四年前肥肥家族曾經去過東京睇櫻花，而兩年前就乘坐超豪華o既Crystal Serenity郵輪暢遊歐洲多過地區，兩次旅遊o既靚景同美食到而家小肥都仍然歷歷在目；坐完郵輪河時，大家其實都已經開始幻想緊如果兩個trip可以合二為一再玩多次就正囉！今次真係比我地恨到，2014年初，Crystal Serenity郵輪咁啱就有航線由橫濱（Yokohama）黎香港，我地當然係第一時間組團兼報名啦！

由於橫濱離東京唔遠，大肥爸爸就提議大家先飛去東京玩幾日，然後再坐車去橫濱上船。哈，好在大肥咁爛玩，因為咁啱就喺上船前兩日，東京落大雪，世界各地來往東京有多班航機都受到延誤，部份更被取消添；如果我地冇計劃到預鬆三日時間去東京玩，而係等到上船嗰日先飛往橫濱，就算我地唔走船，恐怕情況都會幾狼狽吓，所以大家都好感激大肥有此特別安排！

2月10日（多雲）：Crystal Serenity Day #1 之 Yokohama橫濱

上船當日，我地朝早喺東京凱悅酒店九樓個Hyatt Regency Club度食早餐同辦理check-out手續，一個地方搞掂哂，唔洗上上落落，夠哂輕鬆、簡易、快捷。我地大約十一點半離開酒店，乘坐巴士前往橫濱「大さん橋」（英語拼音：Osanbashi）郵輪碼頭，全程兩個鐘頭有找。

到達橫濱「大さん橋」郵輪碼頭，辦理好登船手續後都差不多成一點半，因為大家都肚餓，所以第一時間就去咗Crystal Dining Room度醫肚！食完晏，我地就上房安頓好自己o既行李，然後再出發去市中心「濕平」。「濕」到咁上吓就返上船Happy Hour，一邊飲酒，一邊聽音樂，直到八點半再入Dining Room食晚餐。