多次曼谷旅行, 行去食海南雞飯時都見到呢間唔多起眼嘅店舖! 但從來未入過去食。

今次去食, 係見到旅遊書介紹呢間店食鴨河, 即管去試試!

呢間店舖, 主要都係以泰國人食為主, menu無中文, 只有泰文同英文, 但有圖片可以選擇!

點咗4碗粉面, 包括2碗鴨河, 泰式魚蛋+炸雲吞河, 泰式红湯魚蛋+炸雲吞河!

嘩, 真係估佢唔到湯底咁入味!

雖然份量唔係好大, 但都夠飽嘅, 鴨河湯底濃郁, 鴨件好似都有4-5件, 仲有好似豬紅嘅食物!正呀!

而泰式红湯魚蛋+炸雲吞河, 個湯有好濃嘅好似我哋平時嘅南乳味, 魚蛋細細粒, 但帶有魚香, 

雲吞雖然唔係即炸, 但都係脆嘅, 唔會係過晒氣淋身! 

泰式魚蛋+炸雲吞河, 我就無食, 但朋友就話湯底好香, 好好味道!

餐廳位於Asiatique 夜市的碼頭旁邊！所以向外面望係河境,

環境Ok, 座位有室內及室外可以選擇，

店內以白色裝修為主，感覺都舒服嘅，但就唔可以講話好正。

以泰國地方嚟講, 呢度都算高級餐廳吖,

但大多數員工都係木無表情, 問佢哋野都好似唔係好想答你咁, service真係麻麻哋!

餸菜點咗生蝦, 泰式炒河, 咖喱炒蟹, 泰式炒菜, 冬蔭功湯, 燒牛肉沙律, 4杯飲品質!

其實整體性食物味道&賣相都可以嘅, 配合餸菜嘅汁都唔錯!

但就唔算好出色, 份量唔太多。
但呢餐飯, 只係6道餸菜, 就食咗相等於HK$1000, 實在認真唔抵食

仲貴過香港九龍城地道泰菜囉, 咁仲咩仲要喺呢度食呢?

只可以講, 唔會再有下次幫襯!!!!!! 
 

呢間今年開幕嘅新酒店，上網睇相係唔錯，但到實際地方時其實就麻麻。

酒店設喺商埸樓上，check-in／out都要到9／f辨理，唔太方便。

而且以為有泳池，點知帶晒泳衣去，原來係無泳池㗎！

房間裝修用料粗糙，企缸沖涼時去水位做得差，D水去得好慢，洗手盆嘅水龍頭做得太入，一洗手，

D水就濺到周圍都濕晒。配備亦唔完善，除房間內只係得洗手間有一塊大鏡外，

就無任何小鏡、全身鏡可以供化妝或裝扮，有人用洗手間時，另一人就無法使用鏡裝身，

對女仕嚟講真係極唔方便！ 而且房間無提供紙拖鞋、牙膏、牙刷！

房間係有免費wifi, 但接收就唔好，就算見到收爆wifi都好啦，都可以慢到好似收唔到咁，

或者係經常斷線！😡

另一不滿係，到第二朝早上9am左右，無端端有人㩒鐘，點知係清潔員工話要做清潔喎😤

，從來未試過會住酒店，喺你仲未起身，而要㩒鐘話入嚟執房囉！😡😡有無攪錯呀？

仲有其中一日，我哋一行4人，想享受酒店內嘅spa啦，點知去到接待員話，佢哋全店只有3位技師，

唔可以同時間做，要做就只能分開兩個時段。唉！結果只有又要坐車出去其他按摩店。

此酒店唯一可取，就係接待處及大堂員工的服務態度有禮熱心。如果下次再去曼谷，一定唔會再

入住呢間，更唔會介紹俾朋友！

 

今次成個行程去食泰菜為主, 由街邊擋到大餐廳都好好味!

點知返香港前, 喺曼谷機場食最後一餐, 竟然係最難食嘅一餐!
叫咗Ice Lemon Tea, 嚟到竟然係無檸檬嘅都唔緊要, 但味道非常怪, 超甜又酸

問個待應點解呢杯Ice Lemon Tea係無Lemon? 同埋點解味道咁怪?

佢個樣唔太有善, 仲話lemon tea係用lemon水沖嘅, 所以係無lemon。

蝦餅~~唔係好覺有蝦囉, 反而麵粉就好多, 一d都唔彈牙!

泰式抄雞肉碎 ~~d雞肉一d都唔似係抄過, 似用水烚過後撈返落d香料&辣粉度,

d雞肉係"鞋"嘅又無色無味!

香葉包雞 ~~仲犀利, manu係炸, 平時餐廳食都係炸, 但呢度嘅真係一打開塊香葉, 見到都唔想食 

嘅, 唔係炸嘅不持止, 又係白烚咁嘅樣, 食落就更加係味道古怪, 你又唔可以話佢係變咗味, 但食落

個感覺係好似變咗!

其他嘅冬蔭功炒飯、冬蔭功湯, 炒菜唔可以講係好, 只可以係形容可以入到口..............

估唔到喺機場咁大嘅連鎖店餐廳都可以咁差!

呢間海南雞飯店, 其實原來有幾十年嘅老店,

店內唔止食海南雞飯嘅, 仲有其他小食嘅!

但由於係早餐, 我哋亦要留肚食其他美食, 所以除咗叫海南雞飯外,

就點多一款香菇燉鴨湯&滷水豬肉。

海南雞飯嘅雞油飯做得好出色, 一啖食落去, 好香雞油味停留在口中,

海南雞都係起晒骨, 但個汁就覺得較為辣咗d, 搶晒d雞味。

香菇燉鴨都唔錯, 好香濃嘅燉湯, 內裏夾雜咗d好似中藥嘅香味, 正!

但滷水豬肉就麻麻哋啦, 因為炆得實在太老啦, 好鞋口呀!

而且呢間好多泰國人食, 我哋夜晚12am行過, 店內都坐滿人,

而且呢間店開到2am! 如果住附近就可以嚟宵夜啦!