新手寫遊記,自從登記左OPENRICE開始寫下食評,今次更是第一次係呢度寫遊記,記錄下開心既回憶及分享俾大家知多D好的餐廳地方
首爾一個幾熟悉的地方,第一次去係渡蜜月,從此鍾意左呢度,每年最少去一次,有時兩次

首先寫整個行程跟住再逐日介紹:

機票: 今次坐國泰用ASIA MILES兌換,只需俾稅,兩人大概$950
酒店: 新村Ever8服務式公寓, 6晚大約$4200 (呢間酒店住左4次喇)
上網咭: 因出發前比較忙,出發前一日先去鴨記買左張(環球8/5GB)$140, 但中伏

DAY 1:仁川機場->酒店CHECK-IN->午餐本粥->梨大->晚餐汝矣渡口夜市->首爾站樂天->宵夜炸雞
DAY 2: 酒店行去弘大->午餐(CAFE)->晚餐福岡漢堡烤肉->回酒店->炸雞
DAY 3: 明洞->午餐馬鈴薯排骨湯->酒店->行去新村食晚餐八色烤肉
DAY 4: 新沙洞林蔭道->午餐烈鳳->晚餐論蜆站海螺煲
DAY 5: 梨大部隊煱->樂天WORLD->新村->晚餐梨大(孔陵一隻雞)
DAY 6: 梨大ISSAC->明洞->午餐柳家抄辣雞->東大門->晚餐新村烤肉
DAY 7: 酒店CHECK-OUT->仁川機場
先介紹大概行程,跟住會每日再講細節及介紹餐廳,今次食左幾間都非常值得推介! 
DAY 1: 香港機場坐CX ->去仁川->仁川機場5號出口坐6002巴士,先要係右手邊櫃位買票先每人10000W, 同職員講(衣嗲-即係梨大), 好快就有巴士,但提提大家首爾既巴士係幾焗架,大約50分鐘到達新村第二站,落車行去酒店大約5分鐘, CHECK-IN上房抖一抖就去食野先, 第一餐唔算好餓所以揀左食本粥,食完係梨大行一陣就去首爾一個夜市,但呢個夜市好似只開到10月30日,所以我地第一日就去呢度!
地點係汝矣渡口站步行10分鐘, 大家去前請先CHECK CHECK幾時開返,因為都好多野食值得去下! 
因為當晚實在太凍,所以食完就即走,坐返地鐵去首爾站行一定要去的樂天超市! 
去樂天超市掃完貨就返酒店喇!! (提提大家係樂天超市買野要退稅要排6號後COUNTER)
返到酒店就叫炸雞食, 今日就完喇!!