拎完車之後我地決定最先去咗Outlet先，呢個Outlet唔係好大，但係名店比較多，其實因為時間都唔早，我地亦因為肚餓，所以就搵咗嘢食先，今次我地就食沖繩拉麵，不過唔知點解沖繩啲拉麵似粗身烏冬多啲
Outlet本來我目標只係ABC Mart, NIKE, ADIDAS，點知……最後，變咗買Tory Burch同Agnes'b 袋~~XDXD
因為真係巧抵呀~~~
我去沖繩嗰時日元兌港元大約係7.5，對鞋都係9千6百円，個袋都係9千円，無理由唔買~~ 

今次出發之前亦都有查詢過朋友大約行程、酒店住宿，而余家弗酒店就係朋友住過，覺得唔錯嘅酒店，唔係太貴，亦都因為離水族館車程唔太耐，半小時內~
我地由那霸出發去到酒店都大約已經7點，去到Check In 唔時，職員話我之前book嗰款房間已經full晒，佢幫我upgrade去新翼嗰邊嘅套房~
因為係夜晚關係，所以其實都唔知個風景大約係點，不過，一到朝早……嘩……風景真係唔錯，有少少海睇到，離遠重望到個棒球場添
 

其實揀食呢間燒肉，一來我懶、二來近我酒店，其實我去旅行好少自己去搵啲咩隱世食店，自己啲日文已經好多都俾返晒老師 ，只係可以好簡單講幾句，太多，我自己都未必明得晒~
呢間燒肉雖然我係睇旅遊書而去食，但係我Plan嘅時候，都有上網爬過文，有冇人話佢唔好食、貴架，既然都冇，我唔怕去食
其實除咗東京之外，好多地方食店、商店都會比較早收工，所以我地去酒店Check In之後就即刻出發去食嘢，因為呢間嘢最夜收11點，我地到酒店都11點喇，又要冇訂枱，一定要等，所以急急腳走
好彩我地有GPS，所以好快就已經搵到間嘢喺邊，泊好架車我地就去排隊等位，因為都幾多人，我地留低名就可以選擇出去坐住等或者轉頭再返嚟，其實附近除咗有間藥妝店，都冇乜好行，我當然要去藥妝店補貨先喇，因為一年先去一次日本，一次要買定一年量嘅洗面用品，所以……等食飯空檔去Shopping超正~~
呢間燒肉有放題亦都有單點，咁既然我地都冇乜所謂，梗係食放題喇，可以食2個鐘
大約等咗半個鐘就可以入座，入門口要除鞋，同埋座位好特別，係凹入去，店員幫你落單係要跪低~
放題會係任食肉類同、某幾款小食，飲品需要額外俾錢~
其實喺日本食牛肉，我相信點都唔會差過香港，呢間燒肉店，我之後都有推介俾朋友，因為真係都幾好食 

好多人話，去沖繩旅行，唔去下沖繩美ら海水族館等於冇嚟過沖繩一樣，所以我第一次嚟沖繩，梗係要去吓水族館喇~
呢個水族館其實就唔係好大，兩個鐘內一定去完，但係一入場，就會見到個小水池，可以同啲海星、海參嚟個親密接觸

熱帶果園本身我同事講起，去過沖繩嘅同事已經叫我可以SKIP咗唔去，因為真係唔值得浪費時間入去，不過我同大少都好堅持想入去睇吓，因為都一場嚟到沖繩，反正沖繩都無乜太多景點，去吓都OK
其實佢真係一個果園咁嘅地方，小朋友可能會覺得興奮啲，因為好多生果香港未必見過或者易見到，依家重有機會可以摸到~~ 
 

呢個海中公園係我第一日本來編咗會去，點知我地真係太晏由那霸出發，去到海中塔啱啱5點半，門口警衛已經唔俾我地開車入去，所以我地就要將行程改去第二日落恩納果時經過去一去
其實佢係一個燈塔， 燈塔可以俾遊人買飛入燈塔內部，落樓下睇下海入面啲魚仔，其實……入去睇一睇就要1千円，都幾貴~~
同埋其實係有巴士可以由停車場去到燈塔橋口，點知我地兩個就好型咁話唔搭……最後，行到去燈塔成身汗XDXDXD
 

沖繩除咗苦瓜出名之外，海葡萄都係好出名嘅名產之一，食落會有一陣海水鹹味，就咁食幾好食架~
如果嚟呢間本店食海葡萄丼，我覺得中間白色一堆嘅物體真係有啲……唔太好食，如果可以唔要個丼會好味好多~
另外，因為大少好想試吓沖繩苦瓜，咁我地就叫咗一碟苦瓜炒蛋俾佢食，另外……因為我見佢豬手都好出名，一定唔可以放過 
不過想提提大家，佢有中文Menu，但係唔代表店員識中文，店入面個婆婆係完全唔識中文~~ 

由於万座毛同元祖海葡萄店相距只係幾分鐘車程，所以我將佢地編埋一齊，食完海葡萄都已經差唔多5點幾6點，開始天黑~
我重擔心睇唔到靚景色，點知……原來黃昏日落嘅万座毛都可以好靚 

因為喺外國關係，所以今年冇生日蛋糕食，咁啱我地去買紫薯批，俾我喺本店見到有紫薯蛋糕買，梗係買返個同自己慶祝生日喇~~
個紫薯蛋糕重好好味添~~ 

我訂嘅時候完全唔知佢會喺山上面，雖然風景好靚，但係我都冇介紹朋友去住，因為搵呢間酒店都要少少時間
同埋佢附近係冇嘢食……最後我地嗰晚係去便行店買杯麵、便當返酒店食~