3月24-25日同朋友及朋友的屋企人一齊去浸溫泉,一行二十一人真的很震撼.3月24日9:45am在皇崗集合,坐了差唔多兩個半小時先去食個晏先.

食完晏去第一個景點啦,就係旭日廣場啦,又要坐成個幾鐘車,到了,但係咩都冇,得一塊空地,導遊話公司指定既景點,但係佢都知係咩都冇得睇,問我地落唔落車,成團人都唔落車,跟住映了一張相就走了.

第二個景點又要坐一個鐘車,到左,係南樓呀! 導遊講解了一陣就俾左半個鐘我地行下映下相啦.

去完南樓已完成晒我地兩日既景點啦,跟住就係返酒店啦,好開心五點已到酒店. 休息左一陣及映下相就去食飯啦.

食飽飯去左放煙花,酒店有一間小店係專賣煙花及一些土產的, 我地買左一些一齊放,有指定放煙花區,係湖邊都幾安全,我地放左一些細細支的煙花,還有寸雲箭,還有買左一個大大地既煙花,放上去勁大聲,但係超靚呀!! 之後唔夠喉再買多一個大大地既. 好靚呀!! 放煙花既地方係有職員係度維持安全的呀!!

去浸溫泉啦,導遊冇講要帶每人一張房咭先入得去,我地有些人冇帶要返去房間擺,攪左一大輪先入得去,都唔算好多人,溫泉區都好大,分開大池區,有些可以滑梯,激流,溫泉仲有養生區及情侶區.泉水溫泉都夠熱,都好舒服呀!!浸左一輪後去左休息區休息下,有水果,養生茶及三文治可以免費享用既,休息了一輪後再出去浸左一陣就走了.

第二朝去食早餐,之後再浸過. 餐廳都已經好多人,食物選擇唔算好多,最好味係粥,有白粥及皮蛋廋肉粥,還有一些炒麵之類,但冇烘多士,炒蛋這些西式嘢,普普通通的一餐早餐啦. 食完休息左一陣又去浸過,我地今日可以睇清楚d溫泉呀,原來都好多種唔同既藥材,花,不過最可惜係冇我想浸既咖啡,牛奶,杞子....有當歸.....唔記得其它係咩了.

11點半離開酒店了,跟住去食黃鱔飯呀!!

回程了,差唔多五點返到皇崗.玩得好開心的一個旅程.