10月24日（小雨）：札幌

今次北海道之旅頭三日都天清氣朗，咁啱細佬又編排好天晴o既日子去哂最遠同較多戶外走動o既觀光地點，到第四日落出雨時，大家都可以留返喺札幌，好佗佻地慢慢食、慢慢行、同慢慢睇。

札幌地鐵極之方便，每人手持一張一日乘車券就可以全日任搭唔嬲。八人朝早先喺生產「白い恋人」o既北海道名朱古力廠「石屋製菓」開設o既「Ishiya Café」度食咗個人氣早餐，接著就起行去其主題公園「白い恋人パーク」（譯音：Shiroi Koibito Park）。喺公園玩咗一個早上後，就返回酒店附間一家專門食蟹o既「かに本家」（譯音：Kani Honke）食咗個全蟹宴午餐。

10月23日（天晴）：富良野

深知早一日喺小樽o既行程對年長o既團友們黎講會有啲勞累，所以第三日小肥就專登編排去遠少少o既富良野度賞花觀葉，順便吸取大自然o既靈氣。

朝早八點離開酒店，到達富良野已差不多係午飯時間，所以八人就直接行咗去離火車站只有五分鐘路程o既「くまげら」（譯音：Kumagera）度食晏。食完個超正o既生和牛丼後，大家就決定晚餐再返轉頭試埋佢個和牛火鍋。

嘩，淡季o既富良野可以用鳥無人煙黎形容，街道上真係人影都冇隻。由於旅遊景點都隔得好遠，我地結果都只係行咗去較近o既市集「Furano Marche」買手信，跟住就搭車去上富良野度賞花。

往返札幌o既列車班次唔多，八人飯後就喺車站旁邊o既咖啡屋「我夢舍樂」度一邊飲咖啡，一邊等火車。

節奏超慢o既富良野一日遊剛好給予團友們回氣o既機會，為接住忙碌o既一天作好準備。

10月22日（天晴）：小樽

只有五日遊北海道，年長o既團友們又唔可以過份操勞，所以小肥要好小心去揀選觀光景點、交通工具、用膳餐廳及控制時間。第一日先喺札幌市中心瘋狂購物，第二日就決定搭半個鐘頭JR火車去遠少少o既小樽，貪佢地方夠細，又有條聞名日本海外o既壽司街，景點夠集中，唔想行路都可以跳上循環巴士代步。

為咗要避開上班返學車站o既繁忙時間，八人由酒店隔離o既札幌站乘坐早上九點十三分班JR列車前往小樽。到步後，即轉乘市內o既循環觀光巴士前往最遠o既地標食早餐，然後就慢慢沿住條主街一邊瀏覽、一邊試食、一邊狂購。當日都食得真係夠誇張，中午未到，先喺「北の漁場」即買即食鱈場蟹及壽司小食，跟住就轉場去「壽司街」離巴士站較近o既「旭壽司」度豪食魚生；行到天黑，小肥仲要拉大隊去小樽名芝士蛋糕及朱古力店「LeTao」度嘆返個下午茶先肯離開。喺小樽度過大半日，雖然當中都有哈碌地搭錯車，幸好團友都大感意猶未盡，仲話下次如果再黎一定要過一晚夜添，XO仔總算冇令大家失望。