新宿區役所前膠囊旅館 Shinjuku Kuyakushomae Capsule Hotel

https://www.google.com.hk/?gfe_rd=cr&ei=xeLqVebzNKjC8AfO5JGgDQ&gws_rd=ssl#q=%E6%96%B0%E5%AE%BF%E5%8D%80%E5%BD%B9%E6%89%80%E5%89%8D%E8%86%A0%E5%9B%8A%E6%97%85%E9%A4%A8

膠囊酒店每人每晚百幾蚊，唔介意屈就或者想留彈藥購物既朋友可以考慮。

呢間膠囊酒店主要分幾部份，包括儲物櫃，大浴場，睡房及休息室。

隨身物品會放喺儲物櫃，行李箱就會喺櫃外，所以記住要保管好鎖匙同鎖好行李箱。因為行李箱係放在公共地方，而地方淺窄，所以拎野執野都較唔方便，呢樣係筆者覺得較麻煩既地方，唔似得酒店咁方便。

喺到沖涼會去個公眾既大浴室，沖涼無遮無掩，私隱度大大減低，介意既朋友要認真考慮。值得一讚既係，設施都好乾淨，而且配備齊全，洗頭水沐浴露風筒牙刷剃鬚刀都一應俱全。

訓既地方就係一個只能容納一個身位既細小膠囊，細到只有一個床位，因為咁狹窄所以亦唔係好通風比較焗，但外面有冷氣所以都唔會好熱。膠囊內有電視同充電位，記住帶兩腳轉三腳既插頭。床鋪偏硬，訓慣軟床既朋友要留意。

 

Check in左搞掂哂所有野都已經接近十二點, 好在新宿區好多深宵依然營業既餐廳, 今次就隨機揀左間24小時營業既磯丸水産餐廳, 真係幾夜食都唔怕. 
朋友點左個魚生飯, 筆者就想食熱野嗌左個蟹炒飯, 兩者都好好味, 魚生好新鮮, 白米香而爽脆~

第二日一早去新宿車站用大型儲物櫃放置行李箱，然後就喺新宿西口巴士總站搭高速巴士，花左兩個幾鐘車程去到富士山五合目。（登山有四條路線，呢條係最多人行而難度最低，網站及旅遊書均建議沒什麼行山經驗或未曾登富士山既朋友選擇。筆者亦鮮有行山經驗，平時係懶到運動都唔多做既人哈哈）一落車已經感受到陣陣涼意，即刻要著番件褸。（所以要到富士山甚至想登頂既朋友記住帶齊禦寒衣物！）之前睇過唔少文章，建議登山人士先喺五合目逗留一個鐘左右，以適應當地海拔高度。相信都唔難適應，但若果發現有任何不適症狀就應該考慮盡早落山。五合目有神社幾間餐廳同商店，手信紀念品工藝品甚至登山用品都應有盡有，睇下野食下野都可以消磨一段時間。仲有郵局可以寄明信片，值得一提係因為從呢到寄明信片係可以喺卡上印上五合目紀念郵戳，係獨有既，所以特別有意義。

 

而登山人士就要留意，如果有裝備唔齊就喺到買埋，除左飲料小食等可以喺山上買，雨衣太陽眼鏡登山杖等都要喺到買。登山杖係木製，有長有短，可以喺山上烙印紀念。筆者買左一枝短既登山杖($500)同氧氣樽($1250)，預防高山症，因為山上空氣稀薄，未知適唔適應到，不過山上都見到有得買，可以放心。（筆者同朋友各人買左一枝，最後只有朋友需要用到，所以個人建議可以先兩至三人買一枝，唔夠先喺山上買，但依筆者所見，唔多登山者有用氧氣樽）。

 

十二時許正式登山，初段登山路並不複雜，只有少許分忿口，看著地圖或跟隨大隊前行便可。登山徑初段為平路或只是微斜，簡單易行，沿途可以欣賞風景。中段以後開始出現崎嶇不平的石路，或需使用手(最好戴上手套)或登山杖協助攀爬。上山程度不算難，但還是敬請按照自己的體力及身體狀況，隔一段時間休息及補給(包括水份及能量棒等)。由於需要不斷往上爬，大小腿肌肉或會痠痛，請及時休息。衣著方面，應該隨著氣溫驟降而逐件逐件穿上，以多件及較薄為好，方便面對不停驟降既氣溫和隨便體溫升降而穿著或脫除，亦建議穿著防風防水既衫褲，以抵抗大風同落雨。其他建議戴上既裝備包括帽及太陽眼鏡以抵擋紫外光，另外登山鞋總比運動鞋好，筆者今次穿運動鞋登山，雖然都順利完成，但相信有登山鞋會比較好。

 

登山路既中段多數以Z形路為主，唔太難行，只係上斜同攀爬比較用得多體力。陸續會見到山屋，整段路總共有十幾間左右，不妨當係休息點，抖下睇下風景影下相，如有需要亦可以買野補給。如果預約左山屋就可以入去休息喇，但謹記因為山屋床位非常有限，如果預左要過夜就記住要事前預約！各個山屋企預約方法都唔同，有啲只可以打電話有啲就可以網上預約，各位可以視乎自己既目的地同各個山屋既介紹而作決定。由於我地本身想到山頂睇日山，所以提早喺網上預約左最近山頂既山屋御來光館。由十二點開始行山，行到上八合目既御來光館，已經係五點半左右。因為筆者同朋友算係行得較快，所以相信整段路程應該係六小時左右。

 

到達山屋之後會獲發床位，真係只得一個好狹窄既床位，身材高大既人可能會覺得好迫，但都冇辦法啦，唯有捱一晚。同埋因為山上水係好矜貴都係冇得沖涼刷牙洗面，都係果句，無辦法啦捱一晚。唔記得左提，喺富士山去廁所係每次收$200，作為處理污水既費用，同埋垃圾係要自己帶番落山，所以最好準備幾個膠袋裝垃圾。講番山屋先，搞好床舖後就會獲發晚餐同早餐，早餐係預你凌晨起身上山頂睇日出前食既。食完晚餐大概係七點，但已經要訓覺，準備凌晨起身行上山頂。

 

凌晨兩三點起身，已經聽到同見到好多其他登山者都起左身準備攻頂。出到山屋抬頭一望見到滿天繁星，淨係呢個景已經值回票價。同時望落去，見到點點星光郁動，其實係無數既登山者帶住頭燈上緊山頂。所以我地都迫不及待，趕住上山，可惜登山人數太多，途中經常出現擠塞。夜晚無咩光行山係比較困難，好在我地係住最高既山屋，所以呢段路程唔會好長，建議想登頂既朋友可以住較高既山屋，日頭行山比夜晚行好。行到四點幾，天已經開始光，視野比較清楚。去到五點幾已經接近日山，由於朋友話怕山頂多人，亦唔想一路行一路留意日出左未，所以我地搵左個地方停留，迎接日出既來臨。等等下突然聽到山頂有人大嗌，嚇死唔知咩事，望下前面，原來開始日出！見到雲邊有少少太陽邊露出黎，我地即刻拎手機開始不停咁影。可惜不時山頂有薄霧飄落黎，遮擋住視線，所以要影到靚既相好睇時機。但好好彩，最尾都影到滿意既相，不過筆者覺得肉眼先係最好既相機，身在富士山親眼望日出係好感動既事。

 

睇完日出上到山頂，上面可以買下紀念品同野飲補充體力。講真呢到冇咩野行，只係難得上到黎，值得留多一陣欣賞下風景。由呢到仲可以沿路去到富士山最頂既劍峰，應該需時半個鐘至一小時，不過筆者就冇行到，有興趣既朋友可以去搜尋一下富士山劍峰。

 

之後就開始落山，坦白講筆者覺得落山比上山難幾多，而且因為同另一條登山徑重疊左所以會有分忿路，要注意指示牌唔好行錯方向，另外落山冇咩風景睇，趣味大大減低。落山既路基本上就係十幾廿個Z形既路，一來比較悶，二來因為落山既路又斜又多碎石，所以好易冼倒，而對腳因為經常要出力固定喺地面既位置，大小腿肌肉會開始痠痛，並可能係因為之前行山累積既疲勞。幾經辛苦終於落到山，可以行到平路，負擔減少得多，最後大概用左三個多小時落山，到達五目合。去到即刻搵餐廳醫肚，之後去行商店買手信，結束今次既登山之旅。