自助烏冬，第一次食的時候是十年前係涉谷食過，當年我個仔都只係八歲。之後都係新宿食過一、二次，今次去台北，係冇選擇下，食了。而香港的，一次都冇食過，點解，咪因為我好少去九龍那邊囉。點解今次會係台北食，都是因為那天台北車站有示威。超多人係那邊搵食，所以差不多好食的店舖都排長龍，冇位。而仔仔又想食湯麵等食物，最後，我地才係新光三越Food Court搵到這間烏冬食。這裡雖然人多，但都搵到兩個座位。之後我就去買嘢食了，好似日本咁，先要咗想食的烏冬，再選食什麼炸物。原想食木筒的，但又不想食豉油，所以都係叫返湯烏冬好過。見仔仔冇乜點食過嘢，所以叫咗碗大牛肉湯烏冬比佢，自己就要咗個細湯烏冬。見下午才食完MOS Burger的炸薯條，所以就只要咗三件炸蝦、一件炸鯛魚和一件炸蕃薯。買完後，就乜配料都冇加，只攞多二杯水就返位食。這裡的讚岐烏冬都ok彈牙，個湯幾清，味道都可以接受。而炸天婦羅方面，炸蝦好ok，好彈牙又爽。塊炸鯛魚最正，魚好新鮮好滑，好好味。塊蕃薯都幾好，夠甜夠粉。下次再來時，一定再食，食完後好飽，之後就坐車返飯店了。