來到旅程的Day 3, 瞓到成11點先起身 所以今日skip咗早餐直接去brunch。
我又想開心share一條link俾大家，裡面有大量台北cafe的資料，有齊地址、營業時間、近邊個捷運站等，十分詳細仲keep住update:
http://haruhii.pixnet.net/blog/post/41591272-%E5%8F%B0%E5%8C%97%E5%92%96%E5%95%A1%E7%94%9C%E9%BB%9E%E4%B8%8B%E5%8D%88%E8%8C%B6%E6%8E%A8%E8%96%A6wifi%E6%8F%92%E5%BA%A7%E5%B0%8F%E6%95%B4%E7%90%86 
今日食brunch的Aranzi Cafe就係從上面的link內找到。Aranzi Cafe喺台北有幾間分店，我去的係位於新光三越南西2館4F(即係類似香港Sogo的百貨公司裡面)，cafe以可愛公仔為主題，入到去就好似返回幼稚園的感覺，cafe有堂食部份，也有售賣蛋糕&曲奇餅的counter，另外也有售賣精品的部份，女孩子來到這裡一定會瘋狂拍照!
如堂食，先坐底再到cashier點餐，餐牌都好可愛啊!我叫咗個brunch，個磨菇同炒蛋好好味，底部有大量沙律菜，沙律汁係柚子味，分開上的。另外叫咗個pizza sandwich，飲品叫咗杯mocha，有可愛兔仔拉花，味道都唔錯。本來諗住要食那個熊貓蛋糕，可惜已經太飽食唔落了(T_T)...

一位台灣朋友推介我來這個地方，這個地方跟我Day 1去的松山文創園區有點相似，都是歷史古蹟改建為藝術文化的園區，這個地方以前是酒廠。園區是免費入埸的，裡面有些小店，pop-up store，創作室，餐廳和收費的展覽館。這次來到剛巧有Miffy和櫻桃小丸子的展覽，參觀展館收費NT$280，其實入面很大，可消磨一整個下午。園區內有一間叫"小確幸紅茶牛奶合作社"，行累了可在此坐坐，飲杯冰紅茶，so relax~

今日的重點行程係去探草泥馬，知道路途遙遠，要食定個大早餐打底先! 又再次喺西門町好random咁揀一間餐廳，行下行下就見到阿宗麵線，但因為無得坐，就去咗旁邊的北平一條龍餃子館。成間餐廳係一片紅色的舊式中茶館格局，叫咗一碟煎窩貼，一碗牛肉麵。煎窩貼一碟有成10隻，仲好大隻，是長形那種，有點似八方雲集的煎餃，味道一般。牛肉麵反而很出色，湯夠濃郁牛肉很腍。

終於來到今次行程的重點~~探草泥馬!!! 心情真係超級無敵興奮呀! 食完早餐就喺西門站出發搭捷運到淡水站，再轉公車去Oia伊亞藝術咖啡館。喺台北坐公車都幾方便，我想介紹個APP俾大家，叫"台北等公車"，只要輸入路線，佢就會show晒D站出來，每個站都有顯示仲有幾多分鐘有車，不停更新，所以都幾準確，上車後仲可以set下車提示，真係一個偉大的發明，由淡水到北勢溪口站約45分鐘車程，NT$30/人。
到了Oia伊亞藝術咖啡館，一入去就見到草泥馬店長Snow!!! 好可愛呀!!! 餐廳規矩要先點餐才可拍照，我們兩人點了一份朱古力鬆餅(即窩夫)、一份雪糕鬆餅(即窩夫)、凍咖啡同熱水果茶。沒想到這裡的鬆餅都唔錯喎，好香蛋味，鬆軟，而且好大份，我快快食完就同草泥馬玩了。
Cafe地方很大，草泥馬有足夠空間行來行去，Cafe室內的地方只有一隻白色的草泥馬，佢會主動親近人類，客人可以去水吧問店員攞餵草泥馬的食物，另外Cafe外有大約7-8隻草泥馬喺圍欄入面，客人可以隨意出去探佢哋，就這樣影下相抱抱草泥馬就過咗一個好愉快嘅下午。 

Day2晚上來到師大夜市逛逛，原本打算掃街(食街頭小食)當晚餐，但行到太累想搵個地方舒舒服服坐低食，行到師大路街尾見到呢間Evans Burger，望望裡面的裝修好古典啊，店員很熱情的給我們餐牌，都幾吸引喎，一於入去試試，入到去見到有幾枱客都係外國人，心諗應該係正宗的美國菜吧~
1) Mushroom Swiss Cheese Burger NT$270 (9/10分) - 漢堡扒十分juicy, mushroom swiss cheese醬好creamy，個包用牛油烘過，味道有D似香港的Burger Room，個薯條都好正，價錢已包一杯飲品，計返港幣只係六十幾蚊，抵食!
2)  Evans Steak Brunch NT360 (7/10分) - 份量大到嚇死人，有香草麵包、炒蛋、一大塊牛扒、兩件薯餅、幾片香蕉，仲包兩杯飲品(無限添飲)，薯餅最出色，個牛扒反而一般，質感有D似牛柳多D。

酒店優點
1) 由捷運西門站(Exit 4)行3-5分鐘便到，Exit 4設有扶手電梯，有大件行李都無問題，而且一出Exit 4就係維格餅店，買手信超方便
2) 想購物或醫肚一落街就有
3) 酒店開業只有兩三個月，大堂及房間都很新和整潔

酒店缺點
1) 升降機不足而且很慢，繁忙時間等候時間較長
2) check-out後的行李只存放在大堂，人來人往...好似唔安全

誠品生活松菸店係位於松山文創園區內，這個地方多年前係一個煙廠，現時已成為歷史遺跡，園區內部份建築物仍然保留原貌，用作文化及展覽場地，週末常有市集或表演。園區的另一部份正是誠品生活松菸店，裡面除了有誠品書店，還有表演廳、電影院、餐廳和多間台灣原創品牌的小店，也有一些手作工藝班可以參加，如皮具製作、燒玻璃瓶等。平日夜晚來人流較少，慢慢行可以行幾個鐘，體驗一下台灣慢活的一面。

建議黃昏/晚上來看夜景更美。

要試正宗的珍珠奶茶和台灣菜，一定要來春水堂，因為春水堂係珍珠奶茶發源地，台灣有多間分店，我今次來的就係誠品生活松菸店內3樓的分店。店內環境很古色古香，也有些精美的茶壺擺設，點餐紙有成幾十款冷熱茶類飲品，食物方面有小食類，麵類和甜品，我最鍾意食台灣嘢樣樣都細細碟，可以叫好多唔同款。
飲品叫咗珍珠奶茶、柚子烏龍茶(夏季限定)同肧芽奶茶，珍珠奶茶的珍珠比一般香港的細粒和彈牙，柚子烏龍茶酸酸地好清新，肧芽奶茶勁多肧芽，比香港開粉的好飲好多。食物叫咗功夫麵(他們的經典商品)，功夫麵其實係香菇肉燥麵，好好味超推介，甜不辣都好好味。甜品叫咗個鐵觀音茶餅，入口粉粉哋之後溶化，好得意，值得一試。

酒店冇包早餐的, last day的早餐, 我就落咗去酒店樓下, 即係華陰街睇下有咩好食

其實呢條街都幾多嘢食, 嚟嗰日見到有不少仲要係長(人)龍店呢~ 不過一早開的食店唔多, 見呢間都幾熱鬧, 所以就揀佢, 點咗兩個外賣攞番上酒店食

早餐選擇勁多, 有選擇困難症的我, 攞住張點餐卡揀咗好耐先揀到

揀咗一個叫'幸福' 一個叫'樂活'的套餐, 真係幾豐富, 有吐司有腸仔有沙律菜, 沙律菜會另外配一包醬汁的, 不過我冇用到, 就咁食都好fresh.  外賣的奶茶都夠凍~ 

食飽飽就執好行李check-out 了 

因為佢响香港的名氣, 我排咗成個鐘就係為咗一試呢個三文治....

之前一日去新竹已諗住嚟買件做早餐, 點知嚟到冇人, 只棟咗個牌寫住星期六開11am, 所以是日食完早餐check-out就過嚟買件試試

11點嚟到但仲未有人响店(counter)內, 不過就已經有廿幾人响度排緊隊, 等咗大概20分鐘, 卒之見到大人搭的士(?!)送嚟大大包一盒盒的三文治.

因為得一個店員, 而且要處理勁多的預訂單, 雖然得嗰廿幾人排隊, 結果都排咗成粒鐘...

買咗兩件：草莓起司&招牌起司

um...先試咗件草莓起司, ok啦, 士多啤梨醬多士囉, 麵包切到起角好整齊, 不過就....冇乜特別
另外嗰件招牌起司我哋攞到機場先食, 都係冇乜特別, 試過就算了, 台幣28蚊我覺得值ge~ 

食完件三文治, 就例牌去行吓'江南大批發', 入完貨就再去西門町行街嘞.

行到咁上下又肚餓, 就嚟呢間試下台灣出晒名的臭臭鍋~

原以為只係110台幣冇乜料到, 點知我實在太睇'小'佢嘞, 一人一爐, 食物份量同香港啲快餐一人一爐有得fight, 大腸臭臭鍋裡面有肉丸, 大腸, 菜, 大大件臭豆腐等, 仲配埋一小碗白飯, 嘢飲仲要係任飲的(雖然飲品味道一般), 唔駛加料都食到你飽飽, 真係超值!

台灣周圍都好多臭臭鍋, 三媽呢間响西門紅樓附近, 都幾就腳, 行到攰嚟打個邊爐都幾好.

之後行多陣就回酒店攞行李, 坐國光客運往機場了, 臨上機仲响候機室附近的食肆(好饗廚房)買咗個貢丸米粉餐(約200台幣)食埋先上機, 以'食'結束呢次台灣之旅 
 

又係偽文青時間，第一次一個人旅行，心裡又驚又遇上"個幾日"…
心情幾差…一落機就要搵野食！
做足事前功課，搵個地方食brunch，配搭好豐富
而且裝修好有工廈feel,同埋係有貓同你玩(如果佢睬你既話)

Brunch主要分四項去揀，首先係主菜：有出名(如圖)既蝦水波蛋或者可以揀吐司；然後有配菜：有薯條/薯塊/洋蔥圈或者炸雞(如圖)等等，然後仲可以揀奶或者果汁，最後仲有紅茶/綠茶……其實兩杯野飲……本人覺得都幾多…哈哈，不過因為飛機餐唔想食，落機後好肚餓…食咩都好好味

鋪名叫Toast Chat…吐司都好受歡迎…可以…得一個胃………要留番食其他野嚕

服務員超好   不斷斟茶  又會友善分菜   服務周到

環境舒適夠靚   廳中央有台白色綱琴

有趣的是   餐廳會跟據國藉放支旗  隔鄰兩桌插了日本國旗  我們桌插了區旗   

小籠包不錯  

家鄉正土閹雞      正
糖醋鍋粑蝦   正

炒蟹    正
下次一定會再去!

地點非常方便的酒店，由於我們第二天要搭公車去宜蘭，步公車的車站只須要三分鐘

地方好乾淨，服務一流，食物的水準也過得去，如果食下嘢，傾下計，是不一個不錯的選擇

最好空肚去的夜市，因為你去到會不停不停的食食食食

這裡雖然比較難到逹，但我喜歡這裡，喜歡這裡的寧靜，喜歡這裡的簡單，喜歡這裡藝術家的老闆，食的雖然清淡，但也很美味，愛上這裡簡單，平凡，清幽

幾米廣場可以靚下影，日間有個小市集，全都是一些手作品，價錢不算是貴，也可以影下懷舊的火車站

入面都幾大，分開唔同既區域, 食的集中在一處，民族特色的街道，不同種類既手工藝和傳統小食，
在中間湖的另一面，有面積不少的草地，我地係度玩影相都玩左好耐，而係對面影張全景相加埋藍天白雲，不錯不錯。 

係網上睇到時已好鍾意呢間民宿，好有特色既裝修，同埋好乾淨，老闆娘很好人，會幫你叫車到門口接你，大廳有一啲遊戲可以俾大家一齊玩

這趟旅程去2個夜市我們都有去，相對之下，我們覺得羅東的夜市比士林更好，食的很好味，環境我也覺得相對較好，地方很方便，很容易到逹

朋友推薦，說香港的好好食，一場黎到台北，點都要去試下，食物跟飲品不過不失，不算太好但也不差，是個飲下嘢，傾下計既地方。
店裡好侍應都是辣妹喔，蠻漂亮的~~  

想不到飛夜機都會滿座且整個入境處都是人，打了無數個蛇餅前前後後花了一個多小時才辦好入境手續，本想乘二時三十分的巴士往台北車站，怎料巴士到來的時候居然上了十數人就滿座，期間有不少的士大佬在兜客，想到我們到台北車站後仍再要轉車，不想再轉轉折折，最後用每人二百五十元台幣的價錢跳上的士到酒店算了（起初他獅子開大口說要四百元呢！）。

雖抵台灣是半夜，但我絕對不贊成不休息直踩到隔天，有充足的休息才能夠氣夠力的去玩，心情好一點大家吵架的機會也少一點。出發十天前在hotels.com訂了一家近市中心西門町的樓上酒店，三人房一晚連稅港幣六百六十塊，網站照片看起來不怎麼樣，但去到又有點驚喜；可能尚有空房的關係，我們被安排到兩間相連的四人房，房間不大不小，兩張雙人床放在中間，在旁攤開三個手提行李箱亦綽綽有餘；厠所也是寬敞的，純白的裝潢令人感覺整潔，一個人淋浴一個人在外梳洗也完全無問題，比我想像中狹狹小小的差太遠。以它便利的地點和二十四小時供應咖啡、朱古力等熱飲來說，整體性價比真的不錯。

沿住舊城南路行, 途中會經過一個大型商場 - 新月廣場, 原以為咁大個商場會有好多嘢食啦, 點知咁早得地下幾間連鎖coffee shop開咗, 食咗個星xx早餐, 食完行過馬路就到宜蘭設治紀念館~

紀念館其實以前一直係宜蘭首長的官邸, 1997年再整建成紀念館.

紀念館為日式建築, 入到去就好似去咗古時日本咁, 館內有關於宜蘭的歷史的展品; 面積唔大, 屋外有日式花園.  來認識一下宜蘭, 影下相也不錯

此館就在設治紀念館旁, 不過已改為一間茶室.  店主容許參觀茶室的一角, 我哋順道來影個相就走了

(這裡還有一賣點: 金城武嚟過呢度拍廣告喎...)
 

由設治紀念館出發, 再行多5分鐘, 又到另一景點: 台灣都幾多的 - 酒廠

之前响七星潭都有個觀光酒廠的, 不過因為時間唔夾所以冇去到, 今次順路就嚟宜蘭呢間睇下

酒廠有幾個館, 有銷售酒品的, 有展示釀酒過程及酒的歷史, 外面陽光猛烈, 入嚟行下睇下仲有紅

 麴香腸食, 唔錯呀~

臨走仲買咗兩個花雕.....雞碗麵今晚消夜

行完走廠, 就打的去另一個觀光工廠- 橘之鄉

嚟到呢度感覺似去到一啲遊客買手信的店, 店內有很多蜜餞款式, 也可以試食, 不過店內人唔多, 可以舒舒服服咁行

這裡會有蜜餞工作坊, 費用唔貴, 但需要預約

行行下見到呢度原來有間coffee shop, 就坐低抖下relax下

點了兩杯飲品, 加個橘子窩夫, 酸酸甜甜的, 好味~

悠悠閒閒咁坐咗成個鐘, 因為呢間coffee shop真係好舒服, 令人好relax.
 

又是一間觀光工廠, 但感覺折然不同, 因為呢度更像一間手信店

因為的士司機推介, 遊完橘之鄉, 沿大路行約7分鐘就會到阿典蛋糕, 話好多人都這樣玩呢, 所以我哋又行去睇下

一入到去, 左面玻璃房內會見到工人在焗連輪蛋糕, 整豆沙包(銅鑼燒), 中間就係商品區, 右面就一大堆遊客

見蛋糕幾得意, 於是買完蛋糕就走了, 相都冇影 

阿典蛋糕門口有免費巴士往宜蘭火車站, 不過就非常之疏, 好彩走嗰陣夾到時間, 所以就坐到嘞 (否則等的士都唔知要等幾耐...)

到咗宜蘭火車站, 見到附近有呢個好似荒廢的建築, 內裡原來有間二手書兼茶室, 我哋就行多陣先去搭火車嘞

書店唔大, 店外放了不少舊漫畫, 店內就有行多二手小說, 工具書, 旅遊書等, 仲有少少精品發售.

打咗一陣書釘, 都買咗一本二手書, 就結束是日大半DAY的宜蘭之旅, 搭火車去台北了 

因為係weekend, 所以台北的酒店好多一早就full booking了, book唔到心儀的, 唯有退而求其次搵咗呢間近火車站的商務酒店.

由火車站行去酒店, 原來都唔係咁近, 拉住行李都幾辛苦吓, 好彩Y13出口有電梯, 唔駛搬行李行樓梯算好彩了(但要注意Y13出口的開放時間, 因為試過夜歸(晚約10點後), 個出口係封咗的)

由出口行去酒店就好快, 2分鐘就到

酒店設在一座大廈的3樓, 房間如預料中細, 但算是OK的, 可以放到開到行李, 基本用品亦齊全.  最意外的是在房間櫃桶發現一張訂購熱門手信(如豬肉紙, 鳳梨酥)的order紙, 今日訂第二日就送到仲會pack好晒手提上機, 咁方便我緊係第一時間落order啦, 不過只收cash~ 

每次嚟台北都會嚟呢個夜市, 因為想食咩台灣小食都可以响呢度搵到.  以往嚟呢度都係搭巴士, 而家方便好多了, 一出松山捷運站就係~

一條街內, 台灣美食與精品服飾等等應有盡有, 如果同行友人唔多, 建議先行一圈, 揀選最想食得之後才'落手', 因為美食實在太多, 半條街都未行完就已經可以食飽了~

 

因為招牌寫住'百年老店' 而且店內冷氣開放喎, 所以就入去食碗蚵仔麵線~

店內座位都比較迫, 好唔容易先搵到個位, 一坐低店員就會問你食咩, 點完唔駛2分鐘碗麵線就送上, 超有效率~

蚵仔好脆口, 肥嘟嘟的好飽滿, 麵線唔會太碎, 湯底唔錯, 唔會太咸, 我個人比較LIKE呢間的口味

行完食飽飽再戰師大夜市, 可惜夜市已經冇以前咁熱鬧, 逛咗一陣, 買咗杯最愛的柳橙檸檬, 就打道回酒店休息了
 

酒店就位於台北轉運站樓上, 由機場搭國光客運到台北火車站, 步行過對面馬路(途經地下街及商場)就到, 因為明天一早要搭火車到花蓮, 所以住呢度就非常方便.
房間都很寛敞, 而且露台可以望到101~ 房間設備用品齊備, 不過燈光就略為暗一啲.  房間位於16樓, 所以位置在鬧市都覺得寧靜
 

安頓好後再休息一陣, 就出發去醫肚嘞

通常嚟台北都係掃夜市小食當一餐, 朋友大力推介下, 今晚就嚟試吓打邊攎~

這店在台灣有幾間分店, 出發前先在網上預約訂位, 準時嚟到就有得食嘞

店內環境舒適, 通風做得好所以食完個身唔會有陣'火鍋味'.

兩個人點了: 養顏美容鍋, 沙朗牛肉, 油條, 菜&一個海鮮拼盤(細)

這裡的鍋是以位計的, 而沙朗牛就勁大盤, 兩個人食其實幾'吃力', 油條比較香港食的硬&乾身, 用嚟打邊爐真係超好食! 海鮮拼盤有: 蝦, 蘭花蚌, 鯛魚片, 扇貝, 份量二人剛好, 亦很新鮮

其實個湯底都有'料'的, 最好未係啲豬紅, 好爽口, 仲有條蔘呢~

醬料選擇唔多, 不過有白飯任裝! 我見啲台灣人食完就會加啲飯落個湯底度再連埋啲湯食清~ 好似好正咁, 但我兩個人已經食飽飽, 試唔到呢個'湯飯'嘞~

而最最特別ge係: 個湯底可以打包攞走ga (我當然冇咁做啦.....)

另外值得一讚的係呢度啲服務員, 真係勁勁勁有禮貌, 下下都九十度躹躬, 真係有啲唔好意思

仲有仲有, 食完會有張滿一千減二百的coupon, 我用了朋友俾我嗰張(佢前兩日先幫襯~), 所以又再抵啲

由無老鍋出發, 步行去'地圖上較近的夜市' - 寧夏夜市
最終行咗差唔多25分鐘.
食飽飽就當散下步啦~ 

第一次嚟呢個夜市, 感覺很地道, 遊客(好似)比較少, 賣的都係地道小食, 也有一啲遊戲小攤, 雖然規模唔大, 但都幾多嘢食選擇, 食飽都忍唔住再食個臭豆腐呢~

閒逛完就步行到捷運雙連站, 搭捷運回酒店休息了.