步出機場，系乘坐國光號出台北車站轉捷運入新北投，車站職員好親切話我知中山路就喺對面馬路，以為好近，點知---- 唉﹗原來拖喼行上山係咁索氣，結果，行咗廿分鐘，終於到皇家季節酒店北投館。

服務員態度很好，check in 時知道我book咗台北館，仲安排酒店shuttle bus直接送我台北館

房間面積有30平方公尺，私家湯屋佔房間一半面積，日式風呂設施，圓形大理石羅馬湯池，水龍頭藏於獅頭內，溫泉水從獅口流出，但放滿八成水要成粒鐘，湯池旁另設淋浴設施，讓客人先洗澡後泡湯。房間提供浴衣、絲絨拖鞋、迷你樽裝沐浴套裝，天然海鹽等等給客人使用，房間不算太寬敞，勝在夠光猛，感覺舒適。

參觀完十三行博物館，喺門口搭公車去八里碼頭坐渡輪過淡水食lunch。

跟據旅遊書指示，呢間餐廳唔難搵，好快就搵到，當然要試試呢度嘅招牌菜~ 我點咗炒孔雀蛤同蚵仔湯，孔雀蛤落咗圾豉椒九層塔，但炒到水汪汪，冇鑊氣，同我期望有點落差，味道有尐似泥鯭嗰種泥味，Oh! no good；蚵仔湯好足料，好多蚵仔，而且落咗好多薑絲辟腥，湯飲落唔腥，很清，味道很鮮，正﹗

食完lunch，行咗一陣，搭的士去紅毛城，上車時，的士司機話照錶加30元，呢尐係淡水嘅規矩，吓﹗咁都得﹗不過出嚟旅遊，算喇，唔深究囉。落車盛惠100大元台幣。

紅毛城，十七世紀由西班牙人侵入台灣，在淡水河邊的山丘上興建『聖多明哥城』即紅毛城，隨後又被據守在南部的荷蘭人北上將西班人趕出台灣，及後鄭成功驅逐荷蘭人，紅毛城因而成了一座廢城；直至清朝康熙台灣正式納入清朝版圖，成為淡水河口防禦要塞，英法聯軍之役後，英國人租借紅毛城作為英國領事館，並興建領事官邸，紅毛城紅磚、拱廊的洋樓的建築，表現出典型的殖民地建築的特色。是國家一級古蹟。一個見證殖民時代的地方，

行完紅毛城，坐車落淡水老街，見到間 Easy House cafe 美式蔬食，做緊 promotion，聖代系列買一送一，行到身水身汗，啱晒﹗入到去，環境氣氛都唔錯，waitress好努力咁sale 二人套餐，睇落足夠四人份量，真係好抵，但要留肚掃街，結果點咗兩個聖代，waitress有點失望，不過佢嘅服務態度好好，還不時為我加水，真係要畀個 like 佢。

隔壁間百葉，30年老店，久違了溫州大餛飩的味道，點咗個套餐 ... 餛飩湯加蘿蔔餅，餛飩湯有點失望，蘿蔔餅餡料製法香港不同，蘿蔔絲好像醃製過，辣辣地，好惹味。

跟住掃埋即炸熱辣辣嘅阿香蝦捲，，脆皮嘅味道同質感似過年食嘅蛋散，而餡料似港式雲吞，食完熱氣嘢，飲番杯阿媽的酸梅湯，Perfect。

凱達格蘭人的族地文化館之所地，正是400多年前凱達格蘭族的族地。是一座以原住民為主體的文化藝術及教育研習中心，以保存及發揚原住民文化藝術，語言、歷史為任務目標

酒店shuttle bus司機推介，百年老店嘅金春發牛肉店，當然不容錯過，嚟到台灣梗絛要試下，女女鍾意飲湯，點咗個牛雜湯同清燉牛肉麵，我試牛筋麵，所謂牛雜湯，即係浄牛雜，而牛雜唔係牛內臟，而係牛筋、牛脯同牛柏葉。牛雜湯味道濃郁，原汁原味，湯麵都係用同一湯底，但加咗麵同菜，味道已失真。

車來車往，只可遠觀。

N年冇嚟，最大改變喺冇咗「大中至正」四個字。

北投住了兩天，今日check out，乖搭酒店安排shuttle bus去台北，由於未到時間，先寄存行李，然後出去食lunch，同埋周圍行吓，到夠鐘返嚟check in。

房間唔夠光猛，雖然有窗同開晒燈，仍然覺得暗，浴室有按摩浴缸，洗pat pat坐廁，不過公家嘢，擔心衛生問題，都係唔敢用。 

酒店附近有個寧夏夜市，逛逛睇吓搵尐好嘢食吓。呢個夜市規模較細，但多人到心口頂背脊，忽然眼前一亮，消聲匿跡一段時間嘅日船，竟然喺度出現，太感動喇﹗買咗一盒，汁醬味道同香港唔同，甜甜地，冇咁酸，幾討好，今日天氣好熱，加上兩旁攤檔，炸鍋和烤爐發出熱氣，已經熱到冇晒胃口，想搵間冷氣夠凍嘅餐廳食尐清淡嘢，點知酒店附近冇，結果去7仔買杯麵返酒店食，真係灰到喊

早餐以台式為主，算係咁啦，只係我食唔慣啫，冇煎蛋，好似少咁尐嘢咁

行入黃金山城，掃街時間開始，首先冰滴咖啡，台灣香腸，食到唔停得口；食芋圓喺去九份嘅基本動作，賣芋圓的食店開到成行成市，最出名係阿甘姨芋圓，人龍亦排到好長，排咗好耐才買到碗芋圓，入到去竟然找到個靚海景位，芋圓煙煙韌韌，呢尐唔知係咪台灣人所講Q彈呢，加埋刨冰底食落透心涼。

出到嚟重有大腸包小腸，哈哈﹗rice hotdog﹖跟住入去間60年老舖試試九份魚丸湯，魚丸滑溜煙韌，質感似食緊圓形嘅生棻魚肉。

本想去陛平戲院感受吓侯孝賢嘅悲情城市，但見到一條長而陡峭嘅樓梯，有點腳軟，結果放棄咗。

遊罷九份黃金山城，乘的士大約七分鐘車程，到達金瓜石金礦博物館，進入玄關，眼前第一座建築物–「四連棟」，剛好趕上展館提供導賞服務，影片介紹等。
四連棟約有七十五年歷史，是日治時代日本礦業株式會社員工宿舍，具日式建築風格，及後在「修舊如舊」的原則下，採取日式傳統方法，保留並使用原有建材，進行重修，命名「生活美學體驗坊」，四連棟內保留原有架構，雅緻的窗櫺、長廊、日式簡樸傢俱，還有些中式擺設嘅房間。

本山五坑，是現今仍保存完整的礦坑之一，已開放供遊客進入參觀，坑道入口用紅磚砌成，進入坑道參觀需依照當時採礦的程序：先在入坑準備室做完安全宣示，然後領取安全帽，坑道較濕滑，需抓著扶手而行，坑內設置蠟像用以展示當年的採礦工作的情境，在礦坑出口處擺放一件藝術品，名叫「無限塔」，當我走出礦坑，除底安全帽，我的髮型也變了無限塌。

離開黃金博物園區，正想找公車到瑞芳的時候，忽然傳來「去台北，去台北」，哈﹗原來基隆客運車長在提醒乘客上車，該車1062，可直接到台北忠孝復興捷運站，明白了，明白了。

當年每當有長假期，總是喜歡和幾位同事到台北玩幾天，當時無需燃油附加費， 飯店亦唔太貴，每次來台，必定喺西門町落腳，因為該區的飯店唔太貴，啱晒我地尐冇錢冇水，又鍾意周圍去嘅人，咁耐冇嚟，真係改變咗好多，完全唔認得路，全程靠晒GPS。

今日好曬但唔熱，因為好大風，吹到我幾乎企唔穩。自從野柳包裝成變咗地質公園後，設施完善咗，但失去原有風味，如今嘅女王頭，比以前尊貴咗，冇以前咁親民，可能太多陸客覲見，條頸日漸消廋，園方加派士衞在旁駐守，更突顯皇者氣派。陸客實在太多了，我離遠找個有利位置ZOOM埋嚟影幅相算喇。

入到競技館，行一個round然後至決定幫襯邊間，各食店已好進取咁介紹自家秘製牛肉麵，皇家傳承牛肉麵老闆見我行過，即刻叫我埋去可試飲牛肉湯，而北芳園嘅事頭婆揸住本旅遊書不斷向我推介（我都用緊嗰本旅遊書），最後我咃決定分遁揚鑣，我選擇皇家傳承牛肉麵，我點咗紅燒牛肉粗麵，跟飲品，加配涼伴豆腐絲，牛肉麵湯底濃郁，麵質煙韌，涼伴豆腐絲細長好似麵條，質感有尐似板豆腐，，如果多一點麻油香味就好喇。

傳說喺香港等位要等兩粒鐘，今日嚟到台北竟然唔使等位，仲坐近窗口，哈哈﹗發達囉﹗

海鹽焦糖拿鐡，cream另上，賣相好靚，飲落甜甜地，嗒真尐，隱隱約約彷彷彿彿好似少少鹹鹹地，唔知係咪心理作用。綠茶拿鐡就不過不失，冇乜驚喜。

博物院人山人海，很多國內旅行團，而展覽翠玉白菜和肉形石的展覽館人龍更是漫延至下一層。我選擇先從較少人的展覽館開始参觀；館內收藏大量歷代文物藝術品，有青銅器、書畫、陶瓷器、各類典籍、工藝品和宮廷類文物等等；我對各種青銅製器具較感興趣，讃嘆當年冶煉鑄造技術。

 當我正想離開時，展覽翠玉白菜和肉形石的展覽館人龍竟然已散去，我趁這空檔趕快在回程前入內參觀。哈哈﹗

參觀咗幾個展覽館，有點餓，到三希堂醫醫肚，侍應安排個窗口位畀我，環境唔錯，我order咗個香茶套餐、蛋包飯套餐同四彩甘絲，轉頭侍應通知我冇香茶套餐，有尐失望，只好轉素糭套餐，蛋包飯套餐配橙汁，份量似兒童餐；素糭做法似珍珠雞，食落唔似係糯米，質感似荷葉飯，素湯好清甜，好足料。食完好似唔多飽，追加咗個紅燒牛肉麵，配小食，牛肉麵不過不失，五香花生幾好味，如果係熱嘅就好喇。

今朝香港仍然掛八號風球，有力牆頂住，收到消息香港下午市面已回復正常，但都係擔心，所以提早去機場，check 咗in ，第一航廈購物商店唔多，好快行完，距離登機仲有一段時間，經過翰林茶館，入去飲杯茶 hea 吓。

嚟咗台灣咁多日，未有機會試珍珠奶茶，終於喺 last minute 試到喇，我點咗熱洛神花茶同烤魷魚，洛神花茶連同成套泡茶工具，還有一壺熱水，慢慢泡，好relax。

hea 完，入候機室等上機。