行程: 西門町 ~ 101 ~  饒河街夜市 ~ 遼東夜市 ~ 華西街

今朝嘅早餐有日式, 西式兩款揀, 為咗隱陣起見維妮都係揀西式, 而張生不嬲都對日式早餐情有獨鍾, 所以佢就揀咗日式啦! 呢朝嘅早餐雖然唔係自助, 但賣相就非常之靚呀, 係一個又靚又好味嘅早餐呀!去台北嘅車站就喺正酒店隔離, 我哋非常之好彩, 一出酒店就有巴士, 仲有好多位tim, 我哋8個人包咗成架巴士...嘅車尾, 又可以擺行李, 真係fit晒呀! 估唔到喺金山去台北嘅巴士又幾靚架喎, 成架旅遊巴噤, 一啲都唔似巴士喎, NT120都幾低坐! 坐咗差唔多成個幾鐘終於去到台北車站啦, 唔好以為我哋到咗, 我哋仲要坐捷運去西門站再行15分鐘倒, 先去到我哋今晚嘅酒店 ~ 富園國際商務飯店 因為我哋呢兩日都會坐捷運, 所以我哋決定每人買張悠遊咭, 悠遊咭就好似我哋嘅八達通噤, 搭車會平啲, 用淨又可以退番$$, 非常方便架! 去到酒店離遠睇個外表又係又殘又舊噤, 又大打折扣啦!但入到房又真係完全唔差喎, 仲幾正tim喎, 仲有DVD機tim! 究竟台灣啲酒店係咪間間外表都係殘殘舊舊, 內裹就四四正正嘅呢?放低行李之後, 我哋就行去西門町食lunch, 行到去左睇右睇都唔知食咩好, 終於比我哋見到一間食泰國菜嘅餐廳! 唔好諗啦, 就呢間啦, 餐廳仲比間房我哋tim呀, 呢間嘢平平無奇但啲嘢食又幾好味喎! 餐廳個名唔記得, 但記得就喺正老天祿隔離! 

台北嘅地標101, 去到101感覺上都唔係好高啫! 影完一輪相, 見又無噤早去行夜市, 決定喺附近周圍行下, 順便睇下有無eeepc賣, 但發覺原來呢區係無asus囉! 行到無嘢好行, 決定早啲去行夜市! mami之前講過話要去饒河街夜市, 我哋就決定首先去呢個夜市先啦! 饒河夜市好明顯無基隆夜市噤熱鬧, 但一樣都有好多嘢食, 同之前一樣我哋各自分頭行動,最攪笑就係當我哋坐低食嘢時, 一見到自己人就會叫佢過嚟試食, 就係噤一個經過又走埋嚟食一舊, 下一個經過又走埋嚟食一舊, 啲食店佬闆見到我哋噤都笑我哋呀!芒果奶冰同碗魷魚勁好味架! 好快我哋就行完成個饒河夜市啦, 見時間仲早, 我哋一於再攻下一個夜市, 邊個好呢! 經過張生同衝鋒人商量過之後, 衝鋒人話去一個叫遼東嘅夜市! 遼東夜市? 維妮聽都未聽過呀!去到遼東夜市, 呢到都算係我哋去噤多個夜市最少人嘅夜市啦, 我哋唔駛半個鐘就行完, 仲係無食過嘢, 就行完! 見噤嘅環境我哋決定再攻第三個夜市, 就係華西街啦, 華西街就好似香港嘅廟街噤, 因為唔係好多人, 我哋都諗住一齊行, 但發覺原來行夜市8 個人一齊行係唔work架, 因為行行下我哋已經好自然噤分開晒lu! 行完我哋就搭的士返酒店lu! 就喺我哋坐的士差唔返到酒店時, 竟然比我哋見到嘉樂福, 仲係24小時營業, 仲要係離我哋酒店一啲都唔遠, 哈哈~今晚我哋有節目啦! 返到酒店, 原本我哋四個做人仔女嘅諗住飛起啲dady mami自己去嘉樂福, 點知比佢哋知道咗, 佢哋都話要去, 哈哈~我哋仲以為佢哋已經攰到唔識郁tim, 原來佢哋啲精力一啲都唔差架喎! 係唯一衝鋒人真係攰到唔識郁話唔去, 但衝鋒夫人死都要拉埋佢去, 所以我哋一行8人又浩浩蕩蕩噤去嘉樂福啦! 行完嘉樂福我哋又掃咗一大堆嘢食返酒店又開餐啦! 順便商量下聽日嘅行程! 究竟去淡水好呀定九份好呢?

行程: 香港 ~ 桃園機場 ~ 基隆夜市

我哋去到桃園機場都成點鐘啦, 第一件事當然係唱$$先啦, 超多人呀, 好彩我哋有個衝鋒人,一落機就一支箭噤去咗排隊! 如果唔係都唔知要攪幾耐! 攞完行李我哋就要搵車去今晚嘅溫泉酒店 ~ 喜凱亞溫泉酒店 去到一間租車公司左問右問, 佢哋話無8人車, 所以要租兩架車! 衝鋒人一聽到就話:{唔駛諗, 搭巴士啦!}就轉身走啦, 但唔知點解我哋7個人竟然好一致噤無跟佢走, 因為我哋都覺得應該有第二個選擇架庥! 就喺我哋商量緊之際, 就有人走埋嚟問我哋去邊到, 今次由dady出馬, 因為大家都係ga ge la(自己人), 佢哋話可以租兩架奔士比我哋NT$4000, 噤我哋計過同搭巴士相差NT1500, 每人都係多$50啫, 但時間上就快好多, 又唔駛轉車, 又唔駛搬行李, 噤都化算架喎, 但衝鋒人就話佢哋一定係禁住搶.  又想轉身走, 但我哋7個人一樣無動於中, 哈哈~ 因為我哋7 個人已經決定咗唔坐巴士坐奔士, 7對1無嘢講, 哈哈~  坐咗差唔多兩粒鐘奔士終於到啦!  嘩 ~ 一睇到間酒店外表好唔掂喎!  但好彩入面原來唔差嘅, 同web site都差唔幾! 不過我哋四人房就好似細咗啲囉!

我哋喺酒店hea咗一陣就出發去基隆夜市啦, 今次我哋真係搭巴士啦!一去到基隆夜市, 多人到爆呀!我哋一行8人都唔知點行好, 最終我哋決定各有各行, 各有各食, 香腸, 魷魚, 魯肉飯, 刨冰......總之就係食..食..食..大家一輪狂掃之後, 又要趕返酒店浸溫泉, 返到酒店, 男人就去浸溫泉, 我哋女人對溫泉無興趣嘅就走咗去酒店對面睇下有無宵夜食! 發覺無嘢食, 最後都係去咗7-11掃貨!到佢哋浸完溫泉返嚟, 竟然比細佬買到宵夜返嚟, 我哋又開餐啦!開完餐我哋返房諗住睇下有咩玩啦, 點知維妮等等下就訓著咗啦!