Taupo係一個十分值得去嘅地方，所以我地就決定參加一個2日1夜嘅短線tour，去呢個地方走一走，仲認識咗三位來自菲律賓，正喺澳洲讀大學嘅新朋友，一齊玩、一齊癲。朝早起身嘅第一站當然係去醫肚！WOW！好味到不得了嘅早餐，一睇就知有幾正啦！

沿途俾我地遇到幾隻好神氣嘅草泥馬，梗係要落去同佢地影下相啦！

第一站，我地去探下紐西蘭嘅國鳥 – KIWI BIRD。佢地夜間出沒，所以一般唔容易見到架！

呢啲就係喇！不過只係仿真品，因為場管唔希望影響到佢地嘅生活，所以入面唔可以影相，未能夠將佢地最真實嘅一面帶俾大家﹝抱歉﹞。不過仿真品都可以睇到小小特徵。佢地俾我地喺香港見到嘅雞大隻小小，睇落去冇手又冇翼，跳下跳下咁去搵嘢食，從後面睇埋去仲好似真係一個奇異果咁架！毛茸茸！

第二站我地去左Waitomo Cave睇螢火蟲，由於都係唔俾影相，所以只好用官方嘅圖片等大家有個概念。事實上，當你置身於漆黑一片嘅洞穴入面，成千上萬嘅螢火蟲就會令你覺得自己去咗外太空睇星星咁，好平靜，好優雅。

好！靜態完畢又係動態嘅時刻喇！第一站係去玩Jetboat！坐喺一架飛快嘅船上面衝呀衝！急速衝刺、拋上拋落、水上飄移真係乜都齊，頭搖又尾擺，成個身濕晒，好彩佢借出嘅防水衣都真係幾防水。

玩完之後，真係頭都甩，熱晒身準備紐西蘭終極大挑戰…

就係佢喇！Cliff Hanger！

呢個真係好好玩，大推介，你淨係睇個景就已經值回票價啦。咁到底Cliff Hanger係乜東東呢？

就係咁，我地好舒適咁坐喺一個千秋煩嘅物體上面，「1，2，3」，跟住工作人員就鬆開千秋上面連接著吊臂嘅鎖扣，然後你就會好似bungy jump咁free fall幾秒，跟住就fing出去，好似玩緊超級無敵大千秋咁fing黎fing去，fing完佢就慢慢拉返你下去。好好玩架，冇bungy jump咁驚又小啲離心力，係一家大細、老少咸宜嘅新奇小玩意…講下咋，都有啲驚架，但真係好好玩。

玩完一大輪之後，梗係要同新朋友同導遊先生一齊食餐好嘢，交流下人生經驗啦！我地去咗一間當地嘅小酒吧食晚餐，雖然啲食物等咗好耐先上枱，但真係十分有水準。Barbecue ribs大大份，啲汁香濃到不得了，如果可以送白飯一定食幾多碗都掂，個Fish and chips又係正到爆，用啤酒炸嘅非常入味，魚本身又夠新鮮，大大舊、啖啖肉，真的很一流！

食完之後，就返去我地喺Taupo嘅住宿。可能係我地住過所有地方最充滿愛同溫馨嘅一個地方。呢間係一個河邊嘅BnB，屋主係一對好幽默、健談、有善同鐘意去旅行嘅年長夫婦。佢地屋企環境非常乾淨、企理，仲有一個小型地熱式水池，俾我地好好舒緩。仲記得我地入住嘅時候，佢地咁啱喺電影睇緊一場好緊張、好重要嘅Rugby比賽，仲邀請我地同佢地一齊睇埋最尾幾分鐘。我當然唔知發生咩事，但男朋友話我聽佢地支持嗰一隊剛剛險勝，令到佢地好開心，仲覺得我地好腳頭。我從這對夫婦的表現中看到了紐西蘭人對Rugby嘅熱情同執著，好熱血啊！

﹝伸懶腰﹞喺一間咁舒適嘅BnB住，仲要浸晒溫泉咁，梗係瞓得好好啦！一起身，由房望出去就係呢個靚景，真係住一世都願呀。

Good morning!

嘩！好正嘅homemade早餐呀！

全部都係女主人Pat一手一腳準備架！

呢個真係不得了，自家製muffin，好味到極點，極點到我地食完之後厚顏無恥地問佢地拎左四個喺路上繼續食，嘩哈哈！

登登登櫈，佢地就係屋主Russ同Pat喇！﹝右面嗰兩位﹞﹝雖然我都好希望係左面嗰兩位然後去招呼客人…﹞

繼續參觀、遊覽！第一站，Huka Fall！

喺嗰到除咗可以見到啲水好急速咁衝呀衝，仲因為佢地夠澎湃所以有宏偉嘅聲效，雙料娛樂。

跟住就急急腳咁衝去睇噴泉。等呀等，等呀等…

爆發喇！噴到最高嘅時候真係有成十幾二十米高，壯觀非常。

你睇下，仲整左條彩虹出黎添！

睇完噴泉，又急急腳咁去下一站 – Wai-O-Tapu lakes，呢個地熱公園十分有名，四周圍都煙霧瀰漫，好似仙境一樣，而整個公園最有名嘅就係呢個香檳湖，湖水係綠色的，但湖岸就係橙色的，等我都走埋入鏡映襯一下先！

除咗有不同嘅特色湖之外，地熱公園附近仲有一個泥漿湖，呢個泥漿湖係可以細心欣賞的，因為呢個湖係處於沸騰狀態的，所以間中就會好似左下角咁噴一 “pat”泥出黎，好好睇，哈。

下一站，我地黎到Whakarewarewa村，個名係唔係好長呢，讀出黎仲有小小似粗口架，因為 “Wh”係發 “Ph”音的哈哈。如果你都有興趣去下一啲毛利人村落參觀，有件事情要留意的。一般呢啲村落大分兩種，一種就係真係有毛利人喺嗰到生活的，感覺會純樸一點；而另一種就係特別興建嘅旅遊景點，冇人真係住嗰到的，只係扮下嘢，但就會光鮮啲。而我地揀嘅呢條就係真係有毛利人住喺入面的。

正式參觀之前，我地就已經可以享受到一餐傳統嘅Hangi料理午餐，特別之處係所有食物都係用地熱黎烹調的，所以別有一番風味。例如肉類餡料會比較鬆軟、多汁，而呢餐嘅甜品都係用地熱蒸架 – 朱古力布丁！

呢個就係傳說中嘅地熱蒸籠喇！

至於粟米，就係用呢個湖黎烚熟架喇！

毛利人係戰鬥民族，以保衛家國。由呢一啲雕刻我地可以留意到一啲特點，例如佢地傳統會將戰鬥嘅事蹟以紋身方式紋喺面上。而佢地亦會以可怕嘅面部表情嚇怕敵人。張對眼睜到大一大，條脷伸到長一長，又真係幾可怕。

走之前，我地仲可以去欣賞幾位族人表演民族舞，然後…

以最嚇人嘅表情來張合照！

又下一站喇！首先，坐纜車上山，沿途欣賞一下美麗嘅風景。

然後就玩LUGE衝落山！我地買咗玩三次嘅套票，咁就可以低、中、高級路線都玩齊啦！

玩咗一日，成身散晒，又係嘆世界嘅時候喇！我地book咗個私人嘅Polynesian spa，可以靜靜地咁睇住日落浸天然溫泉，享受美景同時，再回味一下呢幾日嘅夢幻旅程，這大概就是寫意吧。

我地呢晚又揀咗另一間BnB住，位於奧克蘭嘅市中心。摩登嘅設計同擺設，加上一個小露台，簡直就係都市人嘅夢想家園。時候不早了，晚安。

呢一間BnB好似每一個角落都係精心設計一樣，無論喺色調、配搭、空間感、實用性等等層面都有投放心思，如果我有這樣的一間屋，然後攪BnB，人生就完滿了。

淨係睇下個廚房就已經就殺死人，簡直就是愛煮食朋友的天堂。

為我地準備早餐嘅就係女屋主Sandra。

等左咁耐，終於等到佢喇！！呢一間BnB叫Bella，咁到底Bella是誰呢？未就係佢囉！佢好攪笑，任人玩架！黑媽媽一舊咁，個頭啲毛又好似老公公嘅鬍鬚咁，笑死人喇！尋晚見唔到佢幾擔心，好彩今朝可以同佢social下先走啫，成個旅途完滿喇YEAH！