5月30日（天晴，間中多雲）：Crystal Serenity Day #7 之 Gibraltar

郵輪河進入第七日，目的地為屬於英國o既Gibraltar，中午泊岸，XO仔終於可以訓晏啲啦！

因為可以遊覽o既地方唔係太多，所以Crystal喺Gibraltar只係逗留左五個鐘頭。據Crystal份每日一報講，Gibraltar o既的士聯盟好犀利，所以佢地並冇安排免費旅遊車服務比旅客入城（的士入城收費大概1－2歐元，有啲的士係會以人頭計）。我地一踏出個Cruise Terminal，果然立刻被一群的士司機圍攻，介紹佢地提供o既不同導遊及接送服務。聽落去行程夠簡短，又唔洗年長o既長輩們步行，我地七個人更可享用一架七人車私家團（因同行一位親友自行跟團過境去相鄰o既西班牙，所以我地當日只有七個人），遊完唔滿意仲可以同司機講數，所以團長好快就作出決定，暢遊Gibraltar的士河。

的士遊只有四個景點，其中兩個地方係比較需時觀賞o既洞穴同隧道，所以全程都要成兩小時。完結時已經過哂午餐時候，我地上番船就去左泳池旁o既Trident Bar度食美式燒烤，即熱狗漢堡包。因為我地當晚喺郵輪o既意大利餐廳Prego訂左位食六點半，所以食完熱狗我地就喺七樓行左個幾鐘頭，當做運動，以助消化。

我地喺Prego食完餐豐富o既晚餐後，啱啱趕得上睇八點半嗰場特備綜合節目。當晚o既表演勁精彩，除左有跳舞同Wojciechowski（“Where’s-your-house-key”）先生彈琴之外，最令小肥印象深刻o既就係我地位Cruise Director Gary Hunter先生o既演出！Gary好有觀眾緣，唔講真係唔知佢係一位ventriloquist，字典譯作「口技表演者」，其實即係個攞住個道具公仔扮兩個人講野o既講故佬。喺小肥心目中，ventriloquist應該唔多同人溝通，如果唔係都唔洗成日自己同自己講野啦，所以得知健談o既Gary係位ventriloquist時，真係好愕然。唔知係咪第一次現場欣賞口技表演呢，所以分外投入，大肥爸爸睇完話仔仔係全場笑得最大聲嗰個，哈哈！