今日一早坐泰國東方航空去曼谷，起飛時間係早上8:15，咁早機場巴士都未開工啦，唯有試下坐機場快線。嘩，只不過係20分鐘，就到達機場喇，當時團友們都只係過左青馬大橋咋。機場快線之快，可能會成為我第時去機場的交通工具首選。

去到曼谷機場，首先用左五百蚊做阿公錢，之後我唱左二千蚊，就向今次BOOK嘅酒店出發。車程要差不多45分鐘，行埋高速公路，車費要三百幾Baht。今次間酒店叫Le Fenix，晌NaNa站，但係極度唔近BTS囉。

因為係早機原故，去到曼谷都係當地時間11點到，去到酒店放低行李後，第一個景點係高山路，最多背囊友嘅地方。因為已經1點喇，就搵左間類似Dan Ryan嘅餐廳食lunch。

之後坐的士去臥佛寺，個臥佛真係好大喎。然後行去鄰近嘅碼頭，坐船去鄭王廟喇。呢個鄭王廟，D樓梯斜到呢，行上去唔係，唔行又好似好蝕咁，最終當然有上啦，但上山容易落山難，要我行反落嚟簡直要左我條命。唯有背住一級一級落囉，落到地面我feel到我對腳係震咖。之後幾日我對腳都酸酸痛囉。

辛勞過後，我地一行六人就坐的士（基本上晌曼谷最好係坐的士，又方便又平，除非你間酒店晌BTS隔離。）去Siam Paragon。因為有個團友話要去睇水族館，所以就晌food court食左野然後浩浩蕩蕩落去睇魚喇。入場費800Baht，係貴D，難得有人有興趣，因為我諗我其他朋友係唔會有興趣睇囉。睇完都好夜喇，所以再食D野就返酒店lu。