離開半島後去搵食。Khinlom Chomsaphan的網評不錯，加上河邊餐廳（非酒店餐廳）選擇不多，於是本想從central pier坐船到13號碼頭再行過去，但回到central pier時，去13號碼頭的尾班船已開出，唯有打的直接去餐廳喇！原來路程都頗遠喎，Baht100，如果喺 Khao San嗰邊去近好多。餐廳建於河邊，須從外面大街轉入小街行10至15分鐘，好在無行去，我諗喺13號碼頭起碼行半粒鐘至到，坐的士穩陣。
餐廳裝修幾靚，有情調，坐在室外感覺開揚，近河邊位置面向 Rama VIII Bridge，好靚啊！又有live band，晚上9點前唱英文歌，9點後唱泰國pop songs，好多後生仔來飲酒，大家跟著唱就好似開演唱會一樣，幾熱鬧喎！不過好小遊客，本地人多，可能仍未屬旅遊熱門餐廳吧。
叫了啤酒，串燒和海鮮拼盤。啤酒唔平喎，Baht280 / jar（大概800ml）。串燒唔錯呀，Baht120，有12串，又有好多配料（厚而軟的麵包，微烤，細心地已切成細片，點沙嗲醬好味！另有小青椒同紅洋蔥，好開胃），難怪我地一坐低，經理已拿著串燒的相片推介。好快海鮮拼盤都到，全部都似燒過，但係食唔到有任何炭味。有蝦蟹，尤魚，青口，螄蚶。蝦蟹都無特別，是普通貨式。青口唔得，無味，係雪藏貨加煮得太奈，一定要點泰綠色辣汁先有味。尤魚都幾好，唔un又有尤魚味。最特別係螄蚶，因為之前喺香港唔敢食生的，所以從未試過，原來味道似勁重味的蠔，好鮮甜啊！這裡的已煮熟，食落放心。
網評是正確的。來這裡是為靚景而唔係食物！
小插曲！食到一半時突然番風，D風大到客人都嘩嘩聲，大家都知道風雨欲來，餐廳做足準備，隨即開番個屋頂，又放下塑膠窗簾，安排近河位置的客人坐到能避雨的地方，無幾奈即落大雨。這樣的服務實在窩心，亦可能是泰國人們早已習慣下雨天的生活，這裡畢竟是亞熱帶地方囉！
我地聽歌飲酒至12點才番酒店。埋單時問女侍應是否可以代為call的士，因為真係唔想行10分鐘小街至出到去坐的士，而且又落雨呢！原來餐廳有tuk tuk，可送客人到大街坐的士，一到街口已滿街的士，幾方便啊！