20/07/2012 搭10:00am CX450班機到台北桃園機場, 11:45 am 到達台北, 台灣朋友已在機場等我哋

上咗佢架私家車, 佢即刻車我哋北上, 直去基隆轉入金山北海岸, 當日風和日麗, 藍天白雲; 約1小時後, 朋友就响一間似希臘白色小屋前停車, 呢間小屋叫洋豆子咖啡屋

洋豆子咖啡屋就在北海岸旁, 面向太平洋, 對住個海飲咖啡, 食件cake, 真係非常寫意; 咖啡屋有室外同室內, 室內有冷氣,不可抽煙; 室外正面對住大海, 吹住海風好舒服; 當日由於室外已滿座, 我哋為有坐室內喇!
 
朋友自行叫了三件餅, 水果冰茶, 芒果沙冰同朱古力沙冰

三件餅都好大件, 我哋四個人食, 都差d食唔晒; 水果冰茶造形好典雅, 真係有d唔捨得破壞佢, 味道就稍甜, 係因為加了半個好甜嘅橙同其他生果; 芒果沙冰係用新鮮芒果製, 芒果相當甜; 朱古力沙冰就較普通d, 但我嘅港童鍾意, 冇法!

由於係朋友請, 所以我唔知呢餐幾多錢, 但應約700元台幣左右

其實去洋豆子咖啡屋之前, 朋友在路邊停車話買粟米食, 佢話呢間小舖出名食燒烤粟米, 咁就買咗每人一支

原來呢條係糯米粟, 喺上面塗上一層烤肉醬汁, 食落好似食燒烤肉類般, 感覺粟米粒黏黏的, 真係同香港嘅超甜粟米d質感唔同, 食完真係唔洗食飯, 好鬼飽呀!

 

二十年前曾跟團嚟過台灣環島8天, 最有印象係呢個景點 - 野柳

在與朋友編行程時, 我提議去此處, 因為呢個景點真的令我印象深刻, 另一半同港童從未蹈足台灣, 而台灣朋友都十年冇嚟過, 所以朋友就順路由北海岸入野柳

依加嘅野柳靚咗好多, 修路造橋, 有埋個旅遊中心, 收埋門票50元,  仲打造埋卡通人物代表野柳石象, 好鬼可愛

野柳現場所見, 本地人好少, 最多就係祖國同胞, 一團又一團, 周圍都係佢哋嘅踪影, 當然有d唔守規矩啦! 如踩上d風化石上影相, 隨地吐痰, 想打尖影女皇頭等等.....唉! 真失禮! 當然都唔係個個係咁嘅!

行完野柳，朋友就揸車直去陽明山。

我曾在網上搵資料，好似係冇直接嘅巴士由野柳去陽明山，要轉車先至可以去到，又或者包車。

今次朋友只帶我哋遊咗陽明山嘅東北及東南面，而因時間同順路関係，今次係冇去西面同北投，下次去台北再補數吧!

在陽明山遊車河，感覺很好，氣溫稍涼，約攝氏23度, 同山下的台北氣溫成強烈對比。

朋友就响冷水坑放底我哋，呢處有免費溫泉提供，可全身浸或浸腳，我哋只係浸腳。

全身浸溫泉嘅地方比較簡陋，外型是公廁模式，前面小屋是男温泉，後面係女溫泉，的確浸身區較舊，裏面有一個小池，約可容納6個人左右，溫泉池旁是沖身處，而浸溫泉的人大部份都係上咗年紀嘅公公婆婆，溫泉內裡大家都是赤條條，所以唔方便影相。 

陽明山嘅溫泉，係屬於硫磺溫泉，所以有浸硫磺味。浸完腳後， 都覺得雙腳滑咗D。

跟住又出發去下一個景點 -  文化大學新建體育館，係呢處可以望晒全台北景色。

喺文化大學新建體育館走落50米, 就係今晚食飯嘅地方 - 屋頂上。

嚟呢間餐廳最主要原因, 係呢間餐廳可飽覽台北市全景。佢哋有室內同室外嘅枱, 當然室外係最多人揀, 因為可以睇景麻! 而且佢哋亦在餐廳中間位置設置咗共用間, 有8張長椅比客人坐, 共用間係唔可以食嘢, 只可以比客人影相同睇景, 有d喺室內嘅客人食完嘢就走出嚟睇景, 真週到啊呀! 如果係香港, 一定唔會有共用間, 餐廳一定放多四張枱搵食。

食方面我覺得OK嘅, 雖然唔係真係好味到令人難忘, 但對住個靚景食飯, D菜式都零舍好味嘅!

價錢方面係唔貴, 我哋一共叫咗5個菜, 碟頭又大, 味道又唔錯, 都係NT1650, 約HK$441/4個人, 只是香港一般餐廳酒樓價; 如果係香港, 一定收高檔價, 點會咁大眾化呢!

原本在兩個月前已預約咗响8月1日去總統府參觀, 但最後決定取消唔去, 原因係總統府規定男女不可穿背心短褲及著拖鞋入內參覲, 台灣實在太熱, 38度下點樣著住條長褲呀! 所以決定打電話去取消預約。

雖然唔入去參觀, 但經過總統府, 就影番張相算是到此一遊。

約上午11:15到達兩蔣文化園。

出發去台中, 途經桃園縣慈湖, 又唔洗入場費, 當然入去參觀吓啦!

起初以為兩蔣文化園都係一般嘅景點，心想都係抱住到此一遊嘅心態，但原來唔係架！

我哋先入慈湖遊客中心參觀, 門口有兩個得意Q版嘅蔣介石同蔣經國嘅銅像, 中心嘅中間位置係一個小型博物館, 主要簡單介紹兩蔣生活點滴, 國共政治, 台灣經濟及建設等, 而中心兩旁分別係餐廳同紀念品店。

遊客中心後面有小路直上慈湖, 綠葉成蔭, 雖然當日好熱, 但在樹蔭下都有清風送爽, 經過牌樓, 就會見到風景優美嘅慈湖, 走過慈湖, 就係蔣介石陵寢, 同忠烈祠一樣, 有兩位衛兵守護陵寢, 衛兵全副武裝, 睇見佢都熱, 兩位兵大哥滿面汗水。

十分鐘後, 係換班儀式, 五位兵大哥操完約10分鐘嘅換班操後, 我哋就離開陵寢, 走回遊客中心方向, 順便去埋慈湖紀念雕塑公園, 公園入面一大片草地, 擺放咗好多蔣介石銅像, 大大小小嘅銅像不下數十個, 好一個個人主義公園 。影完相, 馬上走返入遊客中心過冷河, 順便食番支Q版梅花形雪條解吓暑, 我揀花生味試吓, 好濃嘅花生香, 而芒果味當然唔會差得去邊啦! 食完就爽晒!

呢個景點主要招呼大陸同胞旅行團為主, 對強國人來講, 當然係幾值得參觀, 第一唔洗入場費, 第二亦比佢哋了解吓國民黨同蔣介石嘅嘢, 唔洗喺國內只睇到一黨專政嘅一面。
 

兩蔣文化園入面嘅停車場旁, 亦即係慈湖遊客中心對出, 有拉拉山農民嘅水果展銷攤檔 。

拉拉山最出名就係水蜜桃 ，經講價後，我哋用咗台幣120買咗4個中型嘅。台灣D水蜜桃好香好甜, 水份充足, 用手輕撫水蜜桃, 連對手都充滿住水蜜桃的香氣 。

除咗水蜜桃外, 又試咗好多台灣地道生果, 如石榴, 梨, 蘋果同鳳梨, 一樣咁正!

台灣朋友話台灣除咗台北外, 每個地方都有佢哋特有嘅農作物, 我哋今次台灣環島遊一定要慢慢品嚐台灣農作物 。

去完兩蔣文化區，跟住就到大溪老街行街兼掃街。

我哋先行咗街巿，再又街巿進入老街。

大溪老街唔係好長，短短的兩旁舊樓已活化成商業及文化兼備嘅「商用民宅」，老街大部份商舖都係買食品, 令到成條街都好熱鬧, 食物香氣亦充滿著整條街呢!

一去大溪, 朋友馬上帶我哋去食全鎮出名嘅鹵水斎, 名字已忘記, 成間店係冇冷氣, 人頭擁擁, 完全坐無虛席, 梗係好食先至咁多人啦! 嚟大溪, 一定要去食呢間鹵水斎店呀!

大溪係出名豆干，豆干名店有兩間，分別係黃大目和廖心蘭。兩間都有幫襯，豆干口味都有好多款，如鹵水、芝麻油、麻辣等，亦有各種口味腐乳，最推介係黃大目嘅鹵水豆干，一包開封，一定食唔停。

大溪老街幾乎都係售賣食品, 亦係一條手信街, 完全可以係度買大溪出名嘅食品 。

後悔豆干買得少, 喺其他地方買唔番黃大目嘅鹵水豆干同芝麻油豆干, 可惜;

後悔糕點買得少, 怪責我哋個胃唔夠大, 樣樣食少少, 飽晒;

後悔生果買得少, 買幾款試完味, 又响第二處買唔番, 無奈!

 

 

離開桃園縣大溪老街, 朋友專程車我哋嚟苗栗縣棗莊, 此乃食特色私房客家菜, 兩點多就到達棗莊食午飯, 啱啱過咗午飯繁忙時間, 所以我哋等一陣就有位喇!

呢處唔屬於著名旅遊區, 所以外地遊客係冇, 只有本地台灣人士揸車去食飯; 我覺得棗莊好有台灣本土特色, 飯菜係台灣客家菜,  我哋所點嘅菜式都具備鄉土風味, 呢餐盛惠1100元台幣, 好值呀!

棗莊除了有餐廳供客人食飯外, 莊周圍環境都唔錯, 棗莊內種咗好多佢哋嘅主題樹 - 紅棗樹。

喺門口擺攤檔賣當日新鮮所摘嘅紅棗, 每盒NT200, 新鮮紅棗味道與曬乾紅棗不同, 新鮮紅棗初摘時是綠色的, 莊員話過一段時間會變紅色的, 而味道不酸, 即摘即食,  爽脆清甜

其實棗莊不但有心思做私房客家茶, 喺餐廳同莊園布置都好有心思, 主題以舊時農民生活為主, 傢俱陳設雖舊, 經重新裝飾後, 別緻優雅 。

勝興客棧出名客家菜, 但我哋唔食客家菜, 喺嚟飲擂茶 。

我嘅另一半係海豐人, 家鄉一樣飲擂茶, 佢哋主要有兩款: 菜茶同鹹茶, 都係鹹味 。

菜茶係最好味,  擂茶內有芝麻, 花生同茶葉, 擂好茶底, 加埋幾種蔬菜, 腊味, 蝦米, 炒米同原粒花生食; 而鹹茶就冇蔬菜腊味同蝦米; 由於做菜茶較複雜, 所以過年先至有得食, 平時就做鹹茶 。

今次嘅擂茶屬甜味, 店主先將黑芝麻, 白芝麻, 花生同瓜子放在磨碗內,  讓我哋輪流玩擂茶 。直至磨至混合物到滑身, 就加熱水, 黃糖粉, 綠茶粉, 再擂一陣, 便分成四小碗, 加炒米便成; 不過......嗰甜擂茶唔得, 最唔掂係炒米, 腍晒, 有益味, 另個茶太甜, 都係菜茶好味好多 。

喺勝興客棧玩完飲完一碗甜擂茶, 走出客棧向左望, 就見到有一小攤檔賣炸物, 又走去試吓!

炸物主要材料係地瓜同薯仔, 有幾種口味, 一係加辣粉, 另一係加孜然粉, 仲有係加沙糖含椒鹽粉, 我哋冇要辣味, 要咗NT100地瓜同薯仔, 味道ok啦, 不過不失, 但一定要熱食,  唔係就會腍夾更油,
不然掉了它吧!

由勝興車站到台中, 一路都係跟住舊黑雲, 行雷閃電, 一路在公路上行走, 一路d閃電喺左右隔離閃來閃去, 真係好驚, 就因為咁, 公路上有交通意外, 所以塞車塞咗兩個幾鐘至到台中。

去到台中都7:30 pm, 即刻去今晚所住嘅地方check in, 然後馬上去逢甲夜市掃街。

真好彩, 冇落雨, 逢甲夜市規模都幾大, 有嘢食, 有嘢買, 好啱年青人嚟食買睇, 我真係睇到眼花, 港童就係度掃貨買手信比同學, 我就負責比錢, 另一半就同朋友搵食。

呢度真係有好多花款嘢食, 不過都好多double檔, 我哋都係行到邊, 食到邊, 鍾意食咩就買, 全冇跟書上網上所推薦嘅去食, 都滿意囉!

由於22/07/2012正值週末(星期六), 台灣各地嘅住宿都較貴, 而且係暑假添, 經台灣朋友思索, 佢提議去呢間合作社住, 4人房, NT1500/晚, 好抵呀!

起初真係冇咩期望, 上網睇, 好似間學校咁, 好似幾舊添, 但沒法, d房價真係幾貴, 又要平衡番d旅費, 所以冇理港童同另一半點唸, 都去馬算喇!

哈! 去到又唔係太差, 嗰Lobby雖然舊d, 但上網好快, 間房雖然亦舊d, 但當可接受, 有兩張3呎半單人床同一張5呎雙人床, 張床都幾好訓; 一切基本設備都有, 奶茶咖啡, 風筒即用毛巾牙刷等都有供應, 港童都話OK, 當然得啦!

現在米芝蓮的版圖還未擴展到台北，所以出發前便參考了一本叫「台北世界級名廚餐廳」的書籍，最後鎖定到訪STAY、璞食軒及Pierre Marcolini三間餐廳。女友知道我喜歡吃法國料理，便挑了STAY為我慶祝生日。

位於台北101購物中心4樓的STAY，其全寫是Simple Table Alleno Yannick，由米芝蓮三星名廚Alleno Yannick所創立，旨在塑造一個輕鬆自在的環境讓客人品嚐一頓法國料理。

這天是平日的中午，客人不多，座位安排更為鬆動，坐得分外舒適。環顧四周，室內裝潢時尚優雅，卻沒有嚴謹的服飾要求，也有穿圓領衫與短褲的男士，不如高級法國餐廳般拘謹，氣氛非常輕鬆自在。

STAY的午市套餐分為4種，兩道菜基本午餐包括前菜及主菜，價格為NT$980。兩款中價午餐較基本的多了湯品及甜品，合共四道菜，價格分別為NT$1480及NT$1900。最豪華是NT$2800的五道菜午餐，更附有店家的招牌甜品「半公尺的甜點盛鍛」。我點了NT$1480的套餐，女友則點了NT$1900的套餐。

先來的是主廚精選小點，各以一隻木匙盛載，既美觀又方便食用。服務生建議先從青蘋果凍開始品嚐，入口微酸而且味道清新，裡頭還混有果仁碎來增添咬口。最後是味道較濃的豬肉凍，味道鹹香，咀嚼時還吃得到煙韌的軟骨。

當日Alleno Yannick決定到台北開店時，為確保麵包質素，便引進同樣來自法國的Lalos Bakery到101，為STAY供應麵包。麵包籃內的小圓球帶點蜜味，而且較為鬆軟。但最喜歡還是外層香脆而煙韌，內裡滿有麥香的小法包，簡單的塗上牛油，其酥香使麵包更為美味。

我的前菜是「薩丁尼亞麵疙瘩」，麵疙瘩被一層厚厚的海膽泡沫所覆蓋，賣相吸引。墊底的麵疙瘩就如細碎的意大利粉，軟熟可口，飽吸海膽與巴馬臣芝士的香味，非常好吃。裡頭的海膽，質感幼滑細膩，鮮甜中帶有海水味，令人一試難忘。

女友的前菜是「新鮮水牛乳酪」，按服務生的建議，拌以各種配料一併吃下，水牛芝士口感軟綿伴隨著淡淡的奶味，香脆的芝麻麵包脆片與略帶微酸的車厘茄，也減輕了芝士的膩滯感，配搭簡單而清新。

前菜過後，服務生把湯碗端上，先讓客人看清碗底的配料，才把熱湯注入。我的湯品是「青醬蔬菜清湯」，每一口也充滿蔬菜的清甜，湯內除了蔬菜粒外，還有數片巴馬臣芝士，其鹹香使味道更具層次。置於碟邊的巴馬臣芝士棒，單吃或沾湯吃也不錯。

女友的湯品是「慢燉鴨清湯」，湯內有鴨肉慕斯，紅蘿蔔，西芹及蘑菇。湯底清澈，味道濃醇，彷彿把鴨的精華都濃縮於湯裏一樣。配料中的鴨肉慕斯亦見精彩，入口即溶，化作一縷濃郁的鴨香。

我的主菜是「油封石斑魚」，石斑魚肉質嫰滑且魚味鮮美，非常出色。配菜是杏鮑菇及烤馬鈴薯，肉厚的杏鮑菇口感爽嫰，菌香濃郁；馬鈴薯表面煎得微脆，小小一片卻薯味十足。 

女友的主菜是「巴黎風牛菲力」，點了五分熟，呈嫰紅的肉色極其誘人。吃一口，肉味濃郁而且軟熟鬆化，咀嚼間還滲出豐盈的肉汁，讓人回味無窮。配菜是主廚特製脆薯，外脆內粉，沾上香濃的牛菲力醬汁同吃，既香口又惹味，不過以薯條作為主菜的配菜，總覺得稍欠特色。

主菜過後，便輪到「法式精緻小點」，分別有集香脆與酸甜於一身的鳳梨撻及味道濃醇的朱古力蛋糕。

此時，服務生端來一個插著蠟燭的「脆皮泡芙塔」，送上生日驚喜。內藏朱古力餡的泡芙，外層硬脆，口感特別。堆成塔狀的朱古力奶油幼滑輕柔，中心更混了黑朱古力奶油，吃得出不同濃度所帶來的層次感。

我的甜品是「柚香蛋白脆餅」，在蛋白脆餅上放了柚子雪芭，再以數片糖漬檸檬作點綴。入口先感到一陣冰涼與香脆，咀嚼間雪芭與脆餅在口中溶化，柚子的酸香正好中和脆餅的甜味，配搭恰好，甜而不膩。

女友的甜品是「特製巧克力脆糖卷」，在脆糖卷內填滿覆盆子果凍雪芭，再以無花果醬把兩端密封，設計極富心思。輕輕敲破脆糖卷的外殼，內裏的覆盆子雪芭又凍又酸，感覺清新。

吃過甜品後，服務生便遞上沾滿脆糖的棉花糖讓客人挑選。

逐道菜式慢慢品嚐，不知不覺已經吃了兩個多小時，又是時候繼續行程。結賬離去時，沿途服務生與領班再次給我送上生日祝福，有點喜出望外。個人挺喜歡STAY這種簡約而輕鬆的風格，若果要追求奢華與精緻的話，STAY或許會不對口味。 

一早起身, 馬上決定唔玩宜蘭, 即回台北, 如果唔係, 連台北都唔駛指意玩呀!

我哋搭的士由英雄館去宜蘭轉運站, 其實路程唔太遠, 應行十五分鐘左右, 但因下著雨, 又拖住唿, 都係搭的士隠陣D。

台灣朋友叫我哋揀葛瑪蘭客運搭, 因車較新同快, 我仲選綠色線1916, 由宜蘭直去台北車站, 當中只有3個分站, 快好多。

我哋準時坐10:25分客運返台北, 好彩, 沿途冇塞車, 唔駛一個鐘就去到台北。

The Top喺我響東方食宿網站訂嘅，見佢地點方便，唔係太貴，約HK$500/3個人（無論訂雙人房或家庭房都要以人頭針，喺台灣住民宿好難屈蛇的）。

The Top屋主嘅民宿主要係舊樓裡，全部冇lift，我住嗰兩間面向响大街，屋主仲有零星幾間响後街。雖然住近大街，但唔係太嘈。

我共訂4晚，第一晚嚟台北20/07及最尾3日（30/07-01/08），另幫朋友訂咗8月1日。

20/07由於係星期五，房價較貴，雖然20號晚間房冇後3日咁靚咁大，但都唔差，房名叫溫馨小家庭，一張5呎床再加床墊，內有一小客廳，有衣帽間同小廚房，都約有400呎，不過要行上兩層窄窄的樓梯，拎住行李喼，上落十分吃力。

後3晚住嘅房叫時尚新古典，我住呢幢舊樓共有三層，每層一單位，一樓即我住的時尚新古典，面積約有700呎多, 設備算新淨，只係浴室沖涼位冇門擋水，浴室大門係磨沙玻璃，另有一房係衣帽間，地方好大。而旅行partner就在8月1日入住，佢住喺樓上二樓，房名叫後現代紐約，面積一樣，但沿室冇門，澡涼較尷尬。

由民宿到捷運西門站要行約10至15分鐘左，樓下有又平小食店及便利店，所以8月2日想extend 多一日都冇房。

取消宜蘭半日遊，馬上會合旅行partner響台北車站，然後即搭捷運去淡水。

淡水老街都係台灣一般嘅賣手信及小吃嘅小街，由街頭試食試飲到街尾，都飽晒囉！而小吃攤販賣的都與夜巿差唔多，其實我對淡水老街冇咩興趣，我嚟咗12日台灣，都去咗好多老街同夜巿，反而朋友喺度賣咗唔少手信呢。

至於慢步淡水河較寫意，經過淡水碼頭，有船家兜生意，話NT270/人/來回八里至淡水，乘搭嘅人唔多，朋友話天氣時好時壞，7個人搭船都唔平，所以擱置了。

其實嚟淡水最主要目的，係朋友個仔知道呢度有平波鞋賣，經搜索一輪後，原來賣波鞋店舖响淡水捷運站對面，路口前有Nike專門店，要走到街尾轉左，有間波鞋店，我哋就响店內消磨咗個幾鐘，朋友一家四口買咗6對波鞋，我哋都被佢影響，買咗一對，三個港童話呢度平香港約百幾二百蚊，係咪真架？不過，我相信「出門賣嘢實疏爽」呢個道理!!!

一路慢步淡水河, 一路睇住日落西山, 不經不覺行至紅毛城古蹟。

古蹟都有做Promote？ 現在唔駛錢可入場, 當然入去影番幾張相啦!

離開紅毛城, 天又開始下雨, 仲越落越大, 就喺路口搭巴士直去漁人碼頭。

落車時雨剛停, 天變成橙紅色, 要快D行去情人橋影相同睇餘暉，天黑就會景色有變，要把握時間捕足浪漫的每一刻呢！果然, 慢步於橋上真浪漫, 周圍景致迷人, 難怪是拍拖必選之地。

原本都想在此食晚餐, 諗住浪漫吓, 但港童們一致要出去捷運站才食, 啊！原來有目的 - 要去買波鞋也！！

我真係比呢個台北車站玩死, 昨日約旅行partner一家在Y3區等, 都搵到我死喇, 行咗成半個鐘先至同到朋友會合。

今日又比佢玩多一次, 賣票大堂原來都有好幾個, 令我再一次遲到, 好彩朋友明白, 因為佢自己都係咁, 搵咗好耐, 先至搵到佢要住嘅酒店出口處。

最後一日都要再比佢玩多次, 問捷運工作人員行邊到可以搭到客運去機場, 又被兩個工作人員點到行錯路, 最後亦要搭的士到機場, 好彩趕得切班機。

台灣朋友話佢哋本地人都成日攪錯台北車站方向，更何況我哋D遊客呢！ 

 

 

由台北至瑞芳，差不多約15分鐘就有一班車，約40分鐘就嚟到瑞芳，然後行出火車站，再過對面馬路，就可以搭巴士到九份，好多巴士都可以上到九份，方便快捷。

瑞芳本身是個小鎮，唔係咩嘢遊客區或購物區，遊客多數都係去其他景點而路經此地。所以瑞芳冇嘢睇，冇嘢買。

有曾到過九份嘅朋友話九份冇嘢睇, 亦睇過網上有人話九份遊覽價值一般, 究竟點架?? 自己親身去睇吓咪知道囉！

嚟到九份, 呢度修飾得好鄉土情懷, 好遊客區, 仲好緊貼潮流, 整個九份老街有免費wifi覆蓋, 對我哋遊客來講係非常方便上網、行街、食嘢、購物。

九份老街純粹係一個遊客區, 可以係度買台灣手信, 可以係度食台灣地道小吃, 又可以係度飲杯茶, 食個包, 愐懷鄉土事, 細看九份舊建築, 看看九份下的山村景色; 熱鬧, 恬靜, 集於一身.........

 

九份老街除活化成遊客區外, 連昇平戲院都冇將之荒廢, 雖然戲院已被現時的商場迷你戲院取代而停止放映電影, 但仍然冇浪費佢嘅價值, 成為老街中的小型博物館, 令遊客在此回味戲院舊時的光輝。

行到差不多, 係時候醫肚, 行過見綜合魚丸湯一連有三間分店, 門口見佢哋D丸大大粒, 幾吸引，入去試吓啦!

店裡貼滿老闆娘個人「玉照」, 老闆娘真係自信心爆棚呢!

我哋每人都叫了一碗各式丸子, 朋友一家四口一定要丸+粉麵, 而我哋三個就叫咗超級綜合丸湯, 裡面共有十種丸子, 當中有三種味道麻麻, 肉質鬆散, 味道一般, 如果再揀過嚟食, 我唔會選佢做午餐囉!

食完丸子, 又走去買兩件草仔棵, 唔錯喎, 甜味適中, 每處地方都有其造棵風格, 每在一地方食一棵, 方可感受到當地郷懷, 「真係各處郷村各處棵」吧!

平溪鐵路沿線近年受電影同電視宣傳, 傳媒又大力吹谷, 現已成為港人到台北必遊之地。

四方八面都一致讚好, 對佢當然有期待啦! 可惜天公不造美呀! 嗚 ~

去到瑞芳線搭平溪線, 大部份嘅遊客都係港人, 只有少數當地人搭平溪支線; 我打算先去菁桐終點站落車, 個半小時後再搭回火車响平溪或十分落車逛逛, 點知如意算盤算錯了。

好多遊客都同我一樣在菁桐站落車, 遊完菁桐再坐火車回程; 在菁桐, 除了周圍的鐵路故事館, 菁桐礦業館同零碎兩三間小店有開門外, 全部休市, 不消15分鐘, 便可行完整個車站區域。火車又開了, 要等一個半鐘至有火車, 想去礦場睇睇, 天色又唔樂觀, 想搵食, 食店又關門, 只有一間有賣雪糕嘅小店有開; 想放天燈, 個天又落大雨, 我哋同埋好多港人都擠在木造車站呆等一小時火車, 就咁樣嘅陰影下, 我哋決定唔係平溪同十分落車行街喇!

原來呢個唔單止我哋嘅做法, 原來大部份响車站呆等嘅香港遊客同我哋一樣, 都唔落車, 噢 ~

我想都係我哋咁啱遇到天氣唔好, 令D老街都唔願開門做生意啫, 事實喺呢處影相又真係唔錯嘅! 好有韻味呢!

 

註: 原來我都去咗台灣四個日式木造火車站中其中三個 : 勝興車站, 集集車站(寶島時代村室內版)同菁桐車站。

 

由於平溪支線火車班次疏落, 要等下一班火車最少要1個多小時, 所以我哋除咗菁桐有落車逛逛外, 十分同平溪都係即落即上, 因為在車上看過去, 十分店舖都好凋零, 只係小數營業, 而平溪亦然, 算啦! 總算到此一遊了, 比較失望係放唔到天燈, 因天不停咁小雨大雨, 見有遊客放燈, 未夠一分鐘已整盞燈掉了下來, 唷 ~

原本想喺菁桐食D嘢，但菁桐冇食店營業，忍住餓返到瑞芳，一班港童話冇力行喇，好啦! 去瑞芳舊街睇吓先啦!

點知瑞芳舊街得個牌，條街相當凋零，只得三間小食店，都冇得揀，就揀間好樣啦!

呢間小麵店真係唔肯定佢叫咩嘢名，因舖內好多舊招牌，舊時收音機，舊時擺設，煮食嘅地方喺外面嘅小檔攤，店內4張枱，其餘地方都擺成好似博物館咁， 幾好，一路食，一路有嘢睇, 嘻~

講番D麵食，又唔差喎，雖然唔係驚為天人，起碼不過不失，碟頭都幾大，價錢又唔貴呢!

由於早上我哋四位家長忙於處理航班事宜, 我哋差唔多1:00先至坐的士去Mr. J, 司機又車錯咗我哋去台大醫院, 攪到成1:45至到餐廳, 令我哋食唔到Set Lunch, 要用原價食主菜, 價錢相對貴咗好多。

Mr J 有min charge 計, 所以用人頭計, 起碼每人要叫一樣嘢, 我哋叫咗6個意粉及飯, 同埋一個Tea Set, 6個主菜味全部有跟餐湯、法包同飲料，而味道係得嘅, 唔錯, 可惜份量少咗d, 朋友同一班港童都係大食之人, 呢d份量只能滿足佢哋暫時嘅須要, 所以對佢哋嚟講係唔飽, 而個甜品, 百香果巧克力切餅唔單至好味, 而且好扺食。

因其中一個港童係周董迷, 所以好期望嚟呢處食飯, 而我哋四位家長都只抱住到此一食, 所以對餐廳感覺唔係太強烈, 入面嘅布置亦不須多介紹, 因太多香港周董迷同網誌都已介紹。

見到台北101, 冇特別感覺, 因為在香港周圍都係高樓, 自己亦曾在世界最高大廈返工, 所以冒雨影張相, 入內轉個彎便走。

好難忘嘅一餐晚餐, 台灣朋友專登帶我哋去呢間有得食, 又有得玩嘅日式燒肉店。

當日台灣刮颱風, 台灣政府宣佈8月2日全台北停工停課, 台灣朋友就話同我哋盡興今宵, 佢又再一次比我驚喜.......

呢間「乾杯燒肉」係台北好有名，好多OL、年青人愛蒲新熱點，J2 "台灣闖蕩"都有介紹。台灣朋友全程負責叫食物, 嚟到樣樣都好食, D牛肉入口即化, 班港童食到唔停得口; 8:00pm 前, 侍應會走到每張枱, 問客人嚟乾杯燒肉食嘢嘅感受同問客人有冇嘢要向外宣布云云.......

到8:00 pm，司儀要所有客人一齊倒數，然後於10秒鐘一齊乾杯, 完成後侍應會再送多一杯客人剛才所飲嘅飲品, 好有氣氛, 噢!

玩完乾杯， 又到每張枱宣布該張枱客人嘅感受，同客人打成一片；就喺侍應宣布時，我先知那晚有三分一幫襯乾杯嘅客人係香港人，大家都係因打風留在台灣，冇得返香港都咁開心，Oh!

講完感受，侍應就會過嚟搵人玩kiss kiss，無論係情侶、同性朋友、家庭成員等，佢哋都會拉你報名玩，錫錫10秒後，影完相，就送客人一碟牛或豬肉。我嘅另一半見此即刻走開咗，班港童四散逃跑，我嘅旅行partner就報名玩咗，咁我哋又多一碟燒肉食喇！

今餐真係唔知食咗幾多錢，係由台灣朋友靜靜雞埋咗單，我呢個朋友真係.......太客氣喇！

 

離開乾杯燒肉, 已10:00pm, 走出ATT 4 Fun, 橫風橫雨, 超大嘅風雨, 台灣朋友送我哋返民宿, 佢話順便同我哋問吓有冇8月2日同3日嘅房, 所以就去咗台北英雄館問吓喇!

去到英雄館, 好多嘅房都已經被預訂, 8月2日只有兩間8人團體和式房, NT3,200, 包早，真抵住; 但8月3日已經房滿, 但可做ｗａｉｔｉｎｇ　ｌｉｓｔ，由於我嘅旅行Ｐａｒｔｎｅｒ唔係好識講國語，加上一定要台灣朋友幫佢哋在８月３日做ｃｈｅｃｋ　ｉｎ，而我亦在８月３日就走，經思想後，我哋都係再搵過第二間住宿。

註 ： 全台灣嘅英雄館雖然價錢好平，以前只招待軍人及其家屬，現在亦都招待台灣公民，不過佢哋現時仲未對外開放，所以外國人係訂唔到，除非有台灣公民幫忙預訂及做埋ｃｈｅｃｋ　ｉｎ，否則唔洗唸喇！

 

02/08/2012

要由The Top搬去愛客發商務旅館, 趁停雨, 馬上起行, 好彩只走兩條街。

呢間旅館係另一半同朋友搵到嘅, 位置方便, 喺西門町中心點, 房內裝修唔錯, 乾淨舒適, 旅館仲有好多香港人住添, 雖然係咁, 其實心裡有d驚, 因為......

1) 房內係冇窗嘅, 只靠冷氣同抽氣扇調節室內空氣;

2) 旅館形式有d似重慶大廈, 地下至5樓分別係戲院、機舖、商場、食肆等，好雜呢；

3) 走廊同通道狹窄, 樓梯出口比較複雜難搵。

如冇事發生當然好, 如遇火警會係一個好大嘅災難....

愛客發旅館另外仲有兩幢唔同嘅住宿, 那兩幢環境雖然冇呢座咁方便, 但起碼有窗同易找樓梯, 真係有著有唔著......

攪掂check in事宜後, 朋友同班港童話肚餓, 就落去睇吓樓下商場有冇嘢食。

原來真係好方便, 樓下商場, 有好多唔同種類嘅食肆： 中, 西, 日, 台, 小吃, 乜都有得食, 就係度唸食乜嘢嘅時候, 老山東嘅老闆就走嚟兜生意, 唉! 見佢咁誠懇, 就入去幫襯啦!

一入去, 見得兩枱客, 唔...好唔好食呢?????

我哋每人叫了一碗牛肉麵, 兩碗大, 5碗細; 大碗真係好大, 真係可以3至兩個人食; 牛肉味濃, 麵係師傅手造, 好彈牙, 唔錯喎, 另外仲叫咗15個韮菜豬肉餃添, 好似响上海食嗰d, 好味。

其實台灣有好幾間出名食牛肉麵, 但都不能在今次一嚐, 希望下次來台再食吧!

 

西門町, 不用多提, 係遊客嚟台北, 一定唔會錯過嘅遊覽項目, 不過.......

颱風下, 西門町一樣熱鬧, 一d都唔似颱風打到嚟; 商舖食肆照常營業, 打風, 唔關佢事呢!

在風雨中行咗一陣西門町, 仲未係時候赴約(今晚約咗台灣朋友再去食餐勁), 落住雨行街唔方便, 又要搵地方歇歇腳。

抬頭一望, 見有座大廈6樓有間女僕Cafe, 我哋一行七人都未試個, 就決定上去飲杯嘢, 玩吓手機, 等夠鐘啦!

一心唸住d女僕質數有番咁上下, 而且會親切有禮, 點知......

成間Cafe只有兩位女僕, 入到去, 女僕表情麻木地同你講句:「主人, 有什麼吩咐....」, 然後就行開, 都冇招呼我哋坐低, Oh...

我哋叫咗7杯五顏六色嘅特飲, 有兩杯好似葯水味, 我嗰杯ok啦!

女僕樣子一般, 冇穿短裙, 表情生硬, 我哋亦見兩位來自香港嘅宅男聊兩位女僕, 而規條亦寫明有d問題係唔可以問女僕, 如幾時放工....... 可唔可以放工後去街等等, 都不能問, 但兩位宅男一樣係咁問, 女僕就唔多睬佢, 哈!

昨日喺3樓乾杯燒肉晚餐, 盡興；今日喺6樓饗食天堂自助餐, 盡食, Yah! Yah! Yah!

呢間專門自助餐店, 响台北都算出名, 但在兩個月前因來自韓國嘅生蠔出咗事, 變咗近來少咗人嚟幫襯, 但我哋仍然照book位, 約埋台灣朋友食埋呢餐, 多謝佢熱情招待我哋, 同埋我哋嘅旅行partners, 今餐喺我請客......

食物無論造形, 擺位, 質數, 供應都非常講究, 飲品係用鮮榨果汁 : 橙汁, 西瓜汁, 石榴汁, 芒果汁, 蓮霧汁等, 汽水啤酒任飲, 雪糕係Haagen-Dazs, 有多種味道任選, 真係香港5星級酒店都冇佢咁多嘢食, 質數咁好, 但價錢竟然係約港幣$240, 嘩! 喺香港3星酒店食個Buffet Lunch都唔得啦! 依加唸起, 都好想再去食啊!

 

03/08/2012

朝早起來, 搵埋朋友一齊食早餐, 今日台北終於好天喇, 而我哋亦要結束15天台灣嘅旅程, 返香港, 真係有D唔捨得.....

亂行亂逛, 隨便走進呢間西門麵店, 各人一碗麵食, 榨菜肉絲, 牛肉麵, 貢丸麵, OK啦! 冇老山東咁好, 但又唔係太差, 佢碗麵都要NT60架, 都平老山東一半呢!

 

食完個麵早餐, 再行去紅樓轉個圈, 便回酒店拎行李, 去機場喇!

喺一個「潮」地西門町中, 都仍然保留住呢個舊時戲院唔拆, 喺黃金地段做保育, 香港, No way!!!

紅樓入面喺一個小小型博物館, 只擺放些少關於演藝界舊物, 都合附主題, 另一邊就做了Cafe, 新舊對比, 又融合到喎!

 

唔經唔覺, 15天台灣環島之旅結束了, 今次令我嚐到台灣嘅美食, 睇到台灣嘅美景, 玩到台灣嘅活動, 感受到台灣人親切有禮嘅招待.......

無論係台灣朋友, 台灣天氣, 我真係要非常、非常感謝你.......

今次台灣之旅費用如下:

機票稅項: HK$2,100

換台幣:HK12,000

已預訂付款住宿: HK$2,855

信用咭消費: HK$3,790

三人總數 : HK$20,745, 即約每人HK6,915

於台北的兩星期裡，除了不停地吃台北的地道食物外，從未有機會吃其他的菜式．
今天，在我的台灣朋友的帶領下，終有幸到一些較偏僻的地方，包括這間位於地底的新派日式餐廳－人間．影．三
若果不是來了這裡，我會後悔未曾試過任何日本菜，便要離開台北．人間．影．三告訴我，台北的日本餐廳的水準是非一般的專業，莫非跟曾是殖民地，又擁有大量日本人居住有關？

人間．影．三　一點也不易找，它的位置非常的隱閉，來到一棟貌似商業大厦的地方，可選擇乘坐升降機或在大厦側邊的位置，沿住一條旋轉樓梯來到餐廳的正門，那日系，簡單又摩登的設計，到現在我仍讚嘆不已，真的很很很喜歡．
一踏入餐廳，驚覺自己身處的地方絲毫也不像一般的日式餐廳：反而是被高高的竹林包圍住，樓底很高，清靜的環境帶來點點的涼意，不時聽到日籍師傅與客人的對話，以及遠處傳來的小溪流水聲，與這炎熱的中午成很大的對比．
沒錯，比起食物，我更看重環境，只要氣氛好，我願意花錢和朋友坐足半天，人間．影．三正正是這種餐廳．

幽靜的環境，低頭一看便是竹葉的影子，光線溫和，足以將叢林的氣氛帶進食客的感觀裡．
午餐的菜單選擇不多，我點了生魚片套餐，論食物的賣相及質數，屬fine-dinning，值很高的分數，吃得出那份心思．
服務也超級細心，屬日式fine-dinning service，特別一提的是，由starter到dessert,侍應會因應不同的食物而替食客更換不同類型的茶，好讓食物的品質達至最高的效果．

結帳時每人大約港幣250元，以這價錢能夠在這種日式fine-dinning地方吃個午餐，實在是享受！

來到通化街的小林煎餅，據我的台灣朋友說，這是台灣非常有名的手信店．
除了有不同類型的煎餅作手信外，在指定的店舖內，更有即製的釣鐘燒賣！
我點選了奶油味的釣鐘燒，吃下去熱乎乎的，奶油隨即差點瀉出，好食程度更勝寧夏夜市的奶油餅一籌！
可惜size太小了，吃兩口即食完，吃得有點不盡興．但算吧，為起港幣３蚊個，算物超所值了！

對上一次來台北，見我的台灣朋友時，我們到訪了周董的不能說的秘密主題餐廳，還記得它是位於一間醫學院旁邊，環境較靜局．但除了過一下電影裡的情節的癮外，食物及服務等等也不見得特別吸引，不致於需要再次幫襯．
這次，我的台灣朋友帶我來到周董數年前開的另一間主題餐廳，主打意大利菜．餐廳內的佈置以周董一簣的風格來設計：高樓底，一目了然的大門口，餐廳以金黑色為主調，採用大量木材，給予一種大自然的色彩．
不知是否周董熱潮已逝，即使當晚是星期天，光顧的只有客人數位，真的那麼不景氣嗎？
環顧餐廳室內的佈置，一如不能說的秘密主題餐廳，有很多周董歷年來出道的作品照，加上周董的新舊歌在餐廳內不斷地loop，令我們這兩位周董迷勾起過往的回憶，聽得我們好感觸呢．

當只有小貓三四隻的時候，我們便開始擔心是否因食物水準下降才導致人流盡失？
看過餐牌後，我點了一客杰倫套餐的明太子奶油義大利麵餐．
只能說的是，由soup和salad開始到甜品的tiramisu蛋糕，沒有任何一樣食物令我找到它的瑕疵．
真的，尤其是那賣相100分的明太子奶油義大利麵，以整個蟹殼來做配襯，令蟹膏及蟹汁充分滲入義大利麵內，非常非常滋味！

說到食物，Mr J絕不比其他的意大利餐館遜色．惜周董熱潮已逝，新一代的樂迷只對新派的歌手有興趣，所以周董的經典音樂還是只有我們這群80及，90後懂欣賞吧！下次再來台北的時候，必定再來Mr J，邊吃邊回味只屬於我們的音樂回憶！

在台北的最後一晚，我的台灣朋友和我到Mr J附近的一酒吧街，選了一間走年輕路線的美式酒吧，來個ladies farewell night.
這間名叫Bellagio bar的地方，以poker cards為題，連drinks menu都用上雙面設計，非常有心思．
室內設計方面，雖地方較細，但備有室外及室內坐位，亦設有bar table給客人與bartender聊聊天，飲杯酒這樣子．
飲品方面，若果menu裡沒有適合你的飲品，年輕英俊的老板會因應你的口味與要求，即時調製最合適的cocktail/mocktail.
最重要的是，這裡給予人一種輕鬆，年輕的感覺．電視裡播住fashion show catwalk,背景音樂是陣陣的美式countryside音樂．
若果想和朋友們在較清靜但又不失酒吧的氣氛下渡過一晚的話，這裡會是不錯的選擇！

夜深了，時間是大約10時許，我和朋友們終於提起精神來，帶住疲倦的身軀離開酒店，踏入捷運，希望能吃下可口，溫胃的宵夜．
小李子青粥小菜好像是台北幾有名的宵夜店，朋友之前曾經來過，對食物讚不絕口．而對於我這個人來說，比起飯和麫，我更是喜歡吃粥．
可能是我少時曾經愛上日本和台灣的早餐，喜愛以白粥或稀飯配不同的小菜配料，令人精神十分之餘，亦胃口大增呢！

來到小李子的第一個感覺是，哇！好平民自助式，好地道呢！雖然已夜深，但餐廳內仍很熱鬧．
這裡點菜是自助的，食物均在地下大堂陳列出來，有點吃自助餐的感覺．
首先你需要拿一個托盤，然後跟阿姨說你想要的食物，她便會替你放到碟子上，再交給你放在盤上．我必須提醒大家兩點，1)各樣食物是沒有價錢顯示，對，這真的是非常奇怪的經營手法．因此，我和友人們在點菜時也小心翼翼，盡量點一些看下去較為”普通”的食物．2)要有心理準備，那些負責替你”拿”食物的阿姨的態度是不易接受的．問多兩句她們便會很不耐煩地”寸”番你兩句，所以點完菜後還是快快結帳吃飯吧！
這裡是先結帳，後用餐．幸好，結帳時發覺食物的價錢尚可接受，銀包仍然有錢乘的士回酒店！（捷運已停駛）

比起地下大堂，我們選了樓上較靜局的座位．選好抬後，便會有職員拿住一個蕃薯粥的窩子走過來，若果你有其他在樓下點了的菜還未到，他們都會送到你抬上．
我只能說，這裡的蕃薯粥真的很棒！粥是任添之餘，嘗不出任何味睛，清淡得來帶有陣陣的蕃薯香！
我們點了的小菜有：蒸魚，肉鬆，凍矮瓜，炒清菜等．全部都很新鮮，即叫即整，好好食，配上蕃薯粥更是絕佳享受！

我和朋友們一坐便是兩個多小時，除了食之外，當然還有談天說地的快樂啦！
這裡雖離大安區站有一段距離，但絕對是宵夜的最佳選擇！小李子，我約定你下次再聚！

老實地說句，我一直以來對關東煮這個東西非常陌生，只知道它是日本的小食，但賣相等等好像與我們香港的街頭小食沒什麼不同．
來到台北後，發現很多日本遺留下來的足跡，包括飲食文化，包括台灣人對關東煮的一份情．
在台北的7-11或其他大型的便利店裡，都可以即刻隨你選擇喜歡的關東煮外賣．
個人覺得這是非常的特別，比起在香港7-11售賣的肥膩魚蛋和燒賣等，台灣7-11售賣的關東煮見到更清淡健康．
雖然我對各種關東煮是一無所知，只是碰碰運氣，試下不同種類；但不是每種都好吃，而且很多的份量較大，容易飽．
順便一提，不得不讚那奇特的關東煮外賣袋子，設計無錯係好特別，但攞到我有點心驚膽跳呢！

買過關東煮後，打算買杯珍珠奶茶才回酒店．
試過天仁但發現不太合乎自己的口味後，我正苦惱應到哪裡買好飲的珍珠奶茶．
轉個街角，碰巧遇上新店開張的找道茶．雖未曾聽過，但剛巧新開有折，加上店面吸引人的眼球，走年輕路線，怎能不試呢？
我點了一杯大的珍珠奶茶．喝下去，確實非常好飲呢！雖然點了大杯，但份量必定比大更大，甜度亦剛好呢！
可惜珍珠較硬，有點難去chew，加上不得不提的是，未知是否新店開張的關係，員工的動作慢，由落單至我離開需時近半小時呢．．
希望找道茶繼續努力！下次來台北必定會再來，難得找到一間喜歡的珍珠奶茶店呢！

常青餃子館是另一間，旅遊書經常提及的餐廳．出名的真正原因，即使我光顧過後也不太清楚，但出奇地有很多日本人喜歡到此飲杯啤酒，食份餃子作晚餐．
談到食物前，我必須提醒大家：這間餃子館非常，非常的難找．皆因它不是在捷運站的附近，更是在一條橫巷的裡面，我們拿住旅遊書的大鄉里也花了近一小時才找到．但到達的時候已八時多，常青關門的時間是八時許，所以大家來的話要趁早！
說到食物，個人覺得麻麻．室內環境確實有點不同，帶有家的味道．但未知是否趕住收工，服務相對較差，不時催趕，不好受呢．

先來的炒青菜（即通菜），雖然細碟但炒得很香，食落去也很可口．
再來的是餃子，我們四人總共點了10隻牛肉餃子，吃下去沒什麼特別，較普通．
最後來的是20隻豬肉窩貼，剛好是4人份．上抬的時候，賣相吸引，煎到金黃色，相當的漂亮．但內裡的肉可以更多一點會更好！

我想，常青餃子館有別於其他餃子館，大大份的servings或許是它吸引年輕上班族，長久”常青”的原因．但始終地方隱閉，我也不太鍾情於它的餃子，只此此行呢．

吃過常青餃子館後，我和友人們覺得吃得未夠盡興，逐到寧夏夜市再吃宵夜才回酒店！
來到寧夏，怎能不喝杯木瓜奶呢？木瓜奶的益處，相信不用我多說，各位女士都應該了解，而我們又怎能錯過一嘗台灣本土新鮮的木瓜呢？
跟年輕老板點了飲品後，便可見他即場鮮搾木瓜加牛奶，絕無添加劑，非常健康．
喝下去時，木瓜奶很香亦嘗到新鮮的木瓜．
啊，我現在已很懷念童年木瓜牛奶了！注意：大家緊記20分鐘內喝完它呢，否則會變得很難喝．（真的，個人的親身經歷．．）

喝過木瓜奶後，走了寧夏夜市一圈，驚覺沒什麼看上眼的小食，當正準備離開的時候，發現這檔在夜市街口的魚蛋店．
賣相吸引，富有日式加台式crossover的感覺．這檔魚蛋店好像幾受歡迎似的，很多電視節目主持都曾光顧．
有見及此，我點了最愛的海苔味魚蛋一試，誰知吃下口後，果然是很彈牙，很好味呢！大家值得一試！