第一天

香港去越南要2小時25分鐘,但我今天2小時就去到,真係好.一落機就感到好鬼熱,之後就乘車入大樓,開車唔夠3分鐘就落車,而過關和取行李都好快,估唔到效率會咁高.

一 出機場就往右走,行 . 行 . 行 去咗舊機場,問完路就是旦企在一旁等巴士,因我左望右望都唔見有巴士站或巴士的東西,在路旁一路等d汗就不斷流,終於15分鐘後見到架152巴士,我就揮 手,點知有條友示意我走出馬路,咁我就照做,原來司機見到有客就會停在對面馬路開門比客上車,唔怪之得無站牌啦.  一上車諗住比錢啦,但司機叔叔又無行動,原來座在我旁邊的小姐才是售票的,我比VN$3,000佢唔收,又手指指我的行李,我都唔明佢做乜,於是我將手上 的越南盾任佢拿,而佢就拿了VN$6,000,原來件行李都要收費,不過算啦,我+件行李都只是HK$3,如我乘的士要US8架.

大約 45分鐘就落車了,在街上行都無人聊我租房,咁我就繼續行入條橫街,終於有條友聊我了,咁我梗係要先睇房啦,點知上完一層又一層,終於去到頂樓5/F,間 房都算清潔又有冷氣,他開價要US$12,我還價US$10,點知他只肯減少少,最後US$11成交.  成交後才醒起唔記得問有無得上網,於是拿拿上取部電腦開機試吓,又得喎.

之後就行去一間 resort office,因早前 sent 了e-mail 同他們訂了住房套票,所以要去比錢,誰知聯絡開的同事放假,而其他人又唔知頭唔知路,唯有明天再去.手續雖然攪唔成但我都順便問咗路.

看 地圖好似好近的檳城市場(Ben Thanh Market),點知揾來揾去都揾唔到,最後就梗係要問路啦,雖然大家唔係好溝通到,但我一早影印定晒d圖,所以都無問題,但我發覺香港d旅遊書d地圖真 係唔多掂,當迷路時,地圖上的地標我揾唔到,但當見到一個大商場時,竟然在地圖又揾唔到.攪到我要常常問路,真係煩.

晚上檳城市場內的檔 口已關門,但門外卻開了一些像女人街的檔口和好多大排檔,但周身無蚊,乜都唔駛諗,在網上見人話在這市場附近有好多銀樓可換錢及對換率都唔錯,於是找了幾 條街才揾到,US1 : VN$18,000 , 咁我就先換US$300,即有VN$5,400,000,當我拿上手數時,我竟然唔識數,要數了幾次先掂,都唔明點解d錢要有咁多個 0 ,好鬼煩.

有 錢就梗係去醫肚啦,在附近找了檔好多人推介的大排檔,食海鮮是我的至愛,好多人會話一條友去旅行食就最麻煩,但對於我來說一d都無難道,因我一條友都可叫 好多野食,今餐我就叫了一碟炭燒篇貝(d肉好細粒)+炭燒蜆(唔好食)+炒勝子(好味)+2杯蔗汁+一碗甜品(似耶汁大菜糕),一共VN$110,000

食 飽飽行咗陣,就搭電單車去買明天的水上木偶劇的票,點知揾唔到,原來我f抄地址時,將28B-->288,最終司機要問人攪了一大論才將我送到去, 而車資亦由VN$10,000變為VN$20,000,最慘我去到想買票時,售票姐姐話沒有預售,明天的場次明天才賣,唉,我唯有又乘電單車 (VN$10,000)回 Sinh Cafe (旅行社) 報團.

明天8:15出發,參觀高台教和古芝地道 ( Cao Dai Temple & Cu Chi Tunnels (1 day) ),團費VN$140,000 (or US$8) ,但唔包午餐和地道VN$80,000入場費.

報完團就在酒店樓下買咗個外型類似煎堆的食物做宵夜(VN$2,000),另外再買咗支1.5L的水旁身(VN$6,000),因天氣太熱,唔太喜歡飲水的我,避免中暑,都唯有買支水.

第二天

今早6點幾就要起身,因要去 resort office 比按金,原本轆咭架,點知d職員唔係好熟部機的運作,於是我要比一半現金,另一半就去到 resort 才轆咭,大拿拿US$36,幸好我帶多了美金去.

之 後就去到 SINH CAFE 門口等出發,差不多時間有幾個去不同地方的團出發,每團幾十人,一條友的我,最怕聽唔明d雞腸唔識上車,最終梗係順順利利上車啦,很快就去到第一站,名義 上是厠所時間,實際上是 shopping time,之後上車往 高台教 (CAO DAI TEMPLE) 進發,車程約2小時,咁長時間就梗係最好瞓一陣啦,點知旁邊座了個死鬼佬,他和朋友由上車傾到落車,真係多得佢唔少,攪到我瞓得唔多好.

在 車上涼了2小時冷氣後,一落車就感覺勁熱,但時間有限,唯有拿拿淋行快2步去影相,差不多12點就要入廟,因12點正會有一次讀經,而廟亦分男女入口,但 唔知點解我從女入口入去時,比d女職員指我去另一入口,而那個男入口卻擺滿男男女女的鞋,於是我亦從此入口進去,奇怪地又無人阻難喎,真係不知何解.

睇 了15分鐘就要走人,因要去食午餐,今餐是自費的,一看個餐牌就知大鍋,因我d雞腸實在太差了,都唔知有乜食,於是求其指了個 spring rolls with rice ,最多唔好食就只食白飯,幸好原來是炸蝦卷飯,味道都ok架,而這個飯價值VN$35,000+ 一罐可樂VN$10,000

食 完飯又上車瞓,粒幾鐘後,就去到古芝地道 (CU CHI TUNNELS) ,聽導遊介紹完再看一段video就開始行,其中一個洞口專比人企入去影相的,而我梗係唔拾輸啦,但因身型問題,上落洞口時真係有點難道,因要非常靠臂 力.   另外亦有一段地道可供遊客行,對於我的身型來說,簡直 easy job ,對於好多人都話入內又黑又無空氣,我又唔覺有以上問題喎.

行 到身水身汗,終於玩到下午5:00就走人,回到市區已6:30pm,一落車就打算搭電單車去 PARKSON PLAZA,因那個商場有個美食街和超市,點知個司機竟然開價3萬盾,我梗係唔理他啦,他見我唔搭就自動減價,但不老實的人,不論減價多少,我都唔會搭, 之後都有其他司機聊我,可是全都是不老實的,所以我就諗住行過去,行吓行吓就去到檳城市場,求其入咗間 PHO 24 食野,現在有很多套餐選擇,我就選了一個VN$39,000,有一碗粉+半生熟旦+甜品+茶,不雖加一,好超值.

食 飽飽就搭電單車去睇水上木偶,點知又比我碰上昨天的司機,我梗係幫襯佢啦.去到水上木偶劇的售票處,竟然貼了 8:00pm  NO SHOW,唔係化又睇唔到,於是問吓售票姐姐,佢話今日真係無第二場,咁我問佢明天有第二場嗎,她又話無,咁我再問可否買定明天6:30pm那場票,佢竟 然話得,天呀,昨天又話無預售,今天又比我買明天的票,真係比佢玩死,不過總算確定明天有得看,票價VN$65,000,大約看50分鐘.  買完票走出門口有檔買已切的水果,於是我又走去買了西瓜和菠蘿,然後取出一疊錢任佢拿她一共取了2萬盾,又幾平喎無p我.

買完水果又搭電單車去 SAIGON TAX TRADE CENTRE,因那裡亦有一間超市,我要去睇吓行情和掃定少少貨去 resort 時享用.一掃又成7萬盾.

掃完一大袋貨走人時,在門外看見一些夜景,原本我都打算搵晚去影相,點知又比我唔覺意看到,雖然手上有一大袋食物好唔方便,但我都唔理了,爭取時間影相要緊,話需我會在越南11天,但總覺得時間好像唔多夠.

影完相又搭電單車回酒店,在酒店附近再買了個法包做宵夜,1萬盾抵到難,但味道就麻麻地,可能我唔要牛油的關係,個包好乾.