鰻魚蛋卷超好食， 日式甜蛋卷包惶燒香嘅鰻魚，蛋卷不會太硬實，軟淋淋~~

另外飯有3個食法，員工會喺你落單之後就拎出食用方法俾客人睇 

第一吃，當然係食原味嘅鰻魚飯喇~~~

第二吃，分一部份鰻魚飯去碗仔，放啲蔥花、山葵拌嚟食 (呢個方法我冇試，因為我唔係WASABI)

第三吃，亦都係分一部份鰻魚飯去碗仔，不過今次係加啲熱高湯當湯飯食

當然，我是比較鍾意第一個食法，因為可以食到鰻魚飯嘅原汁原味，冇太多花巧嘢~~

其實喺訂呢間酒店之前，我嘅行程係返大阪前一日先會路過名古屋住一晚，不過……因為我買唔到4月16日嘅立山黑部上山門票，只買到4月17日，所以……所有行程又要再改過，要第一日喺名古屋停一晚，因為我太遲才訂(出發前一個半月)，只可以訂到比較細嘅房，一張雙人床 (本身我未買上山門票前係訂18號晚兩張單人床，相信有去過日本嘅朋友都知，日本酒店房係有幾細得幾細，喼都冇位開果隻)

當我預訂好所有酒店之後，又是發揮我網上購物嘅本色，我分開Amazon同日本樂天網買咗幾樣嘢，因為趕著用(汽車用空氣淨化機，因為我地係自駕遊，所以最好有部空氣淨化機，如果唔係，我鼻敏感就會好麻煩)，就寄去名古屋 (有部份因為唔趕住用，就寄左去大阪酒店)

由於我地自駕遊，所以一早係大阪租車，去到呢間酒店發覺係冇自己嘅停車場，所以，要喺酒店附近用同酒店有合作嘅停車場，如果你泊好車，拿停車票俾酒店職員，他就會幫你吸一個酒店的印章，停車場就會俾8折……其實我們只是吸咗一次，200円1小時，因為大少話，8折，又唔係平好多，又鬼咁麻煩，20円由佢喇 

呢度係去白川鄉必經之路，經過桜の鄉莊川，大少話好靚，想落車影相，我當然沒有問題，因為揸車嗰個話事，他覺得想停嘅時候，就可以停，都好，可以放鬆一下手腳和去洗手間嘛~~

呢度應該都是一個休息站，因為其實都冇咩好睇，不過因為可以遠處看到雪山，所以風景都是好靚
 

好快我地就嚟到白川鄉入口，超多旅遊巴士……真係很誇張……

當然，中間好多都係香港同內地嘅旅行團，真係好多人，或者可能係我地真係太遲去，不過只係朝早11點未到喎

哈哈，其實今次旅程真係冇心理準備會睇到櫻花(因為我去嘅時候都4月中)，不過因為出發前日本天氣突然變凍咗差不多一個星期，所以……櫻花們喺白川鄉同高山市歡同我Say Hi~~

勁開心，不過……大少嫌棄啲櫻花唔係粉紅色而係白色，櫻花妹妹們……你地好可憐哦~~

我原本網上買咗朝早08:40分交通劵上山，當然又係因為我家大少賴床而遲咗出發，由我地富山所住嘅酒店出發去立山需要大約40分鐘，山路、彎位比較多，加上落起毛毛細雨，所以架車都唔可以開太快，去到立山駅嘅時間啱啱好08:40，哈哈，大少車都未汨好就趕我落車去換飛

落車之後我即刻跑去換飛，票站有分開2部份，2號窗口係網上預約乘車卷，另外3個係即場買票，所以如果你出發前就網上訂好票，去2號窗口就可以換到票~

我地遲到，所以票站小姐就同我講，我要去5號將原有08:40車票換成09:00的車飛才可以上山，所以……我就去5號窗口先換飛再出發~~

因為天氣不是太好嘅關係，所以很難影得到雪牆頂部~~

真係一啲都唔可以睇低立山黑部雪牆嘅吸引力，雖然交通工具上面遊人唔多，不過……原來好多人都已經集結咗喺室堂，當日…聽到好多唔同國家嘅語言，有國語(聽得出好多都係台灣人)，英語、泰語、日語(呢個唔駛講喇，呢度係日本嘛，我係傻的嗎﹖)，竟然……廣東話都聽不少~~

超搞笑，當我同大少喺度苦惱點樣可以自拍立山黑部合照嗰時，突然……後面有廣東話出現“不如我幫你地影呀”，哈哈，我地嚇一跳，即刻話“好呀，唔該晒”~~

當佢幫我地影完，佢問“可唔可以都幫我影呀﹖”，原來因為佢係自己一個人嚟玩，我梗係無問題喇，
香港人要互相幫忙嘛~~

影咗兩張……佢竟然除低外套，只著短袖T-Shirt，哈哈，佢說要俾人睇佢不怕凍~~

(旅行完咗成個月，大少話佢當時都應該要同嗰個人一樣影低短袖衫，真係頂佢唔順，都成個月喇大佬，重講~~)

當我地完成室堂外面冰冷雪山嘅冒險之後，大約11點半，我地要趕喺人潮未太多嘅時候完成我地嘅午餐

出發前都看過很多其他網路介紹，好多人都話唔好對呢個午餐有任何期待，但係食完之後，我覺得無其他人講得咁差呀，其實喺呢個雪山上面，你想人地俾咩山珍海饈你食﹖ 有呢啲基本和食我覺得已經好好喇，唔好要求太多，而且味道真係唔太差呀~~

欣賞過咁有氣勢嘅山嶺之後，我地就出發去今次立山黑部之旅交通終點站-黑部湖，之後再行去黑部水庫

路程唔會太遠，好快就到，不過……去到水庫嗰時，黑部平嘅藍天白雲又唔見咗~~
黑部湖冬天時份基本上都會係結冰，同夏天水庫排水嗰種氣勢，完全冇得比，但係亦都有佢靜態一面

當我地到達大阪嗰時，已經是晏晝4點幾，大阪嘅車路好縱橫交錯，我地只係搵酒店者，已經搵咗大半個鐘先搵到其實係邊個入口入停車場

泊好車後，先去寄放行李櫃台，因為我地其實係聽日先入住，但係又唔想拎太多嘢去神戶，所以大件行李就先放低喺大阪

放低行李之後，我地就即刻趕去関西空港還車，因為已經5點，我地租車時間係7時之前要還，不過……因為大阪啲高架橋太交錯，所以我地搞錯咗出口，又要再兜一圈上高速，去到関西空港，又因為錯過咗停車處去咗第2航廈，我地去到租車公司門口停車處，已經差唔多7點，真係比大阪啲路玩死，所以我覺得要自駕遊千祈唔好揀大阪、東京~~

還完車我地就出發去難波食晚餐，今晚我決定要去吃“自由軒”咖哩飯，所以我地要喺関西空港搭南海特急ラピートβ60到南海なんば駅

原來，南海特急ラピートβ60用ICOCA入駅之後，重要喺月台上面補票，冇記錯的話，大概係560円一個人，當然……我地唔會考慮太多，直接俾錢，因為時間已經晏，用錢買時間喺我嘅旅程中經常出現，哈哈

之前一直都聽其他人講，自由軒啲咖哩飯好好食，好特別，我當然滿心期待喇，點知……當我食第一啖之後，覺得冇大家講得咁好食，其實我覺得很香咖哩味，不過，當加埋生雞蛋之後，整個飯都太濕立立，感覺一啲都唔良好，我相信……我係當晚自由軒入面，唯一一位食剩飯嘅客人~~

另外大少嗰款係有點似西式炒飯，反而我覺得呢個好食少少，當然……最好係冇咗中間隻生雞蛋，其實我一啲都唔討厭食生雞蛋撈飯，不過，首要係飯一定要夠熱，但係……呢兩個，飯完全唔熱，所以撈埋一齊之後，有啲腥味，我唔係好鍾意

大少哥哥好幾年前去大阪玩，話冇食到呢間好失望，當我食完了之後，我同大少講，你可以同你哥哥講，叫他唔駛失望，因為吃唔到都無損失，食完反而重失望

食完一餐唔好食嘅晚餐之後，我地就出發去搭鐵路過神戶，因為我預約咗聽日神戶牛肉午餐，超期待，喺香港食日本和牛好貴，雖然喺日本唔平得過香港幾多，但係去関西，冇理由唔試一試吧~~

因為喺自由軒食得唔多嘅關係，所以我經過蓬萊嘅時候，忍唔住買咗肉包同燒賣，因為賣相實在太吸引我喇~~
我地帶去神戶酒店先食，所以已經變凍咗，不過，除了肉包凍咗沒有熱嗰時咁好食之外，我覺得燒賣真係好好味(可能因為真的肚餓)，同香港食嘅豬肉燒賣好唔同，啲肉唔會好似我地酒樓嗰啲咁實的的，好軟熟 

我從來都冇諗過呢間酒店係咁似西式庭院，當我們走入去，真係嚇了一跳，Oh My God……好懷舊~~

我同大少好鍾意呢間酒店，尤其電梯，我地呢幾年去幾個地方旅行，都冇見過這麼舊式嘅電梯，就好似鐵達尼號裡面電梯一樣，係指針形式，不過……如果係日光日白，我諗我會覺得比較興奮，之不過……我地喺夜晚10點先去Check in，酒店裡面除咗Check in大堂之外，其他都熜晒燈，等電梯期間，我一直都覺得好陰森恐佈，哈哈~~

其實喺朝早，呢個庭園真係幾靚，哈哈

另外，酒店令我最驚喜嘅地方係，有一棟激安の殿堂在對面，超開心，去日本我鍾意就係去激安，因為除咗有藥妝買之外，重可以買到好多好得意嘅嘢(大少同媽媽會將呢啲得意嘢稱為 - 垃圾)~

所以當我地食完宵夜之後，梗係要去一次激安喇，咁樣又行咗個幾鐘，哈哈

第二日，我地Check out之後，放低行李喺酒店，先出發去睇大鉄人28号，因為今日冇太多行程，而且我訂中午12點去食神戶牛肉，所以，都唔敢去太多地方，驚誤咗時間

由酒店出發嘅話，我只需要去三宮駅搭鐵路到新長田就可以，好快，新長田一出駅口，唔太遠嘅地方就已經係大鉄人28号 

今日其實本來係諗住食燒肉放題，但係最後我有朋友推介我食拉麵，佢話呢間拉麵係要地道日本人先會去食，無乜遊客，好值得去食
佢知我本身食得偏濃味，佢話呢間店啲沾麵可以滿足到我“咸蟲”嘅要求
我用Google Map入晒地址去搵，行咗好耐都搵唔到，經過20分鐘之後，我終於見到佢喇，真係好靜，由商店街一路行，除非真係住喺嗰頭，如果唔係，基本上唔會行過去，因為黑漆漆，冇嘢行，冇嘢買~~
呢間點係門口就有部售票機，你要預先決定自己想食咩，買完票就搵位，其實佢位就一眼見晒，因為係一條過吧枱型式，大約得10幾個位，而廚師亦只得一位，一個人做晒洗碗、煮麵發餐嘅工作，所以基本上大家食完之後，都會好合作咁自己抹乾淨張枱，將食完嘅餐具放上出餐位