8月15日

昨晚，半夜兩、三點，下大雨，仲行雷閃電，非常擔心今天的行程，我們現在不是在札幌，這裡沒有商場架，點算？

好彩，天公做美！早上不但雨停了，而且太陽伯伯也出來了，正呀！但其實也擔心天氣難測，所以食完早餐便趕着出發了！

講番份早餐先，先來一杯香濃的牛奶，接著有新鮮的菜沙律和超鮮甜的番茄，是宿主自己種出來的！有軟綿綿的麵包，之後仲有一份熱騰騰的炒蛋，昨晚宿主已經叫我們七點半左右下來食早餐，但他說不要全部一齊下來，要分批，原來就是為了這份炒蛋，女主人會等你下來坐埋位，才為你炒蛋，簡直係五星級服務，很窩心，最後以一杯炭燒味極濃的咖啡做終結！

臨走前，與滕井先生夫人，兩隻聰明可愛的金毛犬來張大合照，老婆非常唔捨得兩隻狗仔，未走已經話下次一定要來探牠們呢！

今日第一站是四季彩之丘(map code 349 701 244)，只需十分鐘車程便到達！門口有大量車位任泊，入到去，先租了三輪小型車，四人一架，每架2000yen可用15分鐘，其實都幾貴下！徇眾要求下，我負責駕駛其中一輛小型車，花田在山坡上，所以有小型車便不用行斜路咁辛苦！之後就去睇草泥馬，近來大女不知為何突然喜愛了牠，所以特別雀躍！在入口的商店買了不少紀念品，重大收穫是薰衣草枕頭，老婆買了一個，回港後非常後悔沒有多買幾個！

接住便去近來人氣急升的景點 – 青池(map code 349 568 888)！青池入口有停車場，雖然不算大，但車流量很快，所以很快便有位了！青池的景色果真很等別，也很美，值得去！

之後駕車去富良野，約一小時車程便到達今日午膳的地方 – Kumagera(map code 349 032 071)，這裡出名是食牛肉刺身飯的！話明出名，等位就是必然的，不過都唔算等得太耐，而且還給了一間叫石亭的房給我們，自成一閣，正！除了牛肉刺身，還有很多選擇，小朋友們便叫了吉列海鮮和豚肉定食！

吃完飯又要趕下場，去芝士工房(map code 550 840 237)學做芝士喇！好彩只需十五分鐘車程，結果於開班前十分鐘到達報名，時間剛剛好！學完做芝士便是下午茶時間，有牛奶，芝士蛋糕，雪榚批等等！

之後便起程向中富良野出發，到今晚我們入住的民宿 – Pension Raclette(map code 349 276 781).

這民宿座落在半山上，有一片大草地，地方比昨天的民宿大，大草地上養了幾隻好似係騾仔的動物，牠們的叫聲是很恐怖的！這民宿相信是有台灣朋友參與的，因此她們懂說普通話及有售賣很多台灣茶葉！店員似是全女班，看不見男生！

安頓一切後還未夠鐘食晚飯，便在屋外對住個大草地happy hour，歎番杯冰凍啤酒，一流！這裡晚餐是西式，有沙律、湯、雞扒伴薯菜及飯、咖啡或茶、仲有蜜瓜做甜品！

可惜這裡不可以玩煙花，那唯有乖乖地排隊沖涼吧！這裡的浴室，大細和設備與昨晚的民宿差不多，不過這裡有兩間浴室！但樓上就沒有廁所，每次也要落樓下去！老人家就不是太方便了！

8月14日

早上在酒店食個杯麵做早餐之後便和細佬，妹夫及亞姨三位今次旅程嘅車長去車行取車。之前文章都有提過，行車說免費租車給我們，所以我們懷著半信半疑，緊張，興奮嘅心情去取車！

去到車行，都有很多人辦緊手續，全部都是日本人，只得我們是中國人！填form，影印車牌、passport，去車場取車，教我們用GPS，都要成粒鐘先攪掂，第一關過左，佢地真係無收我們錢！另外，日本汽車的GPS非常好用，只需輸入map code或電話，便能帶你到達目的地，非常準確，而且容易使用，有灣位或分义路之前都有明確指示，一流！個人認為輸入map code最準！

駕車回酒店，接埋其他團友之後，便出發前往旭川，今次旅遊其中一個可能係最重要的目的地 – 男山酒廠(map code 79 469 196)！ 這次車程約需要兩小時，但我們在中途休息站，食下蜜瓜，粟米，蕃茄，腸仔，雪榚，咖啡等等，結果用左差不多三小時才到達目的地！

去到拍完一輪照片之後，便入酒廠，有免費清酒試飲，係咁兒試左兩、三杯喇！再上二，三樓參觀一下，就返落地下做正經野 – 掃貨！買了一枝大吟釀 (5069yen)，約港幣400元，當時以為香港賣緊550元，點知回港後再睇睇，而家要賣798元喇！另外仲買左枝北海道限定嘅特別純米酒，又有D酒杯等等。其實每人只可帶1公升酒類產品入境實在太少了！

之後入旭川市食拉麵，是拉麵蜂屋(map code 79 373 112)，去到已是兩點了，他們的停車場滿左，因為只得五、六個車位，於是泊左係對面的收費車場，每小時300yen，車位都滿左，人就更加多喇，排左冇一粒鐘都有九個字，仲要係分散坐才有位，店內只得一個師傅煮拉麵，所以要等很耐，加上店舖內冷氣不足，所以食到大汗疊細汗，如果有足夠嘅冷氣，我諗我會更加欣賞這碗拉麵！

本來行程是去旭山動物園，可惜之前累積了延遲時間，所以如果入去只可以玩個多小時，經商議後決定直接到位於美瑛的民宿 – 麥之穗(map code 349 850 213)！

到達麥之穗，首先出來迎接我們的是兩隻金毛尋回犬，之後民宿主人滕井先生也出來了！本館只有三間日式他他米房，全給我們了，所以可以話係包左本館了，房間各自有廁所，洗手盆，而沖涼房又只得我們一家人用，超正！其實民宿仲有一間小木屋，今晚都有租出給一對日藉夫婦，但他們屋仔內也有廁所，沖涼，所以唔駛同我們共用！

安頓好之後，喜歡與狗狗玩的，如老婆、弟婦和四個小朋友便留下與狗狗玩，拍照，而我和細佬，亞妹兩公婆就落左美瑛市買煙花今晚玩。美瑛是一個很細的鄉市，非常寧靜，空氣當然好喇，有點清涼，食住杯軟雪榚，爽呀！

六點開始BBQ晚餐，是在另一間木屋仔進餐，相信是唔想令到民宿本館有燒烤味吧！但這裡無冷氣，地方又細，真係好似在桑拿房吃飯一樣！勝井先生不停地替我們烤食物，我們也有點不習慣，我們下午在男山買了一枝1.8公斤的清酒今晚飲，可惜民宿雪櫃沒有那麼大可以雪凍它，只可加冰！其實食物都很新鮮，如果不是房間超熱，應該都是個幾好的回憶，令我最回味的，就是燒飯團喇！

飯後便去空地玩煙花，外面一點街燈也沒有，真是黑到什麼也見不到，玩煙花就一流喇，無論小朋友和大人也玩得很開心呢！

之後排隊沖涼，浴室很大，可以兩人一起沖，有兩個花灑，兩張櫈仔，兩個木桶仔，很有日本feel呀！小朋友在大廳捉下飛行棋，大人就再摸下酒杯底到十一點便入睡了，雖然現在是夏天，但入夜後也相當清涼，打開窗，陣陣微風，瞓得很舒服！

這間民宿是一間很地道的日本民宿，地方不大，但很有日本家的感覺，主人很熱情的招待我們，但亦有他們民宿的堅持和規則，感覺很好！

8月13日

出外旅行，習慣第一朝早上獨自一人落街逛逛，影下清晨的街景！搵唔到地方食早餐，於是入了便利店，見有溫泉蛋和雞肉串，於是買回酒店給兩隻小魔怪和老婆做早餐！

九點正由洒店出發，步行到目的地二条市場，沿途會經過幾個景點，可作到此一遊式拍照留念。第一個景點便是只隔兩個街口的北海道廳舊本廳舍，是一座有超過一百年歷史的紅磚建築物。下一站景點是札幌市時計台，在途中經過郵局，小朋友們興奮地沖了入去，說要寄明信片回港給朋友仔和自己喎！到達時計台，附近有觀光三輪車和馬車，我們並沒有試坐，只是在時計台前拍照留念！再行便經過大通公園的札幌電視塔，由於大家都開始肚餓，於是便繼續向二条市場進發！

終於到達二条市場，亦很容易便找到我們想去的食店《どんぶり茶屋》，行到好鬼口渴，先叫杯生啤(550yen)解渴先，早餐飲啤酒，會唔會過份左D？唔理咁多喇，旅行係咁架喇，哈哈！其實店舖很體貼，有涷茶供應給大家解渴。下圖是我們今日早午餐Brunch的介紹！

食飽飽便出發去北海道神社，坐地鐵由大通公園站去円山公園站只需三個站約十分鐘車程，我們今日全日都會坐地鐵，所以我們買了全日票，大人800yen，小童400yen。售價機可選英文顯示，很容易使用，小朋友也懂得買票。

旅遊書說由円山公園站步行十五分鐘可到神社，但神社在円山公園內，公園內有很多很多又高又粗壯嘅大樹，又有很大隻嘅烏鴉，又有松鼠仔，行下又拍下照，所以行了不只十五分鐘，其實北海道神社並不算十分大，但媽媽第一次嚟日本，便帶好去參觀下日本的廟宇喇！

之後再乘地鐵去白色戀人公園，在地鐵東西線總站宮之澤步行十分鐘便到，在這裡參觀朱古力製造廠，之後買些手信，我們也買了牛奶雪榚和蛋糕吃，在整個北海道旅程中，這裡的雪榚最好味，而蛋榚也很軟綿綿，牛奶味香濃，喜歡奶類產品的朋友一定要食呀！

行程本打算直踩去大通公園的，但大家都有D疲倦，又買了些手信，於是便先回酒店抖一抖再出去。果然只係抖一抖，女士和小朋友便想去昨天經過，在札幌JR駅的商場行街街，而我和細佬，媽媽，亞姨就到JR駅出面的 Sapporo啤酒節happy hour。

一小時多D之後再會合，去薄野食shabu shabu，位都訂好了！點知會合時被shopping的團友發現原來啤酒節一邊係小食happy hour，另一邊係任飲任食 shabu shabu 放題，大人3680yen，小朋友仲只係1000yen，豬，牛，羊，菜，烏冬任食，啤酒汽水任飲！雖然可能冇薄野那間咁好食，但都抵食喇，而且留係度食，她們可以再去shopping多一陣，於是一至通過留係度食！最抵讚係店員的服務真係一流，不停添飲添食都係笑容滿面，而且每次添飲啤酒，都會換過一隻冰杯給我們的，真係超正！這裡很近酒店，飲飽食醉後便慢慢行回酒店！

8月12日

開始我們北海道之旅喇！經過早幾個月坐機場快線嘅經驗，發覺我們兩大兩細坐的士去機場是比較好D的，於是前一晚約了的士大佬六點四十五分出發，他說四十五分鐘就可去到機場，果然我們未夠七點半已到達！

今次全家總動員去玩，大大細細一共十二人，等齊人便入櫃台將行李寄艙，由於我們之前已做了綱上check in，所以很快攪掂和出埋登記証。之後便過海關counter，去食早餐。嘩！成個用餐區都係人，原來暑期旺季真係咁多人出境，無論等位或買野食都係超多人！我們十二人梗係要打散晒嚟坐喇，匆匆食完早餐便去登機閘口，今次要坐無人駕駛列車去，途中都見到仲有很多餐廳，所以下次如果出面人多，都可以入到嚟先食，D餐廳對住停機坪，個view都幾好！

飛機九點半起飛，雖然要坐成五個小時機程，但國泰機上有很多電影，電視，迫樂等等嘅娛樂，所以五個鐘都唔係好夠用，哈哈！

航班非常準時，日本快香港一粒鐘，到埗時間是當地三點半，不過過關入境排左很耐很耐，足足四點半才攪掂！之後到機場B1/F JR站counter買車票，指示很清楚，很容易就搵到！由於我們有老有嫰，而指定席(即有指定坐位)又只是貴300yen，所以我們買了指定席，列車準時開出，所以不可遲到，要預早D在月台等車！

36分鐘車程後便到達札幌駅，再步行十分鐘到酒店。今次我們住 Mitsui Garden Hotel Sapporo 三井花園酒店，Check in 時順便攞埋之前上綱訂的b-mobile wifi卡，可借今次有部分電話用唔到張卡，唯有靠share 出來用！我們訂了四間房，安排四間都在一起，非常方便，抵讚！房間大細都OK架，我們間房放下三張床後，空間還可接受，床也很大，三張床拼埋一齊，瞓四個人足夠有餘！

安頓好後，便出發去食晚飯喇！出發前搵左酒店職員幫我們訂定未來幾晚晚飯的枱，一切都非常順利！之後步行去蟹本家本店，很近我們酒店，只需步行十分鐘就到了。

蟹本家本店樓高數層，地下有一個大蟹池，在搭升降機上樓上之前要先除鞋，店員會為收好鞋子，不過就沒有拖鞋供應。上星期有朋友來札幌，於是託他為我們訂枱。我們被安排了坐在一間私人房間，而全晚亦是同一個店員招呼我們，可惜她不懂英語或普通話，全靠亞妹和妹夫有限公司嘅日語 + 眼神 + 身體語言終於都order 到食物！

之後我們步行到札記駅上面的 JR Tower，晚上天氣清涼，食飽飽在街上逛逛也真的很舒服！JR Tower 其實唔算很高，但已足夠望晒全個札幌市！今次有意外收穫，原來我們超過十人，可能當團體購票，每人減收100yen，爽呀！

札幌大部分商店八，九點已關門，所以睇完夜景，再去酒店附近的便利店買D野飲便回酒店休息了！