星期六，晴。經常聽到人講英國天氣差，十分潮濕，兼且成日毛毛細雨。但筆者身處英倫島上，又冇遇過咁差嘅天氣喎。相反，風和日麗，有點微涼，空氣清新乾爽。又有人同筆者講，到外地一定要入鄉隨俗，食一啲地道食物。筆者都有嘗試過(詳細情況見另文)，可惜英國嘅飲食文化遠遠不及其文學般多姿多彩。

在英國食唐餐，好多人都以為唔好食。不過，筆者於Bristol食嘅第一頓唐餐又唔會失禮人喎。與太座、其好友F及阿B到位於市中心嘅酒樓午膳，吃的都係一盅兩件。所叫嘅點心都幾豐富，計有白雲鳳爪、炸兩、奶黃包、蝦餃、北菇雞飯等。食落比好多本地酒家出色：炸兩裡嘅油條甘香可口，而且份量十足，冇輕飄飄嘅感覺。包在外面嘅腸粉亦彈牙，十分對辦；奶黃包嘅外皮一般，不是太鬆軟，不過內裡嘅奶黃雖不是流沙，但也弄得香軟滑溜；最出色嘅係蒸北菇雞飯，飯粒吸收了冬菇嘅芳香及雞油嘅甘香，食起來軟綿綿，加上吸收了雞油，食完可說是齒頰留香。

在外地中式酒家吃午膳比香港有明顯好處，一來人流唔會太多，唔會有壓迫感；二來少咗啲中國人，環境變得冇咁嘈吵，可以安靜地、悠然地(因為唔駛被催促或暗示埋單走人)享受飲茶嘅整個過程。代價也是大約廿零鎊(三大人一細路計)，折合港幣三百零蚊。一樂也。