這裏是agent介紹給我們的新開酒店,大約一年左右,地下位置已很靚,好有藝術氣息,lobby設於22/F,佈置很別緻及有很多特別的設計,酒店內有一間小型教堂及長樓梯,拍照一流,我們的房間在31樓最頂層,出電梯後還要用房間咭拍咭才可以打開玻璃門進入房間位置,保安很是嚴密,房間很大很舒適,顏色及燈光柔和,廁所的設計都十分之靚.樓下大堂設有INTERNET服務,設備及效率也很高.

這間舖頭係用鬼做主題呀,佈置好靚,章魚燒有兩個男師傅負責,即叫即整架,一客六粒,上面有些魷魚碎,成粒放入口度,好味呀,入面超熱,但係好香及好多料,有八爪魚粒,麵粉唔會太粉,好味呀!

我地第一日既晚餐就係嚟呢間餐廳食蟹啦,嘩好大個蟹既標誌呀,隻蟹仲要識旭架....我地當然唔放過機會影張相先啦.去左本店食,有幾層但都要等位,超誇張,係大阪都撞到熟人,就相約一齊食晚飯啦,等左約半小時位就有啦,我地一行六個人入到去見餐牌都係得幾個套餐選擇,價錢都唔平喎,於是我地每人叫左一個最平既套餐啦.仕應完全唔識講英文,簡直係雞同鴨講,朋友見有梅酒飲就話好想飲,跟住叫左一杯試下先,味道都OK喎,就每人叫左一杯啦.....

嚟啦....先嚟一份蟹腳(三隻)及生蟹肉(兩件)及一小碗菜(有些青草味及薑味),蟹腳好好味呀,好爽,肉質鮮甜,可以成隻攞出嚟食架,生蟹肉兩小件味道都幾好呀,好鮮呀.跟住嚟一杯蟹肉蒸蛋,D蛋好滑身,入面有好多蟹肉,蓮子,好好味.好滿足呀.跟住再過一陣仕應替我們點著前面個爐,然後嚟左一碟生既食物,上面有蟹腳(四隻都大隻架),粟米,大蔥,蕃薯,菇,等,蟹腳燒一陣就OK,味道好好,好香好正呀,燒緊時蟹味已出晒嚟啦.其它配料都好好味,有三種醬給我們配的,有一種是蟹羔的醬,呢個好重蟹味,加埋落D蟹度好鮮呀.

最後仕應係我地面前即刻整甜品,就係熱既抺茶加落杯凍既雪糕度,感覺都好特別,又熱又凍咁,個雪糕球好硬但好味呀.

坐小火車到嵐山,沿途風景真的很靚,我地都不停咁影相呀,跟住去到竹林,勁靚,又清涼,好舒服呀,我好鍾意呀,我地都好ENJOY.

有豆腐,凍雪糕及牛肉味可以選擇,我地兩個食豆腐味,兩個食牛肉味,味道都好好味喎,仲熱辣辣添架,豆腐有包豉油俾你加落去,加左個味仲出呀,仲可以有免費茶飲添.

我地每人叫左一碗,其實應該係三個朋友都叫同一款叉燒拉麵加半隻糖沁蛋,另外一個朋友叫左一碗勁多蔥及肉碎既拉麵,間舖冇英文,好彩有個識講國語的女仕應來翻譯給我們聽先知係咩及點叫炸,舖頭好細,但都好多人呀,我地本來坐入面,等左一陣出面有一張四人枱走左,所以轉左出去坐,都幾舒服喎.

碗麵都好大碗架,三塊叉燒係燒過架,好香好淋好味呀,唔算好肥.拉麵都好彈牙呀,好正,食到好大聲,飲左少少湯都好濃架,朋友果碗蔥麵都見唔到D麵係邊,但佢話好好味.

由神戶坐車到六甲山再坐欖車到有馬溫泉

有馬竹取亭溫泉旅館, 好大好舒服, 環境一流, 食物都好有水準, 池水分金及銀兩款, 有私人及公眾溶池, 還有可以選擇自己的和服, 好細心的送我們一個袋仔, 可以放私人物品.

係溫泉旅館食了一餐餐, 一餐早餐, 實在是太豐富, 非常精緻的攞設, 服務係非常之貼心, 簡直有賓至如歸的感覺.

離開溫泉旅館, 出發去神戶, 我們在這裏行下有馬的街道, 映下相. 好舒服好靚, 好寧靚的一個地方.

從有馬坐車到神戶, 去了坐摩天輪及行了附近的市集, 神戶港好靚, 魔天輪都好高架, 有點畏高的感覺, 還有一個樂園, 是適合小朋友玩的, 有旋轉木馬,一些攤位等.

在神戶食晏, 見到呢間餐廳, 有一個CHEESE CAKE, 賣相非常吸引, 仲要係DOUBLE CHEESE的, 我們就入左去呀. 還叫左其它嘢一齊食. 一個焗飯, 一個PIZZA, 都熱辣辣, 多料, 好味道的, 都是充滿芝士的味道.

主角原來好細個的, 不過真的係好多芝士, 好味, 芝士好溶的, 一條一條絲. 正呀.

神戶牛最出名的地方係三宮, 我們見到呢間唔係好起眼的餐廳, 見到神戶牛的套餐又唔貴喎, 所以就揀左呢度食啦.

還叫左一枝啤酒, 先有三款前菜, 蘿白, 泡菜, 同埋青椒, 都好好味, 好爽又辣又刺激,然後係一些漬物, 有豆芽,海晢, 海帶, 仲有幾樣唔係好記得係咩, 但係好好味, 好惹味, 一大碟包住肉的菜, 仲有辣椒醬, 一碟牛肉, 好薄的五片, 一碟窩蛋生牛肉, 一大碟神戶牛,唔同部位. 有幾件配菜. 神戶牛肉好淋, 入口即溶, 要由淡味食到濃味, 仕應告訴我們怎樣食起, 好好的服務.真係每個部位都唔同, 但係全部都好好味. 唔會好鞋, 真的係唔同D.