今次跟團去左河源+梅洲! 三日兩夜好快就過左. 雖然行程, 食宿非常地麻麻, 但都好開心可以同Honey周圍去呢~~

八點三準時到達集合地點, 上車後無幾耐就開始瞓...大約三個鐘就到左河源lu~ 第一個印象係, 好鄉下同埋好似好窮既地方, 心諗睇黎都無咩好玩喇....

第一站就去左食中午飯, 估唔到, 第一餐飯比想像難食得多, 餐廳嚴格黎講都唔係一間餐廳, 只係一間屋吧了...九餸一湯, 雖然唔好食, 但總好過無得食...所以都食飯飽飽....
第二站就去鏡花緣, 坐左八蚊雞既電瓶車到左女兒國睇表演, 估唔到都幾得意. 算係一個唔悶既show啦~ 之後行左大半個鐘, 園裡面都幾多野玩架喎. 不過影得最多相莫過於一個小瀑布呢! 行完鏡花緣後就返去食晚飯lu~ 仍然係八餸一湯, 都仍然係唔好食既一餐.....

食飽返酒店休息一陣趕八點鐘去睇噴泉, 聽導遊講呢個噴泉夜景係全個河源最靚, 我地當然唔會錯過~ 去完噴泉行下步行街, 再去食KFC..(haha, 每次去大陸必食既野係KFC), 食飽飽就返酒店休息lu~

第一晚既酒店非常一般, 無企缸加無浴缸, 只有花灑, 我都係第一次見呢.....但估唔到好戲在後頭....

一早七點morning call, 七點半食早餐, 第一次跟團食既早餐唔係自助餐呢~ 係白粥油炸鬼既團餐...當然又係唔好食啦~ 好彩我地買左d乾糧, 所以上車之後又食食食...坐兩個鐘車去到梅洲後, 本來第一站係食午飯, 但因為時間仲早既關係, 我地去左本來第三日既行程, 千佛塔. 呢個都係一個影相唔錯既地方, 不過其實無咩特別呢...去完千佛塔就去食午飯, 又係難食既一餐, 今餐仲要無雞食tim 呢~!

坐車期間, 導遊話我地下午去既雁南飛茶田係無包入場的, 所以要每人俾120蚊入場+陳唔知咩咩大宅+一餐晚飯. 我同Honey都覺得如果再食返呢兩日既飯餸, 寧願自己出去食呢...結果我地俾左每人80蚊去餘下兩個景點.

四幾多完成行程後去到陳咩咩大宅, 我地一致認為有被坤既感覺....呢個根本就係一間爛屋, 仲有人住緊, 同埋根本唔洗入場費既, 咁點解會收我地80蚊咁貴? 雁南飛茶田真係需要80蚊? 不過算啦, 唔去都去左, 由佢la~

夜晚, 我同Honey去左步行街, 又一無野行既地方..haha~之後去左所謂酒吧街, 成條街都係酒吧, 但無人架bor~

一心諗住今日無咩行程可以瞓晏d..但估唔到導遊仍然係七點morning call.... ><

又係團餐早餐...之後就搭車去手信店, 估唔到今次我地都有買野呢...買左兩包粟子..haha~ 之後上車後又搭兩個幾鐘車返河源lu~

基本上呢日係無行程的, 所以有團友投訴呢, 點解要住一晚? 住一晚係因為有三日行程, 但結果逼晒兩日去晒...?? 返到河源食中午飯, 今餐已經係三日裡面比較好一餐. 食飽又係搭車..

本來仲有一個桑果園行程, 但因為落雨既關係, 導遊問我地唔去o唔ok, 當然ok啦~反正都係sell野之嘛~ haha~ 所以今次好早返到深圳灣呀~五點都未夠就到lu~