酒店優點
1) 由捷運西門站(Exit 4)行3-5分鐘便到，Exit 4設有扶手電梯，有大件行李都無問題，而且一出Exit 4就係維格餅店，買手信超方便
2) 想購物或醫肚一落街就有
3) 酒店開業只有兩三個月，大堂及房間都很新和整潔

酒店缺點
1) 升降機不足而且很慢，繁忙時間等候時間較長
2) check-out後的行李只存放在大堂，人來人往...好似唔安全

誠品生活松菸店係位於松山文創園區內，這個地方多年前係一個煙廠，現時已成為歷史遺跡，園區內部份建築物仍然保留原貌，用作文化及展覽場地，週末常有市集或表演。園區的另一部份正是誠品生活松菸店，裡面除了有誠品書店，還有表演廳、電影院、餐廳和多間台灣原創品牌的小店，也有一些手作工藝班可以參加，如皮具製作、燒玻璃瓶等。平日夜晚來人流較少，慢慢行可以行幾個鐘，體驗一下台灣慢活的一面。

建議黃昏/晚上來看夜景更美。

要試正宗的珍珠奶茶和台灣菜，一定要來春水堂，因為春水堂係珍珠奶茶發源地，台灣有多間分店，我今次來的就係誠品生活松菸店內3樓的分店。店內環境很古色古香，也有些精美的茶壺擺設，點餐紙有成幾十款冷熱茶類飲品，食物方面有小食類，麵類和甜品，我最鍾意食台灣嘢樣樣都細細碟，可以叫好多唔同款。
飲品叫咗珍珠奶茶、柚子烏龍茶(夏季限定)同肧芽奶茶，珍珠奶茶的珍珠比一般香港的細粒和彈牙，柚子烏龍茶酸酸地好清新，肧芽奶茶勁多肧芽，比香港開粉的好飲好多。食物叫咗功夫麵(他們的經典商品)，功夫麵其實係香菇肉燥麵，好好味超推介，甜不辣都好好味。甜品叫咗個鐵觀音茶餅，入口粉粉哋之後溶化，好得意，值得一試。

今日的重點行程係去探草泥馬，知道路途遙遠，要食定個大早餐打底先! 又再次喺西門町好random咁揀一間餐廳，行下行下就見到阿宗麵線，但因為無得坐，就去咗旁邊的北平一條龍餃子館。成間餐廳係一片紅色的舊式中茶館格局，叫咗一碟煎窩貼，一碗牛肉麵。煎窩貼一碟有成10隻，仲好大隻，是長形那種，有點似八方雲集的煎餃，味道一般。牛肉麵反而很出色，湯夠濃郁牛肉很腍。

終於來到今次行程的重點~~探草泥馬!!! 心情真係超級無敵興奮呀! 食完早餐就喺西門站出發搭捷運到淡水站，再轉公車去Oia伊亞藝術咖啡館。喺台北坐公車都幾方便，我想介紹個APP俾大家，叫"台北等公車"，只要輸入路線，佢就會show晒D站出來，每個站都有顯示仲有幾多分鐘有車，不停更新，所以都幾準確，上車後仲可以set下車提示，真係一個偉大的發明，由淡水到北勢溪口站約45分鐘車程，NT$30/人。
到了Oia伊亞藝術咖啡館，一入去就見到草泥馬店長Snow!!! 好可愛呀!!! 餐廳規矩要先點餐才可拍照，我們兩人點了一份朱古力鬆餅(即窩夫)、一份雪糕鬆餅(即窩夫)、凍咖啡同熱水果茶。沒想到這裡的鬆餅都唔錯喎，好香蛋味，鬆軟，而且好大份，我快快食完就同草泥馬玩了。
Cafe地方很大，草泥馬有足夠空間行來行去，Cafe室內的地方只有一隻白色的草泥馬，佢會主動親近人類，客人可以去水吧問店員攞餵草泥馬的食物，另外Cafe外有大約7-8隻草泥馬喺圍欄入面，客人可以隨意出去探佢哋，就這樣影下相抱抱草泥馬就過咗一個好愉快嘅下午。 

Day2晚上來到師大夜市逛逛，原本打算掃街(食街頭小食)當晚餐，但行到太累想搵個地方舒舒服服坐低食，行到師大路街尾見到呢間Evans Burger，望望裡面的裝修好古典啊，店員很熱情的給我們餐牌，都幾吸引喎，一於入去試試，入到去見到有幾枱客都係外國人，心諗應該係正宗的美國菜吧~
1) Mushroom Swiss Cheese Burger NT$270 (9/10分) - 漢堡扒十分juicy, mushroom swiss cheese醬好creamy，個包用牛油烘過，味道有D似香港的Burger Room，個薯條都好正，價錢已包一杯飲品，計返港幣只係六十幾蚊，抵食!
2)  Evans Steak Brunch NT360 (7/10分) - 份量大到嚇死人，有香草麵包、炒蛋、一大塊牛扒、兩件薯餅、幾片香蕉，仲包兩杯飲品(無限添飲)，薯餅最出色，個牛扒反而一般，質感有D似牛柳多D。

來到旅程的Day 3, 瞓到成11點先起身 所以今日skip咗早餐直接去brunch。
我又想開心share一條link俾大家，裡面有大量台北cafe的資料，有齊地址、營業時間、近邊個捷運站等，十分詳細仲keep住update:
http://haruhii.pixnet.net/blog/post/41591272-%E5%8F%B0%E5%8C%97%E5%92%96%E5%95%A1%E7%94%9C%E9%BB%9E%E4%B8%8B%E5%8D%88%E8%8C%B6%E6%8E%A8%E8%96%A6wifi%E6%8F%92%E5%BA%A7%E5%B0%8F%E6%95%B4%E7%90%86 
今日食brunch的Aranzi Cafe就係從上面的link內找到。Aranzi Cafe喺台北有幾間分店，我去的係位於新光三越南西2館4F(即係類似香港Sogo的百貨公司裡面)，cafe以可愛公仔為主題，入到去就好似返回幼稚園的感覺，cafe有堂食部份，也有售賣蛋糕&曲奇餅的counter，另外也有售賣精品的部份，女孩子來到這裡一定會瘋狂拍照!
如堂食，先坐底再到cashier點餐，餐牌都好可愛啊!我叫咗個brunch，個磨菇同炒蛋好好味，底部有大量沙律菜，沙律汁係柚子味，分開上的。另外叫咗個pizza sandwich，飲品叫咗杯mocha，有可愛兔仔拉花，味道都唔錯。本來諗住要食那個熊貓蛋糕，可惜已經太飽食唔落了(T_T)...

一位台灣朋友推介我來這個地方，這個地方跟我Day 1去的松山文創園區有點相似，都是歷史古蹟改建為藝術文化的園區，這個地方以前是酒廠。園區是免費入埸的，裡面有些小店，pop-up store，創作室，餐廳和收費的展覽館。這次來到剛巧有Miffy和櫻桃小丸子的展覽，參觀展館收費NT$280，其實入面很大，可消磨一整個下午。園區內有一間叫"小確幸紅茶牛奶合作社"，行累了可在此坐坐，飲杯冰紅茶，so relax~

一早醒來發現落大雨(大雨的程度等於香港的紅雨)，原本plan好去八里踩單車的行程被迫取消了 不過還不算太sad，因為心目中仲有一個地方好想去，而且是indoor的，perfect! 這個地方就係Toast Chat，一間貓主題cafe，聞說在台灣都幾出名，我這個愛貓一族當然要去朝聖一下啦。Cafe地方很大，入面有大約7-8隻貓咪，這天是下雨天，看見貓咪們大多數都在懶洋洋地伸懶腰或打瞌睡，心情即時被溶化了! 聽店員說，店裡面全部貓原本都是流浪貓，見到佢哋現在有這樣好的居所，不用在外面淋雨，真係好感動，shoutout to Toast Chat!
這裡食物質素都超水準的，我們三人點了Beef Lasagna, 火腿水波蛋(Egg Benedict), 冰淇淋法式吐司同紅茶法式吐司。火腿水波蛋可以加選兩種配菜，點了炸雞，超好味，份量很大，一個人應該食唔晒。兩個甜品都好味到停唔到口，冰淇淋法式吐司係用很薄的crepes包住雪糕，紅茶法式吐司係厚吐司上面淋上好香紅茶味的糖漿，雖然怕肥但我真係無法抗拒!
P.S.店內有free wifi