金馬碧雞坊就好似我哋嘅金紫荊咁，一個出名地標牌坊，高12米，寬18米，具有昆明民俗特色，雕樑畫棟，確係幾精美細膩，東坊臨金馬山而名為金馬坊，西坊靠壁雞山而名為碧雞坊；其實，向北遠少少仲有個“忠愛坊”，合稱“品字三坊”，成為昆明鬧市勝景。

另一個出名嘅地方，係「金碧交輝」，據說每60年兩坊會出現一次嘅奇景，農曆8月15日中秋節，下午5、6點左右，太陽將落未落，金光餘輝從西邊照射碧雞坊，佢嘅倒影投到東面街上；同時，月亮則啱啱從東方升起，銀色光芒從東面照射金馬坊，將佢嘅倒影投到西邊街上；兩個牌坊嘅影子漸移漸近，最後會互相交接。隨後，日落月升，交輝奇景逐步消失！據說，由於地球、月亮、太陽運轉嘅軌跡關係，咁嘅奇景要60年先有一次。反映出遠古雲南民族把數學、天文學同建築學結合埋一齊嘅高度智慧。

不過，乜都無喇，金馬碧雞坊因為文革動亂被拆毀晒，晌1997年在改造擴寬金碧路時，先決定同時重建「金馬碧雞坊」，1999年至建成開放，仲定為昆明市徽。我估「金碧交輝」個奇景都無架喇，取而代之嘅係，周圍發展蓬勃，金碧廣場周邊，起咗好多大型商場同食店，熱鬧非常，我哋住晌附近，所以夜晚唔憂無地方逛。

有20多年歷史嘅「江氏兄弟橋香園」，雖然唔係話好老字號，但20多年屹立不倒，仲直營店、加盟店晌大陸唔同地方一間接一間咁開，依兩兄弟雲南蒙自人江勇、江俊真係唔簡單呀！雖然周圍都有，但策略上佢哋晌雲南省內係唔開放加盟店，換句話講，即係雲南省內全部都係直營店，而且佢哋晌昆明市西郊有個4000平方米嘅原料配送中心，暫時嚟講係同行中規模最大，所以，晌雲南省內嘅橋香園，相信質素有保證。

橋香園屬餐飲連鎖店，走大眾化路線，好似我哋食開嘅譚仔咁，一般嚟講價格唔貴，當然，唔同檔次嘅過橋米線套餐系列滿足番唔同消費者嘅需求。

先講環境，得地下一層，入門左邊有「雅座」，枱凳靚啲，又有啲開放式小個室，不時有啲民族歌舞表演；另一邊右面「大堂位」，似粉麵店咁。不過，基本上係自助形式，買票排隊攞，坐晌邊都得，但你亦可以買票後，搵個靚位先，再將票俾服務員代勞都得。

食物分4類：「過橋類」，即過橋米線套餐；「煮品類」，即係一碗過放好曬餸料嘅米線；「鹵菜類」，如鹵豬尾、鹵豬耳、涼拌黃瓜……之類小食；「名小吃」，如紅油血旺、三七汽鍋雞……等等，叫有特色少少。

過橋米線套餐，一共有7款，有平有貴，當然越貴越多料啦：
秀才過橋套餐RMB10
滇味肥牛過橋套餐 RMB12
舉人過橋套餐 RMB15
金牌肥牛過橋套餐 RMB18
海鮮過橋米線RMB20
進士過橋套餐RMB29（包一盅三七汽鍋雞RMB9）
狀元山珍過橋套餐RMB58（包一盅三七汽鍋雞RMB9）

我哋揀咗最貴嘅「進士」同「狀元」，果然幾有氣勢，一大碗滾燙雞湯，面層泛油，一小碟疊一小碟生料，係靠啲燙湯整熟，我哋掛住係咁影相，個服務員都「睇唔過眼」提我哋快啲落生料，哈哈。另外，仲有一大碟裝住好多隻碟仔，係伴米線小食，不過隻生蛋就應該係用嚟撈勻生料嘅，我哋搞笑咁事後補落番啲湯度！米線本身熟嘅，事後慢慢落都未遲，而且份量非常多，我哋三個人，叫兩個過橋套餐，飽到上頂呀！加上餸料新鮮、湯燙味美、米線滑溜，真係好滋味。而三七汽鍋雞雖然細細盅，但完全係精華，雞肉細嫩、湯汁鮮美，三七屬名貴藥材，滋補強身，之不過賣RMB9盅，令我有少少懷疑啫。

鹵菜類可以隨意配搭，結果揀咗涼拌豆腐絲、涼拌藕片同涼拌海帶，成碟都係RMB7，非常抵食，不過頗為辣，小弟唔嗜辣，但都輕嚐一吓。