是次行程首要目的係為了 Bandai 魂 Nation 2009, 購買會場限定品同入場睇下展品......所謂展品, 令人十分失望, 可以話係簡單放幾件玩具, display 下就算, 全場唔比影相......除左因為要買會場限定, 完全冇比入場費o既意欲, 見唔少人排完有排買限定都唔入場......覺得自己蝕左......展覽館位於<電車男>中主角及御宅族中常到的聖地 - 秋葉原. 秋葉原電氣街聞說有好多玩具, 的確有好多玩具, 不過都係電玩相關產品多, 而中古玩具店亦未必會遇到心頭好, 一切都係講運氣, 係呢個"聖地", 除左會場限定, 咩收獲都冇......而最令人討厭, 就係成街都係著住 Maid 服o既人派傳單. Maid 服已經令我反感, 如果當時人唔靚, 就更加......秋葉原, 感覺認真麻麻......真正玩具聖地, 應該係中野, 一個商店街有o既珍品, 贏晒成個秋葉原. 最後都搵到自己想搵o既"玩具", d 70 年代o既超合金, 不過貴到上天, 重貴過香港, 駛咩係日本買......邊個話日本買玩具一定平架? 多左報導, 出晒名, d 舖頭自然見錢就搶. 要搵"玩具", 香港旺角可能更方便......之後都去左新宿, 涉谷周圍行......如果秋葉原係旺角, 呢 2 個地方應該係尖咀同銅記. 周圍o既景物完全兩種感覺, 高檔好多, 女孩子質素都高好多......係涉谷, 真係見到有"淫業星探"......飲食方面, 價錢平均都比香港貴, 但就算連鎖性食店好似吉野家呢 d, 質素都比香港好. 普通餐廳, 七八十蚊貨仔有時都食到香港百幾二百蚊o既質素......主要活動地點都集中係商業區, 市區, 冇點去過咩景點參觀, 除左周圍行, 見到 d 平時冇機會見到o既景象, 有 d 晒......今次花太多時間搵"玩具", 但最後都失望而回, 下次可以花多 d 時間觀光......
大型商場入面未必有好傳統o既裝潢, 但可以有傳統o既師傅.
大型商場o既餐廳都未必好貴, 而且質素都唔錯.
係秋葉原行左成日, 之前係 UDX 排魂 Nation 果陣已經留意到有好多食肆, 所以夜晚就係度搞掂. 日文餐牌完全睇唔明, 侍應 d 英文都唔掂, 不過有英文餐牌.
點左吞拿魚壽司, 火炙壽司. 吞拿魚壽司有大拖羅, 中拖羅, 同平時食開果 d 吞拿魚. 大拖羅, 中拖羅都幾好, 脂肪夠, 食落好有魚油味. 火炙壽司好有水準, 唔會完全燒熟, 只係燒到表面熱熱地, 咬落重好新鮮. 不過海膽就麻麻, 香港成日都食到果 d 級數, 唔太新鮮.
最後加左個燒洋蔥......未試過o甘樣食洋蔥, 成個燒熟, 外皮燶晒, 但入面就好淋, 好有水份......不過差唔多 $50 食個洋蔥, 試一次算啦...
推介菜式: 大拖羅
每人消費: 約4500日圓 (晚餐)
評分:
味道4
服務3
環境4
衛生5
抵食4
成街都係拉麵舖, 食左幾間連鎖店, 出名o既有一蘭, 同埋康竜.
係門口入銀, 揀拉麵同加 d 咩餸, 之後就入去坐底, 揀湯底, 辣度同調味, 間間都係o甘上下......
食左最普遍o既拉舖, 追加 3 塊叉燒、紫菜同半熟玉子, 盛惠 1000 yen.
湯底一般, 冇咩特別, 叉燒咬口唔錯, 不過好薄, 紫菜都好夾個湯. 最正係半熟玉子, 蛋黃好新鮮, 比一蘭o既好.
貴香港少少, 好食過香港好多.
基本上冇服務可言, 只係你 order 佢煮完拎比你, 不過, 揀湯底, 辣度同調味佢有英文版比你, 唔識日文都唔怕.
推介菜式: 半熟玉子
每人消費: 約1000日圓 (午餐)
評分:
味道4
服務3
環境3
衛生3
抵食3

牛肉飯
金錢有限, 總不能餐餐大魚大肉, 係浪費 d, , 但見就腳, 都要幫襯下好有親切感o既吉野家.格局同香港好唔同, 坐低落單, 同連鎖拉麵店差唔多.牛肉飯 d 牛肉肥瘦比例同香港果 d 差唔多, 不過鮮味好多, 牛肉汁亦冇香港果 d o甘咸.不過, 牛肉飯, 就只有牛肉飯, 冇湯冇野飲, 飲茶啦.
每人消費: 約600日圓 (午餐)
評分:
味道4
服務3
環境2
衛生3
抵食3

牛燒肉定食
梗有一間係附近, 出現次數重多過吉野家o既松屋, 都係食果 d 野, 都係果 d 格局.
叫左個牛燒肉定食, 除左飯之外, 有湯有個沙律.
沙律 d 菜好新鮮好爽脆, 不過唔好食.
牛燒肉, 平時食開牛肉飯果 d 牛肉燒完, 同飯分開上. 好油, 比平時果 d 牛肉咸 d , 不過好惹味.
都係細舖 bar 檯格, 但裝修好過吉野家好多, 食物選擇都多 d.
推介菜式: 牛燒肉定食
每人消費: 約800日圓 (午餐)
評分:
味道4
服務3
環境3
衛生3
抵食4

吉列豬扒拼吉列牛肉餅
又係食連鎖店o既野, 今次係吉列定食.
香港冇呢類型連鎖店, 其實都係吉野家同松屋果 d 格局.
吉列豬扒拼吉列牛肉餅定食, 有湯有飯. 伴碟 d 菜好新鮮, 中和食炸野o既油膩感. 吉列豬扒果個皮好脆, 唔厚唔油, 肉質唔錯, 有肉汁, 好高質素. 吉列牛肉餅, 咬落入面冇咩口感, 有 d 似薯餅, 不過 d 料係牛肉.
六七十蚊貨仔, 拍得全香港百幾蚊果 d 吉列, 好抵!
推介菜式: 吉列豬扒拼吉列牛肉餅
每人消費: 約800日圓 (午餐)
評分:
味道4
服務3
環境3
衛生3
抵食4