其實而家的「泰和飲食店」已經搬左, 新地址: 思南路36號..亦改名為「阿娘面」...

大家要注意的: 佢地的營業時間: 6:30-9:30, 11:30-13:00, 17:00-19:00..想去食阿娘面的..要好好安排時間, 以免「摸門釘」呀~

我同朋友仔就揀左13:00之前一定要去到食阿娘面的時間, 當日我地見離關門時間仲有少少時間, 就大安旨意咁去左行陣街, 最後去到就後悔唔早D到...(當然唔係撞正佢地關門....)...嘩, 好多人...完全未見過成間食店都係人...結果我唔理喇, 點都買左兩碗黃魚面先, 之後再「見步行步」...(因為我根本唔知成個程序係點, 只好望住人地點做, 我就點做..)..

原來程序係:
1.你先去收銀處買票

2. 之後就係霸位..(即係跟位....真係太多人喇...我建議的策略係你企死一個位...等你的目標客人一走, 就可以坐落去, 而且你一定要好明顯示意到比其他客人知道, 你係打算霸呢個位, 否則人地會見位就搶...)..

3. 之後等D服務員叫你個no., 你就示意比佢知知你坐o係邊..佢就會將你碗麵送比你...(其實佢地唔算出得慢, 你等到差唔多有位, 佢地就差唔到多到你個no...)...

黃魚麵 ($20): 其實唔係話好特別, 不過我未o係香港食過佢地的麵條, 所以口感都好新鮮, 我見其他客人會買埋一D辣的肉/醃菜...好似幾好味...份量亦可以接受....不過可能因為太多人喇, 你呢頭一有碗麵食緊, 就會有其他人打算跟你位, 所以好難慢慢品嘗, 就好似要快D食完, 比個位人地........


我唔可以話好好味, 但可以慕名來試一次, 同埋感受下o個種熱鬧氣氛, 當然怕人多同等位的, 唔建議你來試...