返左0黎差唔多一個月...但日日都係咁執返d行李!

仲有好多野要處理...所以遲遲都未有時間打遊記呢~~~原本在yahoo 打開遊記~ http://hk.myblog.yahoo.com/kennies-travel/近來被openrice編輯邀請來寫~但都唔知點打...

東京17天之旅! 3月20日-4月5日

人物只得我--kennies 一個人! 但去到東京就不算只得我自己一個啦。

至於點解會選擇一個人去東京17日?

其實自己一直都想嘗試一下住在日本的生活...起初計劃2個月...之後1個月...最後由於資金問題...所以17日!

加上有親愛0既姑姐住0係東京...住宿不成問題! 所以膽粗粗,自己一個去闖一下吧。

好啦!唔好講咁多!出發~

3月20日....由於飛機8點30分起飛,所以4點已經要起來!

做慣夜貓0既我...點會一早就訓!最後磨到點幾先訓...加上心情緊張!結果沒睡過坐最早的機場巴士出發去機場check-in lu~

請大家先注意,我的行李出發時已經有"19.4kg"!!! 點解咁重?冇計! 我家唯一大少少0既係硬gip...本身已經有7kg...加我0既衫加埋姑姐0既手信! 所以就咁...而我坐0既西北航空每人只可20kg免費托運行李....即是說我的行李差點爆磅! 大家可以想一下我回來的情況會是怎樣...check-in後被阿媽帶去食早餐..但明明上機也有早餐吃!可能佢擔心唔好食掛!

7點半左右就入閘了!

預備上機~幫架機影張相啦!

班機全機爆滿!因為東京只係一個轉機站,架機最後會飛往美國--底特律!所以很多外國人啊。

飛機餐...似曾相識的....

唔....就是幾年前跟朋友去14天東京時...又是坐nwa....又是這個飛機餐 上機前已經吃了炒蛋....現在又有蛋...

大家見到右手邊那個批嗎? 我也不知它是什麼批....完全不知道.........

飛機餐!我也不會要求這麼多了!4個鐘的機程只好打機度過....降落之前經過富士山! 機長也廣播說 "大家可以在左手邊的窗看到富士山啊"...但我也不知是不是看到....

落機之後就擔心啦!關生同衛小姐0既事件發生之後...日本人對香港人0既印象應該差左!

早在出發前...聽朋友講要搜所有行李....甚至話搜身! 真係擔心佢整亂我0既行李0架嘛!

最後.....取回自己的行李後,出禁區前,的確所有人都要排隊給passport關員查閱。

我察覺到日本居民查閱passport後就可以走了~ 外國人的就先問你幾句吧~ 香港人的...多數都要你打開行李給他搜搜。

當然我都有份打開行李...全程關員友善態度,加上我可以用日文同佢溝通!所以一切順利。出禁區lu!

第一件事係去買車票去調布!因為姑姐就在那兒接我~

我坐的是limousine bus~ 這間公司有多條路線去多個大站!

http://www.limousinebus.co.jp/

不過車費又蠻貴的! 2300yen~ 視乎你去哪個站吧!

由於2點50分先有車...但當時只是1點4x分...結果要呆等1個小時

機場往調布的車程有2個多小時.....結果5點才到調布!

在車上已經看到日本表弟--shoki 在迎接我了!!

之後再坐姑姐的車回姑姐家lu!

我花了一整天才到達姑姐的家....真的很累啊~~~

待續......

經過一大早起身,4個小時機程,2個多小時車程....我終於都到了姑姐的家!

未來的17天,我就係要住0係姑姐屋企嚕!!

真係打擾晒姑姐一家人啦。

其實姑姐是嫁了給日本人姑丈,所以就要住左日本。而我們家人到日本就省丟住宿費了但經常打擾人家都十萬個唔好意思啦。

登登登登....

呢棟就係我未來17天的家啦! 樓高3層~又大又舒服呢~

而夜晚只得我自己一個睡在2樓啊!好大間房....其實都驚驚。

日本每戶都有屬於自己的門牌...也就是他們的姓氏

呢架就係遲d會車我去玩0既座駕啦! 姑姐話買返0黎已經係唔知第幾手0架啦....外面亦已經傷痕累累。

但車其實內部唔錯,性能又好就得啦!個樣.....都係其次姐! 咁你又知唔知佢買返0黎用左幾錢呢?

只係45000yen!!!!!!!!!!冇錯!你冇睇錯,我亦冇打少個零啊!

點解有兩個門口? 其實日本人而家好興0架。一棟屋分兩個門口。

其實係俾d同老人家一齊住,但又想大家有自己0既空間,所以就分開。自己有自己0既地方。但其實又係住埋一齊喎。

我姑姐就係同佢奶奶住。佢奶奶就住在最底0個層! 而姑姐一家就住2同3樓囉。

終於講到屋0既入面啦~

但始終係人地屋企....所以我都唔周圍影同放上來啦!

我只係一定要講我最鐘意0既就係佢0既開放式廚房!

你睇下....幾大....幾多位! my dream kitchen!

如果我屋企0既廚房有咁大咁多位...我諗我一定會日日都煮野食囉!

好啦~今日打住咁多先啦。

待續.....

日本呢個國家,我就係鐘意佢乾淨!而且重環保及美化環境。

0係日本,無論去邊個地方0既廁所,9成都乾淨過香港街外的廁所。而且必備廁紙!

所以我好放心去任何一個廁所呢。

另外,佢地亦好自律咁將垃圾分類,可燃/不可燃/膠樽/電池/鋁罐 都有指定0既垃圾廂。而收垃圾亦會分好時間表...例如星期三收大紙廂。

美化環境其實好多家庭都做到。0係自己家門口或者小庭園種植物或者花係差不多每戶人家都會做0既事。

我姑姐亦都唔例外啊!

佢屋企入面已經有盆高到上天花板0既植物~

小露台亦都有....請留意上面照片

門口亦有...

我姑姐已經不算厲害了。更厲害的是我見過有人家中有棵梅花,開得超燦爛!每次坐電車經過0既時候都會深深吸引我!

亦有人家中有栗子樹....收成的時候就有好多栗子食啦!!!!

除左日本住宅自己,政府當然都有一系列美化環境0既措施。就好似小小0既街道旁邊,就已經種滿會開好漂亮的花樹。都會令我駐足欣賞呀!

愛花0既人....到處你都可以賞花啊!

長途拔涉到左姑姐屋企,放低行李!終於可以休息下~

那個時候都已經係當地時間5點幾差唔多6點啦....

當我正想坐定定0既時候,姑姐屋企電話響起!就係kennies'媽打0黎啦!

我完全都忘記一到步要打俾好幾個人添。

kennies'媽講0既第一句係 "嘩!我訓完一覺你先到呀?"....

阿媽,你睡得好夢正酣0既時候,你個女都唔知過左幾多關先到姑姐屋企。

對! 人地睇可能覺得我只係好簡單咁上機落機,過關,拎行李,買車票,上車同落車。但其實當只係得自己一個0既時候,自己要花0既精神係特別多。要留意0既事亦更加多...

在機上,你唔可以隨便訓,要留意身邊0既所有人及情況0架嘛!

過關,要順利過關你就當然要好好填好你張入境表同睇下人地點做!咁你過關做順利好多啦。

拎行李....當然係唔好拎錯自己行李!

買車票...亦要買啱自己想去0既車站同留意幾時上車。上車之後又唔可以亂訓,要留意自己0既財物。

所以一秒都唔可以放鬆啊!!! (其實係自己太緊張....)

~~~~~~~~~~~~~~~~~~~~~~

坐左一陣!姑姐就話出去食晚飯啦~

同佢地一家人駕車去左佢屋企附近一間韓國家庭料理店到食。

日本有一個幾得意0既地方,就係好多時0係住宅區會無端端有一間小餐廳或者蔬果店。

我一直都諗...究竟佢一日有幾多生意0架? 點解可以維持經營0既?

甚至我見過日本連鎖服裝店--uniqlo 就開0係住宅旁邊。要是我住0係佢旁邊...一出門口就可以買衫...超愛買衫0既我可能會破產。

好啦!講返正題,呢間餐廳個名叫 "大長今"....真係一聽就知係韓國野。

周圍仲貼滿多位韓星相片同海報...當然唔少得---rain!

全間餐廳只係得我地5個人...真係好靜啊!

我地都叫左唔少野食0架~

首先食韓國料理當然唔少得佢0既頭盆小吃啦!有豆芽,菠菜,蛋同唔知0個個係咩....

酷愛啤酒0既姑丈另外點多左泡菜同菠菜0黎送酒

之後有蠻好吃的韓國炒年糕...因為小朋友要食!所以叫老闆娘少辣啦!但老闆娘好強調"唔辣唔好食!"~哈哈!

仲有牛肉~燒來吃!

姑姐仲驚我食唔飽,叫左石頭鍋飯俾我食! 哎呀~其實我好細食0架! 加上我夜晚都唔食飯0既....聽見佢叫我自己一個人食!真係眼都突埋啊

最後都係5個人分左0黎食啦!

當大家都食到7788,飽到摸住自己0既肚腩0既時候...突然..........

老闆拎左呢兜野埋0黎!話係送俾我地0架~ 真係客氣!

老闆0既好客我地雖然好開心...但大家亦面有難色! 因為大家都飽飽...

而我亦更驚! 仲記得我之前話我上機前的早餐同飛機餐都係食蛋嗎?

現在又來一兜咁大兜0既蛋...我真係驚驚!

呢兜野其實係焗蛋吧?只係知佢0既煮法,同我今日之前2次食0既都係一樣..

第一日0黎到日本....已經有樣野令我食到驚左啦。大叫"好驚食蛋呀~"

食完飯就帶住又累又飽0既身軀回家去啦。

day 1 完...

day 1 0既晚上本來應該好好訓...但奈何因為未習慣而累又訓唔到。

加上姑姐俾我0既枕頭實在扁到好似冇枕頭咁....我就咁...眼光光望到凌晨4點先稍稍訓左幾個鐘。

7點半就已經起左身...最早的一個! 食完姑姐整0既早餐就出街lu!

今日約左早排過左0黎留學0既日文學校同學---joshua。

早左出發之前幾個月已經約左佢幾日同我出去玩下,始終17日0既旅程,也不能完全自己一個周圍蕩嘛。

0係日本...對我來說,最難就係交通...因為實在太太太太多條線!

所以今日第一個難關就係自己坐電車去目的地等joshua!

姑姐住在京王線--飛田給站。如出發去惠比壽而又要快捷一點就要轉好多程車!

路線如下:

京王線--飛田給(各停) ---> 京王線--調布(特急) ---> 京王線--新宿 --->JR山手線--惠比壽

其實已經比較簡單的了! 所以我都好順利到達惠比壽等joshua。遲d再同大家講日本0既鐵路啦。

10:15a.m ,會合左joshua 之後就去惠比壽唯一有少少野可以睇0既"麥酒記念館"。即啤酒博物館。

但去0既途中對同樣都係第一次來到惠比壽0既我地兩個都有同一種感覺,就係呢個地方0既建築有點歐洲風。感覺亦很寧靜,幾舒服...但又冇咩好睇!

惠比壽有間米芝蓮餐廳啊!不過0係出面睇唔出佢係餐廳....

到左麥酒記念館啦...

入到去..........好靜啊!小貓3,4隻...包括我地2個....

只見有個好大用來製啤酒0既唔知咩囉....

仲放左d小工具展示俾大家睇

還放左幾罐大大啤酒模型,打埋燈俾大家影下相tim!

唔.....記念館就係得呢幾樣野睇囉! 仲有得俾錢飲唔同0既啤酒,亦當然有賣紀念品0既地方啊!

有啤酒軟糖....啤酒朱古力之類的東西~

其實日本人好多都鐘意飲啤酒,特別係返工0既人,放工返到屋企或者出去都開返罐0黎飲!~所以日本都好多唔同0既啤酒廣告啊!

哈哈!其中一個金城武0既啤酒廣告

唔多鐘意飲啤酒0既我地,覺得呢個地方都幾悶下...不過惠比壽最有名0既景點亦得呢到

就當係到此一遊啦~

待續...

來到日本....令到我頭痕就係交通! 當你睇見個鐵路圖....真係眼都花埋。

JR線  京成電鐵  東武鐵道  西武鐵道  京王電鐵  小田急電鐵  東京急行  京浜急行  相模鐵道  地下鐵 及其他路線

下面個鐵路圖就係由我本SCHEDULE scan出來的! 係唔係密麻麻到眼都花埋呢?當我去一個未去過0既地方時,就拎住本野望實個圖去!如果唔係好易坐錯車0架~

雖然我坐來坐去都係0個幾條線,但都令我好頭痕! 因為JR 都有分好多線0架!

山手線  中央線  崎京線  井之頭線  京葉線  千葉線  ..............

而當你選擇好你要坐邊條線,之後你就要選你要去邊個月台等車.....所以要好仔細睇清楚啊!!

有時選好線,選好月台之後都要選坐咩車喎!

因為有d線係分 特急  急行  各停  三種車~

特急只係停大站! 行駛速度好快啊~ 當你企0係一個只係"各停"先停0既月台,而剛好有"特急"車經過時.....你最好唔好咁出!因為快到d風會吹到你個頭亂晒.....

急行就係停大站及中大站

而各停就當然係個個站都停啦。

所以為左快d到目的地,好多時都要轉車再轉車。

其實我自己好多時都去錯月台...搞到成日都走來走去...又上又落! 本來可以早d返到屋企都搞到遲晒啦。

一遲左到左繁忙時間真係慘!會變沙甸魚0架! 情況係人貼人....你都唔怕會跌低!你唔好無端端提高隻腳喎~你一提高左,個位就會俾人企左!咁你就要單腳企到你落車....

我就有次無端端掂高腳企....搞到全程都要咁企!到落車差d腳抽筋啊!

所以千萬唔好0係返工放工時候坐電車....

行完冇咩好睇0既惠比壽之後都差唔多12點幾...

咁就去醫下個肚先啦!

今次0黎0既其中一個目的就係要joshua帶我去佢一直都激推介0既"美登利壽司"~

呢間壽司店joshua差唔多每個月都去!其實旅遊書都有介紹啊~仲話係"商台DJ飯堂",因為好多商台DJ去日本都會去喎!係真唔係呀?

究竟呢間野有幾勁?真係要試過先知呀!!!!!!不過其實都少少貴....算啦!豪俾佢~

美登利壽司位於涉谷,當我地遠在車站走過去的時候......已經見到長長0既人龍

睇怕都要等45分鐘....你睇下我等到頭到耷埋

等左45分鐘之後終於有得入去啦!壽司師傅就0係你面前,你要食咩就同佢講!佢就會即場整俾你食0架啦!!

joshua 問我想食咩....我就冇咩所謂!最後我講左幾樣最想試0既之後就由佢發辦~

佢推介蟹膏沙律! 我一望...賣相唔係咁討好! 但joshua不停話"試下啦!好正!"~

一食~原來唔錯喎!好味好味!好蟹呀~哈哈! 下面係蟹肉0黎0架!不過一個人食晒啊!膽固醇會爆登0架!但坐我隔離有個男人就自己鯨舌成碟~

一向好鐘意0係壽司店食燒玉子...但我昨天已經食到驚驚!但見到佢咁多件放0係我面前真係想試下呀!

最後都忍唔住叫左~但太多了吧? 我食第二件...驚蛋0既感覺又返晒0黎!我再望返0個堆蛋...有點想吐的感覺....

我最想試穴子壽司~都係同鰻魚同類! 嘩~成條我自己一個食晒!我真係好唔客氣

之後又係joshua推介! 之前我0係香港食過海膽....好臭!所以對佢冇好感!但好多人都話日本0既完全唔同bor! 真係?

又係喎!唔臭0架~甘香囉!

至於三文魚子..我總係覺得佢好咸...not my cup of tea

要食新鮮0既壽司其實都唔需要專登去築地食...又貴又唔飽。

呢間0既.....都真係好新鮮

唔好睇0個兩隻蝦平平無奇! 當我放佢放口一咬! 我叫左出0黎...搞到個師傅都望住我!真係失禮晒...其實我都只係細細聲咁叫左一下姐

我一咬佢條尾驚然0係到郁呀!嚇死人咩~

不過joshua 話佢食咁多次都係第一次食到隻蝦仲係郁ja~

之後佢會將個蝦頭燒好俾你食~眼見joshua一啖放個蝦頭入口~眼都突埋成個頭食晒?? 最後我只係食左少少個頭入面0既肉! 其實個頭都燒到好脆,應該都唔錯0既~

(當我返到0黎香港...同kennies'爸講0既時候...佢只係冷冷回應我一句"真係殘忍" )

我仲見到更新鮮更殘忍0既龍蝦刺身0係我面前! 佢條鬚仲0係到郁下郁下0架~

**注意!只係"見"到....呢兩隻野唔係我地order 0架

另一個期待係呢個toro啊! 咁大個女都未食過0架~ 成日睇電視見到d人食到好好味咁!

今次我一定要試~

我仲食左帶子壽司0架!冇影到tim...

今次埋單係5040yen....其實都算抵0架!食咁多貴野~大滿足啊!

美登利壽司 : 涉谷mark city 4/F

                       11:00-13:30  17:00-22:00

待續...

吃飽飽就坐東急東橫線向自由が丘出發。

近幾次0黎日本都會去一去呢個地方,雖然呢個唔係話有咩特別野睇! 但卻有一種好悠閒好relax 0既氣氛。感覺好舒服。

今次亦唔例外要0黎呢到!不過唔知係唔係因為星期六0既關係,多人左!熱鬧左~感覺少少唔同左。

但仍然有人好悠閒咁坐0係到睇完傾計

呢到亦有好多特式0既shop,亦有有趣0既shop!

對甜品有興趣0既人0係到當然會去佢出晒名0既sweets forest 到食甜品啦!雖然話食壽司食到飽飽,但都要食呀!!!

行左一大個圈,最後都係食我至愛0既"蒙布朗"~~~

食完之後就去cuoca買蛋糕材料!愛整蛋糕0既人,0黎到日本點可以唔去cuoca呀!?

買左都幾多野啊! 買買下~佢原來有個免費馬卡龍班~你可以企0係到睇佢整馬卡龍啊!有咩唔明仲可以問佢~ 但我聽都唔係聽到全部,好彩佢有示範,仲有得試食!哈哈~

買野之餘仲可以上一堂甜品堂,有so啊!

行多陣都已經5點幾,joshua要返工!我都要返屋企食飯lu~

坐電車返屋企時又俾鐵路迷宮玩殘我啦! 返屋企車程如下:

東急東橫線(自由が丘) --> JR山手線(涉谷) --> JR山手線(新宿) --> 京王線(調布) -->京王線(飛田給)

由於第一日唔熟路,唔知由JR點去坐京王線! 點知糊里糊塗去左京王新線入錯閘之後又亂咁出閘。最後行左一大輪先找到原本要坐0既京王線.....

返屋企之前有件好重要0既事要做!就係去拎我早在出發之前已經訂左0既飛輪海新碟"ONLY YOU"

其實只係0係屋企0既車站旁邊0既7-11 就可以拎囉! 好方便~哈哈!

拎完就高高興興返屋企食dinner lu~

day2 完

記得0係上篇0既"鐵路迷官"入面講過0係繁忙時間盡量唔好坐日本電車嗎?

因為真係迫到面容扭曲啊!明明眼見已經迫到爆...但好多人都會照強行上車!!

但最搞笑係連鐵路職員都會幫佢,推佢入車廂!真係"死擠難擠"。職員都只係務求車門可以順利關好然後準時開車。

當大家要落車0既時候,車門一開!所有人就好似"爆"出去咁。

大家可以睇下上面0個段短片就知道情況幾搞笑....要出動6個職員去幫手! 我亦覺得入面d人好慘!俾人係咁推推推.........所以我都好怕怕

日本電車亦有貼心0既一面..

每個車廂都設有"優先席" ,俾老年人,孕婦,傷殘人士及帶有小孩的人仕使用。

但有時都有好多年青人唔理,有位就坐。聽我d 0係日本留學0既朋友仔講,有d正義朋友會當面話0個d人0架!

0係優先席旁邊可以見到有個標貼0係到

個標貼意思係於優先席旁邊需要將手提電話完全關掉。因為手提電話0既電波可能會影響到植入左心臟起博器0既人仕啊。

而日本電車亦有規定所有人仕在電車內需要將手提電話轉做靜音模式。以免影響他人。日本人好多都好自律! 上車冇人講電話,只見個個對住個電話上網,send sms,甚至靜音睇電視。

所以當有人犯規0既時候,可能會令所有乘客側目呢

另一貼心點就係晚上設有女性專用車廂

由於日本"痴漢",即變態佬問題嚴重。加上夜晚好多醉酒人事可能會騷擾別人。所以為左保護女性,特設女性專用車廂,只限女性進入。男仕止步啊!

所以我對日本電車又愛又恨囉~愛佢靜!恨佢迫!

是日星期日~姑丈放假!所以我都冇plan去邊到玩,等佢地車我去玩0架! (真係唔客氣!)

8點幾起左身之後就食姑姐準備0既早餐!

但原來之後佢地一家人要出去一陣,去佢地0既親戚家坐坐喎!

咁既然係佢地親戚家我都無謂跟住去啦~所以獨自留0係屋企等佢地返0黎帶我出去玩。

等到真係好眼訓......

突然有人話"我返0黎啦!"(日文)...原來係姑姐0既奶奶(おばあちゃん)返左0黎!一返到0黎到走上姑姐屋企,咁屋企得返我一個!就當然係我0黎應佢啦...

好驚驚!好耐冇講過日文....0黎左幾日都好少講日文...好緊張啊!

佢同我講一大堆野我都有d唔係好明...之後佢叫我去佢屋企飲茶喎!其實次次0黎佢都會叫我去佢屋企飲茶,但今次只得我一個啊!

我又唔記得講我等緊姑姐返0黎出去喎~結果當佢準備沖茶0既時候!姑姐剛好返來話帶我出去~所以就好唔好意思咁先行告退啦。我亦都抹一額汗。

首先,姑姐帶我去食我今次最最最想食0既105yen壽司啦!碟碟105yen~好多!好味!好抵!

去邊食?咪0係 "sushi 囉" 囉! 佢個日文名係"寿司ロー" 就係讀 "sushi囉"!次次0黎都去食0架!呢間店係連鎖店,東京都有17間店啊!

其實對食唔係咁高要求0既我,已經覺得唔錯!幾好味0架啦~

壽司0既中文名我都唔係太知0架!

大家可以去佢0既網到睇個menu有咩食

http://www.akindo-sushiro.co.jp/menu/item.php?c=DWDdAfx4981a4a369ed1

食到飽飽~好滿足! 之後就上車出發去汐留+台場啦!

一上到車!姑姐就話"嗱!甜品呀!"

下?仲有得食?

係我另一愛0既大福~好好味!!!!!!> <上載相片數量有限...俾唔到大家睇...

食到飽飽我習慣企,唔想坐!覺得坐0係到好似積聚脂肪咁~但去台場0既車程都個幾鐘!加上飯氣攻心...焗住我"食飽就訓"

待續...

5點幾就由台場回家去....可能係姑丈明天要返工!所以先要咁早返去啦~

一個人去旅行0既好處就係你想行幾耐行去邊點樣行,都唔會影響到人地。

有時你想行想睇0既,人地未必想睇?見到人地冇咩心情去睇,你自自然然就會求其咁睇下就走,免得人地等你嘛。

亦有時當你未行得夠,人地就已經累了~也只好乖乖返酒店啦!

更加情況係當你要找某個地方時,可能有時會行錯路,兜來兜去。別人有時也會埋怨一番。

總括來說,自己一個的話,係幾咁自由!

今日亦有點無奈,0係台場只係行左一個商場就要返屋企。

返到屋企已經好晏~所以就叫外賣pizza!而姑姐就用意粉醬整意粉。

日本除左有pizza hut 仲有 pizza-la! 模式同pizza hut一樣~

pizza-la : http://www.pizza-la.co.jp/menu/menu1100.html

好鐘意日本pizza可以一個批有4款味俾你!真係好味呀~

睇到都流口水啦~

day 3 完

食飽飽就向汐留出發...0黎左幾次日本都未去過啊!鬼叫佢咁遠咩~

去汐留只得一個目的!尋找anpanman~只係為左去一間小小0既shop!

原來呢間野同自由之丘0個間一樣0既!感覺好浪費我時間...

但都要留影下0既~

如果係anpanman 0既粉絲~建議去橫浜那個anpanman館比較好!更大更多野睇~只不過佢主要係for小朋友。

汐留除左anpanman shop~旁邊有成龍(呢排唔係咁受歡迎的人)都介紹過0既拉麵店!仲有日本電視台(NTV)0既店舖啊!

之後我地出發去台場lu!自從我第一次來日本時去過就冇再去過~當然又係遠啦!

去0既途中雨愈落愈大...落雨真係煩啊! 要不是因為落雨,姑姐今日就唔係帶我來台場,而係另一個地方。

期間亦經過2016年奧運選手村予定地~乜原來2016年0既奧運0係東京嗎??

到達台場~因為落大雨,所以都只可以室內活動...行街街!

去DECKS Tokyo Beach 行~首先上去"台場一丁目商店街"行!

星期日當然好熱鬧,好多年青人啊!

呢個商店街佈置到好似以前日本咁~好懷舊風

有日本屋企0既場景,亦有日落公園0既場景,更有一個無厘頭0既火車頭場景

商店街亦有唔同0既店舖~好多都賣懷舊商品同懷舊小食。仲有d懷舊遊戲機可以玩啊!姑丈都玩~可能呢d遊戲就係佢細個時成日玩0既遊戲啦!

呢條商店街仲有鬼屋俾大家去玩啊!夠膽0既可以去玩下~哈哈

當然唔少得食野0既地方~呢個food court 以課室為場景

好耐冇坐過"學生椅"啦~

仲有個日本學校先有0既書包架~有好多日本學生0既書包!

行完商店街就落去shopping mall shopping~ 姑丈就帶小朋友去game centre玩!

唉~真冇癮!冇得出戶外影相行下...遺憾!

待續...

0黎到第4日啦~

朝早就跟姑姐去調布買下送加行左一陣。好快手就已經買左件衫...同埋睇中左隻錶!錶太貴,要諗諗。

一個人shopping往往都會控制唔到自己0既購買慾而做出"傻事"....所以好快會破產。

下午約左又係來日本讀了4年書0既中學同學---盈,一齊去池袋行街街。

我發覺自己0黎咁多次都冇認真咁行一次池袋喎!就算酒店係0係池袋都冇行過.....

但池袋係出名0既旅遊點!都唔明點解自己唔去0既?

用了半個小時等盈.....又一無奈係自己手機冇申請漫遊!所以要打電話又要找公用電話....幾咁煩! 所以而家d人冇手機真係會死呀~ 我都會呀!!!!!!!! 想打俾佢又要周圍找電話~

等到她之後就向池袋出發!

池袋係好多年青人0既集中地,所以人流好多啊!

首先我地要去醫肚先啦~盈就帶我去sunshine city食pasta!

我地就係去呢間五右衛門食啦!

1set 有沙律,湯,甜品,飲品,當然唔少得主角---pasta啦!!係一大碟!食到好飽呀!承惠:1480yen~

呢間野都唔錯,唔太貴!

食飽飽就兩個女仔去發癲0既時候!睇我地兩個外表好似好冷靜,但其實心裡面係

"嘩!勁靚!好想買呀!"

"正呀~~~買唔買好呢?"

心入面其實係無比激動0架!!!!!!!!!!!!!!!!!!!!!!!!!!!!!!!!!

我亦已經冇再影相!掛住睇衫~ 而0係池袋又再俾我見返早上0係調布睇中0既錶!而且仲平左幾百yen!!!!!!!

雖然今次身邊有人0係到,但盈其實係魔鬼!咩都叫你去買~唔會阻止你!所以我又做左"傻事"~話咁快就去俾錢啦......

由於食完lunch已經2點幾3點~行完呢個令人shopping慾激爭0既sunshine city後!就去旁邊樓高8層0既tokyu hands行~

最後再去旁邊0既勁大加勁平0既藥房!行完都5點幾...我又要回家吃飯啦!!!再見啦~池袋!

day 4 完

今日凍左~ >~<

今日目的地係原宿!又係約左盈一齊去啊~但約左12點半!

咁冇理由0係屋企呆坐上網咁耐,浪費時間之餘我都唔想0係屋企逗留咁耐~

所以就決定自己出新宿行返轉先!

去左京王百貨到行! 但其實新宿大多百貨公司都係for OL 或者比較年長0既女性~

咁我就只好行"文具部" 同 "食品部"

呢兩個部門都已經可以俾我行好耐0架啦!哈哈~

行到差唔多夠鐘就入閘去月台等盈...

等等等.....1個鐘過去!= = 我再一次無奈自己冇申情漫遊! 咁唯有走去找公用電話去打俾佢啦~

結果係我自己先去原宿竹下通等佢~

原宿---潮人集中地! 亦係旅遊點之一!

竹下通亦成為原宿其中一個地標! 日本0既年輕人都好鐘意0係0個到買野,因為"平!"

每一次0黎日本都會0黎竹下通,但我今次0黎已經唔同左目標啦! 唔再買衫買手飾~

轉戰食甜品!!!

等到盈來之後我地就去食"LUNCH"~而我地0既lunch係去食甜品!女仔就係這樣愛甜啦!

間甜品店係我早前睇"流行東京"時見佢介紹~!好似好吸引咁呀!至愛甜品0既我又點會錯過呢~

caffe solare 原宿分店有2層,除左甜品亦有意粉及飯等...

入到去見到D甜品都唔知揀邊款好! 我地兩個企0係到望住甜品講

"嘩!好靚呀!" "好似好好味咁喎!" "食呢款!但又想食呢款喎!"

最後揀左呢幾款~盈為左表示歉意,所以係佢請啊!多謝~^^

叫左杯睇佢已經夠晒靚夠晒開心0既士多啤梨酥皮杯!當然都係好味好味!!!!

仲有個和風甜品!

仲有仲有個一定必試0既!!!!!!!! honey toast~

個麵包其實係酥皮麵包,即係好似丹麥條咁!

加上honey仲有面0個舊白色0既野!唔係牛油喎~而係cream cheese! 軟綿綿0既麵包加上忌廉芝士,原來都夾喎!推介~只係380 yen!!!

食飽飽就慢慢行竹下通啦! 竹下通而家吸引到我0既就係"ダイソ"! 樓高4層0既100yen店~每次都令我買好多野啊! 今次已經買少左好多啦!

就係次次都0係100yen店買好多野~所以永遠竹下通只係行得一半就徹退....

不過我想講.....呢間100yen店就係香港jusco 10蚊店.........= =當然,日本呢間多款好多~

今次就可以行完整條竹下通啦!之後順便行一行表參道!

名店臨立0既表參道當然唔適合我地呢d貧窮神啦!所以只係"經過"..... 要不是再行就"迷失表參道"啦!

行完一大輪我話要返竹下通! 點解? 我又要食甜品! 每次必食0既~

pancake!! 我唔係幫趁0個間香港都有分店0個間啊!而係0係佢對面0既angle heart!

佢0既特點係佢0既pancake可以加芝士蛋糕啊!!超好味~

但今次我竟然唔再食一向食開0既士多啤梨芝士蛋糕pancake~而改左食期間限定0既蕃薯pancake啊!!

我0既蕃薯pancake!真係有蕃薯0架~

入面有合桃碎+cream+焦糖漿! 但都係食開0個隻好食d!

盈亦被我引誘到食埋一份!佢食士多啤梨pancake

我強烈建議食呢個pancake之前真係唔好食野!因為太大件.....所以搞到我食到有點想嘔0既感覺明副其實飽到想嘔。

食飽飽.....當然要行下消化下啦.....

待續

熱鬧0既竹下通對面就係寧靜的明治神宮。只係一條馬路之隔,就分開寧靜同熱鬧。

當我地食飽飽要行下,消化下0既時候就走進明治神宮。

可能去過日本0既人都會話"明治神宮都冇野好睇!" "去一次都夠啦!"

但我卻每次到日本都必會一去~

我就係愛佢0既寧靜,愛佢0既莊嚴.....由繁囂0既街到走入去就好似0係另一個世界

好!踏進"原宿外世界"的入口

要入到明治神宮要走一條頗長的石仔路~唔知係唔係受氣氛感染,人人都會細細聲說話,慢慢的走進去。沿途只聽見石仔的聲音。途中亦會一d和風0既設施。

正式走進明治神宮啦!

明治神宮每年除夕都會聚集好多好多人去參拜,祈求新一年也得到神的保祐。0個個時候,連又長又闊的石仔路都迫得很。

今次亦幸運地俾我見到有人0係明治神宮舉行婚禮。很莊嚴啊! 所有人都讓路呢~

除左婚禮,每年0既1月都會舉行成人式。0個個時候好多年滿21歲0既年青人都會穿上和服0黎到參加啊!

0黎到神宮正正係日落時候,令到神宮更美

到有神明0既地方都會有許願0既地方~

將願望寫上牌上面,希望願望成真啦!

5點多,神宮要關門。我地都要回家去lu!要走回熱鬧0既街道了~ 下次再見吧~外世界!

走出外世界之後竟然迷路= = 因為從另一個出口出去! 不知不覺走到代代木去! 幸好找到車站~有車站就懂得回家去啦!

day 5完