莎哥斯基古城自十五世紀發展起來的東正教聖地，雖然我唔係教徒，一場嚟到，當然要去朝朝聖；古城距離莫斯科約七十公里，大約一小時車程，莫斯科跟其他大城市一樣，總避不開交通擠塞這個老問題，結果熬了兩個多小時才到達。而今次行程只是參觀聖三一聖爾蓋修道院群；今日精神狀態唔係幾好，腳步浮浮，感覺好似'wing wing'地，落咗車，古城入口搭建了臨時安檢櫃位，因午後有教會高層到埸主持宗教活動，古城內參觀聖水井係重點推介嘅項目，相傳聖水能醫百病，這個....我當然第一時間走去試試，唔知係咪心理作用，飲完精神真係好咗，結果我番轉頭裝咗一樽帶返香港。除此之外，還有一款俄羅斯地道飲品 -- 鮮搾黑麥汁，當地商販每天拖著流動小販車，在古城內穿梭販賣，但產量有限，售完即止，可惜無緣一試，黑麥汁已售罄，只有目送商販拖著流動小販車離開。

在修道院建築群對面，有一家傳統俄羅斯餐廳，該餐廳以木為主體的建築物，外觀很有style，門前哩士般的彫花裝飾很細緻，加上十字繡圖案字體的餐廳logo，猶似穿著喱士花裙的少女；而餐廳內部佈置和格局，很有俄國大宅的氣派。女侍們穿著傳統俄羅斯服飾，而所用的茶具亦相當優雅。席間還有穿著傳統俄羅斯服飾嘅靚仔，拿著工藝品用廣東話逐檯兜售~~每件一百蚊，哈﹗竟然收港幣。

菜式方面，前菜當然少不了薯仔沙律，今餐係青豆薯仔沙律，還有香港較少機會飲到嘅紅菜頭湯加酸忌廉，主菜係薯仔炆豬肉，豬肉炆得好腍，好入味，汁好稠，還有陣陣豬肉香味，呢餐好滿足。

聖母升天教堂是伊凡四世下令修建的，教堂內除聖像壁畫和金碧輝煌的祭壇外，還安放了聖髑，供教徒膜拜、親吻（聖髑匣蓋），冇圖片因為我有尐肴底，唔敢行埋去，更遑論拍照啦。

回程時，領隊同團友玩有獎問答遊戲，結果我贏咗個五層嘅木套娃娃。其後旅遊巴穿過莫斯科鬧市，向著機場進發，望著窗外A貨中銀大廈，猶如置身中環。

今次旅程，從走進古代的木建築群和見識當時人民的生活點滴，亦曾遊走奢華浮誇的帝皇宮殿，曾經是象徵鐡幕的紅牆和列寧墓，仍殘留著鐡幕時代的莊嚴，和改革開放後的社會生態等，踏上回程的航班，看著慢慢遠去的都市，彷似在歷史長廊中走了一回。

呢間酒店嘅早餐選擇比Radisson少，冇即煎雞蛋，有點失望，雞蛋煎定，仲係煎定擺咗好耐嗰種，完全塑化晒，食落好膠，好似假蛋咁，除此之外，其他食物都不過不失，餐廳環境開揚寬敞，坐得好舒服。

從建築外觀和門前花園看來，佈局相當優雅，喀山教堂頗有羅馬聖彼得大教堂的古典歐式風格，有別於一般東正教教堂嘅洋蔥頭設計，教堂以喀山聖母聖像畫而得名，曾經傳出過喀山聖母顯靈的事蹟，教堂內不准拍照，為咗唔好影響居民日常禮拜，所以沒有安排入內參觀。，

滴血教堂為咗紀念亞歷山大二世遇刺而興建，建築師參照聖巴素大教堂設計，導遊吳明話呢尐叫偽東正教建築，有別於正統白色牆身的東正教堂。

豬仔包﹗今餐終於見到久違了的豬仔包，真感動﹗出國旅行係要嘗試不同飲食文化，遇見孰識的東西，總是產生莫名的興奮和親切感，呢尐係咪叫做家鄉情意結呢。

主菜係魚柳飯，賣相好有茶記feel，白飯就不敢恭維，味道好淡重帶有一絲心硬，西方人煮嘅飯真係食唔慣。

聖埃撤教堂極具歐洲色彩，屬新古典主義建築風格，鍍金穹頂，經歷百多年，光彩依然不減。灰色大理石外牆，教堂的四面各有16 根巨大的石柱，整個建築相當宏偉壯觀。內部樑柱用了大理石、斑岩、綠孔雀石和天藍石等名貴石材鍍金鑲嵌而成，最奪目係原條綠孔雀石柱和祭台入口的天藍石柱，還有歐洲富風格的琉璃彩繪耶穌像。

參觀完聖埃撒教堂自費包船遊覽有北方威尼斯之稱嘅利華河，尼華河是（Нева́）聖彼得堡市最主要的河流，而全市主要建築和名勝均分佈於尼華河兩岸；如彼得與保羅城堡、隱士蘆博物館、勝利之柱、獅身人面像、彼得大帝騎馬銅像等等。。。遊覽船低船身設計，以便穿過矮身橋孔，而最矮嘅橋孔只有2米，每次穿過橋孔，吳明都有溫馨提示我哋要彎低身，千祈唔好撞崩橋底。

中途停船休息突然咗個貌似拉丁裔或南亞裔青年坐喺度，英明神武嘅吳明立刻上前驅趕，呢個人相當可疑，好有可能係扒手。

彼得與保羅城堡由彼得大帝設計建造，用作保衛波羅的海出海口，是一個軍事要塞，城堡包括：彼得與保羅大教堂、造幣廠、工兵館、監獄等。今次只安排進入彼得與保羅大教堂（Петропавловский собор）參觀，教堂巴洛克式設計，安放了歷代沙皇棺槨，可算是俄羅斯的十三陵。當中值得一看係亞歷山大二世棺槨，由於亞歷山大二世當時深受人民愛戴，死後他的棺槨特別用玫瑰石做的，與其他沙皇的白色棺槨不同，可見其地位的確超然。

劇院對面有個很大廣場（Михайлoвский Сквер），廣場中央有個紀念碑（Памятнийк A.C. Пушкину），紀念碑有嘉芙蓮大帝俏像；距離開場還有一些時間，於是入去看看，奈何雨越落越大，廣場佈積水和泥濘，行咗幾步，為免「泥足深陷」，最後都放棄咗。

劇院睇落有尐舊，但好grand，旅行團當然唔會坐到大堂前，而係第三層左邊包廂位，包廂其實好細，大動作尐都會撞到隔離，一個包廂有四個坐位，兩個前兩個後，坐喺前面兩個可以居高臨下睇芭蕾舞，坐後面兩位跟本睇唔到，可以舂眼瞓；點解要咁設計呢﹖難道係隨從保鏢位﹖今晚劇目係天鵝湖，芭蕾舞我係外行，我睇到只係好表面，淨係欣賞到天鵝公主和王子優美嘅舞姿、小丑同巫師跳脫嘅演出，已經足夠了。而我本應編排到包廂後面舂眼瞓座位，今次能睇到咁精彩嘅演出，真係要多謝領隊好貼心咁換咗佢自己張包廂前坐位票畀我，真感動。

散場出嚟，雨仲未停，氣溫跌到得十度，企喺露天停車場等旅遊巴，特別覺得凍，寒風刺骨，厚褸薄褸連放手袋件士啤冷氣外套，全部著晒上身。

紅牆係喺我心中係莊嚴到令人窒息，嚟到竟然人山人海，人氣多咗，感覺上都親民咗。

有一所值得要去嘅景點，紅牆及克里姆林宮範圍聲稱全宇宙最衛生又是唯一免費嘅全智能洗手間；每當洗手間給使用過後，廁格門關上，紅燈亮起，廁格內即啟動智能系統，進行20秒空氣凈化程序，程序完成後，燈號轉為綠色，才能給下位遊客使用。由於凈化程序需時，結果等了十多廿分鐘才能進入，但廁格內竟然瀰漫著舊區公廁特有味道。

在排隊等候期間，兩位操西班牙語嘅女士，見前面有孰人，竟然上前企圖尖隊，這個~當然不讓她們得逞；這種情況，我在巴塞隆拿高迪公園也曾遇見過，難道除了其他國家外，西班牙也有同樣的文化差異﹖﹗

克里姆林宮係紅牆內一個建築群，除俄羅斯最高領導人辦公嘅行政總部，係遊人勿近外，克里姆林宮廣場其他地方均向外開放給遊人參觀，廣場面積很大，可供遊覽有

沙皇砲（Царь-пушка）、沙皇鐘（Царь–колокол），還有大大小小的鐘樓，其中以伊凡大帝鐘樓（Колокольня Ивана） 最高。

除此之外，還有四大教堂值得参觀

聖母升天大座堂（Успенский Собор）、天使報喜教堂（Благовещенский собор）、大天使教堂（Архангельский собор）及聖巴素大教堂（Собор Василия Блаженного）

聖巴素大教堂位於紅場東南部，由九座大大小小彩繪洋蔥頭禮拜堂組成，其設計並不對稱，但睇落相當均勻，係遊覽莫斯科必到之景點。

金百貨商場係一間國營百貨商場，有百多年歷史，典型的俄羅斯建築風格，商場中軸舗滿花圃，有花團錦簇嘅感覺，頂層建有長的弧形玻璃頂蓋，採光效能非常好，商場內名店林立，售賣嘅都係高擋商品，非一般市民所能負擔。

行完克里姆林宮，今餐團隊唔包，要食自己，領隊建議金百貨內food court內一間快餐廳，食物款式較大路，選擇較多，價錢大眾化，該快餐廳自助形式，先選食物然後到收銀處付款，好似某大型瑞典傢具店嘅cafe咁，唔同嘅係所選嘅喺主菜配菜需逐項計算，而醬汁則逐湯匙計算。

呢間餐廳嘅好多旅遊blog都介紹過，食物質素都OK，唯一要扣分係餐廳將預先烹煮好嘅食物放喺室溫飾櫃內，因此熱食凍嘅，慕絲同果汁又唔夠凍。

食完lunch，暫別嘉芙蓮，去機場撘內陸機去聖彼等堡，check-in完取得登機証後，依照boarding pass去到預定登機閘口，hea住等上機，等等下發覺唔對路，原來改咗登機閘口，好彩醒目發現得早，然後通知其他團友，真係要打醒十二分精神，唔好盡信boarding pass。

嚟到聖彼等堡氣氛感覺完全唔同晒，接團導遊有個中國名字，叫吳明，不單止普通話說得非常流利，而且熟悉港式潮語和少許廣東話，經常帶團遊走中港之間，是位中國通。

食完晚飯，返到今晚下榻嘅酒店，呢間酒店睇落好新，鄰近機場，好清靜，可惜附近無商場無超市，同埋無街行。

踏入俄羅斯，領隊囑咐團友們入到客運大樓，第一就係排隊入境，事關處理旅客入境非常緩慢，結果等咗個多小時，其實人龍唔係好長，大約得十個人，效率果然係「慢甘柔」。導遊係一位金髮俄國女士，識講普通話，領隊介紹佢係一位大學教授，趁暑假出嚟帶團搵外快。

沿路入城，兩旁建築物大部份都是史太林式建築，何謂史太林式建築，貌似北京人民大會堂風格是也，路上行人面上冇乜笑容，整體氣氛比較cool。

嚟到莫斯科第一餐係食中菜，餐廳貌似花園別墅，見唔到招牌，花園好大，好雅致，內部佈置紅彤彤的，好有住家feel，食咗兩餐飛機餐，今餐八人一枱，有八餸一湯，白飯任裝，真係好感動。 

入到酒店第一個件事要做係安檢，不過，係hea做，其實hea做安檢都係件好事，如果剎有介事咁，你就驚喇。

住咗兩晚，好似唔多見有服務員，哈﹗冇機會畀貼士，慳番﹗

酒店地點方便，座落於莫斯科二環路，隣近基輔火車站，附近還有個很大的商場和超市。

返上房間settle down後，時間尚早，於是外出逛逛，商場10黠半關門，超市係24小時營業，哈﹗好似7仔咁，好方便，但十點後唔准售賣含酒精飲品；領隊話俄羅斯冇7仔，除咗超市外，花店都係24小時營業。商場同樣地都是連鎖店嘅天下，ZARA、Uniqlo、馬莎等….，哈﹗馬莎竟然有校服賣；步出商場，溜達一會，趁天未黑趕快回酒店，不過都已經11點了。

自助早餐好豐富，領隊話早餐有魚子醬，嘩﹗真係架，好期待，原來係三文魚子醬油漬，立即由天堂跌番落凡間。食物種類很多，有即煎雞蛋和奄列、即製pancake、熱食、冷盤、pickles、日式漬魚、三文魚子醬油漬，值得一提嘅係日式漬魚，鹹鹹地，質感介乎實肉和栴香鹹魚之間；此外，還有結實嘅麵包，不過沙律蔬果選擇較少。

食完早餐，步出酒店，一片藍天，今早行程係登上全莫斯科最高嘅山....列寧山，山高200公尺，一路上山，藍天逐漸被烏雲侵佔。

莫斯科大學，位於列寕山上，是俄羅斯最高學府，驟眼睇有尐似曾相識，除鐮刀斧頭外，仍保留前蘇共CCCP標誌。

來到衛國戰爭紀念館，烏雲已差不多佔據了整個藍天，還有點寒意。

衛國紀念館為了紀念世界反法西斯納粹德國戰爭勝利50周年而修建的，由光榮、紀念廳、近衛軍廳以及畫廊等組成。當然還有不能少的紀念品館。行出戰爭博物館外是勝利公園廣場，廣場中豎立勝利女神紀念碑。今日天氣麻麻地，天陰陰，位置又大背光，勝利女神紀念碑嘅浮雕完全睇唔到，可惜﹗

地鐡站深入地底90公尺，以香港樓底高度計算，足足有30層樓高，果然係深、深、深；乘長長的扶手電梯直達月台，望落去真係有尐腳軟。內部裝飾早已聞名於世，而每一個站都各有特色，是全世界最美麗的地鐵站，美侖美奐，尤以基輔站最具氣派，如宮殿一樣，故又有「地下宮殿」的美譽，革命廣場站有很多記念革命嘅雕塑和馬賽克。

是日午餐係吉爾吉斯坦串燒，餐廳位於吉爾吉斯坦大使館側；俄羅斯同香港一樣，都係室內禁煙的，可是一進門，就傳來陣陣煙味，原來不守規矩的也不只是其他國家了。

頭盤薯仔沙律，什菜湯加入香料和麵條，俄國人煲湯喜歡加入麵條，好飲完碗湯，已經飽了一半，主菜係串燒，我凈係食到孜然味道，而無香烤感覺；飯鹹鹹地、油油地，有尐似土耳其油飯。

下午節目係有觀賞有百多年歷史嘅莫斯科皇家馬戲團，馬戲係俄國國粹，睇馬戲係俄國人日常嘅娛樂，嚟到俄羅斯又點可以錯過呢﹗劇場內人山人海，扶老攜幼，到處充滿孩子的歡笑聲和陣陣爆谷香味，好有昔日荔園嘅feel，可惜場內不准拍照，未能記錄這刻歡樂情景。

領隊話劇目經常轉換，有時會有一兩隻動物演出，有時只得演員，至於有冇機會睇到動物表演，咁就要睇彩數喇。下午場次通常本地人居多，所以表演項目較精彩，遊客通常集中在晚上場次，表演項目相對遜色（欺負遊客唔識貨），今次能安排觀賞下午場，我們走運了。

多年前我睇過莫斯科皇家馬戲團來港演出，當然不及home country咁精彩，而且今次好幸運，除了馬術表演外，還有難得一見獅子老虎超盟趣緻的演出、黑熊、狗狗、馬騮和其他可愛小動物，而平日甚少在馬戲出現的箭豬，也出來湊湊熱鬧；由於今日係到步嘅第二日，仲未適應時差，睡魔不段急call，有少少環節錯過咗。

經濟成就展覽館，建於蘇聯時代，用以展示俄羅斯及其加盟共和國的發展成就，整個場地面積非常的大，場內有一座座前蘇聯加盟共和國展覽館，且各具特色，形式似世博，隨著蘇聯解體後，這些展覽館已失去其原有作用，現已改作其他用途，或作café shop和紀念品店等等。啱啱落咗埸雨，地下積咗一個個水氹，另外會場更建有多個不同特色的噴泉，而當中之十五金人民族少女噴泉，喻意十五民族團結，物換星移，現在只是一個可供拍照嘅景點。而其周邊增設些遊樂設施，現在成為當地居民假日休憩地方。