八時十五分從香港出發，機程要兩三粒鐘，上機前去T1個lounge醫飽個肚先，選擇唔多但係每次必食即淥魚旦米/河粉，唔錯咖。今次搭細機，要自己步行落機由於機內和機外溫差太大(差起碼十度呀), 即刻拿拿林攞返件羽絨著，以免一去到就冷病。

出發前身邊各人都話北京空氣唔好咖記得載囗罩呀，個天灰色咖。不過我出去機場抬頭一看第一個感覺：唔係喎！我見倒藍天白雲喎！應該係我彩數好，就帶住呢個彩數開始今次4天遊。

打的約40分鐘到酒店，今次揀咗喺王府井附近嘅Raffles Beijing夠晒方便，出酒店門囗2分鐘就有地鐵人囗，行8分鐘就到王府井步行街。酒店外型同大堂有D似香港嘅Peninsula Hotel, lobby滿佈鮮花藝又濃濃香氛味。安頓後都成3點喇，個肚大晒鼓，一於去搵食。凍冰冰最好食火鍋，第一站去咗東來順涮羊肉。餐廳佈局像宮延劇內嘅湘房，由於太餓喇所以快快趣點個套餐乜都有呀。銅製炭爐鍋夠晒正宗，火力均衡，湯底喺清水加D蝦米同香料如八角、花椒，羊肉半肥瘦普通啦，套餐內嘅食物份量足夠二人。
於王府井大街上遊逛，人流頗多而街上店舖也很有特色。 其中有一茶店吳裕泰，內裡主要賣茶葉但門外設有外賣部仲排咗人龍，噢！居然賣軟雪糕，一於試晒兩款味道: 抹茶&茉莉花，幾好味喎。 晚飯於大董烤鴨，由於去到都八點半後，所以walk in 都係等咗十分鐘左右就可被安排枱，大吃大喝一餐後就打道回府。