11日第一日(忠孝敦化,五分埔,饒河街夜市)天成飯店

我同MANDY坐KA486,而卉妍坐CX460之後再相約係TERMINAL等,一齊再坐飛狗落台北,飛狗好奇怪坐坐吓途中無端端叫你落車,之後企係個街度等轉第二架普通巴士,好彩卉妍之前有塔過,唔係就真係比佢嚇死,無端端係個街度趕人落車

到左天成飯店放低行李,即刻去台北西站買明日早上7:30分車票落日月潭,之後就塔捷運去忠孝敦化鼎泰豐食小籠包,皮簿唔錯,跟住再去度小月食擔擔麵,OK啦,,叫做食過咁話啦,無咩特別,重有去天仁茗茶買左杯野飲,行吓行吓見到NARAYA喎,走入去買左個花花袋同咭片套要嚟放八達通

食飽再去五分埔行街,好多批發不過質料款式無香港咁好,而價錢亦無香港咁平,更何況已經係日本同香港買左一大堆,所以都無咩興趣買,叫做行過就算啦

唔經唔覺已經天都黑埋,於是再問吓人再埗行去松山饒河街夜市,嚟到第一檔見到好多人排隊就係福州胡椒牛肉餅,之後再食奶油胡椒蝦,燉排骨,牛肉麵,食飽再坐火車返台北飯店休息準備

12日第二日行程(日月潭) 朝霧渡假餐飲小棧

坐早上7:30分國光客運由台北直到日月潭,竟然成架車full哂,好彩早一日買飛,如果唔係真係上唔到就慘啦,3個小時車程,中途有2個點可以休息比你去吓洗手間

去到日月潭唔埋咁多買定票9點半車票落埔里先,以免到時又full晒,之後再埗行去我地今晚住既旅館朝霧渡假餐飲小棧,好似係家庭式經營,房間唔錯仲新裝修緊,每間房露台都會對住日月潭,好relax,個view好正,不過可能係平日成間旅館得我地一班客人

我地買個package係包埋下午茶同遊船河,所以無幾耐佢地就送上下午茶,有兩壺茶,個茶好特別叫做阿莎姆紅茶,好好味架

到3pm旅館主人開車送我們到碼頭等3:30分游船河忝坐觀光碼頭號游船河,沿途仲會停係d島仔比我地行吓影吓相,其中一個島上既阿女麻香菇茶葉蛋/ 日月潭蛋(SUNＭＯＯＮ　ＬＡＫＥ EGG)仲話好出名喎你地睇吓盤水鹵水汁就知啦,呢個導遊重好鬼攪笑架!!

唔錯唔錯!!係日月潭夜晚無咩野做,唯一既娛樂就係煲台劇,仲有台灣電視台好多韓劇睇架