共找到 3 篇遊記, 正顯示第 1 至 3 篇遊記 |
夜晚check過, 朝早起身再check多次, 湖南省湖北省D天氣都係落雨多. 唯有去第度玩. 廣西天氣一樣係落雨. 鄰近只有江西天氣最好, 差不多全省天晴. check埋10:30am有巴士去南昌, 咁就一於咁話. 9點幾去到長沙東車站, 買左飛(140蚊), 見仲有時間就過對面馬路楊裕興分店食個快手早餐.
車程差不多要6個鐘, 中午到達南昌, 就住返7仔Inn, 係正長途車站對面, 夠方便, 離市中心亦唔係太遠. 放低包包就上網check下有咩地方好去. 長沙市內主要景點比較多, 相對南昌市內就無咁多地方行. 休息到差唔多晚飯時間先出去行下. 先坐的士去食街食晚飯. 南昌較出名既食街有孺子路, 蛤蟆街, 天燈下美食一條街及宵夜燒烤聖地宝珠街. 本想去孺子路, 的士佬聽錯去左蛤蟆街(相傳以前整條街都係賣田雞蛤蟆之類而得名, 正式街名我反而唔記得左). 既然黎到就無所謂係度食晚飯呢. 蛤蟆街其實唔係有咁多食肆, 只有兩三間比較大既+D大排檔. 簡左間叫小康廚房既試下. 飯後亂咁四圍行, 行左去南昌最旺既中山路. 呢度入夜街道兩傍都人山人海, 車水馬龍, 五光十色, 國內名店林立, 好多年青人係呢頭消費. 係度行左個幾鐘就沿中山路直上行返出大馬路(忘記左街名). 沿路經八一烈士紀念碑及一D大型商埸(當然已關門休息). 返到酒店先休息一下又上下網, 睇下聽日既行程. 11點幾再坐的士去宝珠街食燒夜. 宝珠街都係食燒烤多, 款式同深圳D燒烤大同小易, 但比較平. 食飽就坐的士返酒店沖涼訓教.
一早起身過對面車站買定中午去赣州既車飛. 襯早上仲有D時間就執埋包服checkout, 問路坐公巴去騰王閣望下, 50蚊入場費, 唔夠時間, 係門口影張相就算. 之後再返中山路穩食, 途經南昌八一起義紀念館, 又影多兩張相. 最後落脚於1+1燒菜館求其食D野算. 飯後就返車站等大巴返贛州.
贛州以前黎過, 市內無咩好行. 到步就租房, 休息到夠皮為止. 晚飯時間過左先訓醒, 但唔係太肚餓. 問前台有咩地方小食多, 佢地介紹左我去一個叫釣魚台既地方, 打的去都唔係太遠, 20蚊有找. 去到釣魚台呢個地方原來只係一條小巷.巷內有各式地方小吃粉麵店或車仔檔, 但衛生情況非常一般. 行左一轉, 只買左隻雞肶頂下當算, 其它都唔敢試. 返酒店途中去KFC食個餐搞掂. 但始終稔唔明點解呢條巷仔叫"釣魚台".
一覺醒來, 又到返深圳既時候. 8:30am早車返深圳, 食D野(另文介紹)再直巴返香港, 完成左今次混吉之旅.



一宿無話. 第二朝早D起身上網check吓有咩地方好去. 見尋晚落過雨, 又順手check吓湖南湖北各地天氣. 唔check尤自可, 一check把幾火. 湖南湖北各地呢幾日都係密雲/大雨/雷雨, 上星期check過都話天氣好架. 天公不做美, 無法.
網上check到湖南省博物館有限量免費入場飛送(一般要30-50蚊入場費), 見朝早仲有D陽光, 立即check埋坐咩公巴去(好多公巴無冷氣既). 10點左右到達, 以經有成70-80人係度排隊. 落巴士即刻跟住龍尾. 咁啱有博物館職員出黎派flyer, 就順口問吓佢係唔係有免費門票. 佢話有身份証或passport就可以攞免費飛,. 唉, 我兩樣都無(唔記得問回鄉証得唔得, 不過我放左ID係酒店度, 得都無用). 問佢可以點, 佢話買門票呢30蚊. 一場黎到30就30呢. 買完飛入到去正門原來仲有成100人(免費飛) 等入場. 我呢D比錢買飛既就可以即刻入, 仲可以坐電睇上2樓開始参觀(免費飛要自已行樓梯上. 由3樓開始, 由上向下層参觀).
博物館正在舉辦一個契丹文物展, 再加上自已本有既馬王堆漢墓展及湖南青花陶瓷展, 都好似有好多野睇咁. 係博物館足足行左差唔多3個鍾, 真係好多野睇. 呢30蚊真係比得值架.
行完博物館, 出返黎又攰又餓(無食早餐), 就係附近穩D野食頂吓肚先. 博物館附近無咩野食, 只好簡左呢間無名菜館. 中午時段都係食快餐. 無咩好食就叫左個雞絲炒飯. 快快手食完就跟住去第二個目的地-岳麓山. 係公車站問本地人坐咩公巴去(其實一早寫定地點名稱係紙仔度), 佢地都好客氣咁教我坐咩公巴. 話咁快(2蚊公巴)就到. 係大門沿斜路上到山腳, 見有10蚊登山車坐就即刻上車. 沿路一路上到山頂, 司機佬開得鬼S咁快, 真係有D心寒, 不過對我衣D行唔慣山既人黎講, 10蚊都真係值得既. 岳麓山風景秀麗, 好多民國初年既英雄人物都長眠於此. 另有長沙名勝岳麓書院(好似係50蚊入場費), 愛晚亭, 鳥語林, 及D庤廟古剎等等. 由山頂沿路行返落山, 一路參觀唔同景點, 一樂也. 係衣度又行左成4個鐘, 真係攰S.
攰還攰, 都要繼續行程. 第三站 - 天心閣, 即長沙古城牆遺址. 剛到大門(16蚊入場費)就開始落大雨, 真係無癮, 唯有走人返酒店. 酒店對面有間香港滿記甜品, 入去食返個芝麻糊潤一潤喉先返酒店休息.
華燈初上, 又到晚飯既時候. 今晚决定去南門口食D地道野(黄興銅像果邊好似叫司門口, 行到步行街尾, 差唔多有1km, 叫南門口, 過對面馬路就係食街). 自己果時唔識路坐公巴去, 2蚊兜左個大圈, 落車先知原來係呢度. 南門口出名多大排檔及燒烤, 晚飯時候未係有咁多人, 行吓睇吓有咩食又幾過瘾既. 簡左間有冷氣既室內排檔成記, 要左個地道美食口味蝦(少辣)同家鄉炒通菜, 兩樣都幾好味. 飯後就行返過步行街遊蕩下, 不知不覺又行返黎小食街度, 一定要幫襯下啦. 食左串阿拉伯烤肉及飲左杯芒果乜乜珍珠奶茶, 兩樣都ok. 再行去酒吧街参觀一下就打道回酒店. 我對夜蒲無咩興趣, 都係返酒店上網check下D天氣以决定後幾日既行程.





嘩, 卒之放大假呢, 雖然祇有6日, 但因工作忙碌, 以推遲左一次. 一早plan定去湖南, 沿武廣高鐵到達城市之中比較大既玩. 放假前一晚先有時間去中旅問吓訂飛既手續(幾日黎打過好多次電話都唔通, 唯有自己去中旅問). 原來訂飛要等幾日先confirm倒, 票價亦貴過自己上廣州南站買(從網上查到內地高鐵票價), 所以都係决定自己坐直巴上廣州南站買飛算.
5號一早起身執齊野, 帶上自己既旅行孖寶(相機and netbook), 8:00am油麻地直巴(好似1日得1班, $120)到廣州南, 中途停沙田及上水上客. 到廣州果邊就停祈福新村及番禹, 廣州南係最後一站. 當日大堂都好多人排隊買飛, 亦有自勳售票機, 但好似祇收50同100人仔. 即買飛去長沙, 333蚊人仔, 12:34分開車, 我卡(4號卡車)都坐滿人. 座位就似D直通巴坐位咁上下(2等), 係面對面咁坐, 但leg room唔多夠. 車上有小賣部, 可以買倒飲同食既野. 當時正直午餐時間, 好多同胞都有買快餐飯盒食, 我就無試, 唔知幾錢.
兩個多鐘就到左長沙. 睇見最快係行到343km/hr. 全程祇停左3-4個站, 可能我坐果班係快車掛, 唔洗站站停. 首先兜的去五一廣場(市中心, 都要成50蚊車費. 的士佬好好人, 知我來玩, 佢沿途一路講有咩景點, 但我普通話有限, 祇聽得明少少), 穩酒店(黎之前無book定), 最後住7天Inn, 188蚊, 開會員卡, 第2晚就157蚊. 第1日坐左成日車有D攰, 係酒店放低包包後, 就落去附近既五一廣場步行街行吓. 五一廣場係商業中心, 附近食肆林立, 食街都有2-3條(坡子街夾三王街, 小食街, 南門口 .. 等等), 酒吧街, 大商場林林種種咩都有. 呢條步行街同一般既步行街都無咩分別, 但條街就夠哂闊, 人多都唔怕, 同埋有好多銅像公仔係度. 臨租酒店前祇食左個Donut同Ice Coffee, 兩樣都把鬼, 唐唔似唐, 西唔似西, 不過果時肚餓就唔理得咁多. 衣家又開始有D餓, 見有楊裕興就入去試吓. 食完繼續週圍遊蕩. 先逛五一廣場既小食街, 共十來間店仔. 試左個長沙著名小吃糖油粑粑, 熱辣辣炸起, 甜甜地幾好味, 1蚊2個, 2蚊5個. 行左陣就行去火官殿行下, 有間幾百年歷史既火神廟, 古色古香咁. 行到7點幾就去坡子街(五一廣場附近, 火宫殿對出其中一條食街), 又選左間百年老店熱鹵劉食晚飯. 飯後四圍行多陣, 食左幾隻餃子當宵夜就返酒店上網穩吓info, 先決定第2日行程. 返左酒店無耐就含含聲落大雨, 心稔唔好掛, 咁辛苦先黎得到呢度.







