返酒店遊泳抖一陣,17:30又出左去漁人村,每逢星期五漁人村都會有夜市,就好似小販檔一樣,有好多小食及飲品,仲有一些小檔灘,十分熱鬧呀。

小食有好多選擇,特別炸物同串燒較多，眾多美食之下,幫襯了幾檔。

燒魷魚,燒完的魷魚再切粒,然後撈埋醬汁即食,魷魚口感腍腍地,少少爽口,幾特別,味道酸酸辣辣,仲要都幾辣下,幾好味呀。

大椰青,THB50,果然好大個,味道同平時飲的椰青差唔多。

燒薯仔,THB20,熱騰騰又大件的燒薯仔,口感夠腍,配上牛油及蒜茸,味道香口,好味呀。

鱷魚肉,THB100,口感好似霉了的雞肉,好鬆散,只有沙嗲調味料的味道,唔太好食呀。

雪糕,THB40,有6-7小球雪糕,用椰殼盛裝著,好有特色呀,雪糕有椰香同炎煉奶味,好香甜呀,加上配料及椰肉,真係好美味呀

串燒,THB50有8串,要了4串雞肉及4串豬肉,味道普通。

banana-nutella pancake,THB40,香蕉榛果朱古力,好多醬同香蕉,果然好味呀。

行到好攰之後去左一間Dusita Spa按腳，ralex，之後回酒店訓過好的，第一日去玩呀。