唔差。但服務真係令我唔會想去多次。之前NICK SUSHI ,SUSHI LANO個個員工都真係好好笑容,又會定期加茶,呢間我茶杯會哂茶都無人加,因為店主二公婆掛注自己係到食野,睇報紙,CHATTING,無視左個客。

@@一個人特燈搭左一個中車去richmond食野  今次叫左個精緻個人套餐,叫左jellyfish,沙茶牛肉炒面+鍋貼。Jellyfish 淡左少少,有D似T&T個D JELLYFISH, 不過都唔差。沙茶牛肉炒面幾好食,牛肉一D都唔硬,我都食到沙茶味。鍋貼好JUICY, 好好食。

一入到去就發現全店員工都係日本人今次叫左個Shoyo 拉面+50%面底+糖心蛋個拉面好彈牙,又有好蛋味。第一次食糖心蛋,好好食。但我覺得日本叉燒無中國叉燒咁好食,但都唔錯。ANYWAY,值得一去GE 拉面店

今日簡左去sushi lano去食lunch.呢間係一間由一對夫妻開GE SUSHI 店。
一開始送上GE係毛豆+ Meso soupz。個人唔中意個豆類食物,Meso soup間間都差唔多味
原本重有個salad, 但我唔記左影相.之後送上我要GE Sashimi + Sushi Lunch Box。因我簡左坐係chef前面個個位,睇到佢係到整sushi刺身幾新鮮,WASABI都唔洗落,今次試下唔用是油感覺係點,但都係覺得有少少是油好食D. 加洲卷入面D 蟹肉重多過D飯,正!Sushi又係細細舊飯+大大件魚(香港個D大飯卷sushi無得比).正! 春卷唔錯.個chef問我係邊到黎,我話我係香港人,佢話係韓國人。驚喜係佢最後送多件特別sushi比我,超好味,但我完全唔知係咩黎.Anyways, 個服務真係一流,雖然比Nick sushi "信"色左小小,但個服務又比nick sushi更好(nick sushi都好好),重有一件免費sushi食,真係好滿足!!Tips都要比多D

Wonton with rice noodle. After reading all the reviews of this restaurant, i finally gave it a shot. Taking the 99 for more than 35 min to get to the main street in Boardway, eventually i found this restaurant. Since I really miss the Wondon rice noodle in HK, I decided to order it. Raising my hand for 5 mins , finally somebody spotted me (  is my hand too short?). The rice noodle is tasteless. The wonton is ok. Ather all , I am not satisfied after paying $ 6.5 (4 times the price in HK) for that noodle and the service.