26 November 2009 (Thu) 天晴

今朝”倒塔咁早”就起身去機場, 因為我要乘8:15am港龍去台北。由於機場巴士都無咁早, 所以我要乘第一班(5:30am) 的788去香港站轉機鐵 (好彩MTR Club 送2張50% discount coupon..呵呵), 我5:15am起身 (基本上昨晚係輾轉反側訓唔到, 我去親旅行前一晚都係咁咖), 連人帶喼衝落樓, 可惜都係miss咗班車, 因為我明明企喺788個位置, 但居然比發現有架788喺隔2條線開出, 仲要我趕唔切叫停佢….激死…有d出師不利的感覺。

去到機場6:35am, 好多人check in, 又排一大爛餐。7:00am去果d貴賓候機室, 喪食嘢, 再嚟一罐汽水。食完拿拿聲搭無人駕駛列車入閘, 因為final call啦..哈哈。

獨自一個上機, 因為友人同我唔同機, 佢會乘遲我一小時的國泰機, 即係話我到達台北都要等佢一個鐘。本來預咗個幾鐘的機程, 飛機餐都會係三文治、麵包, 但居然係食麵, 仲要有2粒燒賣..呵呵…仲有一包曲奇&包裝橙汁。我就好飽, 所以曲奇&包裝橙汁袋走, 以備不時之需。

聽住歌瞓的我, 話咁快就準時(9:55am)到達台北桃園機場。行去換台幣, 勁多人排隊, 之後去落地簽證 (台幣200), 好快搞掂。準備去等友人, 由於港龍降落喺T2, 而國泰就降落喺T1, 所以我就要去T1等了。一去到T1就比我發現友人的航班delay了30mins, 嗚…我只好傻更更咁等”接機”, 期間我發現勁多人接勁咖喎, 仲要係帶埋banner果隻, 哈哈..好似fans等偶像咁。

出發前check過台灣天文台, 話係19 – 23度, 有雨。但係落機就發現係26度, 仲要越嚟越高添….果然同香港天文台一樣…唔多準喎。

終於等到友人出嚟, 我地就去搵車搭去酒店 (其實唔係酒店, 係”商旅”), 我地搭”國光”, 個職員叫我地喺”國賓飯店”落車直行, 我地到咗國賓落車, 開始要估估吓…哈哈…唔記得講, 今次的旅程, 我同友人都係無旅遊書、地圖在手咖…我地只係download咗捷運、火車路線咋..幾勁。

無啦啦我地經過個公園, 就比友人發現我地要入住的”新月商旅”個牌, yeah我地搵到啦…個outlook同我地上網睇好唔同, 不過都ok啦..哈哈..。不過無得上網 (之前上網睇過有咖, 不過唔覺囉), 仲有個浴室係無浴簾的, 所以我地日日都整濕哂個地。喺房我地休息一吓, 友人乘國泰都係得麵包食咋, 所以佢勁餓, 我比咗港龍的曲奇佢食。

梳洗之後我地就出發, 首先搭捷運去市政府站, 新光三越A4 館 (超市果層) 訂咗查理布朗雞蛋布丁 (一盒台幣180, 9隻), 只需留名、數量、攞貨時間就得咖啦, 我同友人每人訂3盒。之後行去搵”江記華隆豬肉紙”, 佢就唔係counter, 只係喺超市入面的一個玻璃架內, 我見仲有貨就唔買住, 等last day嚟攞雞蛋布丁時再買 (之前同事話因為阿蘇介紹過, 所以勁多人買, 成日sold out, 再加上佢去果陣係公眾假期, 所以要訂囉)。

行行吓見到有Harrods counter (我仲以為係日本三越先會有Harrods counter), 即刻入去睇吓有咩啱母親大人, 不過睇嚟睇去、心大心細, 唔知買咩好。所以又兩手空空走。臨走前影相比母親大人睇。

之後我地去咗信義誠品旗艦店, 已經係3:30pm, 好餓呀, 不過今晚打算去”牛角”食日式燒烤放題, 所以又唔敢食太heavy, 所以我地就一人食咗一個mini pizza, 加嘢飲, 個pizza 都ok, 不過杯嘢飲就好唔得。之後我地就行誠品, 不過就無咩收穫, 因為d嘢都幾貴。之後見到我去日本必食的mister donut, 我就忍不住買2個食 (台幣35一個), 仲見到有禮品換, 可惜要勁多”點數”先得…..短短4日, 我一定唔得囉。

之後我地就搭捷運去中山國中站食”牛角”, 其實”牛角”就唔只呢間, 不過就得呢間有”食到飽 all you can eat”, 同埋得星期日至四的。一出中山國中站去對面向右行就到。大約7:30pm, 唔算太多人, 不過我地無訂位, 所以要坐大枱, 我地2個人就一個爐, 我地對面4個人(3大1小)就有2個爐。台幣699 (另加一), 任食任飲2小時, 我地食咗五花牛、牛肋、雞、菇、有骨腸仔、帶子、鍚紙金菇、蝦、蜆湯、溫泉蛋、甜品、每人飲咗3杯嘢….勁飽。不過我地都後悔無勁叫五花牛..哈哈。

食完就行吓街, 去咗康是美睇”我的美麗日記”價錢, 不過都係無咩收穫, 打道回府。