今日好曬但唔熱，因為好大風，吹到我幾乎企唔穩。自從野柳包裝成變咗地質公園後，設施完善咗，但失去原有風味，如今嘅女王頭，比以前尊貴咗，冇以前咁親民，可能太多陸客覲見，條頸日漸消廋，園方加派士衞在旁駐守，更突顯皇者氣派。陸客實在太多了，我離遠找個有利位置ZOOM埋嚟影幅相算喇。

入到競技館，行一個round然後至決定幫襯邊間，各食店已好進取咁介紹自家秘製牛肉麵，皇家傳承牛肉麵老闆見我行過，即刻叫我埋去可試飲牛肉湯，而北芳園嘅事頭婆揸住本旅遊書不斷向我推介（我都用緊嗰本旅遊書），最後我咃決定分遁揚鑣，我選擇皇家傳承牛肉麵，我點咗紅燒牛肉粗麵，跟飲品，加配涼伴豆腐絲，牛肉麵湯底濃郁，麵質煙韌，涼伴豆腐絲細長好似麵條，質感有尐似板豆腐，，如果多一點麻油香味就好喇。

傳說喺香港等位要等兩粒鐘，今日嚟到台北竟然唔使等位，仲坐近窗口，哈哈﹗發達囉﹗

海鹽焦糖拿鐡，cream另上，賣相好靚，飲落甜甜地，嗒真尐，隱隱約約彷彷彿彿好似少少鹹鹹地，唔知係咪心理作用。綠茶拿鐡就不過不失，冇乜驚喜。