天然景觀，心曠神怡

盡興而歸

平時自己晌屋企整早餐，都喺簡簡單單，麵包果醬，餐蛋治，邊有今餐咁豐富架！其實未嚟之前，晌芒果屋民宿嘅網頁，已見唔少人讚崔姐姐嘅早餐豐富又好食，今早卒之一嚐夙願啦。

雖則話喺韓式早餐，其實小弟都唔喺太清楚點先至算喺韓式，總之眼前嘅早餐就豐富啦。有豆芽清湯、泡菜、煎豆腐乾、鹵牛展及雞蛋、炒雜菌，加埋一大碟炒飯，韮菜海鮮煎餅，整體味道唔錯，尤其個韮菜海鮮煎餅，表面帶點脆口，又好有韮菜香，只喺個鹵牛展鹹咗啲。查實，噚晚已見崔姐姐做定準備功夫架啦，好似牛展就更加要一早鹵定啦，夠晒誠意。

位處濟州市北面海岸嘅龍頭岩，離市心極近，兜一兜過去睇睇都好快，所以喺個有唔少人到嘅景點。

龍頭岩有成近10尺高，色澤灰灰黑黑，其實喺火山熔岩經過海浪、風化長年累月侵蝕而成嘅天然景觀，由於貌似龍頭破海而出，所以就叫龍頭岩。當朝海邊超大風，吹到頭暈，但為咗睇睇依個都頗為栩栩如生嘅「龍頭」，辛苦少少都要！但話時話，走落石灘行近啲睇，感覺無咁似，反而啱啱經石級落到石灘，遠睇仲神似。

神秘道路（或神秘之路）喺一條視覺反差嘅有趣路段，長約100米，原因由於周圍嘅丘陵地形跟附近樹木生長方向所做成嘅錯覺。當你明明望住條路好似落斜，但啲嘢反而會向上爬。其實當小弟身處路上，感覺唔明顯，都唔知邊面上邊面落，好似旅遊書中嘅「示範」咁，用水樽做吓實驗，無料到。如果有粒波子晌身，可能效果唔同啲！

由濟州市去西歸蒲市，如取道中部公道都順路可經，唔需要刻意車過去，所以依個景點順路到此一遊就無妨，「專燈」揸車過去睇就無謂喇。

「噢雪綠」喺韓國出名嘅茶葉生產商，又喺綠茶連鎖專賣店，而濟州因為它嘅氣候、降雨量、溫差都好適合綠茶樹生長，加上漢拿山具有有機物含量整高且滲透性極好嘅火山灰土，配合埋清澈嘅火山岩盤水，所以成為「噢雪綠」嘅主要生產地，故此晌度更開設咗韓國唯一以綠茶為主題嘅博物館。

博物館分幾個部份，有古董茶杯展示，世界唔同地方嘅茶具，亞洲各國特色嘅茶葉，以及泡茶相關工具，其實地方唔喺好大，基本上輕輕鬆鬆一陣就行晒。此外，仲有啲炒茶工作坊、茗茶班，樓上另設立一個展望台，可以眺望對出一片綠意盎然嘅茶園風火山，如遇上天氣好，望著綠悠悠嘅茶園，可以令人感覺舒暢。博物館內梗唔少得自家品牌茶葉嘅銷售，行入啲就會見到有好多茶葉嘅相關產品，如茶葉、化妝品、文具……等等，自用送禮皆宜。假若無時間嚟濟州，「噢雪綠」晌首爾都有好幾間專賣店，而晌全國好多大型百貨公司亦搵到佢嘅蹤影。

如果愛好茗茶嘅人故然要預留時間啦，不過對飲茶一般，但鍾意飲飲食食嘅朋友，不愁無「細藝」，因為博物館盡頭開設咗間咖啡室，有不同綠茶飲品及甜點，綠茶控晌度就更唔捨得走喇！

玻璃城堡晌2008年11月開幕，都算幾新，喺全韓國最大嘅玻璃主題公園，分室內及室外展覽區，共有6個唔同嘅主題，除獨創展品外，亦有搜集來自世界各地嘅珍貴玻璃藝術品，約有350多件作品。

走進依個與眾不同嘅玻璃世界，對住五光十色、絢麗閃爍嘅玻璃工藝品，盡情睇， 盡情影，真喺要預番多啲時間。因為作品實在好獨特，又有趣，而且款式超多，如傑克與魔豆嘅樹莖、玻璃石頭爺爺、玻璃鏡迷宮、灰姑娘玻璃鞋、玻璃花園……精巧細緻，實在擺唔到太多相同大家分享，只好掃瞄佢個平面圖俾大家參考，有興趣登入佢網址了解多啲。

除各式展品，亦有玻璃工藝體驗室，可學習玻璃吹製技術，不過要另外付費。至於尾站喺必然嘅手信店，不少玻璃精品，唔買睇下都好。由於玻璃城堡就晌噢雪綠茶博物館附近，相隔十來分鐘車程，好值得前往遊覽嘅一個主題公園。 

由於晌「噢雪綠茶博物館」、「玻璃城堡」嗰邊無咩好食，所以包車司機梁先生車我哋去西歸浦市再睇睇，最後去咗emart個food court，貪方便，夠快趣，又可以順道晌emart買吓手信，因為依度價錢平，款式多吖嘛。

雖則話喺food court，但其實得一間鋪，只喺同時賣中、日、韓食物，而且所有指示全韓文，不過手指指點菜都應付到。穩陣啲，揀咗個吉列豬扒定食，賣7,000韓圜，為起港紙$50左右 ，抵食到痺啦，除咗大大件吉列豬之外，有飯又有烏冬，仲有泡菜、椰菜絲，而豬扒炸得鬆脆甘香，入口唔油膩，飯粒黏糯，整體質素不俗！

2002年舉行嘅韓日世界杯，濟州世界盃會場就喺當年世界杯比賽場地之一，場館可容納40,000多人，設計亦好有心思，成個公園外形喺根據濟州島獨特地形而設計，頂幕又參照濟州傳統捕魚嘅魚網而製成。世界杯之後，繼續用作各種球類及田徑比賽之用，內部部份地方改作綜合娛樂之用，例如：博物館、戲院、spa-saunal中心……等。

雖則小弟喺波牛一名，但個濟州世界盃會場嘅名氣又未至於吸引我入內朝聖，只喺由於佢正正晌emart隔離，行過對面馬路就喺，完全無刻意預算去，故此，晌門口影張相留個念吧！

濟州有三大瀑布：天地淵瀑布、天帝淵瀑布、正房瀑布，3個瀑布都可謂各有特色。

天地淵瀑布喺濟州島嘅代表，高22米，闊12米，極具震撼力；
天帝淵瀑布喺濟州島最大嘅瀑布，高22米，亦喺罕見嘅三段式瀑布；
正房瀑布喺全亞洲唯一直接流入大海嘅瀑布，高23米，闊8米。

今次揀嚟天帝淵瀑布，因為佢較多嘢睇。首先由入口一轉落去就喺第一瀑布及天帝淵（荷花池），瀑布高22米，而池深有成21米，不過當時正值冬天，無乜雨水，所以個瀑布都無乜嘢睇，但個瀑布外形又幾特別，形狀呈橢圓形，如一條條石柱砌成。可能你會問，咁依個瀑布都無水流，下面第二及第三瀑布一定無嘢睇啦，咁又唔喺喎，點解唔喺？臨尾先再解釋。此外，據講如夏天嚟，池子色澤鈷藍而清澈，特別靚。

順著指示，沿石級上上落落，距第一瀑布300米左右路程，就嚟到外形筆直嘅第二瀑布。如果雨水量足，飛瀑直瀉而下，氣勢磅礡，但如果冬天雨水不足，瀑布分三疊飛流而下。

晌第二瀑布及第三瀑布之間嘅溪谷上，架起一條橫跨河川兩岸嘅拱橋「仙臨橋」（別稱七仙女橋），橋嘅兩側有手執樂器嘅仙女乖雲飛翔嘅浮雕。過橋對面又有一個五福泉、七仙女傳說碑（記載七仙女下凡之傳說）及天帝樓（內牆、橫樑繪有仙女圖和神仙圖嘅傳說故事）。題外話，五福泉有5種動物嘅石雕，包括金魚（發財）、烏龜（長壽）、鴛鴦（愛情）、豬（生子）、龍（當官），都各有含意，亦喺韓國人最喜愛嘅5種動物。

要去第三瀑布除咗行得比較遠之外，上落石級也較多，還要計及回程，所以我哋無行到，當然相片更加欠奉。但行吓山，睇吓瀑布，幾舒服，值得推薦嘅景點。講番點解第一瀑布無水流，但下面兩個瀑布又有水流，原因喺水從第一瀑布右邊山谷隙縫中流入天然泉水，再不斷進入天帝淵，然後再向下流去第二及第三瀑布嘅！

是日最後一個景點，由天帝淵瀑布返去西歸浦市中心，順路可經過中文大浦海岸柱狀節理帶，一個似喺由六角形石柱堆疊而成嘅特殊山崖地貌，實際上喺由岩漿湧出地面冷卻時產生嘅收縮現象所形成，大多數為5邊或6邊形。

名氣唔算好大，但亦已被列入聯合國教科文嘅天然紀念物第443號，有興趣啲天然景觀，不妨順路過嚟走走！

從韓國觀光公社網頁所知，傳統市場晌全韓國有成1,500多餘個，其中具代表性嘅8個市場被選定為揉合地區觀光與文化結合嘅「文化觀光型市場」，讓市場變為既可參觀市場，又可遊覽週邊旅遊景點嘅傳統市場，包括：仁川新浦市場、春川浪漫市場、溫陽溫泉市場、光州良洞市場、麗水喬洞市場、釜山札嘎其市場、蔚山南倉市場及西歸浦每日多萊市場。

「韓國刮起的健行風氣中心在濟州多萊健行路。濟州多萊健行風氣為傳統市場帶來活力朝氣，甚至變更市場名稱。1965年以5日市集開始的市場隨著每日開市，自然成為‘西歸浦每日市場。但因大型超市與現代化流通連鎖業者的入駐，使得人潮變得冷清的市場，因為想漫步於大自然中，享受健行的多萊旅客聚集，市場又開始恢復活力，並更名為”西歸浦每日多萊市場”。 

濟州島西歸浦市區內的西歸浦每日多萊市場位於漫步”濟州多萊6路線”(索沼溪谷 ~ 獨立岩)走著走著自然會抵達的地方。一邊漫步，一邊參觀蘊含平凡生活面貌的市場，可說是在人群當中體驗多萊健行。標榜‘多萊文化’的此市場所嚴格遵守的營業規則是”標明生產地制度”與”白天12點以後車輛禁止通行”，透過老實正直的交易，盡市場本來該有的本分，並創造可放心參觀市場的文化。橫跨市場中央的寬1公尺，長100公尺的清涼水道是全國傳統市場中，第1個設立的生態空間。」（擇自韓國觀光公社網頁）

其實小弟嚟之前都聽過「多萊健行徑」，不過「每日多萊市場」則無乜留意，今次純粹第一日到步，晌住宿地附近閒逛，誤闖哩個咁出名嘅「街市」。雖然話佢被定為文化觀光型市場，不過就眼見耳聽，都喺當地人居多，遊客則寥寥無幾。但感覺幾好行，乾淨企理，通道寬闊，攤販擺賣井然有序，傳統得嚟非一般市場，其實除蔬菜、肉食、海鮮，仲有小吃、生活百貨……等等。第一晚草草行完，第二朝我都有再嚟過！

飯卷天國晌韓國喺一間頗有規模嘅連鎖餐廳，有晒網站介紹，不過全韓文，唔識睇。室內裝修簡潔，感覺企理衛生，而佢哋所走嘅喺抵食路線，最平1,000韓圜都有交易，不過就只喺齋飯卷（即喺壽司卷），有餡嘅都只喺2,000韓圜起步，為起港紙15蚊左右。

供應飯卷一定唔少得啦，晌入門口位就見到位「阿豬媽」密密捲，不過因為天氣凍，我哋想食多啲熱嘢，所以就無點到。其次仲有餃子、炒麵、拉麵、碟頭飯、炒飯、炒年糕、吉列類、石鍋鍋飯……等等，頗多元化。

菜肉餃子 KRW3,000
一客有成17粒，包得結實多餡，菜跟肉嘅比例平均，味道唔算好突出，但天寒地凍食住熱辣辣嘅餃子就最好不過。

牛肉飯 KRW4,000
成個定食咁款，有泡菜，有牛肉清湯，個湯最啱用嚟暖暖胃。個「碟頭飯」都幾大碟，啲炒牛肉有唔少茨汁撈飯，正，內裡又有洋蔥、青瓜，味道不俗。

蝦炒飯 KRW4,000
相對其他似乎份量較為少啲，餡料亦唔算多，不過， 炒飯炒得唔錯，幾爽身。

嚟得依度，都唔喺打算食咩好嘢，質量屬中等，勝在抵食，又免加一，食得又輕鬆自在，所以，我哋兩晚都走咗過嚟食晚飯。

以往去旅行，晌整個行程上就算唔喺越住越好（唔喺豪呀），尾段總會住得舒服啲，因為行程近尾，難免因舟車勞動，身體狀況會疲憊啲，住番好少少當作鼓勵。不過，今次韓國之旅就一反以往常規，嚟到最尾兩日，揀咗間慳錢廉宿「Jeju Hiking Inn」，原先喺親友介紹，上網睇過好似幾好，又晌西歸浦市中心，交通都幾方便，兼且挺抵住，斷人頭計（下面房價KRW13,750喺指每人每晚房費），由1人房到4人房都有，所以就扑鎚試試。

先講講Jeju Hiking Inn嘅「環境篇」，包括旅館環境及外面環境，下一篇「住房篇」先再介紹房間內籠喺點。旅館環境，我想都可以用「噏耷」嚟形容，大堂、走廊、天台嘅設備及傢俬都幾殘舊，還好嘅喺都算乾淨，唔會一陣味，而且，勝在有免費wifi，雖然唔喺好強，但夠用就得啦。

外面環境方面，其實位置唔錯，上天台可以遠眺新緣島跨海大橋，又可以行到去天地淵瀑布，附近有間中型Family Mart，後尾仲發覺有條食街添，真喺走寶錯過咗，此外去每日多萊市場亦很方便，10min腳程就到。

我哋住晌4/F尾房，因為旅館無電梯，所以拎住重重嘅行李撐四層樓對部份人都幾甘。4人房都幾細吓，一入門口左邊就喺「簡潔」嘅廁所，除基本設備都無咩多餘嘢，只有一支唧唧裝梘液，洗頭水、護髮素、牙膏牙刷唔該自備。沖涼熱水都唔喺好夠，所以，到夜晚我哋都要分段隔開嚟沖。

再入就喺睡床，左邊有一張雙人床，右邊喺一張上下格碌架床，仲有一部老爺電視，空間唔多，我哋擺3個喼都喺勉勉強強，如需要再擺多個喼都唔知點好！所以，都有少少後悔訂一個4人房，早知訂兩個2人房感覺會好少少囉！幸好被鋪都夠乾淨，否則就大家都無覺好瞓，加上今日行程豐富，去咗唔少地方，大家都好攰，所以一沖完涼就瞓著。

Jeju Hiking Inn格局、環境始終都較適合單人或一啲想慳錢嘅背囊友。

房間頗大, 有電腦及wifi供應(免費), 距離subway只係5分鐘路程, 兼具附近有convenient store 十分方便~ 而且去熱間景點如東大門都只需十幾分鐘, 夜晚冇野做隨時去行下都得~

唯一要彈既地方就衛生問題, 房間入面既物品如梳, 浴巾, 拖鞋等都唔太乾淨, 建議自備~

如果budget有限而又只需一個地方訓下覺, 呢間選係一個唔錯既選擇~

看似跟一般coffee shop無異, 估唔到佢地既窩夫咁好味, 外脆內軟, 加上雪糕同cream, 好邪啊~

俾錢後佢地會俾一舊野你, 當食物整就會震動提醒你出去取食物, 蠻有趣!

南大門比東大門隨意, 消費亦相對較低, 貨品種類繁多, 就如香港既旺角, 喜歡購物既朋友值得一去~

若非有日本朋友帶路, 我自己一人一定唔會踏足夜店~

韓國有一個term叫biboobiboo, 意思係跟異性跳貼身舞un下un下咁, 入到去當然要見識一下~

入面簡直係年青人把仔把妹既樂園, 想識韓國朋友又鐘意飲酒既朋友必去!