喺日本真係唔洗驚會餓親，有商店o既地方就好容易搵到有甜品食o既地方，就連地下街亦不例外，「Sapporo Sweets Café」就係其中一間。

咖啡屋以紅、白色裝潢，簡潔明亮，感覺甜得黎坐下一刻已想點食士多啤梨同忌廉。年輕o既店員面帶笑容，且溫文儒雅。

原來由狸小路四丁目商店街，即拉麵店位置，可以喺地底一直行返去日航酒店，慢慢行半個鐘都到。沿途經過多間店舖，雖大多已關門，但小肥最愛o既甜品店及零食店就仲好歡迎客人光臨。由於團員中有多位咖啡愛好者，當日又未有飲用咖啡，故行經「上島珈琲店」時，幾位對眼當堂發光。