9月5日（炎）：鑽石公主郵輪東瀛遊第六日之Otaru 小樽

其實一年前已跟家人去過北海道，當時單靠火車及地鐡自遊行咗五日，記得印象最深刻就係「小樽」（Otaru）。「小樽」o既購物熱店，觀光景點及餐廳食肆位置都好集中，有咗上一次o既經驗後要規劃是次小樽一天遊亦簡單得多。

同上次一樣，我地主要都係以雙腿及散策循環巴士往返不同地點。由於行程都幾緊密吓，大隊朝早八點半就出發，買完頭輪手信後即喺市內名店「LeTao」嘆杯熱朱古力及超人氣芝士蛋糕做早餐，然後就由街尾開始掃起，由音樂盒博物館到試酒場，由皮革店到蜂蜜專門店，去到邊買到邊，買到差不多夠鐘就喺附近o既巴士站度上車去壽司街間「旭壽司」狂食魚生。

可能早上行得都幾多路吓，長輩們都話飯後想飲番杯咖啡先再繼續逛，無奈壽司屋並無咖啡供應，團友們只好順住條路搵，咁好彩行咗一分鐘就俾我地發現到一家細小o既家庭式茶屋「茶房おこばち Okobachi Café」。喺小屋內休息咗一個鐘頭左右，十二人又再次起行去運河嗰邊睇景，喺免稅店買咗第N輪手信後就慢慢行去「北之漁場」豪食即燒活鱈場蟹做下午茶。

食完個豐盛o既下午茶，幾位較年長o既團友就由大肥爸爸帶領下，搭巴士返回郵輪。其餘八人則襯歡樂時光，喺附近一家隱蔽o既小酒吧「Nikka Bar Rita」度飲咗round限量版威士忌，緊住再去觀賞運河o既夜景，之後仲要食多碗巨型拉麵後方才趕回「鑽石公主」，可謂玩到盡呀！

10月22日（天晴）：小樽

只有五日遊北海道，年長o既團友們又唔可以過份操勞，所以小肥要好小心去揀選觀光景點、交通工具、用膳餐廳及控制時間。第一日先喺札幌市中心瘋狂購物，第二日就決定搭半個鐘頭JR火車去遠少少o既小樽，貪佢地方夠細，又有條聞名日本海外o既壽司街，景點夠集中，唔想行路都可以跳上循環巴士代步。

為咗要避開上班返學車站o既繁忙時間，八人由酒店隔離o既札幌站乘坐早上九點十三分班JR列車前往小樽。到步後，即轉乘市內o既循環觀光巴士前往最遠o既地標食早餐，然後就慢慢沿住條主街一邊瀏覽、一邊試食、一邊狂購。當日都食得真係夠誇張，中午未到，先喺「北の漁場」即買即食鱈場蟹及壽司小食，跟住就轉場去「壽司街」離巴士站較近o既「旭壽司」度豪食魚生；行到天黑，小肥仲要拉大隊去小樽名芝士蛋糕及朱古力店「LeTao」度嘆返個下午茶先肯離開。喺小樽度過大半日，雖然當中都有哈碌地搭錯車，幸好團友都大感意猶未盡，仲話下次如果再黎一定要過一晚夜添，XO仔總算冇令大家失望。

小樽，一個浪漫的小鎮。

確實值得用上一整天的時間去感受它的日與夜。

冬雪，為小樽添上多一份的淒美。

喜歡旅行的我，偏愛一些語言不通的國家。北海道是很多人夢寐以求想到的地方，很幸運我可以在冬天訪問這個雪國。

下集(帯広‧小樽‧札幌)