一早執好行李寄存在酒店， 去黑門市場豪食海鮮brunch！

黑門市場因為就近我們住的Swissotel，所以每天回酒店前都會去逛逛，買生果，手信，雜貨，藥妝等等。場內環境非常寬敞又乾淨，十分好逛，每個出入口都有不同的掛飾以作辨認，但我行行下睇睇下買買下通常好快都會迷失方向。

先去<魚福>食即開生海膽，揀了1500yen一個的，一片片金黄色的海膽肥美又充滿光澤，入口甘香豐腴，新鮮海膽係超甜同完全唔腥，絕對是香港食不到的鮮味！

燒帶子則是800yen一隻，燒烤時香氣四溢，味道也是超鮮甜可口。食物味道一流，但老闆娘好惡又粗聲粗氣，成日覺得我地阻住佢做生意，唯有快快食完離開。

跟著去<黑銀>食超肥美的吞拿魚腩飯1800yen，飯面上蓋滿了大大塊又厚厚的吞拿魚腩，肥脂多到魚塊只有淡淡的粉紅色，入口當然是脂香味鮮又滑嫩，食完實在有令人充滿幸福的感覺。

之後去另一間店試了燒蝦2200yen兩隻，大大啖的蝦肉彈牙爽口，但味道卻不太鮮甜。

食完一輪海鮮，想試下大阪地道的小吃，買了章魚小丸子加燒餅600yen，原本打算坐低慢慢食，哪知道老闆好惡唔比我們坐，但其實內裡當時沒什麼客人，我們話已經買左小吃都係唔俾坐，都費事再同佢嘈。

最後其實已經幾飽，但意猶未盡，於是再買了盤雜錦魚生2500yen， 以這個價錢，實在沒可能在香港，吃到如此分量又新鮮無比的魚生，食飽飽十分滿足，才出發前往我們下一站---白濱。