未去之前，都有Ｄ擔心。因為呢家酒店係網上評論好壞參半，但去到真係成個心定哂。
首先我地好幸運，去到佢幫我地免費升級至行政房，樓層高Ｄ，房大Ｄ，間既view都唔錯。
起初我地都好懷疑，左問右問使唔使要額外費用，但個接待員都好有耐性話唔使。

住左四晚，服務好好。
朝早既自助餐早餐好豐富，我地每日都食到好飽先去玩。食左4日，真係肥左幾磅，哈哈！每晚返黎都見到有２枝水同朱古力放係台面（唔使錢），而且執房執到好整潔。酒店位於陸家嘴金融區，都幾靜，人流唔多。距離地鐵站只係５分鐘，都算方便。

總括黎講，我真係覺得呢間酒店真係好有水準，亦唔算好貴（係浦東黎講算平，當然比起浦西既酒店貴一截啦!），住左4晚，大概係RMB700-800一晚啦，因為我地係訂套票，所以都唔肯定。

如果維港係象徵香港，咁外灘當然就係上海既象徵。
黎到外灘係黃昏既時段，由於當日太大霧，所以令到外灘既吸引力下降左。
到處都人頭湧湧，大家都爭相拍照，有一刻感覺係去左尖東海旁。

不過明珠塔仍然令我感到震撼，果然係上海既代表性建築。
到左夜晚，外灘既魅力先真係散發出黎，浪漫而醉人。
璀璨的燈光之下，讓我明白到為什麼別人說上海的夜景能媲美香港。

行完海灘，當然搵地方醫肚。
根據旅遊書既介紹，我地黎左吳越人家。
入到去，地方唔算好整潔，而且入到去冇人招呼你。
個日唔算多人，我地自己搵個位坐低。
叫完野之後，待應埋黎，原黎呢到係要俾左錢先，都正常既！（可能驚Ｄ人走數）

無論如何，食物質素最重要，
呢到主打麵食，女友叫左個醇香排肉麵，
佢話一般，主要因為湯底偏淡，不夠熱，麵條亦未見出色。但排肉（豬排）肥瘦適中，黑色醬汁甜甜地，幾開胃。

至於我叫左個吳越拌川，
作為招牌菜，做得的確出色，配料夠多，有魷魚，肉絲，木耳等等，食落非常有口感，而底下的炒麵香脆，唯一問題是太多油，但我依然成碟食哂，推介！

另外叫左花雕醉雞，
酒味重，雞肉鮮嫩，價格便宜

呢一餐平均都係20-30人民幣一個人，不錯的之選！！