放下行李梳洗一下就出發去餐廳食晚飯，第一晚對食物的印象麻麻，因為晚飯時間六時開始，我們到達時已是七時半，餸菜已經食到七零八落，而且食到中段侍應亦開始收檔和收拾殘局，部分較脆弱的菜式如三文魚和沙律等，已擺放得有些乾硬，但勝在款式夠多，每樣試少少都食得夠飽。

於是之後幾晚我們都盡量六點就準時開飯，因為遲少少都好多人，很難找到好位置。另外餐廳有提供Miffy兒童餐具，妹妹簡直是愛不釋手，不過深愛到不讓我們放任何食物在上面，因為會遮住Miffy的樣子又實在令人好頭痛。

食物款式眾多而且國際化，有西式的扒類，中式的炒飯，日式的壽司，泰式的青咖哩等等，總有一款合你口味，而且擺盤十分精緻有心思，每道菜都設計得如fine dining般令人食欲大增，只是我覺得入口卻是另一回事，食物味道整體上只是一般，遠遠不及外觀吸引。

再者很可惜即使身在北海道，卻享受不到當地的美食，自助餐提供的魚生和壽司，都只是普通貨色，除了在最後一晚，居然有任食涷蟹腳，味道十分鮮甜美味，實在是非常驚喜。

不過即使面前有無限的美食，兩位小兒都只會俾面食兩啖，然後哥哥就說要食雪糕，妹妹就更離譜只肯食雪糕筒，我終於發現原來養大佢哋好容易，每餐只需提供雪糕/雪糕筒再加橙汁，唔駛煩唔駛氹眨下眼就可以食完一餐。