其實濟洲市 Emart 隨近有好多食肆，每次都以本地人幫襯多寡為選擇既準則，萬試萬靈！另外呢一帶既食肆都有請一d中國既留學生為方便招呼中國客人，亦可以透過佢地去了解一下食肆既質素。由於未到食晚飯既時間，肚仔就有d肚餓，先食小小就當測試。

叫左以下兩款食物：
1. 鮑魚粥：第一次食，d 韓國飯仍然保持原粒狀，唔似廣東人既粥要煲到米開花先叫靚粥底。食落係好 "杰" 身，但係唔膩，仲應該加左一d特別既調味料，所以幾香。活鮑魚見住大厨用左兩隻切細放落粥裡面煮，新鮮彈口！

2. 冷麵：仍然係摯愛之一。麵條有彈性、配上香梨、青瓜，再伴上辣醬、芝麻，真唔捨得放手，亦係經常回味既韓食之一。

好自然呢次測試及格有餘啦！下午茶消費為 KRW

逛左幾個鐘後，又返去食 Late Dinner。因為海鮮都係濟洲島有名既出產，所以預左要食餐貴些小既海鮮，其實比起香港，一 d 都唔貴！叫左兩樣同係出名既食物：

1. 海鮮鍋 (中)：份量認真唔少。老闆娘將海鮮鍋放在爐上，親自將熱湯淋到兩隻放响鍋面仲活生生既鮑魚上，然後鮑魚因受熱而慢慢移動。我無估計到有如斯場面，老闆娘見到我個樣雖然言語不通，立即向兩隻鮑魚用英文講 "sorry sorry"！除左鮑魚外，鍋裡有硯、魷魚、有一種擁有瀨尿蝦既殼，淡水蝦既蚶既紅色蝦，味道非常鮮甜，相信係濟洲特別既品種。

2. 煎方頭魚 (大)：方頭魚其實應該係香港人叫既馬頭魚，响濟洲魚市場見到有唔少大大條而好新鮮既馬頭魚。基於 size 夠大，肉夠厚身唔易散，煎香後加上魚本身鹽份己提供足夠天然味道，唔需要任何醬油。要注意佢地有分唔同 size 賣唔同價錢，相信 size 都會影響食味。

Late Dinner 兩人連啤酒1支消費：KRW70,000 (約HK$420)