一入到去見到有好多枱都係香港人
放題限時90分鐘，有五款選擇，價錢由3675至5250yen一位，而我哋就食4200yen嗰款~

嘩...1st Round 上枱嘅有毛蟹、鱈場蟹腳、花咲蟹腳、碗蒸、蝦天把手、蝦把手、螃蟹把手、毛蝦天婦羅各2份

我覺得隻毛蟹最好味，有好多蟹膏，真係正到冇得頂呀!!!! 其次係鱈場蟹腳，佢仲長過粗過我隻手指，啖啖肉!!!!!

至於其他熟食就好普通(注意：要食清晒1st Round嘅食物先可以任你再order)，所以有機會再嚟食，會叫另一款平啲淨係食蟹嘅就夠喇，留返個肚嚟食蟹。

另外，每位必須叫一杯飲品，我哋點咗啤酒(450yen/杯)

櫻桂係向函館朝市橫丁市場入面，店內有個"推店"標誌，係由函館朝市連合會推薦出嚟嘅信心保證。

點咗2個三色丼：
-   海膽+帶子+三文魚(1700yen)
-   海膽+帶子+三文魚籽(1700yen)

非常新鮮嘅刺身鋪滿成個碗，但個碗比我哋想像中細，至於味道方面，當然係超正啦，海膽鮮甜三文魚籽唔腥，撈飯一流，帶子亦一樣大大粒好鮮甜，而三文魚就同平時香港食嗰啲有小小唔同，唔識形容，總之就正啦！不過唔知點解佢哋係用暖嘅飯嚟整嘅~

之前响網上睇到佢房間有獨立私人露天溫泉，住一晚連自助晚餐+早餐要30900yen一晚(約HKD2300) ，都真係幾貴，不過住完就覺得呢HKD2300係物有所值，甚至係好抵嘅呢~

我哋未行到去酒店，已經有人行埋嚟幫我哋拉行李，問我哋係咪住渚亭，行到去大門就有一位女仕出嚟接待我哋，而門口就企咗幾個人歡迎入住嘅遊客，入到大堂，個女仕就帶我哋坐低，俾咗個menu我哋選Welcome drink，唔使2分鐘杯野飲就嚟到，跟住個女仕就拎咗部notebook過嚟坐低，完來係幫我哋做check-in手續呀，我哋都未試過check-in係咁爽嘅。搞掂之後，另一位女仕幫我哋用車仔推行李，帶埋我哋上房，仲幫我哋開埋門呢.....真係好服務到呢~

呢間唔係睇旅遊書推介嘅，係經過撞入嚟試下，雖然冇乜特別驚喜，不過呢間係用有機野菜嚟做材料，味道唔錯架~

1933年創業嘅老字號豬肉飯店元祖豚井，正如旅遊書同網上嘅人所講，門口一定排晒長龍，唔怕搵唔到，就連當地日本人都排隊去幫襯，咁肯定係正野，唔係旅遊書吹水嗰種。
佢哋以炭火將上等厚切豬里脊肉烤成金黃色，再加入自家製醬汁，然後鋪滿响新潟名米上。

我哋由1:35pm等到2:14pm終於有得食，肉質鬆嫩，個醬汁好惹味，真係好好味呀!!!!!!!!! 好食到我覺得唔夠喉~

我仲留意到，碗飯一上枱，連日本人都會拎部電話/相機出嚟影相，最搞笑係，個個一放入口個反應都係好自然點晒頭，就連自己都不自覺地點頭，碗飯有幾好食，相信大家都想像到啦

札幌拉麵共和國位於札幌站隔離嘅購物大廈ESTA的10/F，這裡布置懷舊，聚集北海道拉麵四大系：札幌、旭川、函館及釧路的8間名店，每個月由顧客投票選出當月的拉麵王，並且成為拉麵共和國的元首~

第一日嚟試過札幌嘅代表店舖"白樺山莊"，今日就試函館嘅代表店舖"樂"