我地兩個都係鐘意食日本野o既
而大人就最鐘意食劍魚,於是黎到就梗係要睇下有冇啦
雖然大阪唔近海,不過相信點食都會比起香港新鮮
擺低行李之後落黎o係商店街都係諗住是但入一間就算
就遇到呢間市場壽司
望住門口個魚缸就知呢度一定冇死錯人,價錢亦唔貴,同o係香港揀間靚少少o既差唔多
呢間分店應該有3-4層,不過我地為方便都係坐師傅面前o既吧枱
望住個menu...o係時候測試下自己o既日文有限公司
好在都冇叫錯
坐低之後師傅會問你飲乜,唔要d咩特別野o既都係飲茶算啦,不過都有分綠茶定烏龍
每一件壽司都有芥末o係入面,而且係鮮磨o既,所以我一路食一路喊~
不過真係超級好食!!!!
尤其是我o係香港絕對唔敢食o既吞拿魚,o係呢度先食得返o個種鮮味!
雖然佢係一間連鎖店,但我覺得絕對可以encore! 

話哂第一次黎日本自遊行,有d擔心酒店太遠會好辛苦
所以揀左日航,貪佢痴住車站,而且爬文o既時候見到有網友話可以唔洗日曬雨淋就落到車站
我地搭南海電鐵去到難波,再步行黎到酒店
其實沿路行下睇下野又唔覺自己原來行左咁遠路
另一個原因係覺得反正一嗆大直路,咁又搭多個站唔抵嘛

身邊好多人都話日本酒店房係好細,入到黎...嗯,真係細
個喼都係緊緊夠位可以打開放o係地下
不過個景幾靚,加上地點就腳,都真係好值得推介 
房入面o既間隔冇影到,有興趣麻煩上佢官網睇 

呢間其實都係連鎖店,點解揀佢係因為...
對於日文有限公司黎講可以自己夾自己揀唔洗開口講係避免尷尬o既好方法
不過埋到cashier都係要同佢講飲乜
呢d簡單生字就當然冇問題啦~
都係去到後尾先知,原來呢間野周圍都係,早知就去d特別少少架啦 

坐得o係coffee shop食早餐,當然都係飲返杯coffee
另外再揀左兩件唔知乜野o既多士,好似係有蛋呀芝士呀咁...
飽左就上路喇. 

今日係去奈良玩鹿仔/俾鹿玩o既日子
其實真係要黎到外地先有機會可以咁樣接觸呢類動物
俾鹿仔玩完之後又要醫肚
呢間迴轉壽司店就o係近鐵站一出黎商店街o個度
望下價錢好似好平,於是又即刻仆左入去喇

同早餐情況一樣,自己拎自己食唔洗驚唔知食乜好
迴轉帶上面一路都有好多野轉緊,乜都有d,唔會好似香港咁永遠擺d冇人拎o既野o係上面轉
估唔到o係呢類店舖都一樣咁新鮮,地方又乾淨
比起其他料理店,呢度真係好抵食,埋單個價錢仲平過香港,但就新鮮勁多
而且店員又係永遠好好笑容,好開心呢~ 

睇旅行書見到有介紹呢間烏冬店,話好平好抵食
反正都係要食,又唔可以真係餐餐都壽司o既
呢度o既形式都係自己揀完再埋去同佢講要邊款同咩size o既烏冬(類似ikea)
其實食過幾餐之後,都發覺日本o既份量比較多(或者係我地太細食)
諗住烏冬揀m size都應該可以,點知...
加上我地揀餸都幾冇節制,望下附近d人都好似唔夾咁多野
又係飽到反哂枱咁返酒店
如果我地唔係夾左咁多餸其實又真係好平架XDDD 

通常去大阪都會過黎奈良公園呢度餵鹿
我呢d鄉下妹出城梗係要黎玩下啦
未行到公園入口已經有鹿o係度恭迎各位遊客
公園周圍都總會有d婆婆伯伯擺檔賣鹿餅,150yen一舊十幾塊
d鹿見到你拎住d餅就會自動波跟住你
如果你企o係度唔郁,佢地會推地或者咬你
所以園內會見到有個牌係話俾遊客知要小心d鹿會有呢d攻擊行為
我地兩個都俾鹿咬左一次,不過唔洗擔心,係輕咬o者,想催你快d俾佢食
到你派哂手上o既餅佢地就唔會理你XDDD