可能因為巧遇颱風關係, 白砂灣沙灘非常大浪. 而且全都係白頭浪. 幸好我倆都沒打算游水, 只是純綷影相. 景色不錯. 遊客不多, 如果鍾意衝浪應該會好開心, 因為D浪真係好大呢! 就連我倆企係最淺水既地方都可以被大浪整到成身濕晒呀~!

本來都無期望在貓鼻頭有什麼特別風景. 但意想不到地呢少少既地方影相不錯. 可能因為天氣正好, 天好藍, 所以影既相好大自然而且景觀不錯!

上網見有人介紹去後壁湖浮潛前必食魚片, 我倆當然唔放過. 去左恒春區漁會生鮮區食個午餐!

揀了最多食客的何興生, 坐低後, 一張好簡單的點菜紙, 我倆點了綜合魚生片, 炒海瓜子, 炒了一碟蟹. 仲有一支啤酒&一支汽水.

魚生片先送上, 200元台幣有四款魚生, 而且每款五片, 尚算抵食. 食落口感都幾新鮮, 雪味不濃. 味道唔錯. 炒海瓜子等同於香港的炒蜆, 炒得好惹味, 少少辣, 同香港食味道有點點不同, 幾特別. 值得一試. 最後送上的炒蟹最惹味醒胃! 辣辣地, 汁幾濃味, 而且炒得夠鑊氣! 一隻蟹就這樣被我便KO了!!

到後壁湖主要目的就係要玩浮潛! 第一次浮潛, 原來幾好玩的! 唔識游水都可以玩的喔. 其實後壁湖有好多間鋪頭有人專教玩浮潛, 但我倆揀了安可. 玩完浮潛, 仲可以餵魚仔. 唔錯的節目!!

P.S: 浮潛其間無得用自己相機影相, 但原來呢間浮潛鋪頭除左教人玩之外, 仲會負責幫人影相, 佢地會將影左既相幾日之後UPLOAD去佢地公司網頁, 大家可以自行DOWNLOAD呢! 呢個服務又幾唔錯呀!

海角七號其中一個景點. 其實有分東南西北門, 兩天行程裡面, 全部都去過了. 但較值得一遊的是西門同北門!

本來睇日落安排在第一天, 但因為天氣關係, 故順延到第二天行程. 幸好天公造美, 天氣異常地好. 我倆欣賞了一個好靚的日落. 唯一可惜的是遊客太多了.....

第一晚夜遊墾丁大街時都有留意呢類型既魯味店, 都心思思想食, 但因為之前太肚餓, 所以無花太多時間去選揀, 結果食了一餐非常豐富的放題宴.

呢一晚, 我倆於墾丁大街搵食, 今次終於試了魯味...

原來有點點似車仔麵, 自己揀配料, 之後俾師傅整, 將所有食物炒埋一碟就完成了... 不過雖然賣相一般, 但味道不錯的喔!

另外一提的是, 旁邊有一間賣沙冰的鋪頭, 佢地既草莓沙冰真的好好飲~!! 全程睇住佢整時見佢落左好多粒士多啤梨呢~!! 抵飲!

之前已聽朋友講到墾丁必遊海生館, 事關呢個水族館幾好玩.
到逹墾丁後我倆住的民宿正正就在海生館旁, 所以第一站先遊覽一下啦~!

到逹門口才發現, 有學生証有半價呢(連香港的都可以喔)!可惜女友無帶學生証! 買飛入場後, 第一眼見到既係好大條鯨魚! 呢個係海生館必影既地標呢!! 影完相, 入到室內, 每個館開始慢慢遊覽下.
其實如果有時間的話, 呢個水族館真的可以遊覽一整天呢. 我倆由於時間關係, 有D地方都只係快快行過就算了.

不得不提, 海生館入面有一條好大的白鯨, 亦都係必影景點呢!! 仲有仲有, 裡面的餐廳真的非常唔好食呢~! 所以建議食飽才去呢!!

整個海生館最得意的莫過於冰極世界, 有好肥美的企鵝, 真的好得意! 真的一遊!

本來都無打算食放題, 但經民宿老闆娘介紹後, 有感平靚正, 所以特意一試. 反正我倆除了飛機餐外, 都無正正式式食飯...

坐低後, 侍應送上餐牌, 由於太肚餓了, 先隨意點了幾款食物, 再細仔睇餐牌.
過左一陣, 侍應送上網燒爐同火煱. (其實我倆初初都唔知有火煱呢~!) 之後食物都一并送上.

配菜麻麻. 都係主菜較好味! 尤其墨西哥雞翼, 少辣, 幾惹味. 牛肉類都分了好多款. 每款都不錯! 反而火煱不太感興趣. 只食了一隻蝦就無再惦過了!

其實呢間餐廳既特色係佢既燒烤爐用炭同網黎燒, 燒出黎既肉有少少炭燒味, 味道更佳! 食完主菜, 甜品有雪糕, 百幾蚊(港蚊)都算唔錯. 幾多野食, 抵食! 仲有汽水都係任飲的! 我倆還用了民宿老闆娘的VIP咭有九折tim呢!!

一心對四百蚊的民宿無抱期望的, 到逹後, 老闆娘好親切有禮地帶我倆到我地住的房. 原來係一間獨立屋仔. 房入面的間隔都唔錯. 幾大幾舒服. 而且設備尚算齊全! 床都好舒服. 屋仔外有小露台, 而且外面環境非常大自然又靚, 旁邊有間木屋可以夜晚上去睇星星tim, 實屬不錯!!

每天都有早餐供應, 而且每日都會有張紙仔俾你選想食的早餐. 雖然早餐一般, 但以咁既價錢黎講, 真的不錯..

另外值得一提既係, 老闆同老闆娘都非常好人. 又教我地去邊度玩好, 去邊度租機車好. 仲借埋餐廳vip咭俾我地tim~

墾丁大街必定要夜晚行. 因為大部份的商鋪都係夜晚先開檔. 雖然只係一條街, 但呢條街好多好有特式的餐廳, 小飾物同彩繪. 而且夜晚行有一個好處, 就係夜晚較熱鬧, 有好多酒吧都會有d dancer係街頭跳舞, 真的熱鬧非常!

由於我倆事前無做足資料準備, 我倆竟然無帶電筒, 無買煙花, 摸黑去到呢個出火景區. 其他遊客手上都有煙花,電筒. 有心去玩火的話, 一定要在入景區前買定煙花喔!!! 好多人都可以隔空寫煙花字tim呢！