日期 : 22/02/2008 (Day 7)

行程 :  大內宿  ~ 龍王峽 ~日光東照宮

今朝早一起身就睇下個會津若松嘅日景, 清早望出去真係好寧靜好舒服呀!不過今朝起身係有啲失落架, 因為今晚我哋將會離開東北返去東京啦, 真係有啲唔捨得呀!

食完蟹宴, 我哋就搭JR落新宿行街街啦, 嚟到新宿, 好似去咗銅鑼灣噤, 撞口撞面都係香港人, 同東北真係好唔同呀! 呢一刻梗加掛住東北呀!


因為今日嘅車程時間比較多, 所以我哋早咗出發, 未夠9點我哋已經食完早餐check埋out出發啦! 第一站係大內宿, 一嚟就係差唔多成兩粒鐘車程, 去到大內宿都已經係11點! 大內宿其實係一條街, 兩邊有好多舖頭, 有食嘅, 有賣精品嘅, 維妮就對啲精品好有興趣啦, 最後維妮就喺到買咗一對白兔仔同一個大內宿公仔啦, 好得意呀! 行到悶悶哋我哋又玩拍廣告, 哈哈~係咪有啲頂我哋唔順呢!? 我哋行到噤上下就搵嘢食啦, 記得嗰時睇雪映移城, 裕美好似喺呢度食soba, 我哋就搵soba食啦 揾咗一間試試正正嘅! 呢間舖頭有好多關於日本東北嘅旅遊書比人客睇架, 維妮當然唔放過 攞嚟睇下啦, 揭揭下比維妮睇到檜原湖同五色沼嘅夏天相喎, 即刻影低佢啦! 哈哈~

食完嘢我哋就離開大內宿啦, 之後我哋再去鬼怒川嘅龍王峽 唉~我哋又比亞GPS小姐玩啦 明明話到咗目的地架啦, 但都係咩都見唔到, 搵來搵去差啲想放棄架啦, 點知又喺呢個時候比我哋搵到喎, 原來又要行山禁行 維妮又抱住喺山寺嘅希望比心機噤行, 根據資料呢度應該有條河川同有條紅橋, 我哋嘅目的就係去睇呢條河同橋, 行~行~行~終於見到條河同條紅橋啦, 不過無想像中噤靚喎, 但條河啲水係冰綠色又幾靚嘅! 噤當然無山寺噤靚啦!

之後就係我哋喺東北最後一個景點, 東照宮啦! 維妮對東照宮真係失望呀, 又無嘢睇, 周圍又濕漉漉, 完全覺得返咗大陸噤呀, 估唔到喺東北最後嘅一個景點係噤失望呀! 不過呢度真係幾大, 大到我哋差啲盪失路搵唔番個停車場呀! 攞番架車後, 我哋就要同東北講byebye啦 真係超勁唔捨得呀, 好唔想離開東北呀!

一落番東京就遇到大塞車啦, 維妮訓醒幾次, nds都打完幾混都未到我哋嘅酒店呀, 點知塞完車亞GPS小姐又玩嘢 今次係就係話我哋到咗目的地, 但我哋又見唔到間酒店喎, 又要我哋搵一大輪, 真係比佢玩死!

當我哋check in時, 櫃台小姐拎咗個包裹比我哋, 大家仲記唔記得係咩? 咪就係車厘子個銀包囉, 宅急便送到盛惠750yen 真係超低呀, 低過我哋返轉頭去攞啦! 放低咗啲行李我哋就即刻要去還車啦, 因都已經過晒鐘啦,  好彩又好順利搵到間租車公司, 又噤啱租車公司隔離就係我哋今晚想去食嘅蟹道樂, 真係好呀, 唔駛搵餐檬先有得食! 張生一直都諗緊一個問題, 就係我哋聽日去見小王子好唔好都租車去 佢喺香港已經諗到依家啦, 最終佢都係決定租架車仔去探小王子! 因為如果我哋租車我哋聽日就可以一齊去築地食完壽司先去探小王子, 如果唔係維妮同張生就會趕唔切去探小王子架啦! 所以我哋還完車又租車啦! 哈哈~

日期 : 21/02/2008 (Day 6)

行程 :  鶴城 ~ 東山溫泉

離開檜原湖之後, 應該就係直接去今晚住嘅酒店 ~ 御東鳳 但因為我哋見鶴城離御東鳳唔遠, 所以我哋就順路去探一探呢個鶴城啦! 喺東北我哋浸溫泉好多時都可以包埸, 食嘢又包埸, 估唔到我哋嚟到鶴城都可以包場 哈哈~ 嚟到人影都唔多隻呀, 不過如果多人嘅, 我哋影相就無噤方便啦! 所以維妮覺得又幾好噃! 但其實係咪有啲奇怪呢, 噤大嘅鶴城點解會無人嘅呢? ha~ 原來人哋已經關咗門啦, 唔怪得人影都無隻啦, 因為關咗門所以我哋無得入去睇, 只係喺出面影下呢個鶴城啦 但其實呢個鶴城最靚最出名咪就係佢嘅外表咋庥, 所以我哋無得入去都唔覺得可惜! he~he~ 影完相我哋就去今晚住嘅旅館御東鳳!

御東鳳係喺東山溫泉到, 未去御東鳳之前我哋就去咗東山溫泉街兜個圈睇下其他旅館正唔正! 發覺間間都好似好簡陋, 又好細噤, 再睇番我哋住嘅御東鳳, 唉~未入去淨睇外表, 非常大陸feel, 我哋已經對今晚嘅旅館無晒期望啦......但原來我哋係錯錯錯錯晒呀! 個帶房一路帶我哋上房, 我哋一路睇發覺原來都唔係好差咋噃, 點知一入房仲驚喜 通常維妮一入到房都係第一時間打開個窗睇下出面嘅view正唔正! 今次維妮都唔例外, 一打開個窗簾就係一個 "嘩" 字, 係一個超靚嘅會津若松夜景呀 簡直靚到暈呀! 望住個噤靚嘅夜景真係有啲醉醉哋呀! 就喺維妮陶醉緊呢個夜景時, 電話响 原來係車厘子, 佢問我哋間房有無本聖經擺喺到, 維妮睇過無喎?  但佢話間房有, 驚到佢都唔知點算好噤 維妮就話我同妳調房啦, 反正維妮都無咩所謂! 但的而且確又係有啲奇怪, 點解佢間房會多咗本聖經, 而維妮間房又無呢? 算啦, 無謂再研究呢個問題, 越研究就越唔安樂! 之後頭先帶房嗰位靚女問我哋想幾點食飯, 我哋就話7點啦, 因為今晚我哋嘅晚飯係喺自己間房食, 所以佢又問我哋想喺邊間房食, 噤維妮見之前車厘子嗰間有聖經, 噤咪話喺無聖經嗰間房到食啦 點知佢話有聖經嗰間大間啲會好啲! 唉~噤妳又問我哋想邊間? 真係比佢激死! 未食飯之前我哋又浸一浸先! 一路行去浸溫泉嘅地方都覺得係好spa feel呀, 真係估唔到呢間旅館係噤靚架, 所以呢凡是都唔好睇外表呀! 入到去維妮就第一時間出咗去露天風呂, 因為維妮實在係忍唔住呀 因為呢度個露天風呂正到簡直唔識點去形容呀, 因為呢度個view就係我哋間房所睇到嘅會津若松夜景個view呀對住個噤靚嘅夜景view浸溫泉係咩呀? "嘆" 囉! 哈哈~ 呢一刻維妮真係有少少覺得自己做緊富豪呀! 哈哈~ 另一邊仲可以訓住嚟浸tim呀! 簡直嘆到暈呀! 連車厘子呢晚唔浸得溫泉, 佢都忍唔住要行出嚟企喺度浸腳就知有幾正啦! 呢度係維妮喺東北所浸過嘅溫泉唯一一個浸到唔捨得走嘅溫泉 維妮真係驚自己會浸浸下訓著呀, 嗰時真係大事件啦 所以維妮要清醒啲呀, 浸咗差唔多半個鐘維妮就同車厘子返房啦, 沖完涼維妮又坐咗喺個醉人夜景前面等開飯啦! 

今晚又係食懷石料理, 不過呢度啲懷石料理有少少西餐feel, 但都係靚到唔捨得食 呢度啲懷石料理又係好似食極都食唔完噤, 食食吓又有人敲門攞嘢入嚟都唔記得咗佢敲咗幾多次門啦, 我哋個個都飽到唔識郁呀!

日期 : 21/02/2008 (Day 6)

行程 :  松島漁市場 ~五色沼~ 檜原湖

尋日嚟到松島見到一啲雪都無, 仲以為松島已經無雪落 點知今朝一起身望出去就見到大風雪, 心情即刻興奮番呀! 但點知我哋食完早餐啲雪又開始溶, 啲天氣真係變得快呀! 食完早餐我哋就 出發去松島漁市場, 由大觀莊去漁市場係非常之近, 10分鐘唔駛就到啦去到漁市場, 嘩~靜嬰嬰 除咗嗰度啲職員之外就得我哋四個, 係咪我哋晏得滯呢 但其實都係九點幾咋噃, 不過呢個漁市場一啲都唔吸引呀, 維妮覺得呢度似超級市場多過似漁市場囉 原本維妮都好想試下啲蠔, 但噤早, 又啱啱食完早餐真係唔係幾食得落, 所以都係算數 但我哋就買咗兩串燒牛舌, 係一啲都唔好食呀! 食完我哋就走啦, 下一站係五色沼!

喺戰戰兢兢嘅情況下, 維妮終於都揸到嚟五色沼啦, 唔好以為我哋真係噤順利去到咗五色沼, 去到我哋係咩沼都見唔到 噤我哋去到五色沼嘅案內所, 就入去問下啦, 呢個案內所我哋都差啲睇佢唔到呀, 因為啲積雪多到包住咗成間案內所噤滯呀?  我哋入到去問咗個職員, 佢教咗我哋行, 又話啲沼依家太多雪係行唔到 呢個我哋都知, 但以我哋啲資料睇起碼都可以睇到最大嗰個沼 ~ 毘沙門沼架喎! 我哋依照佢教嘅路去睇下啦, 但我哋左兜右兜都係搵唔到, 之後我哋又返番去案內所又問番個職員, 佢又教多我哋一次 之後我哋又再搵過 ~ 又搵唔到 ~ 又返去 ~ 我哋來來回回足足三次, 之後我哋行咗去個案內所後面, 見到有間旅館, 但呢間旅館竟然寫住冬季休業! 哈哈~酒店都要冬眠呀! 喺呢間冬眠咗嘅旅館對面, 我哋見到個疑似毘沙門沼呀, 但真係完全唔知道係咪, 因為我哋想行落去睇下, 但真係搵唔到路可以行落去, 周圍都係積雪, 我哋又見唔到有咩牌寫住毘沙沼! 究竟呢個係咪就係毘沙門沼呢? 到依家都係一個迷! 我哋見噤嘅環境, 所以我哋決定放棄五色沼呢個景點, 我哋直接去下一個景點檜原湖.

由五色沼去檜原湖車程都係十分鐘左右, 我哋去到見到有嘢食, 梗係醫肚先啦 呢間餐廳係可以望住個檜原湖食嘢架, 但就靜嬰嬰, 我哋又包場啦! 呢間餐廳係要自己入$落部機到買飛! 我哋一邊食一邊欣賞個檜原湖, 呢個檜原湖已經係結晒冰架啦, 啲冰厚到啲人可以起間屋仔喺入面釣魚架! 仲可以喺湖上面玩雪上電單車tim呀! 我哋見到有個牌寫住 "雪上電單車檜原湖遊覽" 哝~咪即係可以坐住架雪上電單車游個湖囉, 都幾好玩喎, 我哋一於食完嘢去睇下先!

食完嘢我哋就落番去下面, 呢度有個conter係可以租啲釣魚用具比人釣魚 我哋就去問下啲雪上電單車啦! 個怕怕啲英文又幾ok喎 1000yen十分鐘, 會喺個湖兜個圈! 噤都ok呀, 我哋一於試下啦! 我哋又要換雪靴, 換完雪靴我哋就行出去, 嘩 ~ 一行到出去勁大風呀 上到架電單車仲死, 好似十號風球噤, 啲風吹到都抖唔到氣呀, 如果話藏王大風, 喺架電單上面風馳電制就簡直係藏王嘅十陪呀! 捱咗差唔多5分鐘嘅十級風力, 我哋落車個個都變晒巔佬巔婆! 企喺個湖上面嘅感覺真係好唔安全呀 成日都好驚啲冰會裂開, 到時我哋就真係齊齊游冬泳啦! 嗰位揸電單車嘅靚仔仲用隻腳整爛啲冰比我哋睇下啲冰有幾厚呀! 真係唔該佢呀! 其實個湖有好大範圍都有繩圍住唔比人行過去, 張生仲腳多多走去踩下人哋圍住咗個範圍入面啲冰, 最後咪比人話囉! 真係修家呀! 不過原來圍住嘅位置真係比我哋企住嗰啲位置嘅冰簿啲架! 但其實只係一繩之隔咋喎, 真係越諗越唔安全呀! 我哋仲去咗睇人哋釣魚, 其實應該係釣魚毛至真! 其實見佢哋喺間屋仔入面排排坐噤釣魚毛都幾得意架喎! 影完相我哋又要坐返嗰架十號風球電單車返去, 唉~我哋又再次變做巔佬巔婆啦! 雖則要捱十級風力, 但真係好刺激, 好好玩呀!  

日期 : 20/02/2008 (Day 5)

行程 : 松島船河
一路上我哋都好擔心車厘子究竟頂唔頂得順可以去遊船河呢? 但其實佢嘅精神已經好咗好多啦! 我哋都係諗住去到先算啦 跟住個GPS行差唔多2點半就去到目的地, 但點解好似唔係好似噤嘅? 見有個觀光案內所喺到, 噤維妮同dor神又落車去問下啦, 點知原來真係喺到買船飛, 但上船就喺隔離, 噤我哋咪照買飛囉, 睇下個船期, 原來最尾班船係3點喎, 真係好彩啱啱趕到坐最尾一班船 我哋買咗飛上番車, 一分鐘車程都唔駛就見到個碼頭啦, 啱啱好對面就有個car park就泊入去啦 哈哈~又係全自助停車場喎! 泊好架車我哋見仲有少少時間就去咗間手信舖行咗個圈, 之後就行去碼頭等上船 今次遊船河嘅主角其實係餵海鷗, 維妮開頭以為係要出咗海先會見到海鷗, 點知原來喺碼頭都已經有好多海鷗啦! 維妮心諗係度餵咪得啦, 駛咩坐船出去餵呢, 但原來喺船上面餵海鷗係好玩好多架!

落咗船後我哋就喺碼頭附近四圍行吓, 行行下我哋見到有蠔食喎, 仲係200yen一隻 因為我哋唔諗住去任食蠔, 所以我哋就喺到試下啲松島蠔啦! 我哋要咗5隻, 點知dor神同張生都話唔食 只得維妮同車厘子食, 啲蠔又燒又焗下噤, 整到半生熟, 食落去係好鮮甜架 維妮一食就食咗三隻啦! 其實真係想食多幾隻架, 但我哋又想再行下睇下仲有無其他嘢食喎, 所以都係少食多滋味! 行行下我哋又見到有間舖頭賣燒米餅, 維妮同車厘子一睇就知唔方好食啦 但兩位大少竟然好有興趣, 仲一人買咗一大塊, 真係有成塊臉噤大架! 食到佢哋傻呀! 最終佢哋都係食唔晒啦! 再行行下我哋就行到去松島漁市場, 但人哋已經關晒門啦, 我哋唯有明天請早啦! 行到噤上下我哋就行番去car park攞番架車去我哋今晚住嘅酒店松島大觀莊啦!

由碼頭去松島大觀莊, 車程唔駛10分鐘 近到我哋上車set完GPS後就已經話我哋到咗目的地! 我哋一去到大觀莊門口未落車就已經有位靚女出嚟迎接我哋 我哋落車想落行李時, 個靚女仲幫手tim! 嘩 ~ 我哋啲行李件件都重過咩噤, 佢又細細粒, 我哋邊忍心比佢攞呀 我哋即刻話唔駛我哋自己攞得啦, 真係唔係好明 間酒店無男人嘅咩? 點解要個女仔出嚟搬行李呢? 不過我哋見喺日本啲酒店好多女仔都係一腳踢 咩都要做, 好似我哋之前住嘅藏王國際帶我哋上房嘅女仔噤, 帶房又係佢, 到夜晚食飯又見佢做待應, 到第二朝食早餐又見佢, 真係我哋見到佢都辛苦呀! 

我哋落晒行李就有個司機出嚟幫我哋泊好架車, 一入到大觀莊第一個感覺係一間好國際化嘅酒店, 同之前我哋住嗰啲好日本式嘅好唔同, 即刻有一點失落呀 ~ 今晚我哋住嘅係和洋室, 即係間房一邊係和式, 一邊係洋式! 其實個感覺係有啲怪怪地囉! 我哋見仲未係時候食飯, 所以我哋就諗住去浸一浸先! 不過呢度同我哋之前浸嘅溫泉真係差好遠呀, 呢度其實唔可以叫做溫泉, 只可以叫大浴場(原來佢哋嘅web site都係噤寫) 真係一啲溫泉feel都無呀! 所以我哋都係係噤易浸下就走啦, 浸完溫泉維妮同車厘子四圍行下, 發覺原來呢間酒店好大架! 行到噤上下我哋就去食飯啦! 今晚我哋終於可以轉下口味, 唔駛再食懷石料理啦, 今晚我哋係食buffet, 一入到去我哋就見到好多人圍住張長枱又影相又拍手噤做咩呢? 原來係有個師傅喺度劏緊條好大條嘅吞拿魚呀! 呢度啲食物同我哋平時食嗰啲都無咩分別, 但呢度就有勁多甜蝦任食, "正"呀! 食飽飽後我哋就去買手信啦, 呢度賣手信嘅地方都算係我哋住噤多間酒店最大嘅一間啦! 買完手信我哋就喺lobby到一邊食雪糕一邊玩電腦 玩玩下張生同dor神話要去埋舊館浸溫泉, 真係唔係好明, 點解啲男人噤鍾意浸溫泉嘅? 維妮同車厘子真係無興趣, 所以我哋就繼續玩電腦, 玩到噤上下我哋就返房, 養精蓄銳等聽日繼續我哋嘅行程啦!  

日期 : 20/02/2008 (Day 5)

行程 :   銀山溫泉~ 松島船河

呢朝早張生一早就同dor神去咗浸溫泉, 維妮就真係起唔到身呀, 要訓多陣先得呀 維妮諗住訓到佢哋返嚟就起身啦, 點知唔夠一陣張生就返嚟啦 維妮仲以為無得浸啦, 點知原來佢話溫泉無人呀, 要攞部相機去影相!  

今朝嘅早餐又喺番尋晚食飯嘅地方, 真係估唔到呢度連早餐都好似食懷石料理噤豐富呀! 一樣都係又靚又好味!

食完個靚靚早餐, 我哋又再去銀山溫泉街, 今次要睇下日頭嘅銀山又有幾靚! 日頭嘅銀山真係比起夜晚嘅銀山靚好多呀, 行到去足湯, 張生, dor神同車厘子都話要浸下足湯, 但維妮真係無興趣呀 除咗嚴庥煩之外, 其實維妮覺得啲水係有啲污漕架, 所以佢哋就浸腳, 維妮就周圍行下啦! 佢哋浸完腳, 我哋又周圍影下相 之後我哋就去買下手信啦, 其實維妮最想去睇嘅就係一間整木頭公仔嘅舖頭 因尋晚嚟到時佢都已經關咗門啦! 呢間舖頭入面有好多亞信嘅相喺度架,  因為銀山係亞信嘅故鄉 據說當年亞信就係喺銀山溫泉街呢度同佢亞媽分開 佢亞媽就送咗個呢啲木頭公仔比亞信! 其實呢個N年前嘅劇集, 維妮真係一早忘記得一乾二淨 依家嚟到銀山, 維妮真係好想揾番呢套劇嚟睇呀! 但睇怕都幾難搵到啦! 手信又買完, 相又影完, 我哋就返旅館check out, 正式離開銀山呢個地方啦! 

行程 :   銀山溫泉

我哋上咗車之後就set個GPS啦, 當我哋禁咗銀山莊個電話後, 個GPS就彈咗一句嘢出嚟 但維妮都未睇得切佢寫咩, 就無咗啦, 但我哋之前嗰啲都無呢句嘢彈出嚟架?  其實我哋都估到可能係話封咗路, 噤我哋見個GPS又無其他指示, 所以我哋無理到, 照行啦 ~ 我哋依指示行咗大半路程, 去到一個上山嘅路口, 見到有個牌寫住咩封路噤, 但我哋見個GPS又無啲咩指示,  噤我哋就繼續行啦, 但我哋就行得好慢, 因為真係驚封咗路, 其實我哋都覺得越行越唔對路架啦 條路又窄又無車喎, 行行吓我哋就見到有兩個男人喺到產緊雪 不如就問下佢哋啦, 噤維妮就落車問呢條路係咪行唔到架啦? 點知佢真係話唔行得, 噤維妮就順便問埋佢銀山莊點去啦, 佢就指番我哋落山!  既然係噤我哋就唯有落番山啦, 落番山後我哋又重新set過個GPS, 今次個GPS就就無彈句嘢出嚟啦, 噤我哋就繼續行啦, 好彩我哋發覺其實都唔係行多咗好多路啫!

大約5點終於去到我哋今晚住嘅旅館~銀山莊啦! 其實銀山莊離銀山溫泉街係有一段路架, 原本維妮真係好想直頭住喺銀山溫泉街到, 可以感受吓啲浪漫氣氛呀庥!  但經兩位大少左揀右揀最後都係決定揀呢間  不過佢哋又真係無揀錯, 因為呢間酒店維妮覺得係我哋今次嘅旅程最正最靚嘅一間! check in嘅時候佢哋要我哋填一份問卷噤嘅嘢, 當中有問今晚嘅晚餐要食飯定食粥, 飲啲咩噤, 其中飲品一欄有葡萄酒呢樣嘢, 噤我哋以為噤好唔駛$有葡萄酒飲嘅?  噤我哋咪揀咗一個要葡萄酒, 其餘就要果汁啦! 點知到我哋check out時先知原來啲嘢飲係要$架! 如果一早知要$就唔飲啦! 之後我哋一入到間房, 維妮就比窗外嘅景色吸引住啦 因為窗外係一個好靚嘅雪景, 一眼望埋去仲以為掛咗幅雪景畫tim呀! 真係靚到暈呀! 但維妮好奇怪唔知點解窗前會有個望遠鏡係到, 究竟有咩望呢 ? 唔通會有小動物睇?  到依家維妮都唔係好明! 維妮同張生見仲有一段時間先到食飯時間, 所以我哋就諗住去銀山溫泉街行個圈先! 但因為車厘子都仲係有啲唔舒服想訓下, dor神就話想去浸下溫泉先, 所以只係得維妮同張生! hee~可以乘機過下二人世界啦! 唔知係咪維妮抱得太大期望定係因為夜晚嘅關係呢, 去到銀山溫泉街竟然覺得無想像中噤靚 再加上又靜嬰嬰, 又唔知點解周圍都濕淋淋, 我哋部傻瓜相機喺啲噤嘅燈光下影啲相又唔得喎, 都係等今晚dor神帶埋佢嗰部相機先再影過!  我哋周圍行下, 行咗兩間手信舖, 買咗少少手信就走啦, 不過當我哋喺其中一間舖頭買完嘢諗住行番去銀山莊嘅時候 竟然見到頭先我哋買手信嗰間舖頭嘅人追出嚟, 我哋仲以為係咪我哋比錯$呢 ? 點知原來唔係, 佢只係想幫維妮同張生影相 佢真係好好人呀, 佢另維妮諗起銀山溫泉有句說話就係"一期一會" 真係好貼切呢!

返到酒店我哋換過浴衣就去食飯啦!  今晚又食懷石料理, 呢度好好呀, 有間房比我哋, 去到一樣都係已經擺好晒啲食物, 呢晚嘅懷石料理一樣都係噤靚, 而且唔知點解維妮覺得今餐啲食物仲多咗份誠意tim!  枱上面仲有張好精美嘅memu寫晒每樣餸嘅名, 嗰位侍應姐姐仲好細心噤逐樣解釋!  我哋就不停噤講係,係,係 ~ 但其實維妮想同佢講, 妳解釋完我哋都唔知妳講咩架啦! 但佢嘅誠意係可加嘅!

食完噤好味又噤有誠意嘅懷石料理之後, 我哋就再去銀山溫泉影相啦! 唉! 車厘子繼錯失咗山寺之後, 今次又錯失埋銀山嘅夜景啦, 佢都係繼續要休息呀 噤我哋唯有三人行啦! 維妮同張生今晚好勇呀 只係著咗旅館嘅浴衣, 再著埋旅館提供嘅大褸就出去啦, 點解我哋噤勇, 咪就係為咗要影啲喺銀山著住浴衣嘅相囉 哈哈~係咪有啲頂我哋唔順呢! 但dor神就無我哋噤勇啦, 不過唔緊要啦, 佢今晚嘅職責都係攝影帥咋庥 hee~雖然維妮同張生都著得噤少, 但唔知點解又真係唔覺得凍喎! 去到銀山溫泉仲靜過頭先同張生嚟嗰陣呀, 連啲手信舖都關晒門! 噤都好呀, 起碼唔會有人阻住我哋影相呀! 一嚟到銀山溫泉dor神就成個攝影帥噤, 又set相機又set腳架! 噤維妮同張生當然係沖當model啦 我哋真係好似model架, 因為我哋影嘅時候係叫dor神set好晒嘢, 真係影得啦, 我哋先至除褸, 哈哈~  今晚我哋好幸運噤見到真狸貓呀, 不過佢真係好可憐呀 佢個樣好似好驚噤, 佢應該係好凍呀, 因為佢係伏咗喺個足湯側邊, 佢個樣真係好可憐呀! 但最可憐都係佢之後比一班日本人搵啲膠樽掟佢, 真係離晒譜呀 一啲同情心都無! 之後我哋臨走時再去睇下隻狸貓, 但已經唔見咗啦! 影完相, 做完model我哋就返銀山莊浸溫泉啦 , 行返去嘅途中開始有少少飄雪, 張生即刻話行快兩步 因為佢話想試下一邊落雪一邊浸溫泉嘅感覺, 佢真係恨咗好耐架啦! 不過今次佢又失望啦, 因為我哋未行到返旅館時, 啲雪已經停咗啦!

返到去旅館我哋就去浸溫泉啦, 今次車厘子唔要洩呀 佢都要浸, 梗係啦, 我哋揀啲噤貴嘅旅館都係為咗個溫泉咋, 如果唔浸就真係好洩架! 不過見車厘子啲精神都已經好咗好多, 都放心啲! 今晚嘅溫泉真係好舒服呀 雖然呢度嘅溫泉都唔算係好古式嗰隻, 但就真係好舒服呀, 因為呢度嘅露天溫泉係可以訓喺到浸, 同車厘子一邊浸一邊傾計, 真係超爽呀 hee~ 今次我哋又係包咗個露天風呂呀! 浸浸下我哋又聽到兩位大少把聲, 我哋又好似喺紅葉館噤, 隔板傾計 同樣都好彩無人, 如果唔係又失禮死人啦!

日期 : 19/02/2008 (Day 4) 
行程 :  山寺

換咗雪靴我哋就開始上山寺啦 上咗一段樓梯就見日枝神社! 維妮心諗山寺就係噤啦? 我哋再周圍行吓, 先知原來我哋頭先行都未正式係山寺, 因為之後我哋見到山門, 即係上山寺嘅門, 見到要比入場費300yen,  維妮當時心諗, 唔係化, 要比入場費架 淨係睇呢啲廟, 維妮真係唔係好想睇喎, 仲要比入場費? 呢個時候dor神原來已經比咗$啦 既然比咗$噤我哋梗係行啦, 入到去見到, 嘩~好高喎, 又噤多樓梯, 真係要行? 唔知有無嘢睇架噃? 呢個時候維妮真係想講:{可唔可以唔上呀!} 但眼見dor神行得好似好開心噤, 維妮同張生都唯有照跟啦, 越上得高啲路就越難行, 維妮依家先知道點解要換雪靴, 真係好彩有雪靴咋, 如果唔係我哋未上到一半都已經扇到灘灘腰呀! 好彩沿途都有啲景可以影下相, 順便可以比維妮抖下, 上到一半, 見到原本係樓梯嘅地方已經唔係樓梯嚟架, 係已經變咗一條舖滿雪嘅斜路呀, 我哋係咪真係要繼續上呀 ? 但其實維妮真係想放棄 但眼見dor神一枝箭噤行, 維妮同張生都好似無得揀噤! 對於dor神嚟講就梗係小兒科啦 佢平時都行慣山, 但對於連平時行街都覺得攰嘅維妮嚟講, 上噤多級樓梯已經係超~超~超~極限啦 好彩都仲有張生陪住維妮, 如果唔係維妮真係企喺度等都似! 維妮同張生又行又爬噤, 終於聽到dor神講, {到啦! 快啲上嚟呀! 呢度好靚呀!} 聽到dor神噤講, 維妮真係好開心呀! 因為知道終於行完啦!  上到去, 見到有展望台, 呢度叫五大堂!  一望出去......維妮第一句講嘅嘢就係:{係咪痴線架......有無可能靚到噤呀!} 維妮完全唔相信眼前嘅雪景係真實, 簡直靚到好似一幅畫噤 呢個時候維妮已經唔記得咗自己究竟有幾攰, 可以睇到噤靚噤浪漫嘅雪景真係行得噤辛苦都值得架! 睇夠之後, 我哋決定走啦, 真係好唔捨得, 但呢個超靚嘅畫面維妮係唔會忘記! 

真係上山容易落山難呀 頭先我哋上嚟, 就算舖滿雪, 我哋都可以爬下爬下噤爬上去, 但落山呢? 唔通真係sir落去咩? 雖然落山無上山噤辛苦, 但就危險好多啦, 一下唔覺意真係可以好似雪球噤轆落山呀! 我哋慢慢噤行, 終於返到落去啦, 我哋返番去嬸嬸間餐廳到, 還番啲雪靴比嬸嬸, 嬸嬸見我哋行得噤辛苦仲斟咗啲茶比我哋飲 我哋喺嬸嬸到再抖咗一陣就正式離開山寺, 向呢個銀山溫泉出發啦!

維妮之後睇番啲資料先知道原來山寺總共有1,015級樓梯, 知道咗之後維妮都好佩服自己竟然可以有噤嘅能耐去完成呢個山寺旅程!

後記: 由一開始維妮完全唔知上到去有無嘢睇, 但又能堅持到底好辛苦噤繼續行, 上到去可以見到超乎現實嘅雪景, 呢個過程維妮係絕對唔會忘記! 維妮相信如果我哋無行過1,015級樓梯, 呢個山寺旅程一定唔會好似依家噤難忘!

行程 :  藏王溫泉街 ~ 山寺

呢朝早只得維妮, 張生同dor神食早餐!  原來車厘子尋晚半夜成晚嘔咗N噤多次  所以佢無食早餐啦!  唉! 維妮仲以為佢尋晚喺溫泉嘔完已經無晒事tim! dor神仲一邊食早餐一邊講番尋晚嘅情形, 佢話車厘子死都唔肯嘔落個馬桶到 攪到成個洗手盆都係, 仲要佢去清理...喂...喂...喂...好啦喎 我哋食緊早餐架, 再講就連我哋都嘔埋啦! 不過維妮真係擔心佢唔知可唔可以繼續之後嘅行程呀......

原本plan嘅行程係今日朝早上山睇樹冰, 但因為尋日已經睇咗, 所以今日我哋多咗半日出嚟, 所以我哋決定喺藏王呢度周圍行吓影吓相 check out 咗之後我哋又行番去滑雪場, 唔知係咪我哋尋日太心急去睇樹冰呢? 我哋今日慢慢睇先發覺到原來條橋仔後面嘅雪景係超靚架, 好似童話噤好靚好浪漫呀! 維妮又狂影相!

影完相我哋就揸埋架車落去溫泉街行, 順便要買啲藥比車厘子! 我哋買咗藥比車厘子食之後我哋三個就去咗溫泉街行, 睇吓其他啲溫泉旅館, 而車厘子就喺架車到休息, 真係有啲戥佢慘呀 維妮希望佢食咗啲藥會無事啦!

原來溫泉街啲景色都好靚架, 我哋仲行埋啲小路tim呀, 其實好多小路都比雪封咗, 啲樓梯又比雪封埋, 但我哋都要照行!  噤行法真係有啲危險架, 噤我哋噤危險都要行為咩呢? 其實都係想睇吓會唔會發現到啲咩靚靚雪景啫! 行行吓比我哋見到高見屋呀!  呢間高見屋有咩噤特別呢? 就係特別~貴囉 其實真係唔知佢貴喺邊呢? 除咗個外表靚啲之外!  行到噤上下都係時候走啦! 但維妮依然都係好唔捨得藏王呢個地方呀!

根據我哋嘅行程我哋下一站應該就直去銀山溫泉架啦, 但其實我哋都仲有好多時間, 所以我哋就決定順路去埋山寺  去到山寺已經成1點鐘啦, 我哋架車去到山寺門口就見到有個嬸嬸手指指叫我哋泊架車入去car park到 ! 但係寫住有料架噃? 點解呢 ?噤我哋就攪低個窗睇下嬸嬸講咩啦, 喺維妮聽得一半聽唔到一半之下, 知道原來嬸嬸係隔離間餐廳嘅人嚟架, 噤我哋泊咗入去係咪一定要幫親佢呢?  雖然我哋都諗住食咗嘢先上山寺, 但都比我哋揀吓好庥!  噤維妮就同dor神落車周圍睇下仲有無其他餐廳可以選擇啦!  睇來睇去, 其實都無咩好揀, 所以我哋都係決定喺番嬸嬸到食啦, 入到去嬸嬸就指我哋叫我哋換雪靴, 吓?食嘢都要著雪靴? 維妮呢個時候先知道原來嬸嬸以為我哋唔食嘢淨係上山寺, 噤維妮咪同佢講我哋想食完嘢先上去!  入到去食嘢嘅地方見到有個好kawaii嘅小朋友 又見到有個BB仲有個mama, 睇得出呢間餐廳係一家人開架啦, 呢間餐廳食嘅嘢真係好簡單, 連memu都無 啲memu全部掛晒喺幅牆到, 仲要全部係日文, 連公仔都無呀! 呢個時候車厘子話要食淨烏冬, 張生又話要食咖喱, dor神就話要食有肉嘅嘢, 維妮好似做咗呢度嘅待應噤, 個個都同維妮落order 佢哋真係當正維妮啲日文好勁噤喎, 一陣維妮唔知叫咗啲咩比佢哋食就慘啦! 噤維妮就唯有用有限嘅日文同嗰位mama落order啦, 好彩mama又聽得明維妮啲唔咸唔淡嘅日文喎~~ 不過呢位mama都好細心噤聽, 當維妮聽唔明, 佢仲帶維妮入廚房指比維妮睇係啲咩嚟tim 呢位mama真係好細心呀!  不過維妮見到佢好忙架, 又要招呼我哋啦, 又要揪住個BB, 又要開飯比嬸嬸同個小朋友食, 又要行番出去睇舖(佢哋出面其實係一間賣手信嘅舖頭嚟架!)佢真係一腳踢呀! 

食完嘢我哋就起行上山寺啦, 因為車厘子都仲係好唔舒服, 所以我哋決定留佢喺度等我哋返嚟 我哋換咗雪靴就出發啦, 其實起初維妮都唔知點解要換雪靴架, 因為維妮一直都以為山寺其實只係一間廟 噤參觀一間廟又點解要著雪靴呢?

日期 : 18/02/2008 (Day 3) 

行程 :  藏王樹冰

越接近藏王, 心情就越興奮呀! 去到藏王都成兩點幾啦, 我哋首先就梗係去咗酒店check in先啦! 我哋今晚住嘅係藏王國際, 揀呢間嘅原因除咗係兩位大少話個風呂正之外!  其中一個原因就係因為佢同去睇樹冰嘅吊車非常之近, 只要過條橋就到! check in時我哋見到原來酒店都有吊車飛買, 仲有discount tim, 不過就只有夜晚飛! 好唔好喺度買呢? 其實我哋原本plan嘅行程今日只會夜晚先去睇樹冰, 但因為我哋早咗到, 所以我哋要考慮下好唔好依家就上去睇樹冰先呢? 我哋又要考慮埋幾點食飯喎! 因為酒店要我哋比食飯時間佢哋, 食飯時間我哋改完又改, 我哋左諗右諗.....最後決定同酒店買咗7:30嘅吊車飛, 跟住依家就上去睇樹冰, 睇到5:00落番嚟, 食6:00嘅懷石料理, 食完7:30就再上去夜探樹冰! 係咪好似好 perfect呢, 但其實......我哋係蠢咗架, 仲係超級蠢嗰隻呀! 大家睇落去就知啦!

攪掂完check in手續, 決定依家就上去睇樹冰, 講真, 維妮嘅心情真係又緊張又興奮架, 因為我哋知道上到去係超級凍 所以我哋係成套武裝上去架,真係咩保暖嘢都著晒上身呀!

由藏王國際去吊車站係要經過一條橋仔, 到咗個滑雪場就會見到個吊車站啦, 一上到架吊車時, 梗係要霸番個窗邊位企啦! 呢個時候維妮見到個窗掛咗一塊膠板喺到, 維妮好奇怪究竟要嚟做咩嘅呢 ? 但因為出面啲雪景太靚啦, 維妮都無再細心去研究啦, 喺吊車到維妮只係不停講好靚好靚同不停噤影影影 哈哈~好興奮呀 到咗轉車站啦, 喺呢度已經見到有兩棵樹冰喺度啦, 我哋又影影影 嚟到轉車站, 見到有個溫度計睇下, 嘩~ -9度呀, 好凍呀!唔理啦, 快啲去轉車再上啦, 終於上到終站啦, 嘩~呢度個溫度計係 -11度呀! 但興奮心情係蓋過冰凍架, 維妮第一時間就衝咗出去睇樹冰啦 嘩~嘩~嘩~嘩~~樹冰~樹冰~樹冰呀!真係想攬住佢呀! 我同車厘子都凍到塊面紅晒呀, 好彩呢度有間餐廳可以入去暖下, 我哋就係噤暖完又再出去再睇, 睇完又入返去, 來來回回好似過冷河噤,  唔知點解啲樹冰睇極都唔厭嘅~哈哈~ 

其實我哋除咗嚟睇樹冰之外, 我哋上嚟係有一個任務架 就係要做一個實驗, 就係要睇下一條濕毛巾喺呢度"fing"係咪真係可以變雪條呢? 呢個任務我哋交咗比張生去負責!

經過3分鐘嘅過程, 係真係得架! 哈哈, 真係笑死維妮啦,做完實驗見到啲人越嚟越少, 天氣都好似越嚟越差, 明明頭先都仲可以隱約見到地藏尊, 依家都已經見唔到啦, 所以啲工作人員都開始欄繩唔比人行過去, 我哋見時間差唔多所以我哋走啦, 真係有啲唔捨得走呀 好彩今晚我哋又會再上嚟啫, he~he~  

我哋坐番吊車落去時, 有兩個工作人員同車, 呢個時候維妮終於知道掛喺窗邊塊膠板係要嚟做咩啦!  原來係用嚟捔走窗上面啲冰架, 噤睇出面啲雪景就會清楚好多啦!又幾好噃!  又喺呢個時候見車厘子神情有啲呆滯原來佢話佢唔係好舒服呀! 呀~唔通頭先凍親? 我哋今晚仲要上去架噃......

行程 : 夜探樹冰

我哋落番去滑雪埸見仲有少少時間先夠鐘食飯!  我哋就去咗一間買手信嘅舖頭睇嘢, 順便維妮要買番啲樹冰Postcard寄比啲好朋友!  行完之後我哋又差唔多夠鐘返酒店食飯啦! 今晚我哋係食懷石料理, 我哋去到食飯嘅地方, 哝~原來啲嘢食已經擺好晒等緊我哋啦, 啲嘢食擺得好靚呀, 真係靚到唔係幾捨得食  但啲份量好似少咗啲喎, 樣樣都細細件, 會唔會唔飽架?  但原來我哋錯晒, 如果我哋真係只食依家枱上面嘅食物, 相信我哋真係唔會飽, 但我哋食食吓, 又有人攞啲嘢過嚟, 食食吓又有嘢攞過嚟, 來來回回應該都有成三四次呀 再加上車厘子唔舒服話無謂口, 我哋又食埋佢嗰份, 食到我哋要話:{好啦, 唔好再嚟啦, 食唔落啦喎!}  點知最後佢仲問我哋要唔要飯, 梗係唔要啦, 想食傻我哋咩!  懷石料理係咪最後先食飯嘅呢, 因為我哋每餐嘅懷石料理都係最尾先問我哋要唔要飯架喎!? 呢餐食極都食唔完嘅懷石料理食咗我哋成個半鐘呀

我哋食完都已經夠晒鐘要再坐吊車! 點解會話夠鐘?  因為我哋同酒店買咗夜晚飛睇樹冰, 係酒店啲人叫我哋7點半喺大堂等架庥, 我哋以為唔駛坐吊車, 酒店會有車上去啦, 點知去到大堂, 再問吓啲staff, 佢就指我哋去搭吊車! 唉~都係自己搭咋庥, 做咩要人哋7點半喺到等啫 真係唔知為咩! 夜晚坐吊車出面啲景真係無日頭噤靚啦, 因為黑得濟咩都睇唔到~又上到嚟啦, 嘩~今次天氣好咗好多呀 雖然係夜晚, 但因為天氣好, 所以啲樹冰清楚咗好多呀, 日頭同夜晚睇嘅樹冰真係唔同呀, 夜晚啲樹冰增加咗啲神秘感, 加埋射咗啲彩燈落去又多咗幾分浪漫嘅感覺呀~ 神秘還神秘, 浪漫還浪漫我哋依然係好凍好凍呀 噤梗係又入餐廳過冷河啦, 就喺過冷河嘅時候, 維妮同張生發現咗樓梯上面有個牌寫住展望台?  噤我哋就梗係唔執輸走上去八下啦! 點知一上到去, 真係比個場面嚇親呀 因為喺維妮眼前見到嘅係數唔盡嘅樹冰, 維妮真係唔知點去形容呢一刻嘅感覺, 真係超級壯觀呀, 係成個山都係樹冰呀 嗰一刻真係有啲感動架! 點解日頭我哋發現唔到呢個地方架~~~不過....就算真係比我哋發現到, 都可能因為天氣唔好都睇唔到啲咩(唯有噤安慰自己) 車厘子因為唔舒服所以dor神(即係丹尼斯)要陪住車厘子, 所以佢哋無同我哋一齊行留咗喺餐廳到, 但噤壯觀嘅場面點可以錯過呢, 唔睇真係好洩架, 所以張生就走番落去捉佢哋上嚟睇, 但都係得dor神上嚟, 睇睇下見到啲工作人員開始叫人走, 原來已經9點幾啦, 人哋關門啦, 呀~唔得呀, 維妮一定要捉車厘子上嚟睇呀!   望一眼都好呀, 呢啲場面真係好難得見到架庥, 所以維妮即刻用9秒9嘅速度跑落去捉咗車厘子上嚟!  比噤多$上嚟唔可以洩架! 捉咗車厘子上嚟睇咗一陣真係要走啦, 真係十萬個唔捨得呀 勁唔想走呀, 但始終都係要走......要同樹冰講bye bye啦, 維妮會永遠記得你哋架......
 

之前維妮話過我哋噤嘅安排係超級蠢, 大家知道點解未? 答案就係雖然嗰度啲人有講過話5點鐘就要清場, 但維妮覺得係可以賴死唔走, 噤我哋就唔駛分兩次上嚟曬多一次吊車$, 噤我哋就唔駛食完飯就趕住去睇樹冰! 我哋啲安排係完全錯晒呀!

好唔捨得噤同樹冰講byebye之後 我哋就返番酒店嘆溫泉啦, 但車厘子嘅狀態真係好差噃, 我哋都叫佢唔好浸啦!  一陣浸完仲衰, 噤點繼續我哋之後嘅旅程呢! 但車厘子又唔想洩~  噤佢就話比佢喺房抖一陣先! 因為我哋知道呢度有個足湯, 所以維妮就同張生去咗足湯一邊等車厘子一邊浸吓腳先! 呢個足湯都幾正架, 同張生一邊浸腳一邊談心, 個感覺好寧靜好舒服呀~~ 係唯一因為出面黑咩咩, 咩都睇唔到囉 如果仲有個雪景望住就仲perfect呀!  浸浸下車厘子同dor神就嚟到啦, 我哋四個又一邊浸腳一邊傾計, 真係好relax呀! 浸到噤上下我哋就入去浸溫泉啦, 但車厘子都仲好似.....但佢都係要照浸, dor神都無佢辦法, 唯有交帶維妮睇住佢, 放心喎, 我實同你睇住佢! 例牌一入到去一定係第一時間睇下個露天風呂正唔正先啦, 哝~又幾正喎, 仲可以掂到啲雪tim, 但我哋都係要喺入面浸下熱一熱身先 熱完身我哋就出去露天風呂啦, 凍凍地又暖暖地, 啲環境又寧靜, 真係好舒服呀~ 浸浸下仲得番維妮同車厘子, hee~我哋又包咗成個溫泉啦 我哋仲一邊浸一邊玩雪, 真係好正呀! 維妮仲砌咗個雪人tim呀, 哈哈~唔知點解維妮去到邊都要砌雪人架 係咪有啲頂維妮唔順呢?hee~ 唔好以為維妮只係掛住舒服無理到車厘子呀, 維妮都有時不時問下佢點, 得唔得架?  唔得我哋就走啦, 但佢又好似無咩事噤喎, 維妮仲以為佢可能浸完溫泉會好番啲tim! 但點知維妮浸完溫泉換完衫之後....哝~點解唔見咗車厘子嘅? 維妮就周圍搵啦, 呀~原本佢對住咗個垃圾桶勁嘔呀 wah~真係嚇死維妮呀, 即刻走埋去睇下佢點啦, 點知維妮走到埋去, 佢就嘔完啦, 佢仲同維妮講:{嘩!嘔完舒服晒!} 維妮見佢又真係好似精神咗好多喎! 舒服晒就好啦! 我哋就再坐多陣就返房啦 ! 最攪笑, 車厘子仲喺度諗番自己嘔咗啲咩出嚟, 又話整到人哋個垃圾桶污漕晒, 維妮仲同番佢講, 唔係呀, 妳嘔嗰啲嘢粉紅色都幾靚呀~哈哈~ 唔知車厘子有無比維妮激死呢?