28 November 2009         (下雨, 仲有d涼意)

台北車站> 瑞芳>平溪線

今日主要係坐火車, 平溪線…去十分、菁桐。

去到台北火車站買票時, 我地遇上一個”看似熱心幫我地”但其實想問我地攞$的男人, 嚇鬼死。我地買咗票上到車, 發現無得坐..唔明人地有d人的票有坐位號碼, 我地無….要企足1小時20分鐘…..(~__~)! 到達瑞芳…要轉平溪線, 購買平溪線一日週遊卷台幣 54。未有車住, 我地出出面的”美食街”(即係熟食中心)食早餐, 食咗個好地道的米線。之後上車出發去十分(其實我地本來想去菁桐先, 但係落錯車), 行老街、觀瀑吊橋、眼鏡洞瀑布, 開始有d雨。呢個站唔太多嘢睇, 所以去菁桐, 但係又要等, 因為d車好疏。呢個站多d嘢睇, 我地首先去”紅寶礦工食堂”, 食lunch, 食咗個礦工工人飯盒, 多嘢食到爆, 好大塊雞扒。之後行鐵道故事館, 原來所謂的故事館, 係買記念品的地方, 並唔係一個博物館..哈哈..有木板postcard, 我都買咗寄比自己&朋友, 仲喺個”幸福郵筒”寄的, 唔知…會唔會得到幸福呢?!?!....雨就越嚟越密..不過都無阻d新人影結婚相, 而我地亦趁無咩雨的時候行落路軌度影相….友人對鞋就就咁宣佈死亡..哈哈…可能比d石仔整爛的。

之後去番去瑞芳, 混亂之間買車票回台北車站, 我地d票又係無得坐, 都唔知有坐位號碼d票點買….又要企1小時20分鐘番去。番到台北車站, 行吓地下街, 友人睇吓有無鞋賣, 發現好多鞋店都有”Made in Hong Kong”的鞋賣…我地話香港要喺長沙灣果d批發先有得賣果d…哈哈..。喺呢度, 友人鞋就睇唔啱, 不過就誤打誤撞去到”李儀餅店”, 買鳳梨酥。之後番中山站, 行新光三越, 喺2館終於比友人買到鞋了。之後再行1館(即係本館), 比我見番Harrods Counter..太好了…我就買咗個x’mas set 比母親大人, 包一隻熊仔 (佢條頸巾有隻小熊的)、一個PVC中size袋、一個x’mas紙盒。比$時, 發現明星…………就係……….伍佰….哈哈…同一名女士一齊買茶葉。走果陣, 我同友人”發夢”地想, 如果我地見果個係Jay….就發達了 (發夢中…………)。之後上9/F 行Tokyo Hands, 不過無咩特別。諗住去退稅, 點知要同一館先得 (我在1館買Harrods, 友人在2館買鞋)….又係搵嚟搞。

已經係9:30pm, 我地仲未食dinner咖, 你話我地為咗shopping, 真係咩都得咖…呵呵。喺毫無頭緒食咩之際, 我地向番番酒店方向, 見到一間好大個招牌的咖哩餐廳, 就入內試試。喺入門口之際, 我同友人講：”依, 呢間嘢個logo公仔好似city super內果間喎”, 友人：”咁即係入定唔入呀?” 我對腳當時已經唔屬於自己咁, 梗係入啦。入到去, 果然係city super果間, 不過都無所謂啦。遇上一個勁熱情的女侍應, 問我地係咪遊客、係咪第一次食呢間餐廳….。同香港唔同, 呢度除咗食主菜外, 係有沙律、湯比你自己任食/飲的, 都幾好喎…哈哈。我食咖哩豬扒飯, 友人食蛋包飯。

就係咁, 明天就係last一天喺台北了。